腓立比书 1:1-1:11

注释:

使徒保罗tī chit章主要表达几个重要ê信息：一是伊感谢腓力比教会久长以来对伊ê支持，包括我人tī监狱里，该教会iáu是仝款继续关怀伊。二是伊向腓立比教会表明：只要ē-tàng kā耶稣基督ê福音传开，就是好。其他ê，已经不重要à。伊表明性命活teh，就是为tio̍h beh宣扬耶稣基督ê救恩，án-ne，死去就有收成。Chit种收成就是kah耶稣基督连结做伙。三是伊劝勉腓立比教会tio̍h继续努力，同心协力为福音phah美好ê战争，伊表示「这仗」tio̍h继续phah落去。

Chit段经文是hō͘腓立比教会ê信徒，除了表明感谢之外，mā teh鼓励in beh kā疼心kah判断力同齐增进，án-ne tī基督koh再临ê时chūn，ē-tàng成做「纯洁无thang指责」ê信仰团契。

第1到2节，ná亲像其他书信仝款，使徒保罗tī每封phoe ê踏话头lóng是先自我绍介。比较无仝款ê所在是，伊tī chit张phoe ê开始，并无亲像其他ê书信先强调家己是「使徒」（参考罗马书一：1，哥林多前书一：1、哥林多后书一：1，加拉太书一：1，以弗所书一：1，提摩太前书一：1、提摩太后书一：1），不过kah罗马书仝款，伊讲家己kah提摩太lóng自称是基督耶稣ê「奴仆」（参考罗马书一：1）。另外一个特色，就是伊常kah提摩太á是其他同工联名写phoe（参考哥林多前书一：1—2，哥林多后书一：1，加拉太书一：2，歌罗西书一：1，帖撒罗尼迦前书一：1，帖撒罗尼迦后书一：1，腓利门书1 节），而提摩太是伊siōng疼惜ê门徒之一。

Tio̍h注意ê，是「奴仆」一词，原本指ê是「奴隶」，表示tī福音事工上，使徒保罗tio̍h表明伊完全顺服耶稣基督，因为耶稣基督就是伊性命ê主。这mā是为甚么伊会tī第21节讲「活teh，是为基督」chit句话ê原因。

Koh讲，伊tī chia讲写chit张phoe，除了是写hō͘信徒看，mā同时是写hō͘「教会领袖kah众助手」读ê。Chia提起「教会领袖kah助手」，就看出早期教会内已经出现有系统ê组织。所谓教会「领袖kah助手」，tī中文《和合本》圣经用「监督kah执事」。Á监督chit-ê词，mā就是一般所指ê「长老」，负有教导、讲道、督责ê角色。Á执事，则协助「监督」所beh执行ê各项事务，mā担当tio̍h kah长老、监督仝款ê角色。

Ná亲像当时罗马文化ê特色，写书信ê开始，除了绍介家己之外，mā会有请安、祝福ê话语。这mā是使徒保罗所写书信中一再会出现ê句话（参考罗马书一：7，哥林多前书一：3，哥林多后书一：2，加拉太书一：3，以弗所书一：2，歌罗西书一：2，帖撒罗尼迦前书一：1，帖撒罗尼迦后书一：2，提摩太前书一：2，提摩太后书一：2，提多册一：4，腓利门书第3节），这mā是一种礼貌上ê用语方式。

第3到5节，使徒保罗tī chit短短三节经文中，一再表示每pái伊祈祷上帝ê时，就会为该教会献上感谢，原因是该教会tī福音事工上一直协助伊，无停止过。Ná亲像伊teh写chit封书信ê时，人虽然tī监狱中，该教会mā仝款teh关心伊、帮助伊。Tī第4节chia使徒保罗讲一提起腓立比教会，就抱tio̍h「喜乐ê心」，而这「喜乐」一词ē-sái讲是本书信ê中心题旨，tī chit本书信中用chit-ê词句ê次数相当chē（参考一：18、25；二：2、17、18、28、29；三：1；四：1、4、10）。

第6到8节，使徒保罗Tī chit段经文中表示，伊心中一直kah该教会连结做伙，m̄-nā是心中记念tio̍h，连祈祷中mā是仝款，每pái祈祷，就会为该教会祈祷。Á该教会mā非常清楚使徒保罗tī福音事工上ê情景。因为án-ne，mā知影伊被送到罗马监狱去，进一步koh派以巴弗提去罗马监狱协助伊。

第9到11节，因为使徒保罗每pái祈祷ê时，lóng会记念tio̍h该教会，为该教会祈祷。Chia讲伊为腓立比教会祈祷，希望in ê疼心kah判断力（这mā thang指「智慧」）lóng会同时增进。Tī第10节chia提起「tī基督koh来ê日子」，这是早期教会一直深信ê信息（参考约翰福音十四：3、18，使徒行传一：11），并且认为基督koh一pái来临ê时，是来审判ê（参考哥林多后书五：10）。使徒保罗讲祈祷该教会tī审判ê日子来临ê时，in lóng会结出「仁义果子」，这是teh指加拉太书第五章22节所讲ê，有「博爱、喜乐、和平、忍耐、仁慈、良善、忠信、温柔、节制」等等chiah-ê信仰上有美好见证ê果子。

腓立比书 1:12-1:30

注释:

