哥林多前書 14章1節 到 14章25節   背景資料  上一筆  下一筆
哥林多教會信徒可能有bē少人對講靈語有執迷ê傾向,產生一種特有ê怪現象,就是大家kah-ná teh比賽,看甚麼人比較有聖神ê恩賜,ē-tàng講出比別人koh khah chē ê靈語,á是講靈語用ê時間比較長。使徒保羅認為如果信仰是用來比較ê,he是對基督教信仰ê 錯誤認bat。如果信仰是用來誇耀家己ê靈性ê,he確實是誤解了基督教信仰ê本質。

Tùi kui本聖經thang看tio̍h基督教信仰siōng中心ê信息,就是學習知影家己是一個罪人,需要上帝ê憐憫kah救恩。Á這救恩就是tī耶穌ê身上表明出來。因此基督教信仰是幫助一個人知影悔改信耶穌。Kā chit點掠tiâu,就會明白為甚麼使徒保羅會用chiah-ni̍h chē篇幅說明有聖神恩賜ê人應該有ê態度。

Tī頭前使徒保羅已經真清楚說明,無論有甚麼才華,lóng是tùi上帝來聖神ê賞賜,koh講,所有ê人lóng是基督ê肢體,大家lóng是連結tī基督ê身軀上。無任何一個肢體會講家己是比別ê肢體koh khah重要,因為若有一個肢體痛苦,即使是siōng弱小ê肢體,mā會hō͘ kui個肢體同苦。所以彼此互相幫助chiah是屬tī基督肢體ê信徒應該有ê認bat。chit-má chit段經文中,使徒保羅進一步說明哥林多教會ê信徒中,有人強調講靈語(方言)ê重要性,使徒保羅認為無任何一個chiah ē-tàng是比別ê chiah ē-tàng重要。因為即使會講各種方言,若是無愛,就無甚麼意義thang講。所以tī chit段經文中,伊特別勸勉hiah-ê會講靈語ê人,ài會曉tī甚麼時chūn講?講ê內容應該kah見證上帝tī耶穌裡ê救恩有關chiah重要。

第1到4節,chia一開始使徒保羅就講「Lín tio̍h追求疼」chit句話,已經清楚講出第十四章ê基本內涵。使徒保羅beh指出哥林多教會真正ê問題,是大家彼此teh互相比較、競爭。欠缺包容kah互相鼓勵、分享ê疼。Á siōng大ê問題,莫過就án-ne tī信仰ê事頂面比長短。續落來,使徒保羅先區分了講靈語kah講起帝信息二者之間ê差別;講靈語是對上帝講ê,講起帝信息是對眾人講ê。前者是造就家己,後者是造就眾人,mā等於teh幫助全教會。

第5到6節,tī chit兩節中,使徒保羅表明家己對chit種因為會講靈語而造成教會紛爭ê事ê看法,伊認為ē-tàng幫助教會ê,是上帝ê信息,並m̄是講靈語。伊講如果一個人會講靈語,卻無帶hō͘信徒幫助,án-ne講靈語就對別人無特別ê益處。

第7到12節,tī chit段經文中,使徒保羅引用樂器做譬喻來說明教會信仰團契。伊講如果只有一種聲音,卻無分別高低,就聽bē出奏出ê是甚麼作曲。伊講靈語ê人mā是án-ne,若是無人聽bat所講ê靈語,ná親像teh聽外國人講話仝款,完全聽m̄-bat,就無法度得tio̍h幫助。所以追求上帝聖神ê恩賜,就應該是追求ē-tàng造就koh khah chē人ê「恩賜」chiah正確。可見使徒保羅所看ê,並m̄是某一個人ê能力,卻是teh看整體教會ê利益。

第13到17節,使徒保羅tī chia強調tī信仰團契中,就是beh幫助別人á是講彼此互相幫助,chit種信仰chiah會有意義,mā會帶hō͘教會利益。所以做一個會講靈語ê人,teh聚會中只有講家己聽bat ê靈語,別人lóng聽m̄-bat,就算chit-ê人家己真滿足kah上帝之間藉tio̍h靈語交通,對別人來講mā bē有任何益處。

第18到19節,使徒保羅hō͘哥林多教會ê信徒知影,伊真有講靈語ê恩賜,m̄-koh伊寧可講五句幫助別人明白,mā m̄-thang講千萬句別人聽m̄-bat ê靈語。

第20到21節,伊勸勉哥林多教會信徒,ài tī思想上成熟像大人,m̄-koh tī「pháiⁿ事頂面tio̍h親像嬰á」,這表示有純潔ê心,ná親像嬰孩仝款,無pháiⁿ ê念頭,自然就bē有害人ê行為出現。伊引用以賽亞書第廿八章11節以下ê經文,表示上帝藉tio̍h先知講話hō͘以色列人民聽,m̄-koh in m̄聽。上帝只好藉tio̍h外國人來傳講伊ê信息hō͘以色列人民聽,m̄-koh in iáu是無想beh悔改,因為聽m̄-bat。使徒保羅用chit種隱喻ê方式,teh說明:講靈語ê人,ná親像講人家聽m̄-bat ,án-ne,koh怎樣ē-tàng見證福音ê信息?意思是teh指對傳福音並無任何幫助。

第22到25節,tī chia,使徒保羅kā哥林多教會信徒講,teh聚會ê時chūn,就tio̍h考慮in中間是m̄是有初信ê,á是iáu未信ê人?若是有,就m̄-thang講別人聽m̄-bat ê靈語,因為對in teh追求信仰ê事頂面無幫助。

重新查詢 專卷研經 哥林多前書系列
錯誤回報,請聯繫comm[@]fhl.net