歷代志上 19章1節 到 19章19節   背景資料  上一筆  下一筆
Tùi第十九章1節到第二十章3節,chit段經文同時記錄tī撒母耳記下第十到十二章。主要是teh講述大衛tī戰爭上ê功績,m̄-nā phah敗亞捫人,mā hō͘敘利亞臣服tī伊ê統治下。不過chit段經文中卻kā撒母耳記所描述大衛犯罪ê記事hō͘有省略。其實,歷代志ê作者省略ê m̄-nā是chit片段而已,iáu有一kóa大衛王朝宮廷內真chē不名譽ê事件,包括撒母耳記下第十三章有關暗嫩kah她瑪ê事件,以及押沙龍叛變ê事件等等。歷代志ê作者之所以刪除chiah-ê無好ê事件,主要是因為伊編撰此經冊ê主題是teh凸顯大衛確實是上帝忠實ê奴僕。

Koh講,chit段kah亞捫人戰爭ê記錄,thang分做三個階段;一是大衛差派使者去安慰拿轄ê kiáⁿ哈嫩,結果使者卻被侮辱,因為án-ne出兵攻打亞捫(第1到15節)。然後亞捫人結合敘利亞ê軍隊聯合起來kah大衛ê軍隊對抗,koh失敗了(第16到19 節)。第三個階段是隔一年後,大衛ê軍事將領約押率兵直攻亞捫人ê首都拉巴城,而且奪取真chē貴重ê戰利品(第二十章1到3節)。

第1到5節,chit段經文ē-sái講是亞捫人對大衛ê猜忌,認為大衛派兵四界去出征lóng phah贏,顯然tī國王拿轄往生後,大衛派chiah-ê特使來對繼任為王ê哈嫩表示關懷ê動作,kah間諜無甚麼差別,亞捫ê chiah-ê幕僚認為chiah-ê特使根本就是來探亞捫ê虛實,準備ài進攻。亞捫ê新任國王哈嫩聽從幕僚ê話,侮辱了大衛ê chiah-ê特使,kā in ê鬍子剃掉,而且koh kā in ê衫褲割破,hō͘ in ê尻川斗露出來,然後chiah kā in驅逐出去,chit種方式對tī大衛ê特使是極大ê侮辱。

Chiah-ê特使被侮辱後,感覺非常見笑,m̄敢tńg來耶路撒冷,大衛就安排in khiā起tī耶利哥,thèng候in ê鬍鬚發出來了後chiah tńg來耶路撒冷城。

第6到7節,亞捫人真清楚,chit種方式侮辱別國派來ê特使,必定會受tio̍h嚴厲ê報復。因為án-ne,in開了大筆ê錢(三萬四千公斤銀á)去雇用外籍兵團來協助國防ê工作。

第8到13節,大衛手下大將約押知影怎樣帶兵,伊挑選以色列siōng精銳ê部隊去攻擊敘利亞,然後kā另外一部分ê軍隊交hō͘伊ê小弟亞比篩帶領攻打亞捫。伊兄弟兩人有真好ê默契,beh彼此相呼應支援。

第14到15節,簡單ê兩節,講出亞捫人ê軍隊逃逸,另外就是亞捫人用錢雇來相戰ê敘利亞軍隊mā被phah到落荒而逃。

第16到19節,chit段經文是關係大衛親自帶兵去攻打敘利亞,chit pái m̄-nā痛擊敘利亞,並且kā敘利亞軍隊ê元帥朔法mā刣死,chit pái哈大底謝m̄敢koh再拗蠻強烈抵抗以色列,伊來kah大衛和談,表示願意歸順以色列ê管轄,無koh支援亞捫。

重新查詢 專卷研經 歷代志上系列
錯誤回報,請聯繫comm[@]fhl.net