Tī chit段经文中，使徒保罗提起有人传福音ê心，并无真实，只是为tio̍h beh hō͘使徒保罗传福音所结成ê果子带来「koh khah chē麻烦」而已。M̄-koh伊不介意。伊强调只要ē-tàng hō͘福音传开，个人ê事已经不重要。因为伊只有一个心志：hō͘耶稣基督ê救恩突显出来。Chit点chiah是福音ê本质。

第12到14节，是真有意思ê一段经文，说明基督教信仰ê精华：tùi苦难中认bat上帝tī基督耶稣内面ê救恩。使徒保罗tī chia讲，伊tī监狱ê苦难反tńg bat帮助福音ê进展。伊kúi-nā pái tī书信中提起家己被囚禁ê事，亲像tī歌罗西书第四章3节，伊讲是为tio̍h宣扬基督ê奥秘而坐牢，伊ài歌罗西教会ê信徒会记得伊是「带锁链」写该封书信（参考歌罗西书四：18，使徒行传廿八：20）；teh写hō͘腓利门ê书信中，伊mā讲家己是因为基督ê缘故成做囚犯（参考腓利门书9、13节）；hō͘以弗所教会ê书信soah讲是为tio̍h传福音hō͘外邦人而成做囚犯（参考以弗所书三：1）。Á福音ê可贵ê所在，就是bē因为苦难来致使信仰破碎，颠倒，会因为苦难而koh khah坚定信仰ê内涵。伊写hō͘罗马教会ê书信中án-ne讲：「我想，咱chit 时ê 艰苦kah teh beh对咱显明ê 荣光bē 比得。(全民版)」（罗马书八：18）而值得注意ê是，伊讲tī罗马ê警卫全体人员，以及tī罗马官邸ê人lóng知影，伊是为tio̍h beh见证福音而被囚禁。Mā因为án-ne，m̄-nā无损害福音ê发展，反tńg是hō͘ koh khah chē「信徒对主koh khah有信心，koh khah勇敢，lóng无惊惶地传讲上帝ê信息」。

第15到18节，chit段经文thang看出使徒保罗确实是一个心胸开阔ê传道者。伊知影有人讲是teh传福音，其实m̄是，只不过是想beh拆使徒保罗ê「台」而已。伊讲chiah-ê人ê主要目的，是beh「制造koh khah chē ê麻烦」而已。M̄-koh福音事工是上帝拯救ê工作。人有pháiⁿ念头，上帝却有美好ê旨意。因为án-ne，对hiah-ê嫉妒伊传福音ê人，伊根本bē致意，伊所在意ê是怎样kā福音传出去。只要ē-tàng传出福音，伊ê心中就充满欢喜、欢喜。Chit种心境thang参考哥林多前书第九章19到22节chit段经文提起，使徒保罗讲「无论用甚么方法，总是beh救一kóa人」看出伊ê用心。Tī chia，伊讲只要福音ē-tàng被传出去，伊就欢喜，而且「iáu koh khah继续欢喜」。

第19到20节，这二节mā ē-sái讲是使徒保罗ê信仰告白。伊已经是kā kui个性命lóng献身tī传福音ê事工上。因为án-ne，伊讲「无论生死，用kui个ê我来荣耀基督」。伊讲这力量是来自腓立比教会ê代祷。

第21到22节，chit节ē-sái讲是腓立比书siōng精华ê一节经文。Chit节说明使徒保罗之所以倾尽所有一切传福音ê原因，是伊kā性命完全kah耶稣基督连结做伙，不分开。Tī第三章7到9节，伊koh一pái表明家己ê性命是kah耶稣基督完全结合做伙。伊写hō͘加拉太教会ê书信mā án-ne讲：「因为照律法来讲，我已经死tī 律法下面，这是 beh hō͘ 我 thang ǹg 上帝来活。我已经kah基督同齐hō͘ 人钉十字架。 Án ne，chit-má teh 活ê 我m̄ 是原来ê 我，是基督tiàm-tī 我内面teh 活；我chit-máteh 活，是靠信上帝ê Kiáⁿ teh 活；基督疼我，为tio̍h 我放sak 性命。(全民版)」（加拉太书二：19b—20）伊ê kui个性命价值就是khǹg tī耶稣基督ê身上，除了耶稣基督，伊已经放弃所有ê一切。

第23到24节，tùichit三节thang看出使徒保罗ê心境；伊已经预期到家己无久会被判死刑，伊愿意为tio̍h福音ê缘故受死，因为án-ne等于kah基督耶稣相会合。Ē-sái讲是，因为iáu有真chē人iáu未信主，á是信仰基础iáu无够坚定ê信徒，无论是就此受难，á是ē-tàng存活落来，伊ê目标只有一个：hō͘未信主ê人得tio̍h福音，mā beh hō͘信仰软弱ê人坚强起来。因为伊想ê，lóng m̄是家己ê利益，却是耶稣基督ê福音。

第25到26节，为tio̍h chit-ê缘故，伊表示只要家己iáu ē-tàng存活ê一工，伊lóng会继续kah腓立比教会所有信徒做伙，帮助in tī信仰上「koh khah长进，koh khah有喜乐」，伊相信只有án-ne，当有一工伊得tio̍h tháu放而kah该教会信徒相见面ê时，in会因为使徒保罗tī福音事工上ê坚持而感觉kah有荣焉。

