重新查询
经文:

约翰福音 1:1-1:18

注释:

Chit段经文ē-sái讲是约翰福音书ê「序言」,作者开始用「道」来讲述耶稣ê特质、心思、意念lóng ná亲像是上帝。所以第14节thang讲是kui本约翰福音书ê中心思想:道成做人,tòa tī咱中间充满tio̍h恩典kah真理。

Koh讲,作者ài用「光明」kah「乌暗」这相对ê存在,表明上帝救恩kah罪恶ê对比。

「道」chit-ê字,m̄是kan-taⁿ停止tī理性ê思考,mā是一种行动ê气力。作者tī第四节讲:「道本身有活命,chit-ê活命是人类ê 光。(全民版)」换句话讲,「道」本身就是一股创造ê气力ê存在。



经文:

约翰福音 1:19-1:28

注释:

四本福音书lóng绍介过行洗礼约翰,m̄-koh以约翰福音绍介kah siōng-kài详细。比较特别ê所在tī第19节,行洗礼约翰已经传道一段时间了,而且一定震撼了耶路撒冷当局,in因此派人去进行了解行洗礼约翰ê身分。

A. Tùi第19 kah 24节ē-tàng看出,来询问、调查行洗礼约翰身分ê有两组人,一组是祭司,另外一组是法利赛人。In之所以想了解行洗礼约翰ê身分,主要原因是「犹太地区kah 耶路撒冷ê 民众lóng 去约翰hia,告白家己ê 罪。约翰就tī 约旦河kā in 洗礼。(全民版)」(马可福音一:5),这必然造成极大ê轰动。

B. 作者tī第28节kā咱讲,发生chit件事ê地点是tī「约旦河对岸ê伯大尼」,这地方距离耶路撒冷无远。


经文:

约翰福音 1:29-1:34

注释:

Cit段经文讲行洗礼约翰teh为耶稣见证,讲他就是「上帝ê Kiáⁿ」。Tio̍h注意第29节,行洗礼约翰讲耶稣是「上帝ê羊羔,除掉世人ê罪ê」,这是kah 犹太人宰杀Pôaⁿ过节羊羔ê观念有密切关系,因为Pôaⁿ过节羊羔所代表ê是救赎ê意思。M̄-koh,mā可能是teh表示受难ê羊羔一般,ná亲像以赛亚书第五十三章所描述ê受难 ê奴仆。

经文:

约翰福音 1:35-1:42

注释:

约翰福音书kah头前三本福音书siōng大ê无仝ê所在,就是认为耶稣是kah行洗礼约翰同时传福音,m̄是tī行洗礼约翰入监了后,耶稣chiah开始出来传福音ê事 工。Koh讲,行洗礼约翰kā耶稣绍介hō͘家己ê门徒,其中有一位是彼得ê小弟安得烈,然后由伊绍介彼得认bat耶稣,chit点mā kah其他三本福音书无仝。

行洗礼约翰真清楚家己ê角色,所以伊一看见耶稣,就马上kā家己ê门徒讲,mā hō͘家己ê门徒去跟tòe耶稣,chit种态度chiah是传福音siōng基本ê要件,因为咱就是beh见证耶稣是救主,咱m̄是主角,耶稣chiah是。


经文:

约翰福音 1:43-1:53

注释:

有真chē人认为chit位拿但业就是耶稣12门徒中ê「巴多罗买」,m̄-koh,到目前为止,无确切ê资料thang佐证。前三本福音书mā无耶稣「呼召」 腓力ê记载,只有约翰福音chia记载耶稣呼召伊,ná亲像马可福音记载耶稣呼召彼得兄弟、雅各兄弟,kah税吏利未仝款。腓力跟tòe耶稣后,马上将家己对耶稣ê认bat介 绍hō͘家己ê朋友。这是真有意思ê一件事,mā是咱tio̍h学习ê福音事工,kā咱所认bat ê耶稣,kā家己ê好朋友讲,福音就是án-ne传开ê。
经文:

约翰福音 2:1-2:12

注释:

迦拿婚姻ê宴席,耶稣hō͘水变成酒ê神迹故事,一直是hō͘人欢喜ài讲。请注意,福音书中记载耶稣ài用婚姻ê宴席做上帝国比喻ê材料。如果 chit-ê婚姻ê宴席mā有chit-ê隐喻ê话,上帝国就是用上帝做中心,án-ne就koh khah清楚了,人m̄是上帝国ê主人,上帝chiah是。所以人不要求上帝做甚么事,只有交托、顺服, 上帝家己会phah算,mā知影该作甚么。因为上帝国谈ê是上帝ê主权。

经文:

约翰福音 2:13-2:25

注释:

Chit段记载耶稣洁净圣殿ê故事,四本福音书lóng有记载,m̄-koh,约翰福音书所记载ê siōng-kài特别。作者清楚指出地点是tī「圣殿外院」(to̍h是外邦人 院),而且贩卖ê包括牛、羊、粉鸟,mā有兑换银钱ê商人。而且耶稣是对卖粉鸟ê人讲,「Mài kā阮老父ê圣殿当做市场」,市场是做seng-lí买卖ê所在,商场鬼扛鬼ê pián仙á屡见不鲜,m̄-koh,圣殿是teh敬拜上帝ê所在,怎样ē-tàng有án-ne态度?

注意第19 节,耶稣讲in chit种行踏已经kā圣殿「拆毁」了,m̄-koh伊ài tī「三工之内」kā它重建起来,chit种讲法真清楚m̄是指外型ê圣殿建筑,却是人内心对上帝敬拜ê意思。如果 无真诚ê内心敬拜上帝,即使koh再súi、堂皇ê建筑物mā是枉然。M̄-koh,耶稣讲伊ài tī「三工之内」重建圣殿ê chit句话,却成做伊后来被犹太人宗教领袖chhōe人作假见 证陷害ê理由之一(马可福音十四:58)。

经文:

约翰福音 3:1-3:21

注释:

尼哥德慕是犹太人siōng koân议会ê成员(和合本用「犹太人ê官」,意指为议会成员),mā是法利赛派ê人。伊利用暗时来chhōe耶稣,并且表示伊知影耶 稣是「tùi上帝hia来ê教师」,koh认定耶稣所行ê神迹是因为有上帝ê同在。Án-ne看起来,chit位属tī法利赛派ê尼哥德慕,显然kah前三本福音书所描述ê法利赛人不 太仝款。比较特别ê所在,是伊称呼耶稣「老师」(犹太人kā它称做「拉比」)。换句话讲,这表示伊对耶稣是相当尊崇ê态度,若无伊bē tī耶稣死后带三十公斤 ê「没药kah沉香混合ê香料」beh去裹耶稣ê身躯(约翰福音十九:39)。

A. 耶稣一下看见伊就直接讲tio̍h「重生」ê问题。M̄-koh,尼哥德慕显然对「重生」ê了解无仝款;tī伊ê认bat里,「重生」是koh一pái tńg来到老母ê腹肚里生出来。M̄-koh,耶稣谈「重生」,是teh指性命ê重新koh再造ê意思。因为chit-ê「重」有「顶面」ê意思。

使徒保罗是kā耶稣「重生」ê意思表达siōng清楚ê人,伊讲:「无论甚么人,若kah 基督结联,就是新创造ê 人;旧ê tāi-chì 已经过去,taⁿ lóng 变做新ê。(全民版)」(哥林多后书五:17a)

