重新查询
经文:

耶利米哀歌 1:1-1:11

注释:

这是五首哀歌ê第一首,背景是南国犹大被巴比伦灭亡ê惨状。诗人透过耶路撒冷过去繁荣ê景象,kah taⁿ被灭亡后凄凉如废墟般ê景象对照,讲出敌人侵入了后掠夺所有一切,致使城内人民iau饿ê悲惨画面。

对tī chit首诗歌ê背景有两种讲法,一种是认为发生tī 597年,这就是约雅斤在位年间,巴比伦攻陷耶路撒冷,伊kah伊ê厝内人lóng被掠到巴比伦去,同时受掠ê重要人物iáu有一万八千人,而且圣殿内所有ê宝贵物件mā lóng hông掠夺(参考列王记下廿四:8—17,历代志下三十六:9—10)。另外一种看法是认为这是发生tī主前586年,mā就是tī西底家治理ê时代,巴比伦chit pái的确kā犹大完全灭亡,并kā所有chhun落来ê犹大国菁英俘掳伊去,并且kā耶路撒冷城kah圣殿lóng摧毁殆尽,西底家王ê厝内人lóng惨死tī伊目睭前,而且伊被挖出目睭,带到巴比伦(参考列王记下廿五:1—21)。后来以色列人民kā耶路撒冷城kah圣殿被摧毁ê这日子当做是禁食日(参考撒迦利亚书八:18—20)。

    Tùi第3节就thang知影chit首哀歌是teh为南国犹大ê灭亡啼哭,因为以色列人民已经被巴比伦帝国ê军队俘虏去做奴隶,诗人写落来chit首诗歌,ē-sái讲是悼念,mā是发出心中ê哀叹。

第1节,诗人tī chit节用「孤伶伶」、「像寡妇」、「诸省之后」等名词来形容「过去人烟稠密ê城市」,其实就是tī指耶路撒冷kah附近ê城市,chit-má已经成做废墟了,因为居民已经lóng被俘虏伊去,有幸ē-tàng逃难ê mā m̄敢tńg来。Chit节诗歌mā有含真强烈ê质疑地意味,koh再问为甚么会án-ne?到底是发生甚么事。

第2到3节,讲出犹大ê以色列人民亡国后ê悲哀――连避难ê所在mā无。另外一方面mā道出一个事实:昔日以色列人民背叛上帝,去敬奉偶像神明,taⁿ chiah-ê神明m̄-nā无法度庇护in,连原本信誓旦旦讲beh帮助in ê埃及、摩押、以东、亚扪、泰尔,kah西顿等等chiah-ê「盟友」,最后mā一时风驶一时船,无来帮助in抵抗巴比伦(参考耶利米书廿七:3),结果犹大人民只有ē-tàng「被迫离开家乡」,hông掠去巴比伦做奴隶(参考列王记下廿五:1—21)。虽然有bē少人逃难到埃及,m̄-koh mā无法度因为án-ne得tio̍h安居ê所在,ná亲像先知耶利米传出ê信息所讲ê,即使in逃到埃及mā bē有平安,因为he m̄是上帝ê旨意(参考耶利米书四十二:15―17)。

第4节,chit节讲出过去人来来去去ê闹热景象,taⁿ都无了。因为通往耶路撒冷城ê道路lóng被巴比伦军队hō͘包围了,就bē koh再有人会去圣殿朝圣「过节」,mā无koh唱o-ló诗歌,换做「哀歌」,耶路撒冷城为没落ê城市。

	第5节,chit节讲出犹大亡国。巴比伦成做支配tio̍h in ê一切,除了俘掳犹大人民到「远方」(指巴比伦)过「受苦」ê日子,mā因为in「作恶多端」,上帝用chit种方式来惩罚in。另外巴比伦王iáu派出新ê总督基大利管理in(参考列王记下廿五:22)。

    第6到7节,chit两节诗歌讲出耶路撒冷已经ná亲像废墟。当巴比伦围困hit-ê城ê时,城内是因严重缺乏粮食而闹严重饥荒,俘掳in ê巴比伦军队kah人民lóng讥笑in,甚至会问in ê上帝tī tó位(参考诗篇四十二:3)。

    第7节,chit节thang参考头前第2到3节ê解释。

    第8节,「赤身露体,受人轻蔑」,这表示耶路撒冷已经被巴比伦搜刮殆尽,所有thang有生产动力ê人、动物lóng hông掠去巴比伦了。Chhun落来ê就是hiah-ê「siōng穷苦ê人」,in lóng是身无分文,甚至衣不蔽体ê贫困者。In只有ē-tàng hō͘人「侮辱」,mā m̄敢公开「露面」。