第27到30节，tùi第27节开始，直到第二章结束，是使徒保罗对腓立比教会ê劝勉。Tī这劝勉中，伊表明一个基督徒tī生活上应该有ê基本态度：是tī生活上ê标准，tio̍h比一般人ê要求koh khah高。Tī伊写hō͘罗马教会ê书信中就án-ne讲：「M̄ -thang kohhō͘ 世俗同化，tio̍ h hō͘ 上帝 kā lín 改造，心志得 tio̍ h 换新，hō͘ lín thang 明白甚么是上帝ê 旨意，甚么是良善、纯全，上帝所欢喜ê。(全民版)」（罗马书十二：2）伊要求基督徒应该有khah高ê道德生活标准，这确实m̄是一件容易ê事，因为chit世界ê诱惑实在siuⁿ大，m̄-koh，信仰siōng美好ê见证就是tī-chia。Tī chia，伊要求基督徒ê信仰kah生活tio̍h一致，án-ne chiah ē-tàng防堵hiah-ê专门teh破坏信主ê人ê各种计谋。Tī使徒保罗看起来，伊认为信仰就是kah邪恶对抗ê气力。因为án-ne，伊ài用战争来提醒基督徒ài有chit种警觉性，若无，真紧to̍h会hō͘诱惑而离开了应该有ê信仰准则，而这警觉性一定tio̍h tùi生活开始做起。

Koh讲，使徒保罗认为基督徒ê特权，就是thang事奉福音ê工作。M̄-koh为tio̍h beh宣扬福音，就一定tio̍h tī生活上有美好ê见证。伊Kā chit种见证看做ná亲像tī战场上相战仝款，绝对无法度输。

腓立比书 2:1-2:11

注释:

伊劝勉该教会信徒，tio̍h活出性命ê亮光，án-ne chiah ē-tàng见证耶稣基督ê救恩，而chit点chiah是所有基督徒siōng重要ê使命。

另外，tī chit章中，使徒保罗特别提起有关伊beh hō͘以巴弗提tńg去ê事。以巴弗提是腓立比教会差派去照顾使徒保罗ê同工，结果因为破病，使徒保罗认为iáu是hō͘伊tńg来腓立比教会。可能以巴弗提会担心tńg去受tio̍h指责，使徒保罗就请伊kā chit书信带tńg来hō͘腓立比教会，免得除使徒保罗担心伊会因病来死tī罗马。

Chit段经文ē-sái讲是腓立比书siōng重要ê一段经文，尤其是第6到8 节是使徒保罗所有书信中，siōng深刻描述耶稣基督身分ê一段。Tī chit段经文中，使徒保罗劝勉腓立比教会信徒，一定tio̍h向耶稣基督看齐，学习伊ê样式，愿意谦卑落来，确实做一个顺服福音ê奴仆。

第1到4节，tùi chit段经文kah第一章27到30节ê经文有密切关系，mā ē-sái讲是延续落来，探讨教会内部发生ê问题。伊知影教会是一个信仰团契，一定会有人ê问题。M̄-koh mā因为án-ne，大家tio̍h学习ê，就是tī信仰内面同心协力抵挡hiah-ê会阻碍基督福音广传开来ê气力，只有án-ne，chiah ē-tàng hō͘教会chit-ê信仰团契永远存在。

使徒保罗tī第1节连续提出四个「问题」hō͘腓立比教会信徒认bat，其实，这并m̄是问题，虽然是用疑问句ê句型出现，真正意思是劝勉ê语句。伊希望腓立比教会信徒tio̍h因为信耶稣基督，hō͘家己tī信仰上koh khah坚定。Án-ne，就bē受tio̍h外来ê真chē虚假信息所影响。二是领受了耶稣基督ê疼了后，就看是m̄是有koh khah进步？若是有，就应该多用宽阔ê心胸看待别人，却m̄是争论。三是ài in反省kah上帝ê圣神有无连结成做一体如仝一个团契hit种？四是beh省思信徒彼此之间有无相亲相疼ê心？

续落来使徒保罗肯定腓立比教会「有」，所以伊beh进一步要求in。Chia连续提出四个要求：一是「共同ê目标」；二是「仝款ê疼心」；三是「仝款ê情感」；四是「一致地ê想法」等。其实，tùi这四点mā隐约thang看出该教会内部确实是发生彼此不和谐ê情形。Chiah-ê纷争是m̄是ná亲像哥林多教会是因为有分群结党状况，tī chia并无说明。不过，tùi字里行间thang看出教会内出现分裂，主要因素在tī有人心存骄傲，而且想beh贪图虚名，bē晓得谦让（jiōng），因为án-ne，使徒保罗劝勉大家「m̄-thang只顾家己，mā tio̍h关心别人ê利益」。换句话讲，tī腓立比教会内，有人真自私，kā家己看做siōng重要，á是想beh争夺权位，这tī一个信仰团契里是siōng忌讳ê行为。

第5到7节，使徒保罗先tī第5节讲「tio̍h用基督耶稣ê心为心」，然后接落去ê第6到11节是用诗歌ê型态写出耶稣基督所显现出来ê样式。Tī chit段诗歌中，siōng重要ê是第6节，使徒保罗非常确信耶稣基督就是上帝本身，kah上帝「同质」。尼西亚信经mā án-ne讲，耶稣基督是：「tùi真神出ê真神，是生ê，m̄是受造ê，kah父同质同体。」使徒保罗讲耶稣基督是「自甘卑微」来到人世间，然后放落身段hō͘家己成做「奴仆」ê样式，而且以人thang看见、接触ê样式出现。Á koh khah重要ê，就是tī第8节所讲ê，chit位自甘卑微到世界起来ê耶稣基督，甚至是顺服上帝到愿意死tī十字架上。Chit种描述有chiok厚ê以赛亚书第五十三章ê内涵，讲出上帝ê奴仆，并m̄是来到世间享受ê，却是一个受苦ê奴仆。

