重新查询
经文:

约拿书 1:1-1:17

注释:

约拿书chit本经册ê写法kah一般先知文献ê类型真无仝款,原因为chit本经册是用故事ê方式写出来,当然旧约圣经中mā有先知是用故事当做传达上帝信息做题材ê,亲像撒母耳记下第十二章1到4节,先知拿单指责大卫王错误行为就是一个例。M̄-koh像约拿书án-ne完kui篇幅之题材ê,Tī圣经中ē-sái讲是无,而这是kan-taⁿ有ê一本。Koh讲,约拿书ê作者teh谈上帝之爱ê时,只谈上帝ê赦免、赦免,不谈上帝ê惩罚,chit点mā是chit本经册siōng中心ê信息。 

约拿书mā是用一个上帝奴仆先知约拿当做故事主角,讲tio̍h伊对外国人ê排斥之重,反映出当时ê以色列人民ê心结。作者用chit种题材想表达一件事:上帝并无像以色列人民所想像ê hit种狭,却是有丰富ê疼,大大超过以色列人民久长以来所认bat ê上帝。

Chit章谈起上帝命令先知约拿到伊ê对敌者尼尼微城去宣告上帝beh惩罚ê信息。M̄-koh约拿决定逃避上帝chit项指令,m̄-koh上帝决定拣选伊,hō͘伊无法度逃避,即使伊想bih tī深海ê底层,上帝á是仝款kā伊「掠」了tńg来。

第1节,「上主向某某人讲」chit种句型,to̍h是先知文献特有ê文学形式(参考列王记上十七:8,耶利米书一:2,何西阿书一:2,约珥书一:1,哈该书一:1、3,撒迦利亚书一:1)。Chit种写法lóng tī说明一件事:先知所beh传讲ê话语,lóng是上帝beh伊传讲ê,m̄是伊个人ê意思。

Chit节讲约拿ê老父是「亚米太」。在列王纪下第十四章25节有亚米太是「迦特・希弗人」。因为án-ne,thang肯定讲有一位先知名叫约拿,伊是迦特・希弗人,这地点是tī靠近加利利ê附近。Á若根据列王记提供ê chit-ê资料来看,约拿ê背景应该是tī主前第八世纪,mā就是耶罗波安二世ê时代(主前786到746年)。

第2节,上帝beh约拿去对亚述首都尼尼微chit-ê大城(参考三:3)去传讲信息,而信息ê内容只有一点:就是beh「公开责备」hit-ê城人民,hō͘ in知影上帝已经「注意tio̍h in是jōa-ni̍h-á邪恶」,而hit-ê城ê人邪恶ê情形thang参考那鸿书第三章1节。

因为「公开责备」teh表示不留情面,beh kā hit-ê城ê人民所犯ê过错一一指责出来。Ē-sái讲是hit-ê城是亚述帝国首府,是北国以色列ê强敌,身为上帝ê先知到亚述去对kah他国家对敌者「公开责备」in ê罪过,岂m̄是beh伊去送死、受难?何况尼尼微城ê人胆敢做「jōa-ni̍h-á邪恶」ê事,可能会kā公开责备in ê先知杀害?而且亚述人民并m̄-bat上帝,去传讲上帝ê信息,in会听mah?若是对照第四章2到3节ê记载,约拿拒绝ê主要原因,是伊知影上帝ê意思并m̄是真正beh消灭尼尼微城ê人民,而是beh警告in,hō͘ in知影赶紧悔改向善。Á约拿ê态度则无想beh hō͘尼尼微城ê人有chit种机会,伊希望上帝早日消灭in。

第3节,先知约拿决定拒绝接受上帝呼召,伊beh往「颠倒ê方向行」;上帝beh伊去尼尼微城,伊则避行「伊施」(今á日之西班牙西海岸ê直布罗陀)。作者用「伊想,逃到hia就ē-tàng远离上主了」chit句话,形容即使是先知mā有对上帝ê认知错误ê所在。想看看:人ē-tàng逃离上帝ê手mah(参考诗篇一三九:7—8)?

第4节,ē-sái讲是上帝对先知约拿逃避他ê命令ê回应,上帝「hō͘海上刮起大风」,掀起「巨浪打击」约拿所搭乘ê hit条船,hō͘「船差不多被击破」,teh要沉无海里。

Chia「刮起」一字,kah第5节、第12节ê「hiat进」等字ê字根是仝款ê。换句话讲,上帝beh掀起大风来刮起大海浪,ná亲像人the̍h起物件hiat进海里仝款ê轻易、简单,只是举手之劳而已。

第5节,「船员lóng非常惊惶」,因为in面对ê是死亡。就án-ne「ta̍k个向家己ê神明哀呼求助」,这tī每一个宗教信仰lóng会出现。

M̄-koh当大家lóng tī无闲求告in ê神明ê时,独独先知约拿是bih tī船舱「困重眠tio̍h」。其实伊并m̄是án-ne,却是当上帝开始掀起大风涌ê时,伊就已经清楚知影上帝chhōe-tio̍h伊了,因为án-ne,伊ê态度是beh hō͘ hiah-ê船员去无闲,看in ài怎样对抗上帝。因为伊清楚知影he是无用ê,所以伊并无参与kā船顶ê物件phah无去,á是协助船员稳定船ê重心。