B. 耶稣chit种回答,其实就是teh kā XX 讲尼哥德慕,神迹m̄是siōng重要ê,重要ê乃是人心灵ê洁净chiah重要。人看见神迹,却无一定看见上帝ê旨意,m̄-koh,心灵洁净ê人, 会明白上帝ê旨意。Ná亲像耶稣tī山顶宝训中所讲ê:「心肝清气ê 人实在有福气,因为in 会见tio̍h 上帝!(全民版)」(马太福音五:8)

C. 第5节应该是chit段谈话ê中心,讲tio̍h一个人「若无法度tùi水kah圣神重生,就无法度成做上帝国ê子民。」水,这是teh指洗礼、洁净ê意思。圣神,是上帝感动人ê心ê气力。 Tùi约翰行洗礼开始,咱看tio̍h伊一再呼吁人tio̍h接受洗礼ê时,一定tio̍h用真实ê心悔改。所以悔改ê人chiah会得tio̍h圣神ê感化,chit种人才ē-tàng成做上帝国ê子民。

D. Tùi第14到21节,耶稣进一步解释伊家己ê角色,就是成做上帝kah人之间ê桥梁,为tio̍h是beh hō͘人因为伊看见上帝拯救ê疼已经降临tī人间。


经文:

约翰福音 3:22-3:36

注释:

第22节讲耶稣tī犹大地区为人行洗礼,m̄-koh,tī第四章2节,koh作了澄清讲:「其实耶稣家己无kā 人洗礼,是他ê 门徒teh kā 人洗礼。(全民版)」Chit段经文mā hō͘咱看tio̍h约翰福音书kah头前三本福音书siōng大ê区别,就是约翰福音ê作者认为耶稣kah行洗礼约翰是同时teh传道,á前三本福音书lóng讲行洗礼约翰入监后,耶稣chiah开 始伊ê传道工作。

第27节是重要ê一节,因为chit节thang看tio̍h行洗礼约翰真清楚家己ê角色,mā hō͘咱看tio̍h伊对耶稣ê身分真清楚,bē因为耶稣ê名声、众望赢过伊,就嫉妒,á是无欢喜。无。「我m̄是基督;我不过是奉差遣作伊ê前驱。」chit句话mā thang讲是行洗礼约翰ê信仰告白。


经文:

约翰福音 4:1-4:41

注释:

第四章是约翰福音tī编辑上真典型ê一章,作者欢喜记述耶稣所讲ê话,kah前三本福音书ê作者偏重耶稣所做ê事工无仝。约翰福音ê作者常常是kā耶稣所做ê事kah伊所讲ê话混合编做伙,而且以伊讲过ê话为主轴。

A. 第1节thang看出法利赛人开始注意耶稣ê行动,因为in已经发见耶稣ê影响力khah赢过行洗礼约翰。

B. 第8到9节提供hō͘咱真好ê资料――撒马利亚人kah犹太人彼此无来往。这是因为历史ê因素使然。主要是犹太人看bē起撒马利亚人,认为in ê血统不纯,甚至kā In看做是「无清气」ê人,只要in the̍h过、摸过ê物件lóng看做无清气ê,这就是为甚么chit-ê撒马利亚女人感觉非常奇怪,耶稣怎样会向伊讨水lim ê原因。Mā tùi chit节thang了解耶稣讲「好ê撒马利亚人」ê比喻之用心à。

C. 虽然耶稣对伊讲ê话,并m̄是伊会了解ê,m̄-koh,chit位撒马利亚ê cha-bó͘人却是一个渴望得tio̍h「活水」ê,伊ê心灵渴慕tio̍h性命ê泉水。

D. 耶稣kā chit位撒马利亚ê cha-bó͘人讲,敬拜上帝,siōng重要ê m̄是地点,却是真实、敬虔ê心灵。任何宗教信仰lóng仝款,如果无诚实、敬虔ê心灵,走去所讲ê宗教圣地敬拜,mā是枉然。Chit对今á日ê基督徒mā是真好ê教示。

E. 传福音ê工作其实无需要甚么大学问,重要ê是真真实地kā耶稣绍介hō͘咱所认bat ê人知影,án-ne就有够。看,chit位撒马利亚ê cha-bó͘人,就是án-ne做,伊kā镇上ê 人讲耶稣kā伊「所做ê事lóng讲出来」,结果hō͘真chē人lóng相信了耶稣。这mā是咱常讲ê「分享信仰ê经验」,就是siōng好ê传福音方式。

经文:

约翰福音 4:42-4:54

注释:

Tī第45节讲加利利人欢迎耶稣,主要原因是in tī耶路撒冷ê时chūn,看见耶稣tī「节期中所做ê一切事」。照第二章23节ê记载,耶稣bat tī耶路撒冷行过神迹。Án-ne看起来,加利利人是因为耶稣ê神迹来欢迎他,m̄是因为耶稣所传讲ê信息来信他,这kah头前ê撒马利亚庄头ê人,因为听耶稣所传讲ê信 息,就相信伊(四:41),确实有真大ê差别。

A. 第46节只有讲是一位官员,并无讲是甚么位阶,真可能是希律手下ê高官。Chit段故事mā thang比较马太福音第八章5到13节,kah路加福音第七章1到10节。

B. 「若m̄是看见神迹奇事,lín lóng是m̄信。」chit句话讲出当时ê人ê信心真脆弱,mā显示出chit位官员ê问题。耶稣并无跟tòe伊去in-tau,只hō͘伊一句话:「去,你ê儿 子会活ê!」佳哉,chit位罗马官员「信了耶稣ê话就tńg去」。神迹mā是án-ne发生,就是无怀疑,坚定ê相信,就必定会发生。

C. 约翰福音ê作者一再ài beh表达一个主题:耶稣ê话本身就是性命ê气力;他 ê话ē-tàng hō͘水变成酒(二:1—10),也ē-tàng hō͘病了而且倒tī水池边达卅八年久ê病人tùi担架 上起来行(五:1—8)。Chit位官员ê gín-á,耶稣只hō͘一句话,就好起来。这就是约翰福音ê作者所beh kā咱讲ê信息:听耶稣ê话,性命会得tio̍h重生。因为伊ê 话,就是亲像神迹一般ê神奇。

经文:

约翰福音 5:1-5:18

注释:

约翰福音书kah前三本福音书无仝ê所在,就是chit本福音书时常提起耶稣到耶路撒冷去,á前三本福音书则讲耶稣是tī传道工作到最后一礼拜ê时,chiah到耶路撒冷城去。Án-ne看起来,tī约翰福音书ê写法,耶稣ê传道工作是行遍包括加利利在内ê kui个犹大地区。

A. 「毕士大」chit-ê名ê意思是:怜悯之屋。这可能kah池水动了ê时chūn,先下水ê病人会得tio̍h医有关,而且tī chia聚集了真chē等待医ê病人(3节)。

B. Kui个故事ê重点是tī第7节,chit-ê病了卅八年ê病人,并无因为行动比别人慢,伊对lian去ê性命失去信心,伊kā耶稣讲tī水动ê时chūn,即使是无人帮助伊,伊iáu 是「想落去」,因此耶稣医好伊。一个人对家己ê性命有信心,这是siōng重要ê。如果一个人连家己lóng无了信心,ná koh怎样ē-tàng期待神迹出现?无可能!