第8节，tùi chit节mā thang看tio̍h使徒保罗kui个中心思想，就是tī耶稣基督ê十字架，chit点mā是伊写hō͘哥林多教会所表示ê，伊只传耶稣基督kah伊死tī十字架上ê事，其他ê事已经m̄是重要ê了（参考哥林多前书二：2）。这就是牺牲ê疼，为tio̍h完成上帝所付托ê拯救使命。

第9到10节，chit两节tú好讲出基督教信仰ê特性：人看做卑微ê，tī上帝眼中往往是高贵ê。人teh看耶稣giâ人类苦难ê死亡是一种惩罚，m̄-koh he却是上帝拯救ê记号。Chit两节mā说明耶稣基督koh活信息ê意义。

第11节，chit节是基督教宣教工作siōng重要ê经文，因为福音ê主要内容，就是teh见证耶稣基督是人类ê救主。传福音ê目标就是beh hō͘所有听tio̍h而且信ê人，lóng公开宣认耶稣基督是主，只有án-ne，chiah ē-tàng荣耀上帝ê名。

腓立比书 2:12-2:18

注释:

Chit段经文mā thang清楚看见腓立比教会ê信徒，有人会埋怨、争论，chit种行为是教会内部siōng容易出现分裂ê原因。伊劝勉腓立比教会ê信徒， tio̍h坚守性命ê道，chit种道，就是上帝tī耶稣基督内面ê救恩。

第12到13节， 使徒保罗hō͘腓立比教会信徒知影，过去tī腓立比传福音ê时，信徒lóng会听从伊ê教导。因为án-ne，伊期待in会继续守tiâu chiah-ê教导，tī每样事顶面lóng有美好ê见证。

第14到16节，tùi chit段经文thang看见tī腓立比教会内，有人为tio̍h教会ê事发出怨言，á是有纷争。Tī第1到4节中，就有提起过in中间有真chē纷争，chit种纷争lóng是kah信徒中有人真自私，á是贪图某种利益有关，án-ne tī团契中，必定会产生真chē bē爽快ê事。使徒保罗希望腓立比教会ê信徒tio̍h像光仝款发亮，hō͘别人看见in有好ê行为。Thang kā第15节thang对照马太福音第五章14到16节耶稣基督山上宝训中所讲ê话。Koh讲，使徒保罗提醒腓立比教会信徒，一定会坚守性命ê道，这就是福音ê信息，mā就是关系耶稣基督死tī十字架上ê救恩，chit点一定会坚持守tiâu，bē-tàng放弃，mā bē改变。使徒保罗讲，án-ne tī「基督koh来ê日子」，伊就ē-tàng得tio̍h安慰，表示伊ê教导无白费。

所谓「基督koh来ê日子」，这是早期教会共同ê信仰认知，而且认为时间已经接近，除了tī chia提起，mā tī第一章6节、10节，第三章20节，第四章5节等等处经文lóng有提起。伊写hō͘哥林多教会ê书信mā提起chit种观念（参考哥林多前书一：8、五：5）。

第17到18节，使徒保罗真清楚表明家己有非常ê准备，即使一定tio̍h为福音ê缘故献上性命，伊mā会kā它看做是一件欢喜ê事，因为he mā是teh分享腓立比教会信徒性命得救ê喜乐。

腓立比书 2:19-2:30

注释:

Chit段经文中，使徒保罗提起两位好koh尽忠ê同工，一位tùi第19到23节thang看出，就是siōng hō͘使徒保罗称心ê门徒提摩太，就ná亲像第22节所讲ê，伊kah提摩太ná亲像「父子」一般。伊称提摩太是伊「tī信仰上ê真kiáⁿ」（参考提摩太前书一：2），mā是「亲爱ê kiáⁿ」（参考提摩太后书一：2）。第25到30节绍介另外一位同工――以巴弗提。伊是腓立比教会差派去跟tòe使徒保罗传福音ê同工，是真尽职ê福音工人，为tio̍h传福音「冒性命ê危险，差不多死去」。可惜，咱kan-taⁿ tī chit段经文，以及第四章18节koh一pái提起伊ê名外，并无koh khah充分ê资料知影以巴弗提所做ê事工。

第19到20节，chit两节使徒保罗绍介了伊siōng得意ê门徒提摩太hō͘腓立比教会ê信徒认bat。伊会想tio̍h差派提摩太去腓立比教会，除了希望稳固信徒ê信心外，另外一个主要原因是：希望tī提摩太ê努力下，腓立比教会ē-tàng成做其他教会ê典范。提摩太是使徒保罗tī第二pái旅行传道所收ê门徒，老父是希腊人，老母是犹太人。Beh tio̍h差派出去传福音前，使徒保罗特别为伊行割礼（参考使徒行传十六：1—3）。当使徒保罗tī监狱ê时，提摩太hit时mā陪伴tī边á（参考歌罗西书一：1，腓利门书1节）。甚至到最后，连提摩太mā tòe坐牢（参考希伯来书十三：23），而原因是为甚么？咱已经无法度知影，唯一thang确信ê是，伊会坐牢必定是为tio̍h福音ê缘故。Tùi顶面所讲chiah-ê资料，咱thang看tio̍h提摩太确实是一位真thang信托ê忠实福音同工。伊特别强调提摩太kah伊非常同心teh关心腓立比教会ê情景。