第6节,因为先知约拿都无动静,因为án-ne,船长bē了解地摇醒了伊,ài伊也tio̍h起来向伊所敬拜ê神求救。约拿之所以无跟tòe船员ê举动走chhōe上帝ê拯救,因为伊就是beh逃避上帝ê拯救chiah会tùi约帕搭船逃离。Mā为tio̍h beh躲避上帝,伊上船了后故意藏到船舱下脚,伊躲避lóng来不及à,当然无可能beh出面来祈求上帝ê拯救,伊甚至最后iáu要求chiah-ê水手kā伊丢入海中,想用chit种方式ê「死」,á是躲到「深渊」ê所在ê方式,躲避上帝beh伊去尼尼微城传信息ê旨意。

第7到8节,就án-ne所有ê船员就决定用「抽签」ê方式,beh「看māi是什么人ê罪恶」引起chit pái ê「灾难」。「抽签」,这mā是早期宗教信仰共通ê宗教行为,圣经中mā一再出现用「抽签」来认bat上帝ê旨意,亲像约书亚记第七章有关亚干犯罪ê事件,就是透过「抽签」发见ê。耶稣ê门徒犹大死后,彼得in mā是用「抽签」ê方式抽中马提亚接替犹大ê门徒身分(参考使徒行传一:26)。结果chiah-ê船员是抽中了约拿。因为án-ne,chiah-ê船员就要求先知约拿讲出伊ê真实身分,好切实知影发生chit pái灾难ê原因。

第9到10节,chit两节ē-sái讲是先知约拿ê信仰告白,伊讲伊是「敬畏上主」,而chit位上主是「天顶ê上帝」,chit句话tī以色列人民被掠到巴比伦去做奴隶了后,不时出现tī以色列人民ê文学作品中(参考以斯拉记一:2),mā因为chit-ê缘故,有圣经学者认为约拿书应该是tī khah晚期,mā就是以色列人民tùi巴比伦受掠之地tńg来国内后ê作品,这是其中之一个因素。
Koh讲,先知约拿tī chia绍介hō͘ chiah-ê船员认bat伊所信靠ê上帝,乃是一位「天顶ê上帝、是海洋kah陆地ê创造主」,然后koh讲伊to̍h是teh「逃避chit位上主」,chiah-ê话hō͘ chiah-ê船员听lóng惊kah gāng去无停,主要原因是chiah-ê船员从来无听讲过有chit种上帝,连天kah地lóng由他掌管,并且á是创造ê主,这实在是大大超过in所ē-tàng想像ê范围。Á人koh怎样ē-tàng对抗chiah-ni̍h大有能力ê上帝?tī in看起来这是绝对不可能ê。

第11节,chiah-ê船员听先知约拿ê告白后,随时有反应,知影只有拿约the̍h来「处置」,chiah ē-tàng平息chit位受气却是管理天地大海ê上帝。

第12节,in kā先知约拿「扛起来,hiat进海里,风涌就会平静」,伊强调这是因为伊ê「罪过」chiah会起chit pái ê大风涌。

第13到14节,m̄-koh船员显然m̄信,因为in从来无听见过有án-ne伟大ê神,因为án-ne,in想beh抵抗,就「拚命摇桨,ài kā船划到海岸去」,m̄-koh无想tio̍h「风暴jú来jú猛,in无法度前进」,chit时chūn,in chiah知影先知约拿所告白ê chit位神真正是天地ê主宰。因为án-ne,in赶紧改变态度。Chiah-ê船员ê祈祷中有两件非常重要ê内容:一是恳求上帝m̄-thang因为约拿ê事,hō͘ in ê性命受tio̍h牵连。二是明白tio̍h遵照上帝ê旨意做tāi-chì。

值得注意ê是chiah-ê原本m̄-bat上帝ê水手,经历过chit pái海上ê相ián了后,认bat了先知约拿所绍介ê chit位创造天地海洋kah一切万物ê上帝,并且告白了in ê信心,讲beh遵照上帝ê旨意做tāi-chì。其实作者mā是用chit种方式teh说明一件事:上帝ài先知约拿看tio̍h chiah-ê水手tùi走chhōe in本来ê神明拯救,到因为先知约拿简单ê绍介,加上亲身ê经历了后就认bat了chit位伟大ê创造主,希望先知约拿会因为án-ne koh khah应该清楚上帝为甚么beh差遣伊去尼尼微城传上帝受气ê信息ê原因。

第15到16节,chiah-ê水手知影chit位创造天地万物性命ê上帝确实是真正,mā是bē-tàng侮慢ê上帝,因为án-ne,当in告白讲beh遵从上帝ê旨意做tāi-chì了后,就随时听先知约拿ê建议,「就kā约拿扛起来,hiat进海里」。果然,约拿一被hiat进海里,「风涌马上平静落来」。Á chiah-ê水手mā因为chiah-ê所发生tī in身上ê事,tī in心中开始有「大大敬畏上主」ê心,并且mā「下愿beh事奉」上帝。