	第9节,这是重要ê一节诗歌。Chia描写以色列人民teh过去「盟友」lóng弃伊tī无顾了后,tī面临敌人侵入搜刮一切所有ê时,伊chiah想tio̍h beh来走chhōe上帝ê「怜悯」。Iáu好伊想tio̍h tńg来走chhōe上帝,chiah为in带来最后ê一丝希望。

Chia ê「污秽」一词,mā teh表明in过去故意犯罪而惹上帝受气。In穿插「污秽」不洁ê衫裤,表示in雕刻偶像kah建造祭拜偶像ê祭坛ê行为等于污秽了家己kah上帝之间神圣ê关系。

	第10节,chit节讲出犹大灭亡,耶路撒冷城破,巴比伦军队进入圣殿kah王宫,kah所有官员ê厝去搜刮财宝(参考列王记下廿五:8—10)。Á耶路撒冷圣殿原本有规定外邦人是m̄准进入ê,m̄-koh chit-má巴比伦军队chiah不管chiah-ê。In进入圣殿内搜刮所有敬拜上帝用ê物件,运tńg来巴比伦去供奉tī in神明前,表示he是战利品。

	第11节,chit节讲出巴比伦军队围困耶路撒冷城一年gōa,就是城内严重缺乏粮食,为tio̍h beh止饥,人民甚至无惜煮家己ê kiáⁿ来充饥(参考耶利米哀歌二:20、四:10),以求性命ē-tàng「苟延残喘」落去,chit时chūn,in chiah想beh呼求上帝「俯视」in「悲惨」ê境遇,伸手救助in。

经文:

耶利米哀歌 1:12-1:22

注释:

Chit段诗歌是用拟人化ê方式来描述耶路撒冷所遭遇ê惨况,而且真特别ê所在,lóng是用第一人称ê「我」来表达。Chit段诗歌siōng大ê特色是无抱怨,而且承认家己犯错误。

    第12节,chit节讲出亡国了后tú-tio̍h ê惨状,m̄-koh却无得tio̍h任何怜悯ê意思。诗人深信这是因为上帝发出ê「震怒」ê结果。

	第13到15节,Tī chit段诗歌中,诗人用「火烧」、「罗网」、「绊倒」、「弃sak」、「被压得筋疲力竭」、「无力量」、挂tī颔颈上ê「枷担」、「踩踏葡萄仝款」等词来形容以色列人民所受ê苦难。「火」是teh指战争;「罗网」代表灾难缠身无法度脱离;「枷担」代表「失去自由」;「踩踏葡萄」是teh指遇tio̍h报复、被践踏ê意思。Chiah-ê lóng是上帝透过犹大人民ê仇敌来惩罚in ê一种方式。

	Tī第14节thang参考诗篇第九十篇8节,诗人讲上帝清楚人所犯ê一切罪过,无甚么ē-tàng隐瞒上帝对人ê鉴察,koh khah值得注意ê是上帝会kā人ê chiah-ê过犯同齐核算,这mā是希伯来书第四章13节作者所讲ê,每一个人lóng tio̍h赤the̍h-the̍h面对上帝ê审判。

	第16到18节,chit节thang参考第2节、第9节。无人愿意á是ē-tàng安慰犹大人民所受tio̍h ê苦难,因为chiah-ê灾难是tùi上帝来,是上帝对「违背伊命令」ê犹大子民所施行ê审判kah惩罚。Chia诗人讲这惩罚是teh显明上帝ê「公义」,这表示上帝bē冤枉人。Á「青年男女受掠去了」,chit句话表示国家、民族ê未来跟tòe消灭了。   
 
	第19到20节,chia thang看tio̍h耶路撒冷城内「iau饿」ê严重性,有ê人是因为iau饿死tī「街上」,mā有ê人是死tī「厝内」,而会面临死亡ê人不分阶级,包括祭司kah领袖lóng仝款。就算街上因为发生「凶刣」而无出门,mā仝款会活活饿死tī厝里

	第21到22节,tī chit两节中,诗人á是知影有án-ne ê一工,上帝「应允ê日子」,mā就是怜悯、赦免ê日子会来临,hit时上帝就会伸手救助in脱离苦难。Hit时,上帝mā会惩罚chiah-ê因为phah赢而侮辱上帝bē-tàng ê仇敌,包括巴比伦kā tùi圣殿掠去圣物排tī in ê庙宇中供奉等chit种行为,上帝一定会追究到底,上帝惩罚犹大子民ê罪,mā会惩罚巴比伦人ê罪。

经文:

耶利米哀歌 2:1-2:10

注释:

这是第二首诗歌,mā是谈及耶路撒冷毁灭ê情形,描述ê内容比第一首诗歌iáu koh khah详细。

Chit段诗歌是作者亲目看见耶路撒冷城沦陷、被毁坏ê景况。Ná亲像头前已经叙述过ê,上帝亲手惩罚犹大悖逆ê子民,是一点mā不手软。因为每pái他差派先知,他忠实ê奴仆去传达信息,犹大人民lóng是m̄听,反tńg一再拒绝听从上帝奴仆先知ê话。因为án-ne,chiah会引起上帝极大ê忿怒,用严厉ê手腕惩罚in,希望in ē-tàng悔改认罪。