第21到24节，tī chit段经文中，使徒保罗提起家己实在非常希望有机会亲自去腓立比教会看in，m̄-koh伊会差派提摩太去。伊hō͘腓立比教会知影提摩太kah伊ê关系，就ná亲像父子仝款ê亲密，而这lóng是为tio̍h福音ê缘故。提摩太ná亲像使徒保罗仝款，愿意为福音而付出一切劳苦。

第25到30节，ná亲像头前已经提起过ê，chit段经文是绍介有关以巴弗提ê事。Á圣经提供有关伊ê资料并无chē，chit段经文ē-sái讲是比较详细ê。

真清楚，以巴弗提是tī使徒保罗被关入到监狱去协助帮忙看顾，m̄-nā án-ne，腓立比教会iáu特别准备真chē礼物带去hō͘使徒保罗（参考腓立比书四：18）。以巴弗提ná亲像使徒保罗专用ê「奴仆」一般。会án-ne，真可能是腓立比教会听讲使徒保罗是家己sòe厝当做监狱牢房，而且ē-tàng tī chit种牢房中，接见任何人，并thang向访ê人客传扬福音ê信息（参考使徒行传廿八：16、30—31），因为án-ne，以巴弗提虽然表面上看起来是使徒保罗专用ê「奴仆」，实际上，并m̄是只停留tī服事使徒保罗生活上ê问题而已，mā是kah使徒保罗同时teh见证福音ê工作上，成做使徒保罗ê同工，mā因为án-ne，使徒保罗称呼以巴弗提是好ê同工，因为伊bat「冒性命ê危险」而见证福音，因为án-ne hō͘保罗讲以巴弗提是kah伊「同齐工作，同齐作战」ê好同工。

Tùi chit段经文mā thang看tio̍h以巴弗提因为真认真地工作，结果可能因过度辛苦而病倒，并且是病得非常严重，差一点á死去。Mā因为chit-ê缘故，使徒保罗赶要紧差遣伊tńg去腓立比。不过，以巴弗提确实是一个忠实ê「奴仆」，chit期间可能有真chē pái，使徒保罗一再要求伊赶紧tńg去腓立比，因为伊ê身躯并m̄是真好，m̄-koh lóng被以巴弗提婉拒了，理由可能是伊自认是受腓立比教会ê差遣，m̄敢离开岗位。为tio̍h chit-ê缘故，使徒保罗特别写chit张phoe，tio̍h用巴弗提带chit张phoe tńg去腓立比教会，hō͘该教会知影为甚么以巴弗提会tńg去，并m̄是因为伊工作无好，á是tī同工上有碍事ê所在chiah被差遣tńg去，颠倒，to̍h是因为伊工作真认真，甚至为tio̍h保护使徒保罗á是为tio̍h见证福音ê缘故，iáu「冒性命ê危险」，伊希望腓立比教会ē-tàng以欢喜ê心接纳以巴弗提tńg去。因为án-ne，chit段话mā是有替以巴弗提 担保ê用意。

腓立比书 3:1-3:11

注释:

使徒保罗写hō͘腓立比教会ê chit封书信，原本到第二章最后一段伊提起遣送以巴弗提tńg去腓立比ê时chūn，应该是该书信最后一段了，准备ài结束loh。可能临时想tio̍h iáu beh koh再交带甚么事，就án-ne就koh再继续写落去。Mā另外有一种可能，就是chit张phoe原本就是分做两个无仝ê时段写做ê。

Chit章thang分做两部分，其一是第1到11节，tī chit部分使徒保罗讲tio̍h家己献身ê使命感，就是伊性命改变ê经过。其二是第12到21节，这部分使徒保罗讲tio̍h身为耶稣基督ê信徒，应该tio̍h清楚家己就是天顶ê公民，因为án-ne，ài kā性命最终ê目标khǹg tī天顶，却m̄是世间chiah-ê会改变ê荣耀。

Tī chit段经文中，使徒保罗讲tio̍h几个重点：一是beh腓立比教会ê信徒提防hiah-ê假冒伪善ê人，chit种人对耶稣基督ê认bat并m̄是清楚，却自认真bat。二是伊承认家己原本是藉tio̍h摩西律法而teh进行迫害基督徒ê人，后来改变了，因为认bat了耶稣基督。三是伊分享家己对性命ê看法，就是性命siōng重要ê中心，是tī耶稣基督。

第1到3节，tī chit段经文中，使徒保罗ài腓立比教会信徒注意hiah-ê专门teh教会内提倡守摩西律法中所讲割礼之重要性ê人。伊认为真正需要割礼，是心灵ê，m̄是肉体ê，chit点thang参考耶利米书第九章25到26节。因为肉体是外表ê，心灵chiah是心内真实ê表现。伊讲基督徒beh夸耀ê，并无肉体有割礼，却是因为认bat耶稣基督ê救恩，chit点chiah是重点。
第4到6节，使徒保罗是出身法利赛人ê家庭，因为án-ne，完全照规矩tī出世第八工就受割礼。若是tùi摩西律法ê观点来看，确实是非常典型ê希伯来人，mā是属tī法利赛派ê人，甚至使徒保罗mā bat迫害过基督教会kah掠基督徒入狱。Chiah-ê条件lóng thang hō͘ hiah-ê一工到晚lóng teh强调遵守摩西律法ê重要性ê人，无thang指责。

