提多书 1:1-1:16

注释:

Tī chit章，伊真清楚提醒提多管理kah组织教会应注意ê事项。Tī chit方面，使徒保罗认为siōng重要ê一件事，就是设立长老。主要目的是希望该教会ē-tàng自立起来，因为长老就是teh负责管理kah帮助福音事工者。

Koh讲，tī chit章经文中，mā thang看tio̍h克里特岛教会发生ê问题，kah加拉太教会仝款，就是有人进入该教会传讲「另外一种福音」（参考加拉太书一：6、9）强调割礼真重要。伊讲传chit种信息ê人根本就是「叛道」，是「用荒唐无稽ê话欺骗别人」。因为如果认为割礼siōng重要，he等于讲耶稣基督ê十字架已经会失去光辉kah拯救恩典ê意义à。Á因为提多是希腊人，使徒保罗带伊在身边，mā无替伊行割礼。Chit对克里特岛教会信徒来讲，特别有意义。

第1节，使徒保罗就自称是「上帝ê奴仆」，chit种用法真少见，因为tī别所在伊lóng是用「基督ê奴仆」（参考罗马书一：1，腓立比书一：1），chia却是用「上帝ê奴仆」。Á「奴仆」，chit-ê词原本指ê是「奴隶」ê意思，mā就是讲完全属tī主人所有ê财产，个人无甚么自由thang讲。另外一点，使徒保罗采用希腊文「奴仆」（doulos）一词，意思是teh指：家己是心甘情愿地接受上帝差遣，mā完全遵照上帝ê话语传达信息。

第2节，使徒保罗tī chia强调「真理」是kah「永恒ê性命」分bē开ê。Koh讲，使徒保罗tī chia特别提起上帝乃是「不讲白贼ê上帝」，意思就是上帝乃是「信实ê上帝」。Á「信实」，chit-ê词ê意思，就是对所立ê「约」永远坚持固守，bē改变、mā bē bē记得。表明ê意思是当人ê性命陷入苦难中，上帝决定beh kā人tùi苦难中拯救出来，而这就是第3节使徒保罗所提起ê，伊受付托就是beh宣扬上帝拯救ê信息。

第3节，「ê时机成熟」，是teh指末世ê日子ê意思。Chia所用ê「奉上帝—咱ê救主」，chit种用词已经teh表示拯救工作是照上帝ê旨意在进行，耶稣基督来到世界上，就是照上帝ê旨意而来ê。Á使徒保罗就是beh kā chit-ê信息宣扬出来，这就是伊受上帝拣选、呼召ê使命。

第4节，chia使徒保罗表明伊kah提多之间ê亲密关系，有ná「父子」仝款，ná亲像伊对提摩太ê态度仝款。Tī chia使徒保罗称耶稣基督为「咱ê救主」，而tī第3节mā称上帝是「咱ê救主」，然后tī第二章10节讲「咱ê救主—上帝」，续落来tī第13节koh称「咱ê救主耶稣基督」，而后tī第三章4节koh称上帝是「咱ê救主」，koh tī第6节则称耶稣基督是「咱ê救主」，chit种交替用法，thang清楚看tio̍h使徒保罗思想中beh表达ê一个重要ê观念是耶稣基督就是kah上帝合一ê救主（参考约翰福音十七：11、21、22，腓立比书二：6—7）。

第5节，「克里特」，这是设tī地中海中ê一个真大ê岛屿，tī希腊ê东南边。使徒行传第二章11节记载，tī圣神降临tī众使徒身上ê时，hit时在场ê群众中间，mā有来自克里特岛ê人。使徒保罗ài提多tī hit-ê岛ê教会设立长老。

第6到9节，chit段经文提起设立长老应该注意ê要件：
一是「无thang指责ê人」（第6节），chit句话并m̄是讲一个人完美无缺点，却是讲m̄-thang有hō͘别人握有攻击把柄ê人。亲像当长老ê人「只有ē-tàng有一个bó͘」，仝款ê，若是对一个女长老来讲，就是「只有ē-tàng有一个丈夫」。

二是除了忠实tī婚姻生活外，koh khah进一步要求kiáⁿ mā是beh tī信仰上清楚、明白真理ê人。换句话讲，本身是一个教会ê长老，就是teh指导信徒认bat真确ê信仰，若是连家己ê kiáⁿ lóng无法度指导，chit种人会成做众信徒ê信仰指导者，照使徒保罗ê看法，并无适合担任长老ê角色。

