西番雅书 1:1-1:18

注释:

Tī十二位先知中，有六位先知lóng有绍介in ê家谱á是有身世背景，有先知何西阿、阿摩司、弥迦、西番雅、哈该，以及撒迦利亚等，因为án-ne就容易明白ná时代ê社会景况，并且因为án-ne ē-tàng清楚知影先知言论ê主要目的。Ná亲像先知西番雅，tī册ê开始就讲伊是「约西亚做犹大王ê时代」得tio̍h上帝启示。Á犹大王约西亚是tī主前640年到609年治理国家。列王记第廿二章1节讲伊八岁ê时chūn就继承in父亲亚们被谋刣了后留落来ê王位。M̄-koh有一件事非常重要ê，he就是虽然伊只有八岁就继任为犹大ê国王，ē-sái讲是后来却被列王记作者认为伊是一位带领国家「做上主认为对ê事」ê国王（参考列王记下廿二：1），chit点真无简单。当列王记ê作者评论一个国王「做上主认为对ê事」，意思就是teh指chit-ê国王带领人民敬拜上帝，用上帝ê旨意为中心，废除国内ê偶像、神坛等chiah-ê违背上帝命令ê行为（参考列王记下十五：4、34、十八：3）。相对ê，如果评论一个国王是「做上主看做邪恶ê事」，he就是chit-ê国王欢喜盖庙，家己带头拜偶像，mā放纵人民去拜偶像（参考列王记下十五：24、28、十六：2、十七：2、廿一：2、20、廿三：32、37、廿四：9）。

约西亚是一个被列王记派ê作者认为是一个「做上主认为对ê事」ê国王，chit点就真难得。旧约历史学者约翰・布赖特（John Bright），tī伊所写ê「以色列史」（A History of Israel）chit本册里，真清楚评论约西亚是透过宗教改革来进行国家整顿和合一ê工作。布赖特认为约西亚是kā亚述ê宗教看做是一种国耻ê记号，当以色列人民teh拜亚述人所崇拜ê神明ê时，he是对全能ê耶和华上帝一种极大ê侮辱。所以为tio̍h beh hō͘国家成做tī信仰上纯洁，就一定tio̍h先铲除耶和华以外ê宗教信仰，而且铲除iáu包括kah亚述宗教信仰延伸出来ê生活风俗在内。Beh改变宗教信仰态度kah风俗，这并m̄是一件容易ê事，m̄-koh约西亚做到à。先知耶利米mā hō͘约西亚王一个真高ê评价，讲伊：「你热心tī 柏香柴ê 工作，kám 就会做王？你ê 老父kám m̄ 是mā 食，mā lim，mā 行公平kah 公义？Hit 时，伊有得tio̍h 福气。伊办理困苦kah sàn-chhiah 人ê 案件，伊就得tio̍h 福气。Án-ne kám m̄ 是bat 我？这是我—上主讲ê。(全民版)」（耶利米书廿二：15—16）

Tùi先知耶利米ê chit段话，ē-tàng看出约西亚王确实是一个真忠实tī上帝ê君王，tī伊治理犹大国期间，带领以色列人遵照申命记ê律法规定之礼仪守Pôaⁿ过节（参考申命记十六：1—8），列王记ê作者讲：「Tùi 士师治理以色列ê时，到以色列王kah 犹大列王ê 时，实在iáu 未有守亲像chit 款ê Pôaⁿ 过节。只有约西亚王十八年，tī 耶路撒冷守chit-ê Pôaⁿ 过节服事上主。(全民版)」（列王记下廿三：22—23）可见约西亚王tī以色列历史上，hō͘人看做是一位非常重要ê改革者。 

Beh做一个改革者，无论tī甚么领域lóng是真困难ê，尤其是做一个国王beh改革已经腐败至极ê社会风气，特别是tī宗教信仰上ê堕落，ná koh khah是困难重重，这m̄-nā是古代án-ne，即使tī今á日mā是án-ne。