其实，phah开使徒保罗所写ê书信来看，就thang看tio̍h伊每一个一地方，lóng会tú-tio̍h一个共同ê问题，就是争论有关割礼ê事。坚持一定会受割礼ê人，就是hiah-ê已经信耶稣基督ê保守派犹太人（参考使徒行传十五：1），in lóng是跟tòe tī使徒保罗后壁，四界去传割礼ê重要性，tī加拉太地区án-ne（参考加拉太书一：7），tī腓立比地区mā是仝款。因为án-ne，tī chit段经文中，使徒保罗特别koh一pái绍介家己mā是受过割礼ê人，而且受过顶真法利赛派训练ê人，m̄-koh却无特别ê意义，因为真正性命并不在tī「肉体上ê割礼」，却是在tī心灵ê割礼，chit种观点tī伊写hō͘其他教会ê书信中mā一再提起（请参考罗马书二：29、加拉太书五：6、六：15，歌罗西书二：11），而chit种观点mā是头前提起过ê先知耶利米之观点。使徒保罗希望做一个基督徒，m̄是在tī外表ê记号，却是心内ê真实，是心思意念ê更新，成做一个新造ê人出现tī众人面前（请参考哥林多后书五： 17，加拉太书六：15，以弗所书四：23—24）。

第7到9节，chit段经文ē-sái讲是非常重要ê经文。使徒保罗强调家己ê改变，就是当伊遇tio̍h koh活ê耶稣基督了后，就kā性命kah耶稣基督连结做伙，伊认为这是性命中siōng重要ê事。

第10到11节，tī chit两节经文中，使徒保罗重新强调伊写hō͘罗马教会书信中所提起ê，就是kah做一个基督徒ē-tàng kah耶稣基督同死，就ē-tàng kah耶稣基督同koh活（参考罗马书六：8）。Á tùi死里koh活，án-ne chiah是性命siōng重要ê大事。

腓立比书 3:12-3:21

注释:

使徒保罗Tī chit段经文中，伊提起基督徒ê性命态度，应该ná亲像tī运动竞技场上ê运动员仝款，非常清楚家己ê目标。基督徒ê目标应该khǹg tī天顶ê奖赏，却m̄是kā性命ê目标khǹg tī这会败坏ê世间。伊同时强调一个基督徒若是认真地以天顶ê奖赏作为家己ê目标，生活言行举止就会谨慎，免得m̄-nā无见证耶稣基督拯救ê信息，却是成做十字架救赎功劳ê阻碍者。

第12到14节，使徒保罗ài用运动场上竞技作例，来形容信仰上该有ê态度。伊写hō͘哥林多教会ê书信mā引用运动竞技场上ê例（参考哥林多前书九：24—27）。Á竞技场上ê奖赏是来自人ê，早期所hō͘ ê冠冕是用桂花树枝á是橄榄叶编织成ê，m̄-koh这真紧to̍h会凋谢。基督徒beh争取ê目标是来自天顶ê赏赐，he chiah是永恒ê。使徒保罗讲伊ê性命中只有一件事：就是无认为家己已经得tio̍h奖赏，却是继续朝ǹg beh得tio̍h天顶奖赏ê目标tī前进，án-ne chiah是伊受呼召ê原因。

第15到16节，tī chia使徒保罗提起「灵性成熟ê人」，意思是teh指hiah-ê已经有因为信仰而改变心思意念ê人，mā就是hiah-ê kah使徒保罗仝款，一直teh追求灵命成长ê人，使徒保罗ài in kah伊仝款kā性命ê终极关怀khǹg tī属天ê位置上看待。

Tī chia使徒保罗特别提起有继续teh追求灵命成长ê人，即使teh追求ê过程中发生差误，上帝mā会清楚指示。因为继续追求灵命成长ê人，伊知影hō͘人灵命成长siōng重要ê基础就是明白上帝ê话语，而且tio̍h明白上帝ê话语，就一定tio̍h tńg来到圣经上chiah ē-tàng明白上帝ê旨意是甚么。伊劝勉腓立比教会信徒m̄-thang乱了心，只要照伊过去教导in ê，努力朝向ná属tī天顶奖赏ê目标前进就对à。

第17到19节，使徒保罗劝腓立比教会ê信徒beh同齐「效法」伊，「bē记得背后，全力追求头前ê事」，mā是属天ê奖赏。使徒保罗m̄-nā是teh写hō͘腓立比教会ê书信中án-ne鼓励信徒，伊写hō͘哥林多教会ê书信中mā án-ne讲（参考哥林多前书四：16）。Tùi chia thang看tio̍h使徒保罗有一股极强烈ê使命感，伊真有信心地表达出对耶稣基督ê认bat，mā知影明确ê上帝国度之道。因为án-ne，伊ài众信徒学习伊ê模样。伊讲chit-má是用「流目屎」ê心情teh苦劝腓立比教会ê信徒，ài in跟tòe伊学习行天路。伊会án-ne讲「流目屎」是thang理解ê，因为伊teh写chit封书信ê时chūn，人是关tī罗马监狱中，伊mā知影所chhun落来ê日子无chē。另外一点，hō͘伊会「流目屎」写chit封书信ê原因，就是tī腓立比教会中间，有kóa信徒ê行为已经hō͘耶稣基督tī十字架死ê拯救恩典蒙羞，成做耶稣基督「十字架ê仇敌」。伊m̄是只有一pái苦劝chiah-ê人tio̍h改正，却是kúi-nā pái，m̄-koh显然并无得tio̍h所期待ê效果。