第1到2节,chit两节kah第一章1节仝款,提出ê问题是「询问」:为甚么会发生án-ne hō͘人大tio̍h惊ê事件?如果上帝「连家己ê圣殿mā弃sak了」,ná iáu有甚么bē放手ê?当然无,上帝对犯罪累累ê犹大是「一点á lóng m̄怜惜」,上帝决定hō͘犹大chit-ê「国家kah它ê众领袖蒙羞受辱」,因为chiah-ê人过去就是tī圣殿侮辱上帝,kui个国家ê人民lóng用拜偶像来侮辱上帝。chit-má上帝mā用仝款侮辱ê方式来回应in。

    第3到5节,chit段经文koh一pái提起上帝摧毁犹大kah人民ê情形,就是用他大受气ê「火焰」,ài kā所有ê「一切lóng烧毁了」,包括圣殿kah宫殿,以及贵族ê厝等等lóng成做「废墟」,这mā是后来耶路撒冷kah圣殿ê结果(参考列王记下廿五:9)。Á逃亡ê人,上帝hō͘敌人射出弓箭刣灭in,chiah-ê弓箭就teh代表上帝ê「怒火」。

第6到7节,chit两节诗歌讲述过去ê耶路撒冷城kah圣殿,kah chit-má ê景象对照起来,差不多是完全颠倒;过去以色列人民聚集tī圣殿,为tio̍h是beh敬拜上帝,tī节期来临ê时,聚集tī圣殿欢呼歌唱。M̄-koh chit-má上帝拒绝chiah-ê欢呼ê声音,koh khah将圣殿摧毁,hō͘以色列人民根本无法度聚集做伙。过去节庆ê时,「君王kah祭司」会带领人民向上帝献祭,m̄-koh chit-má,上帝kā圣殿lóng摧毁了,就无得献祭了,因为上帝无欢喜in ê献祭。情景换做另外一种景象,就是敌人进入圣殿,tī拆毁「祭坛kah圣所」kah「宫殿」了后,in聚集tī「上主ê殿宇内」,欢喜得像teh过节仝款「欢呼喧嚷」,chit种欢呼ê声音当然m̄是teh o-ló上帝,却是抢夺胜利品了后发出ê声音。

	第8到10节,chit段诗歌teh描述巴比伦军队拆毁耶路撒冷城墙,倾斜ê情形thang用「准绳」来测量。这情景ná亲像先知阿摩司所讲ê,上帝是用「铅垂线」来量倾斜ê城墙(参考阿摩司书七:7—9)。无论是「准绳」á是「铅垂线」,lóng是teh表示上帝ê惩罚是真准确ê,一点mā不冤枉、不含糊,上帝既然beh惩罚,就bē草草了事,却是确实地执行彻底毁灭ê工作。

	过去原本tī耶路撒冷圣殿ê外院lóng会有人传授教导摩西律法ê规矩,chit-má是「无人讲授律法」,连先知mā得bē-tio̍h「tùi上帝来ê异象」。换句话讲,in就算想beh开始学习上帝ê话语,mā无机会了。因为in ê「君王kah贵族lóng被放ta̍k」,俘掠到巴比伦去了。真chē「父老」而且是「身穿麻衣,头蒙尘埃」,恬恬「坐tī土脚」,用chit种方式来举哀,而少女只有ē-tàng「垂头丧气地坦覆 (thán-phak)tī土脚」表示心中极大ê哀痛。


经文:

耶利米哀歌 2:11-2:22

注释:

Chit段诗歌是teh描述巴比伦军队围困耶路撒冷城期间,城内痛苦ê景况。

	第11到12节,chit两节讲tio̍h耶路撒冷城内饥荒ê严重性,人民已经到à因iau饿而「失明」、心灵受创严重ê地步,而且「儿童kah婴á tī街路上昏倒」,甚至有ê一直向老母哀求ē-tàng得tio̍h食物,m̄-koh结果是只有ē-tàng倒tī「老母怀里慢慢á死去」,这通常是hiah-ê iáu tī哺乳中ê婴á á是幼年ê孩童。

	第13到14节,chit两节thang参考耶利米书第廿七章14节到第廿八章9节,清楚描述先知耶利米谴责hiah-ê专门传达假信息ê假众先知。In ê信息m̄-nā对人民lóng无好处,颠倒ê,是引诱hiah-ê人拒绝听从上帝ê警告,因为in kan-taⁿ会讲取悦人ê话,讲ê lóng是「白贼」,无劝导人民「悔改」,结果是带hō͘人民koh khah大ê灾祸,而且chit种灾祸是大到「像大洋无边无际」,已经m̄是人ê能力ē-tàng解决。

