歷代志上 29章1節 到 29章9節   背景資料  上一筆  下一筆
Chit章主要是有兩個段落,第一是tùi第1到9節,大衛王為tio̍h beh建造聖殿,除了tī第廿八章對全體以色列領袖表明chit項工程ê重要性,mā hō͘ in知影繼承伊王位ê所羅門,tī建造工程上需要大家ê扶持、協助。chit-má伊是向全體以色列人民宣告chit項工程,而且強調這m̄是為人建造ê聖殿,卻是為上帝。因為án-ne,除了伊奉獻財物以外,伊mā希望全體以色列人民共同參與chit項工程建造ê需要。第二段落是tùi第10到25節,tī chit段落裡,大衛王帶領全體以色列人民向上帝獻上感恩。以色列人民也kah跟tòe伊奉獻財物做建造聖殿ê需要。最後一個段落是第26到30節,這五節mā是歷代志上ê結語,說明大衛王統治結束,伊ê kiáⁿ所羅門繼承伊ê王位。

Tī chit段經文內底,大衛對全體以色列人民宣告beh建造聖殿ê原因,並鼓勵大家參與建造聖殿ê奉獻行列,以表示大家lóng參與有份。Mā tùi chia thang看出建造聖殿ê花費確實是非常重,負擔真大。

第1節,chit節大衛王真清楚表明,伊ê kiáⁿ所羅門iáu少年,經驗不足,而beh建造聖殿ê chit項工程是非常艱鉅,因為這是為上帝而建。這真清楚teh表明,若是單由所羅門來執行chit項工程ê建造,是無夠ê,確實是需要大家ê協助。可見大衛王對所羅門ê疼護,kah伊此生siōng大ê心願,就是希望伊ê kiáⁿ所羅門ē-tàng順利完成伊建造聖殿ê心願。

第2到5節,大衛王tī chia表示建造聖殿所需要ê建材,伊已經準備ê差不多了,m̄-koh伊知影除了伊所準備ê一切外,恐驚iáu不夠額,而伊無法度親目看見聖殿ê建造情形。因為án-ne,伊hō͘以色列人民知影伊準備ê,希望全體人民mā加入參與奉獻ê行列,這mā講出兩件重要ê事:一是thang預防建造聖殿所需要ê開銷不足。二是hō͘全體人民lóng有機會參與,這比伊個人奉獻一切koh-khah有意義。伊先表明家己捐獻出來ê,包括「一百gōa公噸siōng好ê金子,kah大約兩百四十公噸純銀」,這確實是一個龐大ê數目,mā顯示出大衛王ê財富非常雄厚。

第6到9節,當大衛王án-ne宣佈,以色列各界代表因為大衛王早已經召集in宣告chit件事,因為án-ne,當chiah-ê代表tńg去轉告hō͘所有人民ê時chūn,大家lóng會清楚知影這確實是出tī大衛王ê意思。因為án-ne,紛紛燒熱烈參與奉獻建造聖殿,結果民眾koh奉獻了「一百七十gōa公噸ê金子,三百四十gōa公噸ê銀á,大約六百二十公噸ê銅,kah三千四百公噸ê鐵」等,chiah-ê lóng teh表明以色列人民確實在大衛王治理之下,m̄-nā國家財富雄厚,人民mā非常富有。Á chiah-ê捐獻出來ê金銀銅鐵,lóng khǹg tī「聖殿寶庫」,這是臨時ê,因為聖殿iáu未建造完成,而且由葛順族ê利未人耶歇管理。M̄-koh khah重要ê,就是「人民樂意獻hō͘上主;大家lóng歡喜有hiah-ni̍h chē物件奉獻出來」,chit點chiah是siōng重要ê事,表示奉獻m̄是出tī勉強,卻是出tī感恩ê心。

重新查詢 專卷研經 歷代志上系列
錯誤回報,請聯繫comm[@]fhl.net