三是tī生活上有规范ê人。使徒保罗tī chia列出了几点：包括有「不傲慢、不躁暴、不酒狂、无好斗、不贪财」等五项。其实，kā chit五项并合起来看，就会明白伊要求一个长老应该会晓tī生活上有所节制。

四是tī有积极帮助人ê信仰态度。包括有「乐意接待人」、「欢喜做好事」，chit两点tī教会信仰团契中非常重要。「欢喜做好事」，chit句话指ê就是心甘情愿地参与服事ê工作。

五是「坚守可靠、符合教义ê教示」，这是teh指对圣经ê教导有明确ê认bat，chit点恐惊是siōng重要、mā是siōng基本ê。Án-ne chiah ē-tàng「同时纠正ná反对ê人ê错误」。Tùi chia thang看出一点：克里特别区教会内，已经有人teh传达hiah-ê kah圣经ê教导无符合ê谬误信息。

第10节，tī该教会中有犹太基督徒传达尊崇割礼ê信息，这mā是使徒保罗听了后感觉非常恼怒ê原因。就án-ne，伊希望提多tī chit件事顶面有一个好ê处理方式，看怎样阻止chit种谬误ê信息继续传出去。Á使徒保罗认为tī克里特教会设立长老就是为tio̍h beh达成chit-ê目标，hō͘教会ê长老来协助提多维持教会ê秩序。

第11节，使徒保罗ài提多「禁止chiah-ê人讲话」，ài怎样chiah ē-tàng禁止chiah-ê人讲话？其实siōng好ê方法就是用圣经来教导众信徒明白谬误kah正确ê差别。只有án-ne chiah ē-tàng真正堵住chiah-ê传讲错误信息ê人ê嘴。

Koh讲，使徒保罗提醒chiah-ê传讲无正确信息ê人，mā就是过去伊不时提起ê所讲ê「假教师」，主要目的就是贪图钱财，表面上看起来in kah-ná是大发热心，m̄-koh骨底却是想beh thàn钱，kā福音当做商品贩卖，chit种行为mā发生tī哥林多教会中（参考哥林多后书二：17）。

第12节，使徒保罗提起tī克里特有一位先知，m̄-koh却无讲chit位先知ê名是甚么人。真可能chit句话tī使徒保罗ê时代是一句真流行ê俗语，用来形容克里特人ê个性，因为án-ne被使徒保罗采用当做教导ê材料。使徒保罗采用chit句俗语teh形容克里特人ê时，主要teh说明当地ê人真奸巧，不诚实，m̄-thang hō͘ in ê外表所欺骗。

第13节，使徒保罗就要求提多一定会教导信徒活出信仰，án-ne就ē-tàng区别出信kah m̄信之间ê差别。使徒保罗ài提多一定tio̍h「严厉责备」hiah-ê乱讲信息ê人。

第14节，chia koh一pái指出hiah-ê强调割礼siōng重要ê犹太基督徒，所讲ê是荒唐ê信息，chit-ê信息致使in弃sak真理「所坚持ê规例」。
第15节，chit节thang参考马可福音第七章8到13节，耶稣基督对门徒ê教导。

Chit节讲出当时教会tú-tio̍h ê问题，除了犹太基督徒对割礼ê坚持外，iáu面对tio̍h另外一个造成信仰认知上ê困扰，就是所谓「重智派」（Gnosticism）者ê困惑，chit-ê派主张人ê肉体是lah-sap、邪恶ê，只有灵魂chiah是洁净ê。因为耶稣基督是神圣ê，因为án-ne伊根本就无降生tī人类世界上，因为人ê世界是chiah-ni̍h lah-sap，怎样ē-tàng被án-ne圣洁ê救主khiā起？这就是「重智派」者所强调ê一种对耶稣基督降生、死、koh活等相对看法。「重智派」ê人iáu会强调若一个人beh真正洁净，就一定tio̍h谨守禁欲主义，m̄-thang结婚，mā m̄-thang食某一kóa食物等，chit种讲词mā困扰tio̍h以弗所教会，因为án-ne，仝款ê问题mā出现tī使徒保罗写hō͘提摩太ê书信中，ài伊注意chit-ê派ê人对信徒造成ê影响（参考提摩太前书四：3）。