经文:

约翰福音 5:19-5:29

注释:

因为「犹太人ê领袖决意beh杀害」耶稣,除了耶稣破坏安息日ê诫命外,koh khah是kā家己看做是上帝ê kiáⁿ(18节)。所以耶稣开始有进一步ê「答辩」。

Tī chit段经文中,咱注意tio̍h耶稣强调ê几点:
A. 他m̄是凭tio̍h家己ê能力做事,却是上帝ê旨意。
B. 他就是上帝tī世间ê全权代表,信靠他,就是信上帝。
C. tī他ê身上,人thang看tio̍h koh活ê性命。

经文:

约翰福音 5:30-5:47

注释:

Chit段经文真特别,因为耶稣提起行洗礼约翰,原因是早期行洗礼约翰影响真大,真chē人kā伊看做是先知,甚至是siōng伟大ê先知。虽然行洗礼约翰bat kā伊ê学生讲耶稣就是「上帝ê羊羔」(一:36),甚至讲家己「我m̄是基督,只不过是受派来做他ê先锋。』(全民版)」(三:28)而已,m̄-koh,耶稣却明白kā当时ê人讲,他并无需要行洗礼约翰替他作证,他家己ê工作就ē-tàng证明家己是上帝所差遣到世起来ê亮光,上帝家己会为他做证。

A. 耶稣进一步指出chiah-ê想beh kā他杀害ê犹太人宗教领袖,只是teh装饰表面,并m̄是实在认bat上帝ê救恩,所以in ê信仰并m̄是实在ê。

B. 犹太人siōng相信摩西,chiah-ê宗教领袖koh khah是惟有摩西是in ê准则,m̄-koh,耶稣却kā-in讲,连摩西lóng为伊作证!


经文:

约翰福音 6:1-6:15

注释:

这是四本福音书唯一lóng有记载ê神迹――五饼二鱼。约翰福音书siōng特别ê所在,是提供奉献五饼二鱼ê是一个gín-á,而且饼是「大麦饼」,chit种饼通 常是hō͘家畜、禽等动物食用,除非真sàn-chhiah ê人家,若无一般人并无食chit种饼。所以chhun落来ê食物mā只有饼,可能就是「大麦饼」ê缘故。请注意第14到15节, 大家看tio̍h耶稣行chit种神迹,认为他就是大家所期待hit位teh beh来ê先知――拯救者如摩西(参考申命记十八: 18),因此beh拥戴他当王,m̄-koh,耶稣拒绝,家己避开到偏僻ê所在去。

经文:

约翰福音 6:16-6:21

注释:

即使是对加利利海相当老道ê彼得等四位掠鱼出身ê门徒,对这突如其来ê狂风大涌,mā是hō͘不上力。Á当耶稣出现tī水面上时,in原本甚是惊惶,当in知影是耶稣后,chiah欢欢喜喜接他上船。约翰福音ê作者kā重点hē tī最后一句:「船马上达tio̍h目的地。」用来表示有耶稣tī船顶,in ē-tàng排除狂风巨浪ê冲击。
经文:

约翰福音 6:22-6:71

注释:

Ná亲像咱一再提起过ê,众人并无因为耶稣所行ê神迹á相信耶稣,大家「欢喜看」神迹,并m̄是tùi神迹ê出现学习认bat上帝ê慈爱kah救恩。耶 稣就真不细jī地指出众人chhōe伊ê真实问题,结果in就露出了马脚,要求耶稣koh再行神迹hō͘ in看(30节),m̄-koh,耶稣并无án-ne做。因为伊m̄是为tio̍h行神迹而来到世界。

A. 福音事工就是圣神teh做工,这是非常清楚ê,看,耶稣讲:「若m̄是ná差我来ê老父吸引人,无人ē-tàng到我chia来。」伊无因为群众聚集chhōe伊,就将家己pôaⁿ过了应有ê角色。

B. 就ná同在井边kah撒马利亚ê女人谈话ê情形一般,当耶稣讲他就是活水时,ná女人听m̄-bat,现在耶稣对众人讲伊是性命ê食粮时,众人mā是不明其意,甚至连门徒mā lóng感觉耶稣ê「教导太难了,什么人听得入去neh?」

C. 第63节应该是Chit篇讲道ê重点:「hō͘人性命ê圣神,肉体是无济tī事ê。我kā lín讲ê话就是赐性命ê灵。」

D.咱看tio̍h有人因为感觉耶稣ê教导siuⁿ oh得理解á离开他。今á日mā有真chē人原本是基督ê信徒,后来mā离开了,原因kah当时ê人跟tòe耶稣ê情形差不多,多数ê人lóng是 欢喜看神迹,听简单ê道理,总感觉信仰无需要花siuⁿ-chē ê功夫,mā mài费siuⁿ-chē ê精神,希望进天国ê事,像买「麦当劳」仝款简单siōng好。M̄-koh,信仰不是án-ne,基督教ê信仰需要咱用心、用力、用精神去追求。
经文:

约翰福音 7:1-7:24

注释:

当有跟随者离开耶稣伊去ê时chūn,连伊ê兄弟mā对耶稣m̄信任,甚至认为伊是为tio̍h beh出名。耶稣讲:「先知tī 家己ê故乡bē 受尊重。」(全民版)」(四:44)chit句话mā thang用tī伊家己ê厝内人身上。

A. Tòa棚节,这是犹太人三大庆祝节期(Pôaⁿ过节、五旬节、Tòa棚节)之一,这是teh庆祝收割ê活动,时间是tī九月kah十月之间。凡是成年男子tī chit-ê三节期lóng一定tio̍h beh去耶路撒冷朝圣。Chit节期mā是teh记念以色列人民ê祖先bat tī旷野漂流四十年之久,虽然居无定所,lóng是tī帐棚中过日子,m̄-koh,in得tio̍h上帝特别ê恩典á会得thang生存落去(请参考利未记廿三:33—43)。

B. Chit章mā是讨论有关耶稣身分ê一章。Tī第12到15节,虽然所记载ê kah前三本福音书所记载耶稣问门徒hiah-ê人对伊ê了解ê内容无仝,m̄-koh,chit段经文则提起大家想 知影耶稣到底是甚么人,tī第26到27节、40到42节mā提起。咱koh一pái看tio̍h耶稣真清楚表明,伊之所以有hō͘人感觉「真无仝款」ê教导,乃是因为这教导是来自 上帝。约翰福音ê作者一再hō͘咱看tio̍h耶稣ê态度:表明伊kah上帝之间bē-tàng分开ê关系。




经文:

约翰福音 7:25-7:36

注释:

虽然宗教众领袖一直想beh掠耶稣,m̄-koh第30节讲无人下手掠耶稣,原因是「时刻iáu未到」。前三本福音书to̍h án-ne讲chiah-ê宗教领袖是惊众人,因 为众人欢喜听耶稣ê讲道(参考马可福音十一:18、十二:12、十四:2)。第34节是耶稣teh预言他teh beh受害ê话。
经文:

约翰福音 7:37-7:53

注释:

耶稣对撒马利亚女人讲过ê话,tī chia koh对众人大声讲了一pái,m̄-koh,人iáu是无法度理解「活水」ê意义,甚至为tio̍h伊,众人iáu因此起了纷争。