	第15到16节,chit两节thang参考列王记上第九章7到9节。当所罗门完成圣殿奉献hō͘上帝ê时,上帝就bat警告建造圣殿ê所罗门王,如果伊ê kiáⁿ孙不听从上帝ê教示,圣殿就会成做hiah-ê人讥笑ê记号。Taⁿ,chit件事应验ā,因为耶路撒冷城已破,圣殿被焚毁了,因为án-ne,看见ê人lóng teh嘲(sau)笑,特别是以色列民族ê仇敌看见koh khah是畅死,in认为期待已久ê日子「终其尾到à」。

	第17到18节,chit两节提起会有chit种日子来临,是因为上帝对犹大人民ê惩罚,而且这并m̄是临时发生,却是上帝早有计画。只teh等待犹大人民悔改,m̄-koh in无。chit-má只有ê,就是为chiah-ê出现tī目睭前ê灾难啼哭而已。

第19到20节,thang参考第四章10节,耶利米书第十九章9节。可见iau饿ê严重程度,已经达tio̍h无法度形容ê地步,看见「cha-bó͘人teh食家己心爱ê婴á」,而且「祭司kah先知tī主ê圣殿内被刣」,chiah-ê lóng tī说明为tio̍h iau饿ê严重kah惨状。

	第21到22节,tùi chit两节thang看出巴比伦军队进入耶路撒冷进行残酷ê刣戮行为,差不多就是大屠杀,无论是「老年人少年人」、「青年男女」lóng仝款,「无人ē-tàng逃脱」。

经文:

耶利米哀歌 3:1-3:33

注释:

Chit章是第三首哀歌,mā是chit本经册中siōng长ê一章,共有66节。Thang分做三个段落,就是第1到39节;第40到47节;第48到66节。M̄-koh thang kā第一段落分做两段,就是第1到21节;第22到39节,án-ne读起来mā会真顺,而且主题mā清楚。Chit首诗歌ê特色,是每三节是用一个字母,án-ne廿二个希伯来文字母,tú好六十六节。

Chit段诗歌主要是先知耶利米ê自述,讲述家己心内ê痛苦,因为伊传讲ê信息无人beh听。M̄-nā án-ne,伊ê同胞iáu责备伊,讲伊叛国,并掠伊,kā伊关tī监狱里(参考耶利米书三十七:13—16)。Tī耶利米书第二十章、第廿六章、第三十八章等,lóng记载伊心中ê痛,以及被折磨ê情况,thang看tio̍h伊bat有过面临死亡ê威胁,因为án-ne,伊ê心境对上帝ê ǹg望差不多beh消失。

Tī chit段经文中,诗人用「我」、「伊」ê时,lóng是单数teh表达。因为án-ne,有学者认为这是属tī先知耶利米ê心灵世界,伊teh向上帝告白心内ê痛苦kah ǹg望。

    第1到3节,这若是属tī先知耶利米ê告白,伊表示chit-má真正「体验tio̍h痛苦」,而且chit种痛苦是tùi上帝来,而且是一再tú-tio̍h到「打击」。伊ná亲像hō͘上帝「赶入乌暗中」,m̄知应该án怎离开,只有ē-tàng「jú陷jú深」。

    第4到6节,chia提起ê m̄-nā是心灵ê创伤,而且是肉体ê折磨,m̄-nā是「皮肉破裂」,甚至连「骨头」mā被「at断」。Chia讲伊被「强迫」tòa tī「幽暗中」,这是teh指伊被关入枯井中,这口井「井内无水,只有淤泥」(参考耶利米书三十八:6)。

    第7到9节,chia讲先知耶利米被用「铁链捆缚」tio̍h,这mā是古代对待囚犯ê一种方式,即使关tī监狱mā bē卸落来。无论伊怎样呼求上帝,m̄-koh上帝lóng置之不理,拒绝听伊呼求ê声音。这mā隐喻tio̍h上帝bat kā先知耶利米讲,ài伊m̄-thang koh再为犹大人民祈祷,因为上帝拒绝听in祈祷ê声音(参考耶利米书十四:11—12、十五:1)。

	第10到12节,chit三节真清楚讲tio̍h巴比伦帝国ná亲像一只iau饿ê「熊」,mā向一只iau饿已久ê「狮」,mā像猎人看见猎物ê时会「弯弓搭箭」,准备射向「箭靶」。

    第13到15节,准备ê弓箭已经射出,而且是非常准确地射中,结果倒落去ê时,成做大家ê笑柄。就是先知耶利米被关入监牢中仝款,民众teh讥笑伊,hiah-ê假先知koh khah是。Á先知耶利米则痛苦到极点,伊讲「受尽灾祸」ná亲像lim下「苦酒」一般ê艰苦心。