第1节，这是一份绍介有关先知西番雅ê简单族谱。Chit份族谱看起来像似简单，m̄-koh却连续写四代，这mā是在先知文献中非常少见ê。尤其值得注意ê是最后一句「希西家王ê玄孙」。如果chit句话正确，án-ne，先知西番雅就是拥有王族ê血统。

Koh讲，tùi chit节thang看tio̍h真清楚ê历史背景，就是先知西番雅ê时代，是tī约西亚当犹大王ê时chūn；约西亚是tī主前640到609年当犹大王。Tī伊ê时代siōng值得注意ê一件事，就是清洁耶路撒冷圣殿。表面上看起来，约西亚王是teh进行宗教改革运动，其实，伊是teh进行社会改造ê工作，而就tī chit时chūn，先知西番雅出现来传达上帝ê信息。Tùi chia thang看tio̍h先知m̄-nā出现tī一个动乱不安ê世代，mā出现tī一个改造运动ê时刻，mā出现tī一个安定ê环境中。换句话讲，每一个时代lóng会有上帝ê话，每一个地方lóng有上帝信息，只要用心注意听，就会听得tio̍h。

第2到3节，真类似创世记记第六章5节所讲ê：「上主看tio̍h 人tī 地上，罪恶真大，心内所想ê 念头ta̍k 日lóng 是pháiⁿ ê。(全民版)」其实，类似chit种警告一再出现，亲像以赛亚书第廿四章1节，耶利米书第四章24到26节，何西阿书第四章3节等等。先知ê文献会出现chit种警告话语，lóng是kah当代社会ê堕落，以及弃sak上帝ê教导到非常严重之程度，chiah会引起上帝án-ne忿怒。

第4到6节，开始就真清楚讲出有关宗教信仰上ê问题，he就是上帝siōng讨厌ê行为—拜偶像。先知西番雅tī chia提起上帝beh惩罚chiah-ê拜偶像神明ê对象有四种，一是拜巴力ê人，尤其是hiah-ê迷惑人去拜巴力ê祭司；二是拜日月星辰ê人；三是hiah-ê一方面kah上帝有立约，soah koh去拜「米勒公」神明ê人；四是hiah-ê弃sak上帝ê带领ê人，chit种人ē-sái讲是心内无上帝ê人。

第7节，开始谈起重要ê词字，就是「上帝ê日子」，这mā是先知运动中非常重要ê观念，是teh表明上帝「审判ê日子快到à」。所以chia讲「tī至高ê上主面前肃静」。意思是teh指当法官beh宣告审判ê结果ê时，所有ê人lóng一定tio̍h起立（肃立）听宣判。所以tī上帝面前肃静，就是beh注意听上帝宣告审判ê结果。

续落来chit句话真奇特，讲上帝「准备牺牲」家己ê子民hō͘「仇敌掠夺」。这ná亲像先知耶利米所讲ê，上帝重新拣选巴比伦帝国皇帝尼布甲尼撒当他ê奴仆（参考耶利米书廿五：9），原因是上帝不断来差派他ê奴仆去传达信息hō͘以色列人听，m̄-koh in「lóng是m̄听，mā免chhap」（参考耶利米书廿五：3—4）。

第8到9节，chia看tio̍h先知文献siōng明显ê用词「上主讲」，众先知用chit句话来表示伊所传讲ê信息，并m̄是家己ê意思，却是上帝beh伊讲ê。

Koh讲，chia mā提起上帝beh「惩罚」ê第一个对象是「官长、王子，kah一切效法外族风俗ê人」。第二种对象是hiah-ê「以强暴、欺诈剥削弱者ê人」。在先知西番雅时代，就是tī社会中做流氓、乌道份子，若无就是hiah-ê利用权势欺压弱势者。In进入别人ê厝内搜刮人民ê财产，然后堆积tī主人ê仓库中，chit种人tī审判ê日子来到ê时，上帝绝对bē阔手、赦免in。