第17节,约拿书ê作者用第3节约拿行向另外一个方向、第5节约拿上船倒tī船舱中困重眠,以及第12 kah第15节ài chiah-ê水手kā伊hiat进海里等,chit三种方式来说明伊想beh尽所有ê办法,就是beh逃离上帝,躲避上帝ê呼召。M̄-koh当伊行向另外一个方向搭船ê时,上帝hō͘这艘船tú-tio̍h大风涌,hō͘伊即使bih tī船舱下脚困重眠mā bē-tàng安宁,而且一定tio̍h露出面貌被水手看出来伊是一个逃避上帝呼召ê「落走」先知。然后当伊用「死」á是「沉入深渊」ê方式来抗拒上帝beh伊去完成ê使命ê时,上帝koh用「一条大鱼」来阻挡伊,kā伊ân-ân地接tòa,kā先知「约拿吞落去」,hō͘伊tī「鱼ê腹肚里三工三瞑」。

经文:

约拿书 2:1-2:10

注释:

Chit章是描写先知约拿tī鱼ê腹肚内向上帝祈祷ê内容,是用诗体ê方式写出来。Tī结束ê时chūn,以上帝hō͘大鱼kā约拿吐出来tī沙滩顶面做结束。无论是大鱼kā约拿吞入鱼肚内,á是kā伊吐出tī沙滩顶面,作者lóng强调一点:连大鱼mā听从上帝ê呼召,约拿怎样ē-tàng逃走抗拒上帝ê呼召?

现tī先知约拿被大鱼吞入腹肚内,无死。可能tī鱼ê腹肚内真痛苦,因为án-ne,伊向上帝祈祷,而chit篇诗歌就是约拿ê祈祷文,mā是一首祈祷ê诗歌。

真oh想像会tio̍h一个人ài怎样tī鱼肚内生存?mā无法度想像会tio̍h人tī鱼肚内ē-tàng活落去ê镜头?m̄-koh thang理解一件事:讲故事ê时,就m̄是teh论细节ê问题,却是kā重点khǹg-tī故事ê内涵到底是甚么。作者m̄是beh kah读者讲先知约拿怎样tī鱼肚内ê情景,伊是beh描写一件事:这是神迹,当先知约拿被hiah-ê水手kā伊hiat入大海中ê时,伊原本是用chit种方式来表明tio̍h用死来抗议上帝对伊ê呼召。因为án-ne,如果被hiat入大海中,伊就ē-tàng安然死去。

另外一方面,tī以色列文化中,大海是属tī邪恶力量ê世界,先知约拿mā有可能想beh利用chit-ê邪恶世界ê气力来抵挡上帝ê呼召。M̄-koh伊ê计划显然是失败了,因为当伊被hiat入大海ê同时,上帝已经差遣一只大鱼阻挡伊ê计谋,大鱼kā约拿吞入腹肚内。

第1节,chia讲先知约拿tī「鱼ê腹肚里向上主—伊ê上帝祈祷」,这真清楚teh表示:既然是上帝命令大鱼kā先知约拿吞入腹肚内,所以先知约拿tī鱼肚内chiah ē-tàng活teh,这就是神迹。

第2节,先知约拿讲伊「tī遭难ê时chūn呼求」上帝,希望上帝ē-tàng拯救伊。因为会发生chit pái ê灾难,是伊拒绝接受上帝ê呼召惹上帝ê大怒。

Koh讲,先知约拿讲伊现在是tī「阴间ê深ê所在」向上帝求助。因为án-ne thang了解伊所讲ê「遭难」指ê就是现在已经陷入「阴间」中受苦。路加福音描述「阴间」是一个痛苦ê所在(参考路加福音十六:24)。

第3节,chia先知约拿特别提起是上帝kā伊「hiat进深海」中,却无提起上帝差遣大鱼kā伊吞入腹肚内。

Chit节可能是引用诗篇第四十二篇7节ê诗歌,诗人讲上帝用忧伤ê水涌淹灭伊,mā用如大水般ê骚乱向伊怒吼。先知约拿引用诗人ê诗歌,beh描述ê是伊tú-teh tī「海ê siōng深ê所在」,hō͘「大水」、「洪涛」包围teh,chiah-ê词句lóng表示性命面临垂危ê时。

「海ê siōng深ê所在」,表示真大ê苦难,kah-ná性命已经陷入siōng谷底。Á「大水」、「洪涛」lóng是teh象徵先知约拿已经无法度呼吸了,死亡已经来到身边,就快夺行伊ê性命。

第4节,tī chia先知约拿提起伊hō͘上帝赶走,因为án-ne伊「koh khah án怎都看bē-tio̍h上帝圣殿」。「圣殿」,这是以色列人民看做敬拜上帝siōng重要ê所在,因为上帝tòa tī圣殿里,是上帝降临ê所在。以色列人民有一个观念:一个人若是kah上帝隔绝,就是无法度koh再看tio̍h上帝ê面,性命就会陷入孤独无助ê状态,mā是表明性命已经有危机。

第5节,chia提起「海草」,chit种草真强韧,无容易at断。诗人用来形容约拿tī海底被海草缠tiâu伊ê「头」,表示约拿差不多是死定à。

第6节,thang讲kah第5节相对应。Chia thang看tio̍h一个真特别ê语句—「落去到群山ê根基」。Tī以色列人民ê观念中,山ê根基是teh指地siōng深ê所在,它ê根部直落去到海底ê深ê所在。无比chit-ê地方koh khah深之地。因为koh再落去就是「地狱」à。因为án-ne,tī chit地ê根基ê所在有「门闩」,这是区隔地狱之内外ê门。这「门闩」ná亲像第5节提起ê「海草」仝款,chia ê「门闩」kah-ná beh kā先知约拿锁tiâu,m̄ hō͘伊出来仝款,ná亲像第5节提起海草kā约拿缠tiâu m̄ hō͘伊浮上水面仝款,lóng是teh形容性命tī siōng危急ê状况。