加利利,这tī当时以耶路撒冷做中心ê犹太人眼中,是一个偏远小镇,无受重视ê地区,in受tio̍h先知弥迦ê预言影响(请参考弥迦书五:2),认为基督无可能出tī加利利chit种偏远小镇,in甚至认为加利利连出世先知lóng有困难(52节)。


经文:

约翰福音 8:1-8:11

注释:

Chit段经文是大家真熟悉ê一个故事。
A.听tio̍h 耶稣教示ê 人lóng 感觉真奇妙,因为他ê 教示真有权威,无亲像hiah-ê 经学教师。(全民版)(马可福音一:22)。因此,经学教师kah法利赛人就想beh chhōe耶稣ê话柄来陷害伊,想beh赢tńg来in失去ê尊严pah。

B. 犹太人有三种罪是死刑:一是拜偶像,二是杀死人,三是奸淫。Chit-ê cha-bó͘人既然「是teh行淫ê时hông掠tio̍h ê」,依法是死刑无疑。M̄-koh,in无直接kā伊送去议会审判,故意带来chhōe耶稣问意见,而且tī众人面前问,显然是有意思beh chhōe渣ê。

C. 第7节,耶稣反问ê chit句话ē-sái讲是chit项事件siōng中心ê经文,因为照圣经ê教示,tī上帝ê眼中,所有ê人lóng是罪人(请参考诗篇十四:2—3),莫怪当耶稣提出「甚么人无犯过罪,甚么人就先the̍h石头phah伊」这意见时,大家lóng一个一个行了,而且「tùi年纪siōng大ê先行」。


经文:

约翰福音 8:12-8:20

注释:

Ná亲像头前我讲过ê,约翰福音编辑ê特色,就是欢喜记录耶稣ê言论。Á chit-má耶稣发表chit段言论ê地点应该是tī圣殿(2节),而且处理一位因 为行淫被掠tio̍h ê cha-bó͘人ê事件,所以可能是tī圣殿ê cha-bó͘人院,chia mā是khǹg奉献箱ê所在,只要是犹太人lóng thang聚集tī-chia,mā是圣殿中hiah-ê人siōng欢喜聚集ê所在,因为一 般妇女是无法度进入「男人院」ê。

A. Tī圣殿中ê每一个院(包括外邦人院、女人院、男人院、祭坛、到圣所等)lóng一定tio̍h点灯到隔工早起天亮之时(请参考出埃及记廿七:20—21)。所以当耶稣讲「我是世界ê光」chit句话时,对犹太人来讲,he是相当深刻,而且会感受tio̍h震撼ê。

B. 第13节,当chiah-ê宗教领袖质问耶稣「家己作证」无法度成立时,chit句话mā是根据申命记第十九章15节:「一个证人不足以定人ê罪;至少ài有两个以上ê证人才thang定人ê罪。」(比较本段第17节)耶稣ê回答是上帝就是伊ê证人。

C. 问题是当时ê人lóng kā耶稣ê出身看kah真低,认为伊就是出tī拿撒勒木匠约瑟ê家庭,无甚么显赫ê家世背景,mā无拜过名师学习经典(约翰福音七: 15)。所以in实在无清楚耶稣chit种讲法所代表ê意义。

经文:

约翰福音 8:21-8:30

注释:

第25节ê「你到底是甚么人?」实在问得好,chit句话充分显示in对耶稣ê生份。即使伊行过真chē神迹,讲过真chē上帝国ê信息,in iáu是问讲: 「你到底是甚么人?」这就kah马可福音第四章35到41节,耶稣行风涌平静ê神迹了后,门徒tī非常惊惶中所讲ê「chit-ê人究竟是甚么人,连风涌mā听从伊!」chit句话一 样,即使是亲目chiu金金看见,mā是仝款提出chit种问题。其实咱kám m̄是mā不时teh问chit种问题?

A. 因为耶稣并m̄是属tī人ê世界,伊是tùi上帝来ê。人一定tio̍h相信伊,chiah ē-tàng看见上帝ê拯救。

B. 第30节thang讲是四本福音书共同想beh kā咱讲ê,就是宗教领袖即使听,mā m̄信耶稣ê话,m̄-koh,一般人民却听就会相信。

经文:

约翰福音 8:31-8:47

注释:

约翰福音ê作者siōng大ê努力,就是beh kā咱讲一个主要信息:耶稣来自上帝,信靠伊,就是信靠上帝,因为伊是上帝所差遣来ê。伊tùi上帝领受真理,á上帝ê真理ē-tàng hō͘人ê性命得tio̍h真实ê自由。人是有罪ê人,有罪ê人无真理thang讲。Á耶稣teh传扬ê就是上帝ê信息,因此,伊会讲:「我是道路、真理、活命。若m̄ 是通过我,无人ē-tàng 去到天父hia。(全民版)」(约翰福音十四:6)
经文:

约翰福音 8:48-8:59

注释:

当耶稣对hiah-ê信伊ê犹太人讲in并m̄是真实认bat伊,并且指出in ê问题,是因为属tī「魔鬼ê kiáⁿ」时,in kah-ná起受气。认为耶稣是「撒马利亚人, 并且有鬼附身」,chit句话ê意思真特别,因为当时讲一个人是「撒马利亚人」时,意思就是讲chit-ê人「bē见笑」、「无信而且不忠」ê人,因为犹太人认为撒马利亚人对上帝不忠实,kah外国人结婚,污秽了上帝拣选ê恩典。撒马利亚人另外一个含意是teh指「混血ê人」,tī犹太人眼中是「无清气」ê族群。

In指耶稣是hō͘ 鬼附身,tī前三本福音书中,记载犹太人领袖看tio̍h耶稣医病、赶鬼ê神迹后,看tio̍h众人lóng用欣慕ê眼光teh回应耶稣ê疼时,马上就tī众人面前讲 耶稣是「靠鬼王别西卜赶鬼ê」(马可福音三:22)。chit-má耶稣被指有鬼附身,是因为伊强调「永远不死」ê性命,以及伊讲家己比亚伯拉罕koh khah伟大,甚至koh khah早 存在。Chit种讲法tī当时ê人听起来当然无法度接受,莫怪in m̄-nā认为伊是hō͘ 鬼附身,而且kā伊ê讲法当做是亵渎了祖先ê荣耀,所以想beh the̍h石头phah伊。其实第58 节mā是teh反应第一章1节所讲ê:「宇宙被造以前,道已经存在。道kah上帝同在;道就是上帝。」

经文:

约翰福音 9:1-9:41

注释:

Chit章是用「一个生落来就chheⁿ-mê人」被耶稣医好做基础,谈论ê主题是:心盲、chheⁿ-mê之间ê差别。辅佐chit-ê主题是守安息日ê问题。Thang kā这 个主题kah马太福音第六章22到23节ê经文相对照;马太福音ê经文讲:「目睭亲像人身躯ê 灯。你ê 目睭若金,全身躯就光。 你ê 目睭若花,全身躯就暗。你内面ê 光若暗,hit-ê 乌暗是gōa-ni̍h-á 厉害!(全民版)」一个心盲ê人,siōng大ê特色就是只看表面,m̄知tùi表面看tio̍h ê现象所beh表明ê内在意义。Á一个心眼明亮 ê人,伊会一看tio̍h呈现出来ê现象,马上就看出所beh说明ê信息。

A. chiah-ê宗教众领袖致意ê是守安息日ê规律为甚么无遵守,却bē记得安息日原来ê意义是甚么?一个生落来就靠乞食生存ê人,不bat有人关心过伊生活ê苦难景况,chit-má却因为耶稣tī安息日ê时chūn医好伊,受tio̍h宗教众领袖ê注意,这岂m̄是真荒谬ê态度?