    第16到18节,tùi chit三节mā thang看出受折磨ê惨状,包括「面被按tī土脚擦」,然后「嘴齿」mā被用石子「磨断」,性命中体验tio̍h ê lóng是「痛苦」,tī短短岁月中,对上帝ê期待lóng完全消失了。

	第19到21节,因为身心lóng受tio̍h严重创伤,因为án-ne,所有记忆中,lóng是一种「心灵」ê负担。Ē-sái讲是即使是án-ne,á是心存ǹg望。

	这是第三章ê第二首诗,mā是一首信仰告白ê诗,kah前一首诗歌ê内涵完全无仝,是一首非常好ê诗歌,用来表明对上帝绝对ê忠实、óa靠。

Tī chit首诗歌中,作者开始用「复数」ê「阮」来代表示以色列人民。作者肯定上帝是一个「慈爱永远bē断绝」ê上帝,mā是一个「怜悯永远bē止息」ê上帝,并且是「满有仁慈,bē久长拒绝」人忏悔、认罪ê上帝。

第22到24节,目前一首诗歌讲性命不存有任何希望ê时,chit首诗歌却讲beh对上帝有ǹg望,因为他ê「慈爱永远bē断绝」、「怜悯永远bē止息」,诗人讲ài kā所有ê希望「寄托」tī上帝手中。

第25到27节,诗人非常确定一件事:只要走chhōe上帝ê人,上帝一定会「施恩」hō͘ chit种人。伊呼吁所有走chhōe上帝ê人会「耐心thèng候」上帝ê「救恩」。Chia所讲ê「枷担」,指ê是重税ê负担、战争ê惊惶、sàn-chhiah困苦ê生活,以及各种重大灾难等等。

第28到30节,chit三节是teh回应第27节所提起ê「枷担」。因为án-ne,tī第27节讲「应该tī少年ê时学习负枷担」,原因是「性命tú-tio̍h痛苦ê时chūn」,tī少年ê时经历过,就会成做老人ê智慧kah冠冕。因为「纵然受鞭phah凌辱」,也ē-tàng有坚强ê毅力「忍受」落来。

	第31到33节,chit三节谈起上帝ê特性,就是「满有仁慈」(参考诗篇一○三:8),而且有「坚定不移」ê疼。因为án-ne,性命有痛苦,he绝对m̄是上帝存心beh án-ne对待敬畏他ê人,却是一种训练。

经文:

耶利米哀歌 3:34-3:48

注释:

第34到36节,chit三节lóng用「主必关怀」来形容上帝ê特性;公义ê上帝绝对bē hō͘无公义ê事继续发生,á是袖手旁观,mā bē对冤屈ê事有看kah-ná无看tio̍h,听tio̍h被欺压者哀哭ê声音koh khah bē听而不闻。Chit位公义ê上帝一定会为受冤屈ê伸冤,并且为hiah-ê tú-tio̍h迫害ê人讨回公道。这mā是诗篇ê诗人所讲ê,上帝一定会看顾hiah-ê因为被冤屈而入监狱受苦ê人,上帝必定会垂听in haiⁿ-haiⁿ叫ê声音(参考诗篇六十九:33)。耶稣出来传福音ê信息ê时,就bat引用先知以赛亚ê信息,讲beh hō͘「受掠ê,得释放」,hō͘「受欺压ê,得自由」(参考路加福音四:18,以赛亚书四十二:7)。

第37到39节,chit段诗歌thang参考箴言第十六章33节。如俗语所讲ê:「谋事在人,成事在天。」

哀歌ê诗人讲:「是福是祸,lóng出tī至高者ê命令。」chit句话mā teh隐喻,巴比伦帝国会chiah-ni̍h兴盛,必定有上帝ê旨意,并m̄是它有甚么本等thang成就ná此庞(pâng)大帝国ê势力。相对ê来讲,犹大会hō͘灭亡必定有上帝特别ê旨意,应该是kah它犯罪「受惩罚」有密切关系,若无,bē致使发生chiah-ni̍h重大ê事件。因为án-ne,受苦难,第一个tio̍h反省ê是家己,却m̄是一味地「埋怨」上帝。

第40到42节,ná亲像第39节所讲ê,受惩罚,必定kah人犯罪有密切关系。因为án-ne,「该检讨家己ê行为」是m̄是有真正「归回上主」,却m̄是一直埋怨上帝。Siōng好ê方式,就是「phah开心门,向天顶ê上帝祈求」,á是允准以透过chit种方式,向上帝陈述家己ê过错,祈求上帝ê「赦免」chiah是正确之道。