第10到11节，lóng提起有关耶路撒冷城ê问题。Chia讲有一个叫「鱼门」ê城门，chia因为比一般势khah低，所以siōng容易受tio̍h敌人ê攻击。所以tī chia听tio̍h真chē「痛哭」kah「哀号」ê声音，表示敌人已经攻入chit-ê城门。包括tòa tī「下城地区ê人」mā是。虽然有派驻重兵，m̄-koh á是仝款被攻陷。

第12到13节，先知西番雅警告hiah-ê做邪恶ê tāi-chì ê强暴者，伊讲上帝ê惩罚会非常彻底，ná亲像巡察ê人手「the̍h灯」挨家挨户去「搜chhōe」仝款，无论怎样bih起来，lóng无法度逃避上帝ê惩罚。Mā因为上帝ê惩罚是明察秋毫，只要是诈欺所得tio̍h ê，lóng teh-beh赔偿出来。Chia讲chit种人tòa不进家己建造ê厝，mā lim bē-tio̍h家己所kek ê美酒。这ná亲像先知阿摩司所讲ê仝款（参考阿摩司书五：11）。上帝beh hō͘ chiah-ê人ê奸巧计画落空，lóng无所得。

第14到16节，先知西番雅提起「上主ê大日子快到à」，然后，续落来讲上帝ê chit-ê「大日子」绝对m̄是好日子，却是灾难连连不断、续接teh来日子。先知西番雅用「悲惨」chit-ê词来形容上帝审判日子ê时，这「悲惨」是包括「伤心哀哭」；上帝ê「忿怒」；人民「苦难灾祸」、「摧残破坏」、「乌暗幽冥」、「愁云满布」，mā同时是战争ê军号响亮日子。Chiah-ê形容thang参考阿摩司书第五章18到20节。

第17节，提起上帝ê惩罚来临时，人会像「chheⁿ-mê人仝款摸索」，m̄知逃难ê路径怎样行，chit种警告mā出现tī申命记第廿八章28到29节中。即使tī大日时头，mā lóng看bē-tio̍h阳光，而紧接tī黑暗了后ê，就是大量ê死亡，这ē-sái讲是非常严重ê惩罚，ná亲像上帝teh带领以色列人出埃及chìn前，hō͘ in「乌暗」之灾难ê惩罚仝款（参考出埃及记十：21—22），tī黑暗ê后面，就是死亡临到（参考出埃及记第十一章）。

第18节，特别强调tī「上主受气ê日子」，这真清楚就是上帝惩罚ê时间到à。Á hit时chūn，金银财宝是无作用ê。因为上帝决定beh毁灭ê情况，就ná同在挪亚时代仝款，人心ê邪恶已经hō͘上帝伤心到极点，hō͘他决定beh「彻底消灭」世上所有ê一切。

西番雅书 2:1-2:15

注释:

Tī第一章已经有绍介过先知西番雅ê时代，就是tī约西亚做犹大王治理国政ê时期，伊任内siōng重要ê事迹，就是洁净耶路撒冷圣殿，并且带领以色列人民重新tńg来到敬虔ê信仰生活。约西亚王做一件以色列历史上siōng重要ê大事，就是伊在位ê第十八年重新带领以色列人民tī耶路撒冷照约册所规定ê方式举行Pôaⁿ过节ê活动（参考列王记下廿三：21—23）。

Tùi第一章thang看见先知西番雅bat真严厉ê警告过，上帝忿怒ê大日子会真紧来临。伊清楚指出hit日子会是一个「悲惨」ê一工（参考一：14），mā是「苦难灾祸」ê时chūn，koh khah是「摧残破坏」ê时刻（参考一：15）。因为上帝受气à，而且上帝会kā忿怒ê火来「快速烧毁全世界，伊beh彻底消灭世上ê人」（参考一：18）。

Tī第二章，先知西番雅koh khah进一步讲出chiah-ê kā受tio̍h上帝严厉惩罚ê对象，并一一讲出in ê名，这就是先知ê职责。先知bē讲出hiah-ê隐晦不明ê信息，因为伊传达信息ê目的就是beh hō͘听tio̍h ê人lóng清楚明白，thang hō͘上帝ê拯救信息真紧进入人心，hō͘受害ê人得tio̍h鼓舞，同时mā tio̍h hiah-ê违背上帝旨意ê人有悔改ê机会，这ná亲像约拿书所记载ê情节仝款。