B. 为甚么耶稣会讲chit-ê生落来就失明ê人,「是beh tī伊身上彰显上帝ê作为?」这是一个大家lóng会真自然询问ê问题,mā是siōng难回答ê问题。其实这kah作者写作ê方 式(笔法)有关;tī前三本福音书表达耶稣看见身躯ê残缺受苦ê人,就生出「怜悯」ê心,然后医好病人(请参考马太福音二十:34,马可福音一:41)。 约翰福音ê作者是用「荣耀上帝」做主题,描述耶稣对苦难者ê怜悯态度,所以无论耶稣行甚么神迹,lóng是teh表达耶稣「是tùi上帝hia来ê」(本章33节)、是 「上帝有所赏赐」(三:27),所以作者用chit种方式teh描写耶稣回答门徒ê询问。

C. Chit位生落来就chheⁿ-mê了后被医好ê人,有一个真值得咱注意ê所在,就是伊tī面对宗教众领袖咄咄逼人ê询问,并无惊惶,反tńg是koh khah坚定。伊tùi回答「m̄知」 耶稣人tī tó位(12节),到「伊是一位先知」(17节),进一步koh讲「Chit-ê 人若m̄ 是tùi 上帝hia 来,就无可能做chit 款tāi-chì。(全民版)」(33节),chit种回答就是一个真大ê见证。最后伊遇tio̍h耶稣,就向耶稣下拜(38节)。信仰需要像án-ne成长,若无,就会失去承受上帝tī咱性命中赏赐 恩典ê意义。



经文:

约翰福音 10:1-10:21

注释:

犹太人是游牧民族,因此,真自然tek kā上帝kah in ê关系,比喻成「顾羊人」kah「羊群」。Tī旧约圣经中chit种例真chē,亲像先知以赛亚讲上帝「他beh 亲像牧者顾他ê 羊群,他会用手âⁿ-óa 羊á-kiáⁿ,kā 它抱tī 胸前,慢慢á chhōa hiah-ê hō͘ 羊á suh奶ê。(全民版)」(以赛亚四十:11)。先知以西结讲上帝「会亲自chhōe tńg来他ê羊群。牧人怎样chhōe tńg来失散ê羊,上帝mā会 tio̍h照样chhōe tńg来他ê羊。」「你看,我,我beh 本身去chhōe 我ê 羊,来chhōe kah tio̍h(全民版)」。(以西结卅四:11、15)耶稣tī伊ê比喻中,mā提起顾羊人kah迷失ê羊ê比喻(路加福音十五:4—7),伊选召门徒投入传福音ê 工作,是因为「他一下看tio̍h hiah-ê 群众,就可怜in,因为in 困苦四散,亲像羊群无牧者。(全民版)」(马太福音九:36)现在伊讲家己就是「好ê牧人」,而且「愿意为羊群舍命」(11节)。

另外一点,chit段经文中mā出现福音书作者共同ê特点,就是 耶稣常用「对比」ê方式教导人;亲像chit段经文就是用「好」ê牧人kah「无好」ê牧人作对比,「好」ê牧人会甘愿为羊舍命,甚至hō͘伊ê羊群得tio̍h「丰丰富富」ê 性命。M̄-koh,「无好」ê牧人,ná亲像「雇工」仝款,危险一到,就逃走了,甚至koh khah恶劣ê是像「贼」「是强盗」,只知影偷、毁坏。

经文:

约翰福音 10:22-10:42

注释:

Hiah-ê人一直想beh知影耶稣真正身分,因为伊听见耶稣ê教导真无仝款,看见伊行神迹真有能力,m̄-koh,却m̄知伊到底是m̄是弥赛亚。其实,真正teh注意耶稣言行举止ê人,会tùi耶稣ê身上看tio̍h伊荣耀ê身分,ná亲像路加福音记载耶稣回答行洗礼约翰ê门徒来询问伊身分ê问题仝款,耶稣ài in「Kā所看见所听见 ê」tńg去kā行洗礼约翰讲(路加福音七:22)。Ná亲像hit位生落来就chheⁿ-mê人仝款,看见耶稣后,就相信了耶稣。所以真正ê问题并m̄是在tī耶稣tńg来不回答身分ê问 题,却是在tī怀疑kah相信ê问题。Tī chit二项之间,人tio̍h用甚么态度去认bat耶稣?Chit-ê chiah是问题。福音书ê作者不时记载hiah-ê被社会所鄙视(siùⁿ)ê人,甚至外邦人,lóng是听 到就相信耶稣是弥赛亚、救主(请参考马太福音十五:21—28,马可福音五:27,路加福音七:3),惟有自认真有学问、饱读经册ê宗教领袖phah死lóng m̄相信伊。

想看看,咱是属tī toh一阵人?相信?á是怀疑?kan-taⁿ想beh看神迹,á是听见、读tio̍h、看见就相信?m̄-thang bē记得,耶稣kā咱讲慈悲ê上帝,就是差派伊来拯救咱性命ê,记tiâu chit点,免得咱mā沦落tī kan-taⁿ想beh chhōe出耶稣ê身分,却bē记得他tī咱性命中所赏赐ê极大恩惠。


经文:

约翰福音 11:1-11:57

注释:

这mā是福音书中三个hō͘死人koh活ê神迹,一是耶稣hō͘会堂主管叶鲁ê cha-bó͘-kiáⁿ tùi死里koh活起来(马可福音五:35—43),二是tī拿因城,耶稣hō͘一位寡妇ê独生kiáⁿ tùi死里koh活(路加福音七:11—15),第三个神迹就是chit段。

A. chit一章是用耶稣hō͘已经死去ê拉撒路,tùi死里koh活ê神迹编撰结构起来ê。看,我头前讲过,约翰福音ê作者是以「tio̍h荣耀上帝」(4、40节)描述耶稣行神迹ê 意义。耶稣有医治病人、赶鬼、hō͘死人koh活ê能力,就是来自「上帝ê赏赐」(三:27)。传福音ê工作就是beh有chit种认bat,ē-tàng hō͘一个人信主耶稣,m̄是因人 ê能力jōa好,á是有甚么特权,却是上帝ê赏赐,是上帝ê圣神感动人ê心chiah ē-tàng达成。

B. 第35节「耶稣哭了」,这就是福音书ê作者真重要ê见证――耶稣是确确实实成做人,kah咱人仝款;伊会受气,mā会欢喜,会痛心、mā会啼哭。

C. 当拉撒路ê阿姊马大认为tī末日,已经死去ê小弟会koh活时,耶稣回答却无是án-ne,是「活teh信我ê人一定bē死」。马大一听,马上就表示伊相信耶稣就是「基 督,是上帝ê kiáⁿ儿」。这就是福音书作者一再beh kā咱讲ê,chiah-ê当时社会hō͘瞧不起ê族群――特别是女性,对耶稣有绝对ê信心。