上帝怜悯先知约拿,kā伊tùi chit种会置伊tī死海底、地ê siōng深ê所在kā伊拯救出来。换句话讲,如果无上帝伸手,先知约拿必死无疑,因为除了上帝以外,无任何人有能力thang kā一个人tùi绝境中拯救出来。

第7节,chit节提起先知约拿原本想beh尽一切办法beh逃离上帝ê命令,taⁿ tú-tio̍h了性命「快溜行ê时chūn」,伊犹原想beh走chhōe上帝ê帮助。伊讲上帝「tī圣殿垂听」伊ê「祈祷」。以色列人民ê观念是上帝会tùi天顶落来到圣殿ê「至圣所」中,tī hia听人ê祈祷并回应人ê祈求。

第8节,chit节真清楚讲tio̍h:真正神chiah是性命ê庇护者、拯救者,如果敬拜虚无ê神,chit种人必定无法度得tio̍h真神ê救助。先知约拿用chit种话teh形容家己ē-tàng得tio̍h拯救,就证明伊所敬拜ê上帝乃是真神。相对ê,hiah-ê tī死亡边缘无法度chhōe-tio̍h拯救力量ê人,是因为in所敬拜ê神是假神。

第9节,chit节所用ê动词lóng是未来式,而tùi第2到8节所用ê动词lóng是过去式。会有chit种cheng差主要原因是先知约拿现在已经得tio̍h拯救,伊回想过去差一点á就死去,是因为有上帝ê怜悯救助,chiah hō͘伊tùi死亡ê边缘中得tio̍h拯救。现在,伊准备ài o-ló上帝、歌颂上帝,并且beh向上帝「献上牲祭」。

「还一切所下ê愿」,这chit句诗tī诗篇中非常普遍,通常lóng是用tī感恩ê时chūn所讲ê,亲像:诗篇第五十篇14节、第五十六篇12节、第六十一篇8节、第六十五篇1节、第六十六篇13到14节、第一一六篇14节、18节。

「救恩只有tùi上主而来」,chit句话ē-sái讲是约拿ê第二pái信仰告白。第一pái ê信仰告白是tī第一章9节,伊讲家己敬畏ê上帝,而chit位上帝就是「天顶ê上帝,是海洋kah陆地ê创造主」,现在伊soah讲只有chit位上帝chiah是人性命ê拯救者。意思是除了chit位宇宙万物ê创造主以外,人别位无所在thang chhōe-tio̍h拯救ê门道。

第10节,chit节kah第1节相对应;tī第1节提起约拿tī鱼腹肚里向上帝祈求,经过一段祈祷了后,上帝垂听伊ê祈祷,后来「上主命令hit条大鱼」kā约拿「吐tī沙滩顶面」。Án-ne简单ê句话却讲出极大ê信息,作者用chit种话teh kā咱讲:连鱼lóng听从上帝ê旨意、命令做tāi-chì,上帝ê奴仆却不如一只大鱼。当大风、大涌lóng听从了上帝ê话语ê时,人却无愿听从上帝ê话。

经文:

约拿书 3:1-3:10

注释:

Tùi约拿书看tio̍h一个真重要ê信息,就是上帝所行ê神迹。这mā是约拿书chit本小先知文献真特别ê所在,tùi开始到结束,虽然只有短短四章ê篇幅,却是每一章lóng有神迹出现,tùi第一章ê上帝掀起大风大涌,kah用一条大鱼kā约拿吞入腹肚内;第二章描述约拿tī大鱼腹肚内无死去,却是知影悔改求上帝怜悯,然后上帝命令大鱼kā约拿吐tī沙滩顶面;第三章则讲tio̍h尼尼微城ê人民因为听tio̍h上帝对in受气ê信息,就赶紧悔改,而且是tùi国王到家畜lóng总认罪悔改;然后是第四章提起有一丛蓖麻树忽然长大,后来koh被虫咬而枯焦死等等,chiah-ê神迹连续不断出现,而且是每一章lóng有神迹ê记载,这mā是约拿书chit本经册siōng特别ê所在。因为án-ne,有人讲约拿书就是一本描写上帝行神迹ê经册。

Chit章就是记载先知约拿经历过tī大鱼腹肚中ê苦难后,伊决定接受上帝ê呼召,去尼尼微城传出上帝beh伊传讲ê信息。

第1到2节,会有「koh一pái」,是因为第一pái上帝呼召先知约拿ê时,伊抗拒而且逃离。现tī先知约拿知影无法度抗拒上帝ê命令,因为án-ne,当上帝koh一pái ài先知约拿去尼尼微城传他ê信息,伊只有ē-tàng顺服。虽然chit-ê城是伊所无欢喜去ê城市。

上帝ài先知约拿去讲顶pái「吩咐」伊ê话。顶pái就是第一章2节所记载ê,ài伊公开责备尼尼微城ê人民,hō͘ in知影上帝已经注意tio̍h in是「jōa-ni̍h-á邪恶」。

