創世記第三十八到四十三章
1.第三十八章：
chit章是「耶和華文獻」ê資料，mā是真完整ê一篇故事，主要除了teh說明猶大ê兩個kiáⁿ兒法勒斯kah謝拉ê由來，mā koh一pái提起一個性命ê觀念：上帝是性命ê主宰者。甚麼人刻意阻擋性命ê延續，lóng會引起上帝ê憤怒。猶大ê次子俄南ê行為tú好說明chit-ê重要ê信息。Koh講，猶大ê事件，mā teh說明每一個人對性命ê延續lóng負有責任，逃避，kan-taⁿ會帶來koh khah大ê性命負擔。

另外一方面，創世記第十九章記載羅得kah伊ê cha-bó͘-kiáⁿ發生亂倫ê事件，tī chia是看tio̍h猶大kah家己ê新婦發生亂倫行為，這lóng teh說明一個事實：無一個民族ê血緣是「純潔」ê，因為án-ne，用「民族淨化」作藉口，進行種族歧視á是殺戮是真荒謬ê舉動。Chit點tī當今世界koh khah值得政治人物、軍事強人省思，ná親像耶穌所講ê：「凡實行上帝旨意ê人就是我ê兄弟、姊妹、kah母親。」（馬可福音三：35）chit句話chiah是上帝所期待看tio̍h ê人類社會。

Chit件猶大kah新婦她瑪亂倫事件ê背景，kah申命記第廿五章5到10節摩西律法ê規定有真重要ê關係，而且為摩西chit條「利未拉特婚姻條例」作了真好ê詮釋。

2.第三十八章1到11節：
第1到2節，「猶大離開伊ê眾兄弟」，chit句話mā說明chit份資料是比較晚期ê作品。因為猶大就是雅各kiáⁿ孫ê領導者。Á chit句「遇tio̍h迦南人書亞ê cha-bó͘-kiáⁿ，就kah伊結婚」是一記暗筆，除了說明猶大kah迦南人之間關係親密外，伊mā做以前伊祖父母以撒kah利百加看做討厭ê事，就是kah迦南女子通婚（參考廿六：34—35、廿七：46、廿八：1、8）。因為bē記得祖先ê叮嚀，chiah會有後來亂倫ê事件發生。

第3到5節，這三節是一份簡短ê族譜，說明猶大三個kiáⁿ兒ê名字包括有「珥」、「俄南」，kah「示拉」，m̄-koh最後只有示拉存活teh。

第6到11節，猶大為珥娶bó͘名叫「她瑪」，chit-ê名字有「豎立」、「棕樹」ê意思。Chia並無說明「珥」到底做甚麼事得罪上帝，致使「上主就取了伊ê性命」，依照聖經作者歡喜表達ê方式，就是棄sak上帝，去拜偶像，chit種人是上帝所厭棄ê對象。

第8節回應了申命記第廿五章5到10節ê摩西律法之「利未拉特婚姻條例」ê規定。猶大ài俄南娶阿嫂她瑪做bó͘，並且強調這是「義務」，為tio̍h是beh替「兄哥傳後」。

第9節，thang看出俄南並無想beh遵守律法ê規定，原因是無想beh hō͘兄哥珥有後代，án-ne，伊就ē-tàng繼承兄哥ê產業。這是貪婪。貪婪等於「拜偶像」（參考以弗所冊五：5，歌羅西書三：5）。上帝看俄南chit種意念kah行為是邪惡ê，因為án-ne mā取了伊ê性命（第10節）。

第11節，猶大生三個kiáⁿ兒，前兩個lóng死去，原因lóng kah上帝ê懲罰有關係。Chhun落來這siōng小ê「示拉」，chia並無說明伊ê年紀，只有猶大向她瑪表示， ài她先tńg來後頭厝去，因為示拉iáu小，等伊長大「成人」後就會叫她瑪tńg來。M̄-koh作者tī chia特別註明，事實上是因為猶大驚示拉也kah兩個兄哥「仝款死去」。她瑪聽ta-ke ê話tńg來後頭厝。