哥林多前書 10章1節 到 10章13節   背景資料  上一筆  下一筆
使徒保羅tī chit-ê本hō͘哥林多教會ê書信中,用了真chē篇幅teh討論有關基督徒ê「自由」問題。伊會chiah-ni̍h用心討論「自由」ê信仰意義,是因為tī哥林多教會內,有kóa信徒亂使用了「自由」,認為只要信了耶穌成做基督徒了後,就ē-tàng隨心所beh。In所持ê理由就是使徒保羅所講ê「基督已經tháu放咱」chit-ê觀念(參考加拉太書五:1)。M̄-koh當使徒保羅teh講基督徒ê「自由」ê時,是非常強調「自由」一定tio̍h有koh khah頂真ê自律相配合,m̄是放縱。Koh講,「自由」一定tio̍h考慮tio̍h kah身邊做伙人ê軟弱,m̄是用來展寶家己ê信心堅定。哥林多教會ê問題tùi chit本書信一開始就提起分黨結派,致使教會內部有紛爭,甚至iáu有ê信徒因為放縱情慾,發生kah繼母同居ê事,使徒保羅譴責án-ne嚴重ê淫亂,是連「tī異教徒中mā無法度容忍ê」行為(參考哥林多前書五:1)。

嚴格律己ê生活態度,ē-sái講是使徒保羅寫hō͘所有教會書信中ê主要內容之一,tùi伊所寫ê書信lóng會提起有關基督徒tī社會生活上應該有ê頂真態度,就thang看出伊tī chit方面ê用心。伊期待每一個信耶穌基督ê人lóng會知影怎樣透過生活,hō͘人聞到基督ê香味,mā tùi基督徒ê生活中看tio̍h因為信仰帶來「新造ê人」(參考哥林多後書五:17,加拉太書六:15,以弗所書四:23—24)ê新形像。

Chit-má使徒保羅koh tī第十章討論到有關「自由」kah生活ê關連,伊kā重點鎖定tī第31節:「Lín無論做甚麼,á是食á是lim,lóng tio̍h為榮耀上帝而做。」這是一個非常重要ê信仰認知。

使徒保羅以以色列人民tī曠野ê經驗舉例,tī曠野中in因為試探上帝而遇tio̍h懲罰。如果食祭拜偶像ê食物,成做一種試探,就ài beh特別小心。所謂「試探ê食物」,指ê是哥林多教會有kóa信徒siuⁿ過「自信」了,認為家己真有信心,無論食、lim等lóng bē有問題。M̄-koh chit種態度ná親像早期以色列人民tī曠野ê經驗仝款,in mā食過嗎哪,lim過tùi石磐頂出來ê泉水,m̄-koh,in即使經歷過chit種性命旅途,iáu是跋倒了,in chhōe出tī認正當ê理由離棄上帝去拜偶像,結果惹起上帝極大ê憤怒。

第1到5節,chit段經文是講tio̍h猶太人祖先以色列民族tī出埃及進入曠野了後漂流期間所發生ê事,包括tī上帝奇妙ê安排下,平安過紅海;食過tùi天頂落來ê嗎哪,而且tùi石磐中上帝出泉水止in口渴。比較值得注意ê是,使徒保羅tī chia講「石磐就是基督」,將chit句話對照約翰福音第四章13到14節,耶穌對hit位撒馬利亞cha-bó͘人講,伊即使lim了祖先雅各所流落來ê井ê泉水iáu是會渴,m̄-koh lim伊所hō͘ ê水,chiah是永遠不渴ê泉水,因為伊是永恆ê性命之泉。使徒保羅tī chia表示:基督,就是拯救者。Chit位拯救者,就是上帝,祂一直teh陪伴以色列人民行過hit段siōng艱辛ê旅程。一個tī耶穌裡ê人mā會仝款得tio̍h chit種恩典。可惜ê,是以色列人民因為對上帝懷疑,結果上帝hō͘ in tī曠野漂流ê時,只要年滿二十歲ê,後來lóng無資格進入迦南應允之地。M̄-koh若是親像以色列人民án-ne心硬,結果mā會是仝款無法度進入上帝國度享受永恆ê性命。

第6到10節,chit段經文使徒保羅引用了幾個所在經文背景,包括出埃及記第三十二章6節,in tī曠野鑄造金牛後,拜之,既lim koh跳。然後koh引用民數記第廿五章,in因為受tio̍h摩押cha-bó͘人ê誘惑,犯了淫亂罪,為tio̍h án-ne件事引起瘟疫,有二萬四千人死亡(m̄是chia記載ê二萬三千人)。然後koh引用民數記第廿一章4到9節,in因為埋怨上帝無hō͘ in食物kah水,結果上帝發怒,hō͘毒蛇咬死真chē人。第10節真可能是kah民數記第十六章記載可拉、大坍,kah亞比蘭等人不服上帝奴僕摩西ê領導而遭滅絕ê事件有關。Tī第9節ê「試探基督」,mā thang用「試探主」,á是「試探上帝」來表示。基督ê意思就是拯救者。

第11到13節,使徒保羅Tī chit段經文中kā哥林多教會ê信徒講,m̄免擔心,in所面臨ê試探,lóng m̄是甚麼值得驚惶ê,chiah-ê lóng是一般人ē-tàng承受ê。因為「信實ê上帝」bē hō͘ in遇tio̍h承受不了ê試探,慈悲ê上帝絕對bē會án-ne對待信靠祂ê子民。M̄-nā án-ne,顛倒,慈悲ê上帝會賜hō͘ in力量,hō͘ in tī遇tio̍h困境ê時,賞賜hō͘ in力量,行出一條性命ê大道。


重新查詢 專卷研經 哥林多前書系列
錯誤回報,請聯繫comm[@]fhl.net