第3到4节,chit pái先知约拿是「服从」了上帝ê「命令」去尼尼微城。这是一个「大城,需要三工ê时间chiah行得完」。对照一下第四章11节,就thang看tio̍h当时hit-ê城ê人口已经高达十二万ê chē,这tī早期社会来讲确实是一个真大ê城。因为án-ne,当上帝一开始呼召约拿去尼尼微城传信息ê时,上帝就提醒约拿知影hit-ê城是一个「大城」。现在上帝koh一pái呼召先知约拿去尼尼微城ê时,koh提醒伊一pái,作者重复两pái án-ne描写,主要目的就是beh hō͘约拿知影上帝jōa-ni̍h-á关心chit种大城,而in ê邪恶已经hō͘上帝无法度忍受。如果上帝真正beh毁灭chit-ê城市,必定会有真chē人死去,所有听tio̍h ê人一定会惊kah gāng去到无法度想像。

原本chit-ê城之大,需要行三工ê时间,ē-sái讲是先知约拿只行一工ê路程就无koh行à。这teh暗示约拿并无尽责kā上帝ê信息传到尼尼微城ê每一个角落。

Chia mā提供了先知约拿传讲ê信息内容,kah本来上帝beh伊去传讲ê信息有差别;tī第一章2节上帝是beh伊去「公开责备hia ê人」,hō͘ in知影上帝已经「注意tio̍h in是jōa-ni̍h-á邪恶」à。Ē-sái讲是chia却讲约拿去传讲ê是:「koh过四十工,尼尼微城会受毁灭!」这到底是怎样一回事?约拿为甚么不按照上帝beh伊传讲ê信息去讲?伊为甚么修改信息ê内容?而且是非常清楚订出毁灭来临ê时间「四十工」,这是先知信息中绝无kan-taⁿ有ê例。Chia并无记落来伊传讲ê信息内容,却是只讲一句话就无了,确实真chē疑问。M̄-koh故事ê精彩mā tú好就tī chia,lóng tī说明一点:先知约拿实在是心m̄甘、情无愿意地去做chit件事。

圣经中有kóa数字并m̄是真确ê数字,却是象徵性ê意义远比数字ê chē少会khah重要。「四十」chit-ê数字mā是其中之一,圣经中谈起kah「四十」有关ê例真chē(参考出埃及记十六:35、廿四:18,马可福音一:13,使徒行传七:23、30、36),lóng tī说明「四十」chit-ê数字有时是teh代表确实ê数字,m̄-koh往往是象徵性ê意义比较khah大。

第5节,「尼尼微城ê人相信上帝ê话」,句话ē-sái讲是kui本约拿书siōng中心ê一句,mā是作者想beh hō͘读者明白ê一节经文。作者beh kā读者讲:只要有人传福音,就会有人听,而且是完全接受。因为尼尼微城ê居民一听tio̍h先知尼尼微传出来ê信息后,随时用行动表现出悔改ê态度,in以「禁食」、「moa麻衣」来表示in真正悔改心意。

「禁食」,Tī圣经中这是真严肃ê信仰功课。「moa麻衣」,这mā是表达哀伤、艰苦心ê方式(参考列王记上廿一:27,尼希米记九:1)。

当先知约拿kā上帝ê信息传出来了后,尼尼微城ê居民一听tio̍h,马上就以真严肃、真诚忏悔ê方式认罪悔改。作者用chit种方式beh凸显出一个事实:m̄-bat上帝ê人,会欢喜听上帝ê话语,而且会认真思考tiâu帝ê话,并且会想办法去实践上帝ê话。颠倒ê,自认敬拜上帝为性命之主ê以色列人民,却听不进上帝ê话,对先知ê信息反应冷漠(参考以赛亚书六:9—13,耶利米书五:1—3,何西阿书十二:10—11)。

Koh讲,koh khah重要ê是悔改ê行动不限tī只有大人,却是连gín-á lóng包括在内,是「城里所有ê人」lóng同齐悔改。

第6节,尼尼微王一听tio̍h他国妇人人民lóng惊惶上帝ê惩罚而认真忏悔,伊「一听见chit-ê消息,就离开宝座,脱掉王袍,moa麻布,坐tī灰中」,这是一种表示真心忏悔ê态度。

第7到9节,chit三节ē-sái讲是chit本经册中siōng精彩ê段落。如果tio̍h讲神迹,真正神迹应该就是尼尼微城中连所有ê家畜lóng听国王ê命令,同齐禁食、moa麻衣悔改。咱无法度想像连家畜lóng禁食m̄食物件,会是怎样ê情景,m̄-koh这并m̄是作者想beh讨论ê问题,kui个故事ê中心是teh说明外族人听tio̍h上帝ê信息了后,就愿意随时悔改,连cheng-seⁿ、家禽mā同齐采取行动。Thang参考创世记第三章18节所记载ê,人犯罪了后,上帝连土地lóng同齐惩罚,有可能有时人mā会利用chiah-ê家畜动物做出犯罪ê工具。Taⁿ in知影上帝ê受气,真心悔改ê人m̄-nā家己悔改,mā赶紧带chiah-ê家禽动物同齐悔改。

