撒母耳記下 14章25節 到 14章33節   
23.第十四章25到33節:
Chit段經文講述大衛tī真勉強之下,chiah koh恢復了押沙龍tī王宮ê地位。M̄-koh這mā是經過約押ê極力擔保chiah有ê結果。M̄-koh chit段經文mā清楚講出押沙龍實在是無適合當以色列ê領袖。即使伊刣死了家己ê兄長暗嫩,並無表示伊就會成做理所當然ê繼承者。Chia描述伊就是一個驕傲、無理ê人。M̄知影感恩,kan-taⁿ會想tio̍h家己,卻m̄知影怎樣善待為伊講話ê人──約押將軍。這kah大衛ê特質完全顛倒。

第25到27節,作者tī chia講押沙龍生做真「iân-tâu」,甚至講押沙龍是帥到「無一點缺點」。M̄-koh這只是外表ê美,並m̄是心內ê美。作者用chit種方式teh諷刺押沙龍外,mā同時teh暗示,上帝所喜愛ê君王是「遵從」祂旨意ê人(參考撒母耳記上十五:22—23),上帝並無看人ê外表,特別是teh揀選上帝子民ê領導者,koh-khah是án-ne(參考撒母耳記上十六:7)。作者講押沙龍每年剪一pái頭毛,而剪落來ê頭毛重達兩公斤,作者用chit種筆法teh形容押沙龍tī以色列人民眼中,確實是一個真有「能力」ê人。因為舊約聖經時代,中東地帶ê人歡喜用長頭毛、鬍鬚等來表示「尊嚴」、有「能力」。另外,長頭毛mā含象徵性ê意義,就是性能力真強。作者mā tī chia記載押沙龍ê cha-bó͘-kiáⁿ她瑪生做「非常美麗」。

第28到30節,雖然押沙龍已經被約押tùi基述帶tńg來耶路撒冷城內,m̄-koh大衛就是無願意接見伊。因為án-ne,伊派人去請約押向大衛講情,m̄-koh約押lóng是無beh hō͘押沙龍有面子,拒絕接受押沙龍ê請求去向大衛參詳拜託。約押之所以無願意聽從押沙龍ê請託,真可能是kah王宮內部ê鬥爭有密切關係。伊希望保有一個自由空間,來方便以後容易行事。M̄-koh押沙龍卻是一個真殘忍ê人,伊無法度忍受約押無接納伊ê請求去向大衛參詳拜託,就án-ne派人去kā約押ê「田園」hō͘放火燒掉。Chit種作法kan-taⁿ會爲伊khiā立koh-khah chē ê仇敵,對伊想beh得tio̍h王位ê路,白白增加真chē無聊ê阻礙,對伊一心一意想beh得tio̍h王位ê tāi-chì並無幫助。這mā是為甚麼後來約押聽講押沙龍因為頭毛太長,掛吊tī樹á頂ê時,特別the̍h槍矛去kā伊刣死ê原因(參考十八:14)。

第31到32節,約押知影chit-ê tāi-chì了後,非常憤怒,因為án-ne直接去押沙龍ê厝問伊為何放火燒毀伊ê「田園」。Á押沙龍回答約押ê話有兩點真重要:一是伊並無感謝約押設法hō͘伊tńg來到耶路撒冷城khiā起。因為伊雖然tńg來khiā起了兩年,m̄-koh連想beh進王宮去見家己ê老父大衛一面lóng無法如心所願。二是伊講「如果我有罪,就hō͘王處死我好勢」,chit句話已經清楚表示出伊猶原無認為刣死暗嫩是一件錯事,心中lóng無悔意。換句話講,伊m̄-nā無感謝約押,反tńg iáu對約押kā伊帶tńg來耶路撒冷城來chit件事感覺失望、無歡喜。

第33節,約押既然m̄是主動去替押沙龍參詳拜託,因為án-ne,伊只有ê就是依照押沙龍ài伊傳達ê話,去kah大衛講,由大衛決定。Á大衛因為án-ne接見了押沙龍,並且用「chim嘴」押沙龍表示赦免押沙龍,kah伊和好。

重新查詢 專卷研經 撒母耳記下系列
錯誤回報,請聯繫comm[@]fhl.net