D. 第45节讲真chē犹太人看见神迹就相信了耶稣,m̄-koh,iáu是有真chē人m̄信,chiah-ê人主要就是宗教领袖,in iáu为tio̍h耶稣hō͘死人tùi死内底koh活ê神迹开会,tī会中竟然讲:「若是hō͘他án-ne舞搞落去,大家lóng信他,罗马人会来掳夺咱ê圣殿kah民族ê!」这thang hō͘咱明白,in m̄信ê问题,并无在tī耶稣行神迹á无,in所关心ê是 「圣殿」ê保存kah民族ê兴衰。M̄-koh,人若是对上帝无信心,即使有保存siōng美丽ê建筑物,mā是枉然。

E. 第49到50节tio̍h kah第十八章13到14节同齐看。

F. 看,in想beh杀害耶稣,并m̄是耶稣无行神迹hō͘ in看,连死人lóng koh活ê神迹mā已经显现在in面前了,in iáu是m̄信,ná亲像作者tī第十二章37节所讲ê:「伊 虽然tī in面向前行过真chē神迹,in iáu是m̄信伊。」因为in所考虑ê,m̄是耶稣ê真正身分,却是in既得ê利益――政治权力、利益,会因耶稣所带来天国信 息遭遇tio̍h消灭,án-ne chiah是担忧ê问题。
经文:

约翰福音 12:1-12:8

注释:

Tùi第十二章开始,约翰福音kah头前三本福音书有契合――Pôaⁿ过节前一礼拜,耶稣进入耶路撒冷。Tī chit-ê chìn前,约翰福音所记载耶稣ê传道工作,lóng是加利利kah耶路撒冷两地来tńg来奔走传上帝国信息。

A. 约翰福音ê作者认为用极珍贵ê纯nah哒香油膏耶稣ê,是拉撒路ê阿姊马利亚,chit种写法表示伊是用感谢ê心来报答耶稣对伊家庭ê疼。

B. 比较特别ê所在是,约翰福音ê作者认为出卖耶稣ê犹大是一个对钱财有贪婪之心ê人。Chit种写法强化了犹大出卖耶稣是为tio̍h钱ê缘故ê论证。


经文:

约翰福音 12:9-12:11

注释:

Chiah-ê宗教领袖真正残忍至极,in想beh kā拉撒路mā刣死,用chit种类似「刣死人灭口」ê方式,thang堵塞众人teh传颂耶稣hō͘拉撒路tùi死内底koh活ê神迹。真hō͘人怀疑in ê信仰是甚么内容!莫怪马太福音ê作者会收集真chē耶稣谴责chiah-ê宗教领袖是真chē灾祸ê原因(请参考马太福音第十三章)。
经文:

约翰福音 12:12-12:19

注释:

约翰福音ê作者特别强调众人用迎接君王、英雄凯旋ê方式,迎接耶稣进入耶路撒冷。

A. 第13节the̍h棕树枝迎接耶稣入城,这mā是基督教会「棕树节」ê由来,就是受难周ê第一工。Chit节ê颂赞诗句是采用诗篇第一一八篇26节,原本是用来歌颂战争 胜利ê。通常tī感恩节日ê时chūn用chit首诗。原文用亚兰语「和散那」,意思是「耶和华ah,求拯救!」后来tī歌颂o-ló上帝ê时,成做「感谢上帝ê拯救」。

B. 第15节是引用旧约撒迦利亚书第九章9节ê经文。是先知预言tī he将来得tio̍h拯救ê日子,hiah-ê人beh歌颂上帝ê话。

C. 第18节thang比较第十一章47到48节,就会koh khah清楚in beh除掉耶稣ê原因。

经文:

约翰福音 12:20-12:26

注释:

这是约翰福音真特别ê一段资料,讲tio̍h希腊人mā想beh见耶稣。Chiah-ê希腊人真可能就是hiah-ê已经归化犹太教ê外国人,in mā会tī Pôaⁿ过节chit种重要节期tńg来到耶路撒冷去朝圣。可能是tī圣殿中听tio̍h耶稣ê言论,á是tùi群众中得tio̍h关系耶稣ê种种事迹,因此想beh见耶稣。

第24到25节,koh hō͘咱看tio̍h耶稣对性命ê看法――无「死」ê性命观。这mā是基督教信仰ê siōng大特色,性命是无死亡ê,是永生ê。只要咱愿意kā性命奉献出来,性命就会滋生不息,永续落去。

经文:

约翰福音 12:27-12:50

注释:

Chit段经文thang讲是耶稣tī预言家己ê死to̍h是teh beh来临。第35节mā是作者siōng ài用ê话句――光kah乌暗。光teh表明ê就是耶稣菑v,乌暗则说明 撒旦掌权,为tio̍h是beh hō͘人拒绝上帝ê救恩。伊ài群众好好á把握机会,知影伊就是tùi上帝来ê光。Ná亲像本册ê起头作者所讲ê,虽然乌暗beh掌权,m̄-koh,当「Chit-ê 光照tī 乌暗中,m̄ -koh,乌暗m̄ 接纳光。(全民版)」(一:5)仝款。

A. 第38节是引用自旧约以赛亚书第五十三章1节,第40节则引用自以赛亚书第六章10节。

B. 注意第41节,这mā是福音书共同ê特点,说明旧约先知ê预言,就是teh为耶稣ê来临准备ê。Mā就是讲,旧约预言新约,新约就是实现旧约ê预言,á耶稣就是新约ê记号。


经文:

约翰福音 13:1-13:30

注释:

这是一段真出名ê故事――耶稣为门徒洗脚。福音书ê作者一再kā咱讲,耶稣知影人ê心思意念(马可福音二:6—8、十二:15,路加福音六:8),ná亲像现在他mā知影犹大beh出卖他仝款。

A. 洗脚,这是中东地区ê风俗,因为当时ê人通常lóng是穿一种类似凉鞋ê便鞋,路上灰尘真chē,á是雨天就真容易hō͘脚沾满了泥巴。因此,差不多每一个家庭ê门口lóng会放 置水缸,án-ne进入房屋chìn前就ē-tàng先kā脚洗清气。Á接待人客siōng热情ê方式,就是beh厝里ê仆人出来替人客洗脚(请参考路加福音七:44),á是替人客擦干脚上 ê水。耶稣tī chia扮演ê角色tú好是一个卑微ê仆人所ài做ê工作。这mā就是使徒保罗teh描述ê耶稣:「他颠倒piàⁿ 空家己,取奴仆ê 身分出世做人,成做人ê 形体出现。(全民版)」(腓立比书二:7)

B. 为甚么耶稣beh án-ne做?原因真可能kah chit件事有关,就是tī往耶路撒冷ê途中,门徒一直lóng tī争tio̍h什么人比较大,chit件事路加福音比较特别,讲门徒kah耶稣同齐守Pôaⁿ过节晚 餐ê时chūn iáu teh争(廿二:24),因此,伊就利用ná机会the̍h水替众门徒洗脚,并用án-ne卑微ê角色教导in,ài in「mā应该彼此洗脚」。