第43到45节,chit三节讲tio̍h上帝怎样惩罚犹大kah人民。原因就是in ná亲像第42节所讲ê,并无承认「背叛犯罪」,koh khah m̄知tio̍h祈求上帝「赦免」。因为án-ne,上帝回应in ê方式,就是hō͘敌人巴比伦军队「tui-jiok」in,并且是in Tī痛苦中ê哀嚎声音,hō͘上帝ê「密云」hō͘「遮蔽」起来,上帝听无看tio̍h in ê哭声。原本「密云」是上帝用来保护以色列人民免受灾害ê(参考出埃及记十四:19—20),mā是上帝出现kah以色列人民、摩西对话ê方式(参考出埃及记十九:16—17;四十:34—38)。M̄-koh chit-má,上帝用「密云」来隔离他kah犹大ê以色列人民之间ê关系,hō͘ in原本thang被世人看做siōng荣耀ê族群,taⁿ反tńg变成被众人唾弃ê对象,像「垃圾」仝款,人见人厌。

第46到48节,因为会失去上帝ê眷顾,过去所有ê光彩lóng会失去色泽。Tī失败中只有被「仇敌嘲(sau)笑」,mā tī受掠做奴隶之地被敌人「戏弄」ê份。家乡、故国已经被摧毁,犹大国无了,人民tī亡国中只有ē-tàng「tī危险惊惶中过日子」,因为随时随地lóng会有死亡ê可能。诗人亲目睹「同胞所tú-tio̍h ê摧残」,除了「目屎像江河涌流」外,完全bē-tàng为力。

经文:

耶利米哀歌 3:49-3:66

注释:

Chit段诗歌ē-sái讲是一首向上帝祈祷ê诗歌。Tī前一段诗歌lóng是用带领群体会众认罪ê哀歌,因chit首诗人用「阮」来表达。chit-má chit段诗歌则转换做个人向上帝祈祷ê诗歌,用ê lóng是「我」。

第49到51节,诗人tī chia当做证人,伊向上帝哭诉,伊看见ê景象,就是「城中妇女ê遭遇」,心内「伤痛无停」,m̄-koh求上帝ē-tàng tùi天顶「垂顾」chiah-ê残酷ê景象。

第52到54节,诗人继续控诉敌人残酷ê手段,就是「追捕」受难者,ná亲像「追捕鸟á」,hō͘受难者ná亲像惊弓之鸟,四界bih起来避难。M̄-koh mā无法度bih起来得过,因为敌人m̄-nā掠tiâu了受难者,而且是kā in「活活tàn入去陷阱」中,并且「用石头塞tòa」逃生口,而井中ê水teh要「淹灭」,看起来死亡已经来到,诗人讲无koh对性命存有任何希望了。

第55到57节,chia看tio̍h性命ê ǹg望,就是tī极大绝望中,上帝终其尾出声,ài苦难ê子民「免惊」,因为上帝确实是「有听tio̍h」in苦难ê呼声。因为chiah-ê子民已经知影只有「求告」上帝ê名才能得tio̍h性命ê契机。这ná亲像创世记第四章26节所讲ê,塞特ê kiáⁿ以挪士开始求告上帝ê名仝款,后代因为án-ne而延续性命落来。

第58到60节,上帝既然听见了呼求帮助ê声音,就会出手救助。Chit位公义ê上帝一定会替受迫害者「伸冤」,并且会宣告受冤屈ê人「无罪」。因为上帝清楚知影chiah-ê迫害者是「怎样阴险伤害」他ê子民。

第61到63节,仇敌ê「辱骂」声音,上帝会听见;敌人「一切ê阴谋」上帝看kah非常清楚;敌人怎样「设谋造计beh陷害」,上帝lóng了若指掌;in日瞑lóng tī「耻笑」,chit种讥讽ê声音,上帝听得非常清楚,因为án-ne,上帝必定会teh审判ê时一一the̍h出来算帐。

    第64到66节,chit三节mā是诗人ê心声,伊恳求上帝「惩罚」chiah-ê仇敌,「照in ê行为报应in」,chit点mā是圣经一再强调ê观念(参考诗篇廿八:4,以赛亚书五十九:18、六十五:7,耶利米书廿五:14,何西阿书四:9、十二:2)。圣经作者一再强调,上帝是会报应ê神。

经文:

耶利米哀歌 4:1-4:22

注释:

Chit首诗ê特色,就是kā耶路撒冷过去ê光辉对照目前荒废之景况,hō͘人感觉不胜嘘唏;过去ê景象是闪烁如黄金,taⁿ却黯然无光;过去是餐餐山珍海味,taⁿ是饿死街头;过去过ê是奢侈生活,chit-má却tī粪埽堆中chhōe食物;以前ê望族,chit-má则倒街头ê街友;以前身躯硕壮,chit-má则因为缺乏食物而瘦骨如柴等等。Chit种对比,hō͘人一看就知影耶路撒冷已经是一个破碎ê城市,无koh是适合人继续khiā起ê废墟之地。