第1节，「m̄知耻」，chit-ê词原本ê意思是teh指心中无上帝ê人。「觉醒pah」，这是一句劝勉ê话，先知西番雅ài听tio̍h伊信息ê人，赶紧醒悟过来，m̄-thang koh再像过去hit种，去求问虚无ê假神，以及追chhōe对人性命得救lóng无路用ê物件。

第2节，先知西番雅呼吁大家悔改tio̍h赶紧，m̄-thang踌躇，mā就是趁家己iáu活teh thang表白chìn前。所以伊用「像一朵花凋谢以前」，这是teh指tī iáu活teh ê时chūn，就beh赶紧悔改。却m̄是等到人无法度自主ê时，想tio̍h悔改就已经来不及à。

第3节，先知西番雅提出一个重要ê信息，就是「谦虚地听从」上帝命令ê人，tio̍h会记得「走chhōe上主」、「追求正义」，只有chit种人chiah会知影tī上帝面前tio̍h「谦卑」，chit种人tī审判日子来临ê时，就「ē-tàng逃脱惩罚」。

所讲ê「谦卑」，指ê是知影遵守上帝ê诫命、旨意、教导ê人。Chit种「谦卑」kah一般人所讲ê「品格」并无相仝。一个人tī品格上真可能表现出谦卑ê心境，m̄-koh却无一定是真实地遵守上帝ê教导kah信息。

先知西番雅tī chia讲「走chhōe上主」，kah先知阿摩司一再呼吁ê仝款（参考阿摩司书五：4、6），lóng是一再强调只有án-ne chiah有生路。

第4到6节，chit段经文是teh回应第一章18节所讲ê，上帝ê怒火kā延烧到全世界，就ná同在第一章3节所提起ê，上帝「beh tùi地上歼灭人类」仝款。先知西番雅ê信息m̄是只针对以色列人民，却是对所有当时围tī以色列国四周ê国家、族群。

Chia提起非利士人族群所khiā起ê城市，包括有迦萨、亚实基伦、亚实突、以革伦等四个城市。另外iáu有一个名叫迦特ê城市先知西番雅无提起，有可能是在先知西番雅ê时代，迦特城已经衰微、不重要à。非利士人是用色列人民进入迦南地了后，siōng hō͘ in感觉头壳痛ê族群，in时常来侵犯以色列人民ê社区，甚至也bat抢去以色列人民siōng看重ê约柜（参考撒母耳记上四：10—11）。先知西番雅讲非利士人所khiā起ê chit四个城市lóng会因为上帝严厉ê惩罚而成为废墟，ná亲像第6节所讲ê，会变成「空旷ê野地，只有牧者ê草棚kah羊kho͘-á」。

第7节，先知西番雅提起「劫后余生ê犹大人」，chit句话一再出现tī先知ê文献中（参考以赛亚书十：20、廿四：14、廿八：5、三十七：31—32，耶利米书三十一：2，弥迦书五：7、七：18，哈巴谷书二：8）。「劫后余生ê犹大人民」指ê就是tī上帝惩罚了后，iáu活teh ê犹大人。Tī圣经ê作者眼中，in是上帝特别存留ê，为tio̍h是beh更新in ê心灵，hō͘ in知影只有听从上帝ê旨意，chiah ē-tàng存活落去。而且上帝kā以色列人民过去被占领ê城市、土地lóng清除清气，chiah带领chiah-ê劫后余生ê以色列子民tńg去故乡定居。

