歷代志上 21章1節 到 21章15節   背景資料  上一筆  下一筆
第廿一到廿二章是記載大衛準備建造聖殿ê事。歷代志作者kā編撰ê重點提起約櫃移進了耶路撒冷城,大衛一心一意就是想beh建造聖殿安置約櫃。因為án-ne,聖殿ê建造成做歷代志作者撰寫ê主要目標。

第廿一章thang參考撒母耳記下第廿四章1到25節ê記事。上帝beh照顧以色列人民,撒旦則是beh hō͘以色列人民棄sak上帝ê話。Á人民是聽從君王ê領導,因為án-ne,hō͘大衛帶頭犯罪,這就是撒旦ê主要目的。Siōng特別ê所在,是chia記載撒旦攻擊大衛ê時chūn,並無親像約伯記仝款,先走chhōe上帝ê同意。換句話講,tī約伯記,撒旦mā是屬tī上帝ê奴僕á是管轄者之一。M̄-koh tī chia,撒旦則獨立行動者,無受創造者上帝ê掌控。它已經hō͘大衛完全m̄聽伊ê部下約押ê提醒kah苦勸。

Chit段經文講述大衛王tī軍事行動上達tio̍h siōng顛峰ê時chūn,伊執意ài beh進行戶口普查。雖然大將軍約押一再勸大衛一定tio̍h保留chit-ê決策。M̄-koh大衛王顯然聽bē落去約押ê阻擋。執意ài beh進行人口調查。

第1到2節,歷代志作者認為大衛會想ài beh進行全國戶口普查ê原因,是hō͘撒旦附身之故,這表示大衛對上帝ê信心不夠額,á是漸漸淡bē記得上帝賞賜hō͘伊ê恩典。

第3到6節,chit段經文講大衛命令約押去執行chit項調查人口數目的決策。雖然約押有提醒大衛m̄-thang án-ne做,上帝會無歡喜。M̄-koh大衛執意beh án-ne做。結果調查出來,北部以色列中thang相戰ê壯丁有一百一十萬名,而南部有四十七萬。Chit兩個數目lóng kah撒母耳記下第廿四章9節所記載ê數字無仝;tī撒母耳記ê以色列是八十萬,而tī猶大是五十萬。M̄-koh調查中間,排除了利未支族ê人,因為chit族ê人tio̍h負責各區祭祀ê工作。Á便雅憫支族無進行調查,是因為chit支族已經非常弱小,人數真少。M̄-koh歷代志作者認為真正原因是約押「無贊成王ê命令」,換句話講,約押有意思beh抗命,因為伊勸大衛m̄-thang án-ne做,m̄-koh大衛聽bē落去。
第5節所講ê「ē-tàng相戰ê壯丁」,對象是teh指年滿二十歲以上ê男子(參考民數記一:3、20)。

第7到10節,因為chit件事m̄是上帝所歡喜,而大衛卻執意beh去作。M̄-koh當chit件戶口普查ê事進行結束後,大衛忽然感覺「心中不安」。為甚麼會不安?chia並無解釋。真可能是大衛有看tio̍h國內發生真chē災難。因為án-ne,大衛承認家己犯錯,祈求上帝ê赦免。Chit時chūn,上帝差遣先知迦得去見大衛,上帝決定beh懲罰伊,m̄-koh hō͘伊做選擇看ài toh一種懲罰。
第11到12節,上帝beh用三種中間ê一種作懲罰,m̄-koh tī chit三種中間hō͘大衛王選擇一種。Chit三種是:.三年ê飢荒;.三個月逃避敵軍;三是三工ê瘟疫大量死亡。

第13節,大衛表示伊m̄知該怎樣選擇chiah好。因為伊清楚知影「逃避敵軍」等於是phah敗仗,因為án-ne伊講無願意hō͘人處罰。伊寧可接受上帝ê懲罰。因為伊知影上帝有豐盛ê慈愛(參考詩篇一○三:8—10)。

第14到15節,結果上帝用瘟疫懲罰以色列人民,chit pái有七萬人死亡。另外原本ài beh進行毀滅耶路撒冷,上帝臨時叫天使停落來,chiah kā耶路撒冷有保存落來。

重新查詢 專卷研經 歷代志上系列
錯誤回報,請聯繫comm[@]fhl.net