	第1到2节,「圣殿」是teh指耶路撒冷ê圣殿,而「锡安」则是teh指耶路撒冷。前者,thang tùi列王记上第六章、第七章15到50节等等看tio̍h建造整座圣殿ê情景,ē-sái讲是「金碧辉煌」,圣殿内部差不多lóng是用纯金打造起来ê。M̄-koh chit-má是「黯淡无光」,而且圣殿因为被火烧后,每块石头lóng被拆落来,ná亲像chia所讲ê「石头堆积tī街路上」。当辉煌ê日子内,耶路撒冷ê青年hō͘人认为是siōng有性命力ê,m̄-koh chit-má却是ná亲像破碎ê「瓦器」仝款。

第3到5节,thang参考第二章11到12节、19节。

会发生chit种悲惨ê景况,是因为巴比伦军队围困耶路撒冷城,致使城内食物严重缺乏。Á iau饿严重ê情况tùi第9到10节就thang看出。Chia诗人形容tī iau饿难耐ê情况下,人有时是比起野兽iáu不如,竟然m̄知该怎样为子女生存所需要ê食物chhōe-tio̍h解决方法。饥荒,已经逼kah chiah-ê过去活tī奢华中ê人,taⁿ像落魄ê乞丐般,只有ē-tàng tī粪埽堆中chhōe食物。M̄-koh连chit-ê期待mā成做一种奢求。 

第6节,chit节特别提起「所多玛」,kā hit-ê城变成废墟ê情景来比并chit-má耶路撒冷,诗人耶路撒冷所受tio̍h ê惩罚,远比所多玛毁灭ê情形koh khah严重,所多玛已经彻底毁灭,ná耶路撒冷就无法度想ná亲像怎样ê了。不过诗人强调ê是毁灭所多玛是瞬间,而上帝若beh毁灭耶路撒冷mā是仝款,hō͘人措手不及。

第7到8节,chit两节mā是一种对比句型,讲述过去ê望族过ê生活非常优雅,m̄-nā「精力充沛」,而且是「体格强壮」。M̄-koh chit-má却是「倒街头,无人认bat」,这表示非常落魄,kah过去「洁白」ê皮肤完全无仝款了,chit-má是「面孔比煤炭iáu乌」,而且是「皮包骨头,枯瘦如柴」。

第9到10节,chia讲tio̍h耶路撒冷城内饥荒ê严重程度,已经到à为tio̍h要求生存,老母甚至一定tio̍h「煮家己ê gín-á食」(参考二:20)。若是对照第4节来看,真可能是婴á因饥渴来死,老母为tio̍h beh生存落去,á是为tio̍h hō͘其他iáu活teh ê gín-á免tī饿死,只好kā死去ê婴á煮充饥。

第11到13节,诗人承认会发生chiah-ê悲惨ê结果,是因为上帝发出「大受气」,伊火烧ê「怒火」惩罚了耶路撒冷。比起耶路撒冷昔日ê光辉,kah chit-má荒废ê景况,明明是hō͘人无法度相信,因为它原本有坚固ê城墙(参考耶利米书廿一:13),过去无任何「侵略者ē-tàng侵入」城门。M̄-koh当上帝一放手,就算有铜墙铁壁mā无用。Á会发生chit种事,必定kah in弃sak上帝有密切关系,因为in ê「先知」kah「祭司」lóng犯罪,弃sak上帝了。

先知,原本是beh传达上帝ê信息,m̄-koh in m̄-nā无传出上帝ê信息,反tńg假借上帝ê名传信息,koh khah严重ê是in「奉巴力神明ê名讲预言」,hō͘上帝ê子民行入歧途(参考耶利米书廿三:13)。

第14到16节,过去chiah-ê犹大社会领导ê菁英,taⁿ像过街老鼠仝款,四界流窜,无人愿意接纳in,因为in过去ê恶行,taⁿ害得kui个国家lóng ná亲像悲惨世界一般,因为án-ne,人民kā chiah-ê领导群当做像癞ko病人般m̄敢靠近,无任何人,á是国家愿意收留in。因为知影收留in kan-taⁿ会带来koh khah大ê灾难,一点利益mā无。M̄-nā án-ne,连上帝lóng拒绝chiah-ê领袖、菁英,特别是祭司,koh khah是上帝所忿怒ê对象。因为in m̄-nā无带领人民归向上帝,siōng 可恶ê,是iáu带领人民拜偶像。

第17到18节,chit两节thang参考耶利米书第三十七章ê记载;事件是发生tī西底家作犹大王ê时chūn,mā就是主前597年。巴比伦军队来攻打耶路撒冷城ê时,埃及ê军队来援助犹大,hō͘巴比伦ê军队掉头tńg去。埃及因为án-ne班师tńg来国。M̄-koh就tī chia ê时,巴比伦koh转tńg来攻击耶路撒冷,而chit pái埃及mā来不及派援军来救助犹大。M̄-koh犹大ê领导群却iáu teh苦苦期待埃及援军来救助。M̄-koh chit时仇敌来à,大家知影「完了」,「终局到à」,国家teh beh毁灭ā。