第8到9节，chit两节特别提起摩押kah亚扪人ê问题。Chit两个族群khiā起tī约旦河东岸。摩押kah亚扪chit两个民族其实mā是用色列人民ê远亲，in是亚伯拉罕ê侄á罗得kah家己ê两个cha-bó͘-kiáⁿ乱伦之下所生ê kiáⁿ孙（参考创世记十九：37—38）。先知西番雅讲摩押人kah亚扪人「嘲（sau）笑」、「辱骂」上帝ê子民，并且iáu加上恐吓。先知西番雅讲，上帝bē许可chit种事发生，会对chit两个民族采取严厉惩罚当做回应，而惩罚ê方式「像所多玛kah蛾摩拉仝款」，指in会遭遇tio̍h毁灭。

第10到11节，chit两节讲摩押kah亚扪人被惩罚ê另外一个原因，是因为in「骄傲自大」，这thang tùi先知以赛亚ê作品（参考以赛亚书十六：6），以及耶利米书第四十八章看会出来。

第12节，特别提起古实人ê问题。古实设tī埃及ê南部，真可能kah衣索匹亚人有关，就是teh指现今ê苏丹chit-ê国家。先知西番雅tī chit节只简单地讲上帝beh刣死古实人，并无明确讲出原因，m̄-koh必定是kah in bat侵犯以色列人民有关系。

第13到15节，chit三节koh一pái提起上帝beh毁灭亚述帝国。先知西番雅ê时代mā是亚述帝国siōng兴旺ê时代。亚述帝国tī主前721年消灭ê北国以色列，并且俘虏了以色列人民，然后kā in贩卖到奴隶市场，差不多是beh kā以色列人灭族（参考列王记下十七：5—6、24）。这是非常残忍ê作法，mā绝对bē hō͘上帝所许可。

「尼尼微」，这是亚述ê首都，原本是siōng繁荣ê城市，taⁿ会因为上帝ê严厉惩罚而变成荒凉ê所在，而且iáu会成做野兽、飞鸟群居做巢做窝ê所在。原因是第15节所讲ê，它「夸耀家己ê能力」，koh khah严重ê是家己认为有「世界上siōng伟大ê城」，是全世界siōng伟大ê国家。

Chit种情形ná亲像先知以赛亚teh谴责巴比伦帝国ê沦亡仝款，因为伊kā家己放teh kah上帝同等位阶（参考以赛亚书十四：14），这是非常无应该ê事。就án-ne上帝一出手，主前612年上帝兴起巴比伦kā亚述帝国消灭。被拣选ê子民，无论是甚么人，lóng tio̍h会晓谦卑。因为有谦卑ê心chiah bē自认为是神明，而bē记得家己ê强大是来自上帝赏赐ê力量。

西番雅书 3:1-3:20

注释:

Tùi先知西番雅ê信息thang看tio̍h一个真严肃ê景象：上帝ê审判来临à，而且是已经火烧目眉à。Tī第一章伊一再提起「上主ê大日子快到à」、「上主受气ê日子」会像「怒火迅速」地来到，会彻底地消灭全世界。然后tī第二章指出上帝beh惩罚ê对象包括非利士人、摩押人、亚扪，以及亚述人。Á chiah-ê被指明beh毁灭ê对象lóng有一个特色，就是in根本就无kā上帝放tī眼内，原因是in lóng认为家己真有能力，甚至自认ē-tàng抵挡上帝，ná亲像亚述帝国皇帝认为家己ê首都尼尼微城是世界上siōng伟大ê城市仝款（参考二：15）。Koh讲，in ê骄傲mā表现在嘲（sau）笑上帝ê选民（参考二：8），这就ná同在看bē起上帝仝款。

m̄-koh上帝惩罚chiah-ê邦族，并无表示以色列人民就无问题，先知西番雅ê信息mā指出耶路撒冷上帝ê子民违背上帝ê旨意，上帝mā会照样惩罚。上帝真清楚表示：他beh除灭所有骄傲ê人，hō͘万国万民知影谦卑tńg来到上帝面前。