为甚么会án-ne？腓立比教会m̄是对使徒保罗tī传福音ê事工上帮助siōng chē mah？无错，m̄-koh并m̄是每一个人lóng án-ne，却是tī in中间有kóa信徒iáu是继续过浪荡ê生活，这mā就是使徒保罗所讲ê，hiah-ê tī灵性性命尚无成长ê人，in过腐败ê生活。Koh讲，ná亲像tī第三章2节所提起，tī in中间有人iáu继续tī教会内鼓动信徒守割礼，以自傲ê态度藐视别人，致使tī腓立比教会中mā有纠纷传出来。M̄-koh，咱知影mā有讲过了：如果遵守摩西律法上规定ê割礼真正ē-tàng hō͘人成做「天顶ê公民」，án-ne，耶稣基督死tī十字架上ê恩典就落空了，这就是伊tī chia所讲ê「成做基督十字架ê仇敌」ê意思。

第19节是真值得咱注意ê一节；使徒保罗tī chia讲一直teh「对敌基督十字架」ê人，根本就m̄是teh传福音，却是teh传讲「另外一种福音」（参考加拉太书一：6），chit种福音就是物质生活ê需要。In关心ê是属世ê物，使徒保罗tī chia用「腹肚」。就是kā性命ê价值定位tī食、lim、sńg乐ê范畴上。

第20到21节，koh一pái看tio̍h使徒保罗末日ê思想，ná亲像tī第一章6、10节、第三章20 节、第四章5节等等处所提起ê「基督koh来ê日子」仝款。Chit节mā清楚说明咱只是暂时寄居tī土脚ê「天顶公民」，teh-thèng候基督耶稣koh一pái来临ê时，带领咱同齐tńg来天家。

为甚么使徒保罗会提起基督徒ná亲像一个「天顶ê公民」？这是有原因ê。腓立比chit-ê城市是罗马政府为安置退伍军人á是高级官员而设立ê特区，因为án-ne，tī腓立比城里不时会tī马路上看tio̍h有tùi军队退役落来ê军人，in iáu穿插罗马军队ê服饰，in以bat身为罗马军人为荣。In ê言行举止ná亲像一个雄壮威武ê罗马军人仝款英姿焕发、雄赳赳、气昂昂，koh khah重要ê，in绝对遵守罗马军人ê纪律，不随便惹事生非。使徒保罗来到腓立比chit-ê城市，一看tio̍h这幅景象必定有真深ê感受：如果一个罗马军人直到退役了后，lóng iáu以bat身为罗马军人为荣耀，ná身为基督徒岂m̄是比做一个罗马军人koh khah有荣耀ê性命？因为án-ne，伊用「天顶ê公民」就是beh用来kah「罗马公民」对比ê。这mā就是为甚么过去伊mā bat以家己拥有「罗马公民」身分而自傲（参考使徒行传廿二：27—28），chit-má因为tú-tio̍h koh活ê耶稣基督，kā chiah-ê原本看做是有「盈利」ê事，lóng当做是垃圾看待，甚至iáu当做是一种性命ê负担（腓立比书二：7—8）。

腓立比书 4:1-4:23

注释:

Tī chit章经文中，使徒保罗koh一pái劝勉腓立比教会ê信徒， tio̍h追求性命siōng súi ê事，就是ē-tàng因信耶稣基督而会得thang kah上帝连结。同时，伊tī chit本书信ê结尾，o-ló mā感谢腓立比教会对伊tī福音事工上ê全力支持。

第1节，ná亲像teh绍介认bat chit本书信ê时有提起ê，腓立比书真重要ê一个主题，就是「喜乐」。使徒保罗讲每pái伊想起腓立比教会，心内就充满tio̍h喜乐，mā是伊引认为傲ê信徒。伊koh一pái劝勉in tī信仰上一定会khiā稳。

第2到3节，chia提起两位tī腓立比教会ê姊妹就是友阿蝶kah循都基。使徒保罗特别提起in两人ê原因，是因为in两人bat kah使徒保罗同工tī传福音ê事工。其他ê资料咱lóng无法知影，非常可惜。另外一位是革利免，chit-ê人是甚么人？mā已经无任何资料。

Koh讲，tī第3节chia特别提起「上帝ê性命册」，这是犹太人一直有ê观念，认为每一个人tī天顶lóng有一本性命册，记载tio̍h每一个人所做所为（参考出埃及记三十二：32，路加福音十：20，启示录三：5、二十：12、15），做上帝审判ê参考。

第5到7节，使徒保罗强调每一个基督徒lóng tio̍h因为kah主耶稣基督连结而感觉喜乐，而且性命永远lóng喜乐。注意第5节chia所提起ê「谦让（jiōng）」一词，chit-ê词tī希腊文有含「公义」、「正义」ê意思。Chia mā同时提起耶稣基督koh一pái降临ê日子，使徒保罗用chit种末世ê观念看世间ê一切，因为án-ne，建立生活ê基本态度，ài有喜乐、感谢ê心，保持纯洁ê生活，m̄-thang开时间tī hiah-ê会败坏ê事物上，mā m̄-thang有纷争。