尼尼微王随时「离开宝座,脱掉王袍」,chiah-ê动作lóng是teh指谦卑ê态度。

「坐tī灰中」,这mā是古代以色列人民一种表示痛心、悔改ê方式。
一个国王真心忏悔ê态度到像án-ne kā家己当做ná亲像「灰」一般,kah-ná无用ê物件,这是tī以色列人民历代君王中怎样chhōe mā chhōe bē-tio̍h ê例,作者就是用chit种方式teh说明:以色列人民看bē起ê外邦人,却是上帝siōng疼惜ê对象,因为in知影听从上帝ê话,会kā上帝ê话当真,而且照上帝ê话去遵行,koh khah珍贵ê是忏悔ê心意非常明显,án-ne chiah是得tio̍h上帝喜爱ê主要原因。

第7到8节,chit位「尼尼微王」m̄-nā家己tāi先án-ne认真ê态度忏悔,而且iáu向尼尼微城ê人民发出通告,ài in lóng kah伊仝款用禁食表示忏悔。而且对象包括cheng-seⁿ家禽在内。Chit两节所强调ê包括cheng-seⁿ家禽,是teh回应第5节尼尼微城人民「无论大细」lóng总以痛悔ê心进行悔改ê动作。「无论大细」就是teh指包含chiah-ê Tī一般人看起来无甚么性命价值ê动物在内。

国王chhōa人民进行具体悔改ê动作,除了禁食、moa麻衣之外,iáu包括:
一、「每一个人lóng一定tio̍h恳切向上帝祈祷」。Ài beh特别注意ê是尼尼微城ê人并m̄是敬拜上帝ê族群,m̄-koh in却tī听tio̍h先知约拿传出简单ê上帝之信息后,反tńg马上知影向上帝恳切祈祷。Á以色列人民则听koh再听上帝ê奴仆先知无停传出信息,in á是m̄信,koh khah恶质ê态度就是kā上帝奴仆先知一个一个刣死(参考耶利米书四十四:4—5)。所讲「恳切地」,是teh指用siōng真诚ê态度,m̄是虚情假意、应付ê方式。

二、「停止邪恶ê行为」。先知文献中,通常用「邪恶行为」来形容以色列人民弃sak上帝,去拜偶像神明。M̄-koh tī chia是teh指有关伦理道德ê社会行为讲ê。

三、「m̄做强暴ê事」。这是teh指抢夺别人ê财产,像先知阿摩司就bat指责以色列人民kā抢夺tio̍h来ê物件kah财富堆积tī家己ê宫殿中,只为tio̍h beh图谋家己安逸享受,这是非常恶质ê行为(参考阿摩司书三:10)。
第9节,当尼尼微王向伊ê人民做顶面所讲ê宣告了后,并m̄是讲上帝一定会赦免、赦免in,却是讲「mā可能」,是用一种「恳切地祈祷」ê心,期待ē-tàng得tio̍h上帝ê怜悯。

第10节,chit节ē-sái讲是约拿书中所beh传达ê信息中心:上帝是会改变ê;他会因为人悔改向善,而改变他原本beh毁灭、惩罚ê计划。

Koh讲,上帝「看tio̍h」chit-ê动词,thang对照第一章2节ê「注意tio̍h」,表示上帝一直teh期待尼尼微城ê人民会有改变,因为上帝teh等待in改变,好改变他原本ê计划。

「改变心意」,chit句话thang kah第9节ê「mā可能上帝会改变伊ê心意」对照来看,上帝果真正改变了他本来ê计划,原因就是看tio̍h尼尼微城ê人民,上自国王,下到所有ê家畜动物全lóng忏悔,而且是moa麻衣、禁食、坐tī灰上等chiah-ni̍h真诚ê悔改动作,就án-ne感动上帝。

经文:

约拿书 4:1-4:11

注释:

短短ê一本约拿书,重要ê经文kah信息就tī chit章。说明kui本圣经lóng teh述说上帝ê慈爱。Ná亲像诗篇ê诗人tī诗歌中形容上帝ê慈爱是真感心ê:

「上主有怜悯,有恩典,bē 快受气,koh 有丰盛ê 慈爱。他bē 久长责备,mā bē 永远khǹg 受气。他bē 照咱ê 罪过kā 咱处罚,mā bē 照咱ê 罪孽kā 咱报应。因为天离开地hiah-ni̍h koân,他ê 慈爱对敬畏他ê 人mā 是hiah 大!东离开西有gōa 远,他hō͘ 咱ê罪过离开咱mā是hiah远!老父án 怎怜悯伊ê kiáⁿ 儿,上主怜悯敬畏他ê 人mā 是án-ne!
因为他知咱ê 体质,数念咱是土沙粉。(全民版)」(诗篇一○三:8—14)

类似án-ne teh形容上帝慈爱ê诗歌实在非常chē,chit种诗歌m̄-nā是诗篇chiah有,早tī出埃及入旷野,特别是tī以色列人民弃sak上帝,去拜金牛像ê时,上帝确实是bat受气到极点,m̄-koh tòe后tī摩西带领所有ê以色列人民向上帝认罪忏悔ê时,上帝随时回应摩西ê恳求,赦免、怜悯以色列人民(参考出埃及记三十四:6—7)。