第16节，是对前述经文ê一个结论，使徒保罗讲chiah-ê「主张受割礼ê犹太基督徒」，表面上看起来像基督徒，其实in并m̄是真正认bat上帝，因为in ê言行不一致地。

提多书 2:1-2:15

注释:

Ná亲像写phoe hō͘其它教会ê信所关心ê事仝款，使徒保罗真chē时chūn teh处理ê事件，除了信仰ê认知之外，iáu有就是有关信徒信仰生活上所tú-tio̍h ê问题。Tùi chia thang明白一点：基督教信仰是kah生活连结做伙、分bē开ê。如果信仰上无好ê规律、严正，就真oh传达信仰ê意义。
第1节，「讲到你」，chit句话是用真强ê语句写出来ê。其实是kah第一章10到16节相对照，因为tī该段经文中，特别提起tī克里特地区教会中，发见有一批「假使徒」teh传讲无正确信息。因为án-ne，使徒保罗指出hiah-ê人ê谬论kah错误之外，koh khah重要ê，就是beh提醒提多一定tio̍h teh教导信徒对信仰ê认bat「符合健全ê教义」，就是关系耶稣基督死tī十字架上，以及伊koh活、升天ê事。使徒保罗讲chit句话ê时，是用严肃，mā接近命令ê语句，ài提多bē-tàng亲像hiah-ê传错误信息ê「假教师」，致使信徒背离了信仰。

第2到5节，提醒提多针对年纪大ê人应该有ê教导态度。Tī chit段经文中间，伊特别提起几点：

一是对男性ê老人，ài in tī信仰kah生活上成做好ê模范。Chia特别提起「信心、疼心、耐心」等三样信仰内涵，这mā是使徒保罗hō͘提摩太ê书信中提起过ê事（参考提摩太前书六：11、提摩太后书三：10）。

二是对年老ê妇女，ài in tī生活上有所节制。Ài beh特别注意ê所在，是tī chia对年老妇女ê要求方面，包括有「bē-tàng搬弄是非」、「行为tio̍h beh谨慎」、「不作酒ê奴隶」等。

三是对少年ê妇女，ài in重视家庭生活。使徒保罗确实非常强调家庭生活ê重要性，tī伊ê观念中，家，就是见证信仰siōng重要ê所在。Á妇女则siōng容易见证福音ê人。

第6到8节，chit三节经文是针对少年信徒ê教导。值得注意ê所在，就是伊并无讲ài怎样教导少年人，只有讲一句「ài in管束家己」，然续后落来就是beh提多作少年人ê模样。伊提起「诚恳、严肃」这两项，前者意思是teh指正确、不腐化ê意思。Á后者是teh指tī态度上tio̍h真清楚，不随便ê意思。

注意第8节所提起ê，不beh hō͘ hiah-ê对敌者有把柄thang攻击，á是chhōe-tio̍h错误thang侮辱，chit点真可能就是teh隐喻hiah-ê假教师；in表面上kah-ná teh教导信徒认bat甚么大道理，其实心中致意ê是「贪图钱财」chit件事。另外一方面，使徒保罗mā特别提醒提多，「言语tio̍h适当」，意思真清楚，就是beh言行一致地，bē-tàng讲一套，做一套。

第9到10节，chit两节讲tio̍h有关奴隶kah主人之间ê问题，这mā是使徒保罗所关心ê议题。伊tī以弗所书第六章5到9节；歌罗西书第三章22节到第四章1节；提摩太前书第六章1到2节等等处经文lóng有提起过，特别是腓利门chit本书信，谈ê就是有关奴隶阿尼西谋ê事。Á tī哥林多前书第七章20到22节，使徒保罗甚至运用chit种主人kah奴仆之间ê关系，譬喻耶稣基督kah基督徒之间ê关系；伊认为耶稣基督就是信徒ê主人，所有ê信徒lóng是耶稣基督ê奴仆。

使徒保罗ê时代，蓄养奴隶ê风气非常丰盛。Tī使徒保罗ê看法中，身为奴隶siōng重要ê就是诚实。因为án-ne，用诚心顺服主人之外，koh khah bē-tàng有「偷the̍h」ê行为出现。

