歷代志上 14章8節 到 14章17節   背景資料  上一筆  下一筆
Chit段經文是記載大衛王phah贏非利士人ê侵犯了後,hō͘伊tī kui個巴勒斯坦地區名聲遠播,無其他ê國家、部落、民族膽敢進一步侵犯。Chit段經文mā thang參考撒母耳記下第五章17到25節。

第9到10節,非利士人聽tio̍h大衛已經登基做全以色列人民ê王,就想beh趁機會挑釁,主要是認為伊tú上任,政權必定bē穩,若ē-tàng趁機會phah敗以色列,就ē-tàng繼續控制kui個迦南平原。非利士人ê作法就是先進行搶劫,擾亂民心。Á大衛王聽tio̍h chit件事了後,teh決定是m̄是出兵前伊會先求問上帝ê旨意,chit點kah掃羅王是大大無仝。大衛確定上帝會幫助伊了後,chiah決定出兵攻打來侵犯ê非利士人。

第11到12節,因為有上帝允准ê戰爭,就必定會獲勝,這mā是以色列人民共同ê認知。大衛出兵chìn前先徵求上帝ê旨意,上帝表示thang。因為án-ne,伊出兵,結果phah敗非利士人。Chit pái非利士人iáu帶in ê神明來攻打以色列人民,in認為有神明ê庇佑,必定ē-tàng phah贏。結果是慘敗,in tī逃亡中連in ê神明mā棄sakà。

第13到17節,非利士人就是m̄相信會輸hō͘大衛,因為án-ne,in koh一pái聚集軍隊去攻打利乏音谷,tī hia「大肆搶奪」。大衛iáu是仝款,伊無因為頂pái phah敗非利士人,就驕傲á是自認有能力,伊iáu是先求問上帝ê旨意。結果上帝hō͘大衛一個新ê指示。上帝ài大衛m̄-thang正面去攻打非利士人,祂ài大衛將軍隊帶到非利士人ê後面,靠近桑樹hit-pêng攻打。上帝iáu hō͘大衛一個下令攻打ê記號,就是只要「一聽tio̍h樹梢有腳步ê聲音,馬上進攻」。上帝表示he是祂已經tī大衛王軍隊ê頭前phah頭陣à。大衛聽從上帝ê旨意做tāi-chì,結果大敗非利士人,hō͘ in無所遁形,而tùi án-ne大衛ê名聲遠播,大家lóng驚大衛。因為非利士人是非常強猛而且善戰ê族群,每pái進攻以色列,lóng被大衛phah敗,致使其他族群因為án-ne m̄敢妄動。

重新查詢 專卷研經 歷代志上系列
錯誤回報,請聯繫comm[@]fhl.net