第19到20节,诗人形容巴比伦帝国ná亲像la̍h-hio̍h一般ê凶猛(参考耶利米书四十八:40,以西结书十七:3),有时mā ná亲像「tī山顶tui-jiok」猎物,á是tī「旷野埋伏等待」ê「狮」仝款(参考耶利米书四十九:19)。结果犹大王西底家m̄-nā被掠tio̍h(参考耶利米书五十二:1—11),国家mā因为án-ne宣告灭亡。

第21到22节,chia诗人mā警告以东人别幸灾乐祸,因为发生tī犹大ê灾难,mā会发生tī以东,in bē好gōa chē。先知耶利米就传出上帝beh用巴比伦惩罚in(参考耶利米书四十九:7—12)。

经文:

耶利米哀歌 5:1-5:22

注释:

Chit章ê诗歌主要teh描述沦陷后ê耶路撒冷城,以及犹大ê以色列人民所tú-tio̍h ê生活苦境。

第1到3节,诗人向上帝哭诉,祈求上帝看顾in所受ê「耻辱」,m̄-nā in ê土地(产业)lóng落tī「生份人」(指巴比伦人)手中,in ê房舍mā被侵入掠夺。因为cha-po͘人lóng去参战死去,á是受掠伊去,结果到处可见孤儿寡妇。

第4到6节,chit三节讲tio̍h因为战败,hiah-ê人想beh得tio̍h食物比登天iáu难,连siōng基本ê水,lóng「得付钱」chiah有ê lim,其它ê食物koh khah免讲了。In甚至hông掠去做奴隶,像牛马一般被驱赶,m̄-koh无歇困喘气ê机会,直到thiám死为止。Hiah-ê逃往「埃及」kah「亚述」ê人,认为会真安全,其实in m̄-tio̍h去,因为国家phah败仗,无论gōa chē避难,lóng会hō͘人看bē起,bē比较khah安全。先知耶利米就bat苦劝chiah-ê想beh去埃及避难ê同胞,tio̍h放弃chit种想法,因为这是上帝tī惩罚犹大人民。因为án-ne,in无论怎样逃都无用。上帝会用「战争、饥荒、瘟疫」等方式重罚in(参考四十四:27)。注意第6节所讲ê「亚述人」应该是「巴比伦人」之误。

第7节,thang对照第16节,就会看见记载有明显无仝;前者讲犯罪ê是来自祖先,后者承认家己mā犯罪。Koh再对照耶利米书第十六章11到12节:「上主án-ne讲:『lín ê祖先背叛我去膜拜服事别ê神明。In弃sak了我,不听从我ê教示。M̄-koh,lín比in koh khah 可恶。Lín一直为家己顽劣ê心思所赶逐,不听从我。』」这真清楚ē-tàng看出,并m̄是因为祖先ê罪过延祸下一代,却是in tī苦难中iáu缺乏反省chiah会有chit种想法。

	第8到14节,chit段经文是teh描述亡国后,犹大人遭遇ê苦难,惨状真是hō͘人不忍目睹;包括受人奴役(第8节),iau饿kah破病(第9到10节),妻女被奸污、强暴(第11节),领袖、菁英被刑求(第12节),少年一代受折磨(第13节),少年人丧生了(因phah败仗),因为án-ne,无koh有人弹琴奏乐等等。

	第13节ê「推磨」,这是古代奴役á是仆婢siōng普遍ê工作。

	第14节提起「老人无koh坐tī城门口」。城门口是古代ê法庭,「老人」通常lóng是teh指社区ê长老阶级者,á是有公信力权威ê长者。Taⁿ无法度koh再tī城门口审断人民公案,表示in已经失去司法权,无koh拥有家己ê律法制度。

    第15到18节,chit段诗歌讲出in心中充满悲痛,过去ê荣耀确定已经失落,无koh有任何「华冠」thang彰显荣耀。只有ê就是悲伤啼哭到双眼雾雾无清。过去繁荣ê锡安,taⁿ只chhun「狐狸tī废墟中徘徊」tio̍h。因为kui个耶路撒冷已经成做一座死城。

	第19到22节,诗人表达了强烈ê信仰毅力,即使tī chiah-ni̍h恶质ê困境中,á是相信上帝会拯救in,相信上帝chiah是真正ê主宰、统治者。伊m̄相信上帝会真正「永远拒绝」他ê子民,mā m̄相信上帝ê「忿怒永远bē止息」,不,诗人相信上帝一定会看顾他ê子民所tú-tio̍h án-ne悲惨ê境遇。

第22节诗句ê结尾ná亲像kui卷哀歌ê起头以「询问」提出「为甚么」(参考一:1),tī结束ê时用「询问」提出「kám讲」作结束。

重新查询