    第11节，「上帝拯救全人类ê恩典已经显明出来à」，chit句话其实mā teh说明两个重要ê信息：一是审判ê时刻到à，二是上帝有救赎ê恩典。Tī上帝ê审判中，lóng有奇异ê恩典相tòe。M̄-koh这拯救ê恩典lóng有一个基本ê要件，就是认罪悔改，而chit点mā是kui本圣经ê主要信息之一。无认罪悔改，就无法度看tio̍h á是体会tio̍h上帝怜悯ê疼（参考以西结书三十三：11）。

第12节，使徒保罗一再强调ê基督徒信仰生活ê准则，tī chia伊讲tio̍h一个基督徒既然已经领受上帝ê恩典，就应该kah败坏ê生活有区隔，á是kā过去败坏ê生活hō͘排除。Chit节所讲ê「恩典」，指ê就是第14节所讲ê「基督为咱献上家己，救赎咱」。当圣经teh讲「恩典」ê时，是讲原本m̄是人有资格领受ê，m̄-koh chit-má却「白白」得tio̍h à。Á「正直」，这是对待别人á是处理事务ê时应该有ê态度，是bē冤枉别人，mā bē欺负比家己软弱ê人。「敬虔」，这是teh指kah上帝之间ê关系，表示不随便，却是用真实ê态度敬拜上帝。

第13节，这是真重要ê一节经文，使徒保罗koh一pái讲tio̍h「蒙恩ê日子来临」，这是teh指耶稣基督koh再临ê时chūn，所有信靠伊、归属tī伊ê名下ê人，lóng会享受耶稣基督ê救恩。

第14节，一个信耶稣基督ê人，lóng有信仰上ê责任，因为信徒lóng是领受上帝tī耶稣基督内面救恩ê人，因为án-ne应该知影怎样kā chit种救恩显明出来。Á使徒保罗认为siōng好ê方式，就是知影去分享chit份拯救ê疼。伊kā提多讲这分享ê疼，就是教导信徒「热心行善」，mā就是beh kā上帝ê疼具体化，付诸实际ê行动。

第15节，chit节thang到使徒保罗对提多ê期待，伊m̄-nā ài提多扮演一个传道者，kā上帝ê救恩向众信徒阐明，iáu koh khah扮演监督者ê角色，mā就是beh督促信徒照教导去实践，如果有不听从ê，á是有偏离教导ê，bē-tàng随便了事，却是应该tio̍h「责备」。「不beh hō͘人看轻你」，chit句话mā bat用tī提摩太ê身上（参考提摩太前书四：12）。Mā tùi chit句话，thang知影提多当时年纪确实是少年。Tī早期ê社会，lóng会有一种看法：经验kah知识，会跟tòe年纪而增长。M̄-koh使徒保罗ài提多认知一点：传道者一定tio̍h tī信仰ê认知上，日日进步，m̄-nā自制力tio̍h高，并且teh做tāi-chì上显出公正ê态度，án-ne chiah会hō͘信徒尊重。

提多书 3:1-3:15

注释:

咱读使徒保罗ê书信，真紧会发见伊ê书信有一个特色，就是非常强调基督徒ê信仰生活是带有社会责任ê。Tī伊ê书信中就一再提醒所有ê信徒，一定tio̍h kā基督徒ê美德展现出来，这是为tio̍h beh hō͘众人看tio̍h基督徒tī信仰生活上确实有kah众无仝ê所在。伊认为一个人得tio̍h耶稣基督ê救恩了后，就应该更新心思意念，tio̍h kah未信耶稣基督chìn前有无仝。如果无án-ne，信kah m̄信之间就无甚么差别。（参考以弗所书四：23—24）。

Tī chit章经文中，thang看tio̍h使徒保罗一再要求提多tio̍h好好á劝勉克里特岛教会ê信徒，tī平日ê生活中活出基督耶稣ê样式，就是beh有koh khah chē实际ê行动去关心困苦ê人。Tùi chit章jōa-chē mā看tio̍h该岛教会信徒是自私ê chē，真正有疼心ê人少。

