哥林多前書 14章26節 到 14章40節   背景資料  上一筆  下一筆
Chit段經文講tio̍h tī教會內ê聚會中應該有ê態度。基本上,使徒保羅講究ê是秩序ê重要性。Tī教會聚會中,有秩序是進入敬拜ê第一步,如果連秩序lóng無,he是無法度hō͘人專心、敬虔ê注意聽上帝ê話ê信息。Á chit種秩序,一定tio̍h約束某一kóa特別ài展ê人,因為聚會是beh敬拜上帝, m̄是teh顯示個人ê能力。Koh講,chit段經文mā討論到關係婦女teh聚會中應該注意ê事。

第26節,聚會中有人唱詩歌、有人教導、有人講靈語mā有人翻譯等等,chiah-ê若是對聚會有幫助,就會利益參加聚會ê人。

第27到30節,chit段經文中,使徒保羅真清楚講出敬拜上帝,就應該以上帝為主,m̄是用某一個人為重。參加聚會ê眾人ài beh特別注意傳講信息ê人所講ê內容。

第31到33節,teh敬拜上帝ê場合,任何人lóng thang分享家己ê性命見證。無人ē-tàng阻止別人見證。因為上帝喜愛ê,就是和諧,而無愛教會信仰團契有紛爭ê事出現。

第34到35節,真有可能是tī哥林多教會中間,有kóa婦女mā學tio̍h講靈語,結果因為以「靈語」為優先,無人敢阻止講靈語ê婦女,結果kui個聚會lóng僵tī hia無法度結束,á是本來有準備ài分享信息ê人,mā無法度進行,干涉攪擾禮拜ê秩序。另外一點,mā有可能是當時哥林多婦女ê社會地位真低,當時ê觀念是:婦女tī公眾場合講話是「不體面ê事」,指ê就是當時社會ê普遍觀念。所以tī教會聚會中如果有婦女公開宣講á是表示意見,真容易造成一般人對基督教信仰ê誤解。Tùi第十一章5節thang看出使徒保羅並無反對婦女公開宣講福音,伊要求ê是beh講福音ê婦女,也tio̍h按照當時ê風俗,將頭巾罩tio̍h。不過mā因為使徒保羅Tī chit兩節ê講法,chiap-chiap受tio̍h現代婦女ê批判,認為使徒保羅iáu是無因為耶穌ê福音,跳脫傳統風俗ê思維。

第36節,使徒保羅tī chia指責哥林多教會信徒有人kā該教會當做是標準、中心,有種目中無人ê傲慢態度。表示該教會信徒bē彼此尊重,mā bē尊重其他地區ê教會,這是真無好ê行為。

第37到40節,使徒保羅勸勉哥林多教會信徒,無論家己是偏向講靈語,á是重視傳講上帝ê信息,lóng tio̍h彼此互相容忍kah接受,mā只有án-ne,chiah ē-tàng免除彼此之間相爭,避免無應該有ê紛爭。

重新查詢 專卷研經 哥林多前書系列
錯誤回報,請聯繫comm[@]fhl.net