Koh讲，这第三章ná亲像真chē先知文献作品共同ê特色，就是上帝ê怜悯带hō͘他ê子民希望，就是带领他们tùi流亡ê所在重回家园。

第1节，chia讲「耶路撒冷」是teh指犹大人民，in teh代表以色列民族，是上帝ê选民。先知西番雅tī第二章就已经指出上帝beh惩罚非利士人、摩押人、亚扪人，kah亚述人后，现在伊koh进一步讲，上帝beh惩罚ê对象mā包括他亲自拣选ê子民以色列人民。Tùi chia thang看tio̍h上帝ê惩罚是公义ê，他bē因为是家己拣选ê子民犯罪，态度就比较khah阔容。而且chia清楚指出in拒绝上帝ê话之具体证据，就是「腐败、叛逆、欺压家己ê人民」。Chia所提起ê「腐败」，是teh指贪污，而「叛逆」，是teh指无遵从上帝ê话去关心弱小困苦ê人，而且iáu「欺压家己ê人民」，chit句话已经teh说明有权势ê人，用残酷ê手段对待hiah-ê贫困无助ê弱者。

第2节，chit节一连串提出四点以色列人民激怒上帝ê原因，包括有：一是「无听从上主」。二是「不接受伊ê管教」，这kah拜偶像ê行为是仝款ê。三是「不óa靠上帝」。Chia ê「óa靠」意思是teh指「信赖」。意思就是讲以色列人民并m̄相信上帝，á是讲in bē记得上帝有拯救ê能力。四是「boài向伊祈求帮助」，表示in心中已经无上帝à。

第3节，提起以色列人民ê领袖，包括大官员等所犯ê罪行。先知西番雅讲chiah-ê大官员像「吼叫ê狮」，而法官竟然是像「iau饿ê豺狼」，这lóng teh表示众官员对待人民kah-ná看tio̍h猎物仝款，意思是chiah-ê官员是贪婪到ná亲像iau饿ê狮、豺狼只要有钱，不管案件ê真相，就ē-tàng歪曲真相无顾公义。而且是「连一条骨头lóng m̄肯留到早起」，意思是teh指连骨髓、骨头碎片lóng吞落去。另外一个意思就是in贪污ê手路非常细腻，就算想beh chhōe-tio̍h in ê罪状mā「chhōe bē-tio̍h痕迹」。

第4节，前一节谈起政府官员领袖，chit节指出宗教领袖ê堕落，而且比任何官员ê贪污koh khah恐怖、惊人。

「先知」，这应该是忠实tī上帝ê信息chiah-tio̍h（参考列王记上廿二：14），m̄-koh现在先知却是「无负责任，koh诡诈」，表示先知并无忠实传达上帝ê信息，却是kan-taⁿ会讲讨人欢喜ê话，án-ne chiah是siōng危险ê事。

「祭司」ê责任是带领人认bat上帝ê救恩，mā tio̍h帮助人透过祭典礼仪，敬拜上帝。所以in只有ē-tàng用纯洁ê心帮助人来认bat上帝。Ē-sái讲是现在祭司并无án-ne尽责，先知西番雅tī chia所谴责ê祭司，就kah先知以西结所讲ê完全仝款（参考以西结书廿二：26）。

第5节，先知西番雅讲无论世代ê景况jōa-ni̍h-á恶质，即使在先知kah祭司，以及社会上有影响力ê人án怎堕落，上帝á是仝款会秉公行义，他一定会严厉惩罚chiah-ê óa靠权势为非做pháiⁿ ê人，绝对bē放过in。因为上帝是「公义」ê，他一再用各种方式来启示他ê怜悯kah公义ê审判。M̄-koh有kóa人á是仝款，并免chhap上帝ê审判，「继续做pháiⁿ，m̄知见笑」。

第6到7节，chit两节真清楚提起当一个国家看tio̍h另外一个国家遭遇tio̍h毁灭ê灾难ê时，应该会反省家己是m̄是mā有仝款ê问题，免得家己mā仝款遭遇tio̍h上帝ê毁灭，án-ne chiah是正确mā是应该有ê态度。这mā是先知西番雅tī第二章一开始就用ê句话「觉醒pah」、「走chhōe上主pah」，用意就是tī chia。M̄-koh先知西番雅讲上帝真失望，因为他非常期待他ê子民悔改，却无得tio̍h回应。In ê态度就是轻视上帝ê恩典。