    第1节，chit节提起「ài in服从执政者kah当权者，听从命令」，类似chit种讲法m̄-nā出现tī chia，mā出现tī其罗马书第十三章1到2节；提摩太前书第二章1到3节。M̄-koh tio̍h注意，m̄-thang单看话语ê表面，却tio̍h思考一个问题：in为甚么án-ne讲？如果对照一下使徒行传第四章19到20节所记载，彼得kah约翰对当时犹太siōng koân阶级ê议会之议员所讲ê话，就会koh khah清楚明白in所讲ê「服从」是有条件ê。如果统治者、掌权者beh取代上帝，he是绝对无法度妥协ê。如果掌权者khah强迫信徒去做违背信仰ê事，he是应该抵抗，而且tio̍h勇敢抵抗。因为基督徒siōng大ê使命就是为福音做见证。

第2节，使徒保罗提起一个好ê信徒应该就是一个好ê国民。本身是一个好国民，伊有几点基本ê生活态度：

一是不毁谤别人。毁谤，是teh指恶意中伤，mā就是故意散布不实在ê话伤害别人ê意。

二是m̄-thang冤家。所谓冤家，是teh指不接受任何kah家己相异ê意见，只要kah家己颠倒ê意见，就一律反对到底。Chit种态度是错误ê。

三是beh 和气友善。意思是teh指不随便发脾气，而是beh「受气有理」。

四是谦让（jiōng）待人。谦让（jiōng） ê意思是teh指温柔ê态度，mā是仁慈ê另外一个意义。

第3节，伊用「咱」一词ê用法真特别，主要是hō͘克里特教会ê信徒感受tio̍h包括使徒保罗在内，大家lóng是仝一个家庭ê成员。伊见证讲tī伊iáu无tú-tio̍h koh活ê耶稣基督chìn前，家己ná亲像一个「悖逆、失迷」ê人仝款。这是teh指性命会失去方向，chit种人，会放纵情欲，为tio̍h追求满足个人ê欲望，甚至会不择手段，即使因为án-ne而伤害到别人mā bē致意。M̄-koh chiah-ê行为lóng是错误ê。

第4到5节，这是真重要ê一节经文，使徒保罗提醒提多，beh hō͘克里特教会ê信徒知影，被拣选成做一个基督徒，并m̄是因为in有甚么特别ê才能，á是有甚么好行为hō͘ 上帝拣选，却是因为上帝ê怜悯。类似chit种提醒mā出现tī摩西转达上帝hō͘以色列人ê话中（参考申命记七：7—8）。使徒保罗写hō͘以弗所教会ê书信mā有提起（参考以弗所书二：8—9）。使徒保罗kā上帝拯救ê焦点，khǹg tī他ê怜悯kah仁慈上，chit点是非常重要ê。
另外一方面，chit节mā提起早期教会已经实施ê一件事：就是洗礼。洗礼tī早期教会被看做是一个恩典ê记号，这记号表明一个人ê悔改。有悔改，就ē-tàng得tio̍h拯救ê恩典。

第6节，chit节thang看见早期教会信仰告白中非常重要ê信念：三位一体ê上帝。Chit种信仰告白一直传承到咱今á日ê教会。圣神就是三位一体ê上帝之一，kah耶稣基督同等位格，mā kah上帝相连做伙（参考哥林多前书六：11b）。耶稣基督kah上帝ê灵是分bē开ê，mā kah上帝拯救ê计画相连做伙。因为án-ne，thang án-ne解释三位一体ê意义：
圣父上帝：这是teh指创造天、地、海等宇宙万物ê独一上帝。

圣Kiáⁿ上帝：就是teh指上帝为tio̍h拯救世人，hō͘人认bat他ê救恩，他亲自来到世界上，以人ê形体出现，取奴仆ê样式，成做人生活tī这世间，就是耶稣基督（参考腓立比书二：6—7）。

圣神上帝：是上帝拯救工作ê方式，mā是上帝拯救力量ê记号。Hō͘人受感动soah启开心门，认bat上帝ê救恩，chit种力量就是圣神ê工作（参考以弗所书一：13）。

第7节ē-sái讲是提多书ê中心信息，mā是使徒保罗siōng重要ê思想。Chit节提起两件事：

一是因为耶稣基督ê缘故，人chiah ē-tàng kah上帝有合宜ê关系。

二是thang ǹg望永恒ê性命。Chit点mā ē-sái讲是基督教信息siōng重要ê内容，就是teh传达一个信息：信耶稣基督ê人，bē死，因为会有koh活ê恩典teh等待伊去领受。

