哥林多前書 1章4節 到 1章17節   背景資料  上一筆  下一筆
Chit段經文mā呈現使徒保羅寫書信ê特色,就是先o-ló收phoe ê對象,ná親像伊寫ê羅馬書(參考一:8—12);以弗所書(參考一:15—18);腓立比書(參考一:3—8);歌羅西書(參考一:3—5);帖撒羅尼迦前書(參考一:2—10);帖撒羅尼迦後書(參考一:3—4)等等。M̄-koh teh寫hō͘加拉太教會ê書信則例外,tī該卷經冊一開始,使徒保羅就真嚴厲ê譴責該教會接受「另外一種福音」。M̄-koh一般來講,伊ê書信lóng會先o-ló受信ê對象。

第4到5節,使徒保羅為哥林多教會獻上感謝,因為伊知影上帝藉tio̍h耶穌賞賜hō͘該教會ê各項恩典是豐富ê,特別是tī「知識kah口才」上koh khah是án-ne。Chia ê「知識」,指ê是對真理ê領悟力,而「口才」是teh指傳講真理ê能力(參考哥林多前書十二:10),m̄-koh mā thang指講靈語ê能力(參考哥林多前書十四:2)。

第6到7節,使徒保羅肯定哥林多教會ê信徒tī認bat耶穌koh一pái顯現ê恩賜上,是有具備夠額ê知識,chit點伊並無擔心。

第8節,chit節提起關係「基督降臨ê日子」,kah第7節「主耶穌基督顯現ê時chūn」ê意思是仝款ê。早期ê教會認為chit工mā是上帝審判世界ê日子,是末世ê觀念。Koh講,tī he日子來臨ê時,主耶穌將成做審判者,所有信靠伊ê人,lóng thang坦然無驚惶地面對審判。

第9節,上帝是「信實ê」,表示上帝呼召來成做耶穌信徒ê子民,lóng將親密結連做伙,bē分離。這mā講出使徒保羅一貫ê思想:kah耶穌同死,mā kah耶穌同koh活ê意思。上帝既然差遣耶穌到世界起來呼召人歸屬tī伊,祂一定會信守chit-ê應允(參考約翰福音三:16)。

第一章10節到第四章21節:
Chit段經文是使徒保羅teh處理哥林多教會結黨分派ê問題。伊認為chit種教會,並m̄是用耶穌做中心ê信仰團契,卻是將以耶穌為信仰團契ê身軀hō͘分割了,這是非常無好ê現象。

第一章10到17節:
Tùi chit段經文thang明顯看出早期教會已經出現分裂ê問題。提供這訊息hō͘使徒保羅ê是tī「革來」家聚會ê人。這革來是甚麼人,已經無資料thang查詢,m̄-koh真明顯,信仰團契有分黨結派ê現象出現,就可能帶來教會分裂ê危機。

第10到11節,使徒保羅tī chia講「奉咱ê主耶穌基督ê名勸lín」,chit句話已經表示伊續落來beh講是真嚴肅ê事,一種帶有chiù-chōa ê語句。伊ài大家講話一致,「bē-tàng分裂,tio̍h團結」,這表示教會內部已經有「分裂」ê現象出現。

第12到13節,chia使徒保羅指出哥林多教會分裂做kúi-nā派別,包括有「保羅ê人」、「亞波羅ê人」、「彼得ê」、「基督ê」等四個派系。伊直接指出,chit種分派就是kā基督「分割」。伊ài大家想清楚:是甚麼人為大家死tī十字架上?大家受洗是奉甚麼人ê名?

第14到17節,伊Tī chit段經文中提起伊受呼召,並m̄是為tio̍h替人行洗禮,卻是為tio̍h beh傳福音,而且m̄是beh用「智慧ê語論」。Chit句「智慧ê言論」是teh指口才好,講論hō͘人聽感動ê意思。其實,tùi chit段經文thang看出當時哥林多教會中,因為分別tùi使徒保羅、彼得,kah亞波羅等人受洗,自認背景真有權威,所以就tī教會中形成一個小團體,就án-ne有人真不滿,乾脆kā家己歸類tī「基督」ê派別中分別苗頭。Tio̍h注意ê是,使徒保羅án-ne講,並m̄是講伊看輕行洗禮ê重要性,卻是beh除去會hō͘某人行洗禮當做信仰權威。使徒保羅認為受甚麼人行洗禮lóng m̄重要,重要ê是基督chiah是教會chit-ê信仰團契ê中心。伊強調真正重要ê,m̄是tī洗禮ê事頂面,卻是傳福音ê工作。福音ê本身就是耶穌基督(參考馬可福音一:1)。受洗ê主要目的,是hō͘人歸信耶穌,認耶穌為救主,án-ne chiah是重要ê。

重新查詢 專卷研經 哥林多前書系列
錯誤回報,請聯繫comm[@]fhl.net