	约拿书mā是旧约圣经中teh论述上帝慈悲ê一本经册,mā是tī当代充满、弥漫tio̍h一股上帝会严惩外邦人kah m̄信上帝ê人ê言论中,出现chit-ê本小小经册,确实对当时tùi巴比伦回乡后,极力推动「种族净化运动」ê以色列社会带来一股真特别ê氛围。作者想beh呈现出来ê就是先知约拿心中ê意念,chit位册中主角先知约拿,其实所代表ê就是以色列人民ê信仰心态。Chit章mā是约拿书中唯一个载上帝kah伊拣选ê奴仆先知约拿之间对话ê一章,其它三章都无。

第1节,「对tī chit件事」,就是teh指第三章10节所记载ê,上帝看tio̍h尼尼微城ê人「放弃了邪恶ê行为」,他mā改变了心意,「无kā本来宣布ê灾难降kā in赐福」,先知约拿因此「真无欢喜,非常受气」就是为tio̍h chit件事,理由就是上帝改变心意。

第2到3节,chit两节讲出先知约拿对上帝受气ê原因,伊承认家己tī得tio̍h上帝呼召ê时,若是照上帝beh伊去传达ê信息hō͘尼尼微城ê人民听,而hit-ê城ê人民若因为án-ne而悔改归向上帝,伊就已经预测到上帝会赦免、原谅hit-ê城ê人民,bē毁灭hit-ê城。因为án-ne伊chiah会逃走,拒绝上帝ê呼召。因为tī伊ê心内是尼尼微城ê人民会受tio̍h严厉ê惩罚,原因是hit-ê城做尽了「jōa-ni̍h-á邪恶」ê事,受tio̍h严厉惩罚chiah是所讲公义ê上帝应该做ê事。Taⁿ先知约拿看tio̍h上帝发出了他本来ê特性:「慈悲怜悯」、「不轻易受气」、「满有仁慈」。这mā是先知约拿心中siōng大矛盾ê所在,因为伊tī大鱼ê腹肚中,无死去,深切感受tio̍h上帝ê怜悯、慈悲,救了伊,hō͘伊tī死亡ê边缘中被拯救tńg来。M̄-koh伊却无法度看见上帝kā chit种慈悲怜悯ê疼用tī尼尼微城居民身上。因为án-ne,伊对上帝讲家己「死去比活teh佳哉」来抗议上帝chit种无私ê疼。Chit种用死来向上帝提出抗议ê先知,约拿并m̄是第一个,先知摩西就有过chit种呼求(参考民数记十一:14—15),先知以利亚mā是(参考参考列王记上十九:4),而先知耶利米则诅咒家己出世ê日子,伊认为家己出世ê日子是一个受灾ê日子,甚至iáu诅咒hit位向in父亲传达伊出世信息ê人,讲hit-ê人会「像被上主毁灭ê城」(参考耶利米书二十:14—18)。先知会án-ne求死,甚至认为死比活teh iáu koh khah好ê原因,是因为in teh传上帝ê信息中,tú-tio̍h极大ê挫折感。

其实kui本圣经lóng teh述说上帝ê慈悲怜悯、满有仁慈ê上帝,mā是一个不轻易受气ê上帝。圣经中像约拿书第四章2节绍介上帝chit种特性ê经文真chē,亲像:出埃及记第三十四章6节;民数记第十四章18节;尼希米书第九章17节;诗篇第八十六篇15节、第一○三篇8到9节、一四五篇8节;约珥书第二章13节等等等。

第4节,「你为甚么án-ne受气?」这是上帝teh回应先知约拿受气ê疑问,上帝ê chit句问话,tú好显示出先知约拿kah上帝之间有极大ê差别,ná亲像头前所讲ê约拿容易受气,而上帝则「不轻易受气」。

第5节,当先知约拿看tio̍h上帝改变心意,决定不惩罚尼尼微城ê人民ê时,伊用「抗争」ê方式,表达伊心中ê不满,因为án-ne,伊采取到「城外去,tī城ê东边坐落来」,并且「搭一个棚á」,beh看到底上帝毁不毁灭hit-ê城。

第6到7节,chit两节充分显示上帝ê奇妙作为,m̄是人ê能力ē-tàng阻挡,mā m̄是人ê智慧thang理解。作者用chit两节提供一个重要ê信息—所有万物lóng是上帝创造,chiah-ê受造物lóng顺从上帝ê话语。相对ê,先知约拿并无听从上帝ê话。

上帝「安排一丛蓖麻树」生做快koh高,树荫koh chē。Chit种蓖麻树ê学名叫「Qigajon」,tī伊拉克境内ê底格里斯河边真chē,chit种树成长真紧,长大大约有六到七尺高,叶á长大后kah-ná瓠叶仝款,因为án-ne,thang kā树枝调弯攀tī棚架,án-ne成长出来了后,就thang成做真好ê遮阳树。上帝既然ē-tàng命令蓖麻树真紧之间成长起来,hō͘先知约拿感觉非常「凉爽」欢喜ê原因。M̄-koh伊却无注意tio̍h,这是上帝奇妙ê作为。就ná同伊只传讲一工ê时间,就看tio̍h尼尼微城居民上自国王、下到家畜动物lóng悔改ê动人景象,伊mā无注意tio̍h仝款。

M̄-koh chit种凉爽只隔一个暗时而已,上帝koh随时安排「一条虫来咬chit丛蓖麻树,树就枯焦死了」。Chiah-ê lóng是瞬间内发生ê事,只有上帝奇妙ê作为chiah有办法达成,m̄是一般人ê能力所及。