第8节，chit节讲上帝惩罚chìn前lóng会有「控诉」ê举动。这ná亲像一个法庭beh开庭chìn前，会先由检察官提起控告，续落来chiah是审判。上帝mā tio̍h聚集所有国家á是族群同齐看hiah-ê hō͘上帝起诉指控ê国家ê罪状，看tio̍h上帝kā in ê罪状非常详细确凿ê列出来ê时，会晓警醒并赶紧悔改。

第9节，tùi chit节开始直到第20节，lóng是teh谈到耶路撒冷ê以色列人民已经悔改归向上帝。所以上帝beh带hō͘ in极大ê喜讯，m̄-nā hō͘ in脱离仇敌ê掌控，并且iáu thang kā四散tī各地ê同胞重新聚集tńg来。

Chia讲听tio̍h上帝beh控诉ê时，真chē人因为án-ne知影tio̍h赶紧悔改，知影tio̍h「求告」上帝ê名，上帝一定会赦免、拯救chit种人，hō͘ in保存性命并且有后代thang延续性命（参考创世记四：26）。

第10节，「四散ê子民」这是teh指四散世界各地ê以色列人民，mā thang讲是teh指世界上所有ê人。第12节讲连khiā起到「遥远ê古实」之地ê居民mā ē-tàng tńg来，大家koh一pái聚集做伙，而且是「一心一意事奉」上帝，beh向上帝「献祭」。

第11到12节，chia出现相对ê词句—「骄傲自大ê人」kah「谦虚卑微ê人」。上帝beh除灭前者，m̄-koh却会留落来后者并庇护in。

第13节，「残存ê」á是「劫后余生」，chiah-ê lóng是teh指上帝怜悯ê对象，特别是hiah-ê hō͘上帝刻意留落来当做复兴之种籽仝款ê以色列人民，会tī tńg去家园了后，重建家园、歌颂上帝ê伟大。先知西番雅特别说明chiah-ê人会án-ne hō͘上帝所留存落来，是因为in「不koh做pháiⁿ事，不讲白贼，mā不欺诈」，koh khah重要ê是in知影「求告」上帝ê名。Mā所以in tī上帝ê庇护之下，bē koh再有惊惶、不安，因为有上帝同在ê人，就m̄免koh再「惊惶任何人」。

第14到15节一直到第20节是一首欢乐诗歌。先知西番雅tio̍h用色列人民「欢呼唱歌」，而且ài耶路撒冷「满心快乐」，这lóng teh表明上帝赦免、赦免了以色列民族所犯ê罪。Koh讲，上帝赦免ê方式，就是「解除」对以色列人民ê惩罚，相对ê方式，就是「歼灭」in「所有ê仇敌」，以后，in thang m̄免koh再「惊惶灾害」，因为有上帝kah in同在。

第16节，无错，有上帝同在，就不需要「惊惶」，mā无惊惶ê条件。因为有上帝同在，所以以色列人民ê手会勇猛有力。

第17到19节，chit节讲tio̍h一个有上帝同在ê人，必定会有「欢悦」、「喜乐唱歌」。相对ê，无上帝同在ê人，就会有惊惶、不安。Chia用「过节ê时hit种欢乐」，来形容以色列人民tùi受掠而「流亡」到各地去ê人ē-tàng得tio̍h释放ê时，hit种性命ê欢喜快乐之态。

Koh讲，当上帝伸手救助óa靠他、听从他旨意ê人ê时，另外一方面表明上帝mā同时tī惩罚hiah-ê悖逆上帝旨意ê人，in自认为真有能力，thang想beh án怎to̍h án怎，不听从上帝ê话。

第20节，这是上帝hō͘他子民ê siōng大恩典，就是m̄-nā kā in tùi各地带tńg来故乡，iáu-beh加添in ê性命力，hō͘全世界认bat in并且「koh一pái兴旺」起来。