C. 请注意,耶稣mā替犹大洗脚ah!因为tī第30节记载犹大是tī耶稣为伊洗过脚后chiah离开ê。这就hō͘咱thang思考真chē事,一是耶稣替犹大洗脚,mā是希望犹大ē-tàng tńg来心 转意。伊koh一pái提供了机会,可惜犹大并无pái脱撒但ê诱惑。Koh讲,耶稣并无因为犹大án-ne对待伊,就马上拒绝伊,á是当众拆破伊ê真面目,伊希望用chit种方式 转变犹大ê念头,结果iáu是失败了。三是耶稣已经讲出了「ná kah我同齐食饭ê人竟用脚踢我」(比较诗篇四十一:9)án-ne重ê话,m̄-koh并无唤醒犹大ê心,可见一 个人如果被撒但附身,想beh挽tńg来有时lóng真oh neh。

D. 第9到10节,当彼得要求耶稣连伊ê手、头lóng tio̍h洗ê时chūn,耶稣讲只要洗脚。洗脚是siōng基本ê,m̄-koh,身躯就一定tio̍h家己去洗。Ná亲像洗礼是siōng基本ê信仰告白,á是接受基督教信仰ê siōng早阶,其他就一定tio̍h家己来,总无法度家己lóng m̄做,lóng beh靠别人ah。
36. 十三:21—30节,当犹大iáu是不醒悟ê时chūn,耶稣koh一pái用公开宣告ê方式,主要目的iáu是希望犹大ē-tàng tńg来转心意。Tùi第26节ē-tàng看出犹大显然是坐tī耶稣ê身旁 无远,chiah ē-tàng真轻易地the̍h ùn过佐料ê饼hō͘犹大。Koh讲,比较第27到29节,耶稣对犹大讲「你ài做ê,快去做pah」,其他门徒显然并无清楚耶稣对犹大讲了些甚么, án-ne看起来,耶稣是非常贴近犹大ê耳边讲chit-ê话,mā thang证明犹大是坐tī耶稣身边。

第30节讲犹大出去ê时chūn,「to̍h是乌夜」,这是约翰福音书作者siōng欢喜用ê笔法,作者用「乌夜」表明「罪恶」,á是「恶势力」ê猖獗。相对ê,用「日时头」表明「光明」ê意思。
经文:

约翰福音 13:31-13:38

注释:

Kui本约翰福音书ê重点就是tī第34节,上帝疼咱,chiah会将他ê独生爱子耶稣赐hō͘咱,主要目的就是ài咱mā会彼此相疼。基督教ê信仰 就是tùi chia开始ê。如果无爱,就无法度见证上帝拯救ê信息。约翰一书ê作者án-ne讲:「亲爱ê 兄弟姊妹,咱tio̍h 相疼,因为疼是tùi 上帝来ê。有疼心ê 人是上帝ê kiáⁿ 儿,mā bat 上帝。 8 无疼心ê 人m̄ -bat 上帝,因为上帝是疼。(全民版)」(约翰一书四:7—8)

38.Tùi第十四 章开始到第十七章等四章,lóng是记载耶稣对门徒所讲ê话。我tī前面「读约翰福音书」乙文中mā讲过,约翰福音书ê特色就是欢喜记载耶稣ê言论,对耶稣所做ê事 工并无啥重视,这kah头前三本福音书差异真大。因为头前三本福音书是偏重耶稣所做过ê事工,对伊ê言论记录并无啥多。

A. chit段话mā是tī最后ê暗顿(Pôaⁿ过节ê暗顿)中讲ê,这mā是约翰福音书siōng大ê特色,因为tī前面三本福音书lóng无记载耶稣tī最后暗顿讲甚么话,除了讲tio̍h关于「圣 餐」ê事外,其他差不多lóng未记载。M̄-koh,约翰福音书ê作者却用长到四章ê篇幅记载耶稣对众门徒ê谆谆教导。比较特色ê所在是,chit段教导中,伊真清楚kā xx讲门 徒们,性命是有ǹg望ê,并且是bē孤单ê,á chit种ǹg望kah充满性命之力,是上帝tùi天起来ê赏赐。

B. 耶稣会án-ne kā门徒讲们chiah-ê话,siōng主要ê原因是伊知影家己teh beh受掠受难,因此,当他对门徒讲「Lín中间有一个人beh出卖我」 ê时chūn,必定tī门徒中间造成真大ê大tio̍h惊kah骚动。然后他继续对门徒讲他beh去一个所在,是in无法度跟tòe他去ê,chit-ê话mā必然引起众门徒ê忧虑。因此,他开始讲出真chē安慰、鼓励门徒ê话。
经文:

约翰福音 14:1-14:14

注释:

Tùi第十四章开始到第十七章等四章,lóng是记载耶稣对门徒所讲ê话。我tī头前「读约翰福音书」文中mā讲过,约翰福音书ê特色就是欢喜记载耶稣ê言论,对耶稣所做ê事 工并无啥重视,这kah头前三本福音书差别真大。因为头前三本福音书是偏重耶稣所做过ê事工,对伊ê言论记录并无啥多。

A. chit段话mā是tī最后ê暗顿(Pôaⁿ过节ê暗顿)中讲ê,这mā是约翰福音书siōng大ê特色,因为tī头前三本福音书lóng无记载耶稣tī最后晚餐讲甚么话,除了讲tio̍h关系「圣餐」ê事外,其他差不多lóng未记载。M̄-koh,约翰福音书ê作者却用长到四章ê篇幅记载耶稣对众门徒ê谆谆教导。比较特色ê所在是,chit段教导中,伊真清楚kā众门徒讲,性命是有ǹg望ê,并且是bē孤单ê,á chit种ǹg望kah充满性命之力,是上帝tùi天起来ê赏赐。

B. 耶稣会án-ne kā门徒讲们chiah-ê话,siōng主要ê原因是伊知影家己teh beh受掠受难,所以当他对门徒讲「Lín中间有一个人beh出卖我」 ê时chūn,必定tī门徒中间造成真大ê大tio̍h惊kah骚动。然后他继续对门徒讲他beh去一个所在,是in无法度跟tòe他去ê,chit-ê话mā一定引起众门徒ê烦恼。所以他开始讲出真chē安慰、鼓励门徒ê话。

Tī chit-ê四章中间,每一章lóng有它特别强调ê内容:
A. 第十四章,一、他一再强调疼他ê人,就beh遵守他ê命令(第15、21、23、24、31节)。二、他kā咱讲,奉他ê名,无论求甚么,他lóng会成全(第 13、14 节)。三、他去了后,iáu会koh再tńg来,去是为咱预备地方ê(第3、18、28节)。四、他kah天父之间ê关系亲密结合做伙,认bat他,就是认bat天父。他tī天父生 命里,天父mā tī他内面(第7、10、11、23节)。

B. 第十五章,一、以葡萄树做譬喻描述他kah咱之间ê关系。二、天父――耶稣――咱,这三者之间结联做伙。三、特别提起,奉他ê名,无论向天父求甚么,天父定会赐hō͘咱(16节)。

C. 第十六章,一、他koh一pái提起他teh beh离开tńg去天父ê所在,并且用真慎重ê语句讲:「到hit 日,lín bē koh 问我甚么。我实在kā lín 讲,lín 奉我ê 名对天父所求 ê,他 lóng 会赏赐 hō͘ lín。(全民版)( 23节)二、koh一pái强调他kah咱是结合做伙,藉tio̍h他,天父mā kah咱结合做伙。