第8到9节，chit两节ē-sái讲是chit本书信ê最后附加语句，因为án-ne，起头就用「路尾」chit-ê词字，表示chit本书信就beh结束loh。Tī chit两节经文中，使徒保罗提起有六件真重要ê事，希望腓立比教会ê信徒会注意，he就是：

一、真实，指ê是性命中thang óa靠ê。
二、高尚，意思是值得尊敬ê对象。Chit种人，mā是hông称做忠实可靠ê人。Chit种人tī品格上就是高尚ê人。
三、公正，这是teh指一个人无论teh做甚么事，伊bē有两套法码、准则。Mā就是讲：无论是对上帝，á是对人，伊ê态度lóng仝款。
四、纯洁，是讲一个人thang面对上帝而坦然无惊惶，chit种人必定是无欺骗等不诚实ê态度。
五、可爱，指一个人容易接纳别人，会替别人设想，hō͘别人亲近伊。
六、光荣ê事，简单来讲，就是有好ê名声。这mā是使徒保罗不时提起ê事（参考提摩太前书三：7、13）。

以上六点是使徒保罗ài腓立比教会众信徒努力持守tio̍h，chiah-ê原本tī in中间就已经有ê，m̄-thang忽略。腓立比教会ê信徒可能有bē少tī当地lóng是属tī社会高阶地位ê人，使徒保罗希望in信耶稣基督了后，会koh khah有好ê行为，thang hō͘ in ê信仰tī生活上koh khah有见证。

第10到13节是非常好ê经文，看tio̍h使徒保罗真正是进入性命siōng好ê境界，he就是tī基督里性命ê知足。Tī第三章8节，伊讲性命是用「认bat我主耶稣为至宝」，因为án-ne，其他ê事物对伊来讲就m̄是siōng重要ê à。Tī hō͘提摩太ê书信中，伊讲：「无m̄-tio̍h，一个人若知足，宗教的确ē-tàng hō͘伊富有。」性命ê饱足，并不在tī lim食á是拥有万贯财富，而在tī心灵ê满足。伊讲tī耶稣基督内面，伊学会晓了chit种本领，无论tī甚么款ê环境下，伊lóng ē-tàng因为拥有耶稣基督而hō͘性命感觉满饱足。

第14到16节，chit段经文thang看出腓立比教会确实是一间非常值得学习kah thang取ê教会楷模，in全力支持使徒保罗ê福音事工，从来m̄-bat间断。只要使徒保罗有任何需要，in会一屑á 都无踌躇地提供一切需要帮助伊开拓福音事工。Tio̍h注意ê是，使徒保罗tī chia提起腓立比教会帮助伊，并m̄是指金钱ê事而已，iáu有差派人协助伊传福音ê事工，就ná以巴弗提（二：25）。使徒保罗写phoe hō͘哥林多教会ê时，就bat劝勉in chit种学习（参考哥林多后书八：1—15）。

第17到19节，使徒保罗tī chia讲tio̍h伊对腓立比教会ê期待，并m̄是希望得tio̍h in koh khah chē ê礼物赠品á是生活需要，却是希望in tī信仰上有khah美好ê见证。这ná亲像伊tī第一章9节所提起ê，会tī祈祷中祈求上帝帮in tī「疼心会不断来kah真知识kah判断力同齐增进」，hō͘ in成做有成长，而且加倍成长ê教会。伊感谢腓立比教会对伊ê帮助超过伊所需要ê，特别是差派以巴弗提带去真chē礼物hō͘伊，伊深信腓立比教会所做ê这一切资助福音事工ê美德，必定会hō͘上帝记录落来，而透过耶稣基督ê救恩丰富tī腓立比教会中。

第21到23节，这mā是当时写phoe ê一种格式，就是tī phoe ê结尾有请安kah祝福ê话，而chiah-ê请安特别是附带某一kóa亲朋好友ê请安。使徒保罗tī其它书信中mā有chit种格式（参考罗马书十六：21—23，哥林多前书十六：19—20，歌罗西书四：12、14）。

特别tio̍h注意ê是tī第22节提起「皇宫里ê人」（中文《和合本》用「该撒厝里ê人」，《台语汉字版》用「该撒ê厝ê」，天主教《思高圣经学会晓版本》kah《吕振中》教授ê版本mā lóng仝款），意思是teh指hiah-ê tī罗马帝国中央政府机构工作ê官员。换句话讲，使徒保罗chit句请安词虽然无甚么，却已经teh提醒腓立比教会信徒知影：伊虽然关tī罗马监狱中，m̄-koh因为伊ê监狱是「开放式」ê，是伊家己租来ê厝。伊tī chit「开放式」ê监狱中至少有两年以上ê时间，这反tńg hō͘伊有充分ê自由thang一向访ê人客传福音（参考使徒行传廿八：30—31），而来访问伊ê人mā包括罗马政府官员，这就是伊当初决定上诉到罗马法庭去ê一个因素背景，希望藉tio̍h chit-ê机会传福音，mā hō͘ chiah-ê罗马官员知影基督徒其实是稳定帝国境内治安非常重要ê气力。使徒保罗确实达tio̍h à伊ê心愿，伊hō͘腓立比教会信徒知影：即使tī监狱中，伊mā努力向所有来访问伊ê人传福音，其中包括罗马官员。