「hō͘伊感觉凉爽」,chit句话有kóa圣经版本翻译做「消除伊ê烦恼」,á是「hō͘伊免受痛苦」。上帝tī先知约拿搭棚子ê时,mā知影伊会tú-tio̍h日曝ê苦恼,虽然伊坚持tī炎烧热ê气温下坐tī棚子下脚曝日头,m̄-koh上帝á是疼伊,用蓖麻树ê树荫遮盖伊,hō͘伊感觉爽快、凉爽。上帝并无因为先知约拿非常受气,就跟tòe受气,上帝á是用真温柔ê方式kah伊对话。

Tùi第6到8节,作者用「上帝安排」、「上帝叫」等词句当做主词,表示kui个事件ê发生lóng是上帝teh主导号令。圣经讲当上帝ê命令一下,tāi-chì就发生。Kui个宇宙万物ê创造mā是án-ne,lóng是因为上帝ê命令而成。

第8节,「日头出来以后」,上帝koh随时「koh叫烧热风tùi东方吹过来」。Mā因为炎烧热ê阳光照射tī头壳顶,koh加上烧热ê东风一吹,he真正是难挨,致使先知约拿「teh要昏倒过去」,因为án-ne,先知约拿koh一pái「求死」,这mā是伊第二pái求死,第一pái是tī第一章12节,伊ài船员kā伊hiat入海里,he是准备用死来拒绝上帝ê呼召。

Chit节mā是先知约拿第二pái明确表示「死去比活teh佳哉」,第一pái是为tio̍h上帝怜悯了尼尼微城ê人民(第3节),hō͘ hit-ê城原本会hō͘上帝毁灭ê,现在却thang存活落去,伊认为上帝做siōng不应该ê事。Á这一pái则为tio̍h thang供伊遮荫ê蓖麻树死去hō͘伊因为日曝赶到痛苦有密切关系。这thang看tio̍h先知约拿心中确实有真大ê矛盾,伊一方面痛恨尼尼微城ê人得tio̍h上帝ê关怀、怜悯,而免遭毁灭ê运命,另外一方面却为tio̍h一丛蓖麻树遇tio̍h虫咬而枯焦死,致使家己受tio̍h日头曝kah烧热风吹袭艰苦心而想求死。

	第9节,「你因为chit 丛篦麻受气kám 合理?(全民版)」这是上帝回答先知约拿受气所讲ê话。上帝ê质疑地是有意思ê,因为chit丛蓖麻树kah先知约拿并无甚么特别关系,即使讲有,mā只不过是一工ê时间而已,时间非常短促。

	先知约拿以非常肯定ê语句回答上帝ê问话,而且伊ê回答mā显示出伊家己认为是理直气壮,伊kā上帝讲伊是「气tio̍h-ài死去」。

第10到11节,chit两节ē-sái讲是上帝对先知约拿ê教示,mā等于是teh教示以色列人民仝款,因为in对外邦人ê态度,显示出in狭ê心胸。上帝强调hit丛蓖麻树并m̄是先知约拿有为它做过任何一件事,换句话讲,先知约拿只有享受蓖麻树之树荫带来ê凉爽之乐,却无为蓖麻树做过任何栽种、灌ak hō͘伊生长ê工作,却因为蓖麻树lian去死去而发出不满ê声音,甚至iáu理直气壮ê态度讲家己受气lóng是合理,tú好凸显出先知约拿ê自私、无理。尼尼微城ê人民kah cheng-seⁿ对先知约拿来讲,mā是án-ne,先知约拿是一再要求上帝一定tio̍h惩罚in,这tú好讲出了先知约拿ê无知、愚戆。

特别tio̍h注意ê是第11节所提起ê「十二万连左正手lóng分bē清楚ê人」,这是teh指儿童来讲,因为in太年轻,是尚且分bē清楚是非、好bái ê细汉gín-á(参考申命记一:39)。Án-ne,若koh加上成人kah妇女,尼尼微城ê人口必定大大超过十二万ê人数一到二倍ê chē,另外iáu有算不尽ê cheng-seⁿ。

    类似先知约拿chit种心态,tī每一个时代ê基督徒信仰态度中不时出现,mā会像先知约拿仝款,kā家己tùi民族、国家历史中传承落来ê价值、是非准则,用来回应上帝ê疼。咱mā会kā家己所无欢喜ê对象,mā要求上帝跟tòe咱无欢喜,甚至iáu会振振有词地讲上帝mā会像咱仝款无欢喜。亲像咱看tio̍h今á日ê以色列人kah巴勒斯坦人之间ê冲突是án-ne;北爱niâ兰ê英国移民kiáⁿ孙kah爱niâ兰人kiáⁿ孙之间ê冲突mā是án-ne,类似chit种例从来m̄-bat间断过,mā因为án-ne,有真chē看起来原本是单纯ê种族之间ê冲突,并无因宗教信仰ê融入而减轻á是降低,颠倒地,却因为家己信仰上错误ê认知而kā上帝giú来tī chit种族冲突中,而族群之间原本已经有ê紧张koh khah恶化、无法度相容,m̄-nā无帮助信仰成长,iáu因为án-ne hō͘信仰moa了chiok厚ê政治色彩,强迫上帝选边khiā,这是非常悲哀ê事。



重新查询