第8节，使徒保罗ài提多tī克里特教会传扬ê就是chit-ê信息：传扬耶稣基督koh活ê信息。传扬chit-ê信息mā是今á日基督教会siōng重要ê使命。

第9节，chit节提起「族谱kah名录以及律法上ê争执」，这真清楚是teh指犹太人siōng重视ê割礼。割礼ê问题mā牵涉tio̍h犹太人传统ê认知，犹太人一直坚持只有亚伯拉罕ê kiáⁿ孙chiah是上帝拣选ê子民。因为án-ne，一个外邦人beh成做上帝拣选ê子民，第一个要件，就是一定tio̍h先成做亚伯拉罕ê kiáⁿ孙。Á亚伯拉罕ê kiáⁿ孙一定tio̍h接受割礼作做记号号（参考创世记十七：11—14）。M̄-koh使徒保罗则强调chiah-ê已经被耶稣基督tī十字架上ê救赎恩典取代à。

使徒保罗为甚么会kā提多讲争论chiah-ê事无益处？原因是伊tī各地传福音ê时lóng会tú-tio̍h有kóa保守派ê犹太基督徒，一直teh伊背后强调守割礼ê重要性，hō͘伊非常受气。

第10到11节，使徒保罗主张对付chiah-ê不时造成教会纷争ê人，所采取ê态度就是先警告伊，而且tio̍h警告两pái。如果劝勉了后iáu m̄听，就beh kah伊切断来往ê关系，意思就是tī信仰上kā它当做无仝「道」ê人看待。原因就是kah chit种人做伙，信仰bē有成长，颠倒，真可能会败坏，因为chit种信仰是「腐化ê」，意思是teh指无性命thang讲。

第12节，chia提起「亚提马」chit-ê人。Chit-ê名只tī chia出现，mā因为án-ne，并无任何资料thang hō͘咱对伊有koh khah chē认bat。

「推基古」，伊是亚细亚人，mā是使徒保罗ê同工，伊有真chē pái tòe使徒保罗去旅行传道（参考使徒行传二十：4），lóng受使徒保罗ê信任，传达信件hō͘以弗所教会（参考以弗所书六：21—22）kah歌罗西教会（参考歌罗西书四：7）。使徒保罗mā bat派推基古去以弗所教会，可能是为tio̍h代替提摩太（参考提摩太后书四：12），可见伊tī使徒保罗心目中ê份量真重。chit-má则差派伊去克里特教会代替提多，hō͘提多tńg来到使徒保罗ê身边。

然后使徒保罗ài提多到「尼哥坡里」去kah伊相会。这是现今南斯拉夫南部亚得里亚海东岸ê一个城市。

第13节，「律师西纳」，真可惜圣经无任何资料thang帮助咱对伊有koh khah chē ê认bat。M̄-koh tùi chit节ē-tàng看出伊kah亚波罗同行，mā是一位好ê福音伙伴，因为亚波罗是真优秀ê福音工作者，口才真好（参考使徒行传十八：24—28），甚至后来tī哥林多教会mā有真大ê影响力（参考哥林多前书一：12、三：4—6、22、十六：12）。In两人会经过克里特别区，使徒保罗希望提多hō͘ in两人帮助，mā有圣经学者认为chit张phoe就是托in两人带去hō͘提多ê。Tùi chia mā thang看出早期教会对hiah-ê福音工作者有真大ê帮助。

第14节，chit节koh一pái看tio̍h使徒保罗teh教导信徒ê功课上，都无bē记得一件非常重要ê事—分享kah分担。Ná亲像伊kā以弗所教会ê长老讲ê话：「Hō͘ 人 ê，比领受 ê khah 有福气。(全民版)（使徒行传二十：35）伊认为结出信仰ê果子，就是帮助hiah-ê缺乏ê人。所谓「不beh做闲散无用ê人」，意思就是m̄-thang成做无结出果子ê信徒，意思是如果信仰hō͘人只顾家己，chit种信仰并m̄是真实ê，基督教信仰就是教导咱怎样伸手帮助需要ê人。因为án-ne，努力行善，就是结出好果子ê方法。

第15节，使徒保罗特别ài提多「向仝一个信仰ê朋友请安」，因为tī第十一节提起对hiah-ê制造纷争ê人，使徒保罗已经kā它看做无仝信仰ê人，因为án-ne，mā m̄免带关怀去hō͘ in，mā无需要向in祝福。