D. 第十七章,是耶稣基督ê祈祷文,总共有26节。Mā是四本福音书中siōng长ê一篇祈祷文。Thang分做三部分,就是先为家己祈祷(1到4节),koh讲为门徒代祷(5到19节),最后是为所有信ê人祈祷( 20到26节)。

十四:1—14节,耶稣对门徒siōng大ê应允就是伊去了后,iáu会koh再tńg来。Chit点一直是基督教会坚持基督耶稣会koh再临ê主要ê因素,因为这是耶稣亲嘴讲ê。当伊beh升天ê时chūn,mā「有两个穿白衫ê人khiā tī门徒身边」,对门徒讲:「加利利人,lín ná 会khiā tī chia teh看天? Chit 位离开lín 受接上天ê耶稣,lín 看他án-ne 上天, 他mā 会照án-ne koh 来。(全民版)」(使徒行传一:11)问题是甚么时chūn chiah是耶稣会koh来临ê时刻?是koh活了后neh?iáu是tī人死去ê时chūn?á是世界末日ê时刻?chit-ê直是真 gōa人想beh知影ê,m̄-koh,耶稣并无说明。

A. 多马,这是门徒中hō͘咱印象深刻ê一位,因为伊bat讲beh亲手摸到耶稣,chiah beh相信耶稣是真正koh活(约翰福音二十:24—25)。伊问耶稣,既然m̄知耶稣beh去ê所在,「怎样会知影hit条路?」怀疑,并m̄是错误,重要ê是会提出来,á m̄是隐藏tī心内不讲。另外一点,对怀疑siōng好ê解惑方式,就是chhōe,努力chhōe。耶 稣讲chhōe必定会chhōe-tio̍h。如果kan-taⁿ会怀疑,却m̄知chhōe,怀疑永远bē解开,答案bē家己出现。

B. 「我是道路、真理、性命;若m̄是藉tio̍h我,无人ē-tàng到老父hia去。」这thang讲是耶稣对门徒,mā是对咱siōng重要ê宣告。Mā就是头前我讲过,耶稣一再强调ê,认识伊,就是认bat上帝仝款。Chit句话mā表明耶稣kah上帝之间有bē-tàng分ê关系。其实在犹太人ê观念中,所谓真理、道路kah性命是联做伙ê,无法度分开。Mā就是讲,有 真理ê所在,chiah有性命thang讲,因为真理是人性命生存之道。诗人án-ne写讲:「上主ah,求祢kā 祢ê 道路指示我,我beh 照祢ê 真理来行;hō͘ 我用专一 ê 心敬畏祢 ê 名。(全民版)」(诗篇八十六:11)咱thang tùi诗篇中看tio̍h真chē类似ê诗句,lóng是写tio̍h上帝就是真理,他ê话就是性命ê亮光(一一九:105),是性命ê道路(十六:11)。耶稣用chit句「若m̄是藉tio̍h我,无人ē-tàng到老父hia去」,已经明白地讲出,伊就是上帝tī世上ê记号。就是ná条通往上帝之家ê道路。

C. 第13到14节,耶稣重复讲用他ê名向上帝祈求,必定会有所得。因为他就是祈祷ê保证者。这就是咱今á日祈祷ê时chūn,奉靠主耶稣ê名求ê原因。


经文:

约翰福音 14:15-14:31

注释:

Tī第16节「慰助者」(和合本用「保惠师」),tī希腊文原本指ê是律法顾问ê意思,á是「辩护者」ê意思。Tī约翰一书二章1节,作者用 chit-ê字指「慰助者」就是koh活ê耶稣基督。Á tī第17节特别指明这「慰助者」就是「真理ê灵」。所谓「真理ê灵」,是teh指圣神ê意思。换句话讲,圣神是帮助人 认bat上帝ê主要源头。这mā就是基督教信仰所讲ê,一个人ē-tàng认bat耶稣,是因为圣神作工ê结果,m̄是人ê气力ē-tàng hō͘人认bat上帝tī基督耶稣里ê救恩。

A. 第15、21、23、24节lóng提起「遵守耶稣ê话」,就是爱伊ê人。这是真重要ê信仰功课。明白耶稣ê话,并且依照伊ê话去行,án-ne chiah ē-tàng得tio̍h伊tī上帝面前 ê保证,因为伊就是咱性命ê「慰助者」(保惠师)。咱tùi第十四章中thang看tio̍h耶稣一再强调遵循伊ê话去行ê重要性;第15节:「Lín若爱我,就beh遵守我 ê命令。」第21节:「凡接受我ê命令并且遵守ê人,就是爱我ê人。」第23节:「爱我ê人lóng会遵守我ê话。」第24节:「无爱我ê人就不遵守我ê话。」 第31节:「为tio̍h beh世人知影我爱我ê老父,所以我遵行伊所命令ê一切。」耶稣bat讲过:「遵照上
帝旨意ê 人就是我ê 兄弟、姊妹kah 老母。(全民版)」(马可福音三:35)咱thang讲,kui本圣经lóng是提醒咱一点:遵行上帝ê话,确确实实地遵行上帝ê教示。无论是tī旧约á是新约,lóng是以chit-ê主题作为编辑ê主要主轴。

B. 第27节是真重要ê一节,耶稣讲伊留落来「平安」,伊留落来ê「平安」kah世人所留ê平安无仝款。为甚么?tī希伯来文,「平安」指ê是有含祝福ê意思。包括了 「健康」kah「财富」、「长寿」kah「喜乐」、「和睦」kah「美满」等等。Tī希腊文它指ê是「无战争」,á是「停止战争」ê意思。所以咱看tio̍h希伯来文所讲 ê「平安」意思比较广阔。M̄-koh,请注意,耶稣tī chia所讲ê「平安」,是teh kí上帝国讲ê。所谓上帝国,是teh指用上帝做中心ê所在。Án-ne讲起来,一个人ê性命若是 用上帝做中心,伊ê性命就是kah上帝结合做伙ê。Mā就是讲伊ê性命里有上帝同在,无论经过怎样ê境遇,á是tú-tio̍h怎样ê困境,lóng会有上帝ê同在。Chit种性命,是赢过死亡ê性命,是超越死亡ê气力,因为tī上帝ê内面,无死亡,只有永生。因为上帝是性命ê创造者,永恒性命之主。

经文:

约翰福音 15:1-15:17

注释:

Tī巴勒斯坦有四种出名ê果子,就是葡萄、无花果、橄榄、石榴。其中葡萄、无花果是犹太人siōng ài用来比喻in kah上帝之间ê关系。所以当耶稣提起葡萄树ê时chūn,门徒真清楚he是指甚么讲ê。

A. 耶稣koh一pái说明上帝――他――咱三者之间ê关系。Ân-ân结连tī耶稣基督性命里,就是活tī上帝ê救恩中。

B. 请注意耶稣tī chia特别讲「真」葡萄树。为甚么tio̍h用「真」?「真」就是kah「假」是相对ê。先知以赛亚kah耶利米lóng bat指责以色列人民ná亲像变了种ê「葡萄」,kah原 本上帝所拣选ê上等ê品种无仝款(以赛亚书五:4,耶利米书二:21)。这mā teh暗示了耶稣teh谴责犹太人众领袖ê虚假(请参考马太福音第廿三章)。

C. 第11到17节,耶稣真清楚讲tio̍h跟tòe他ê人,性命会有喜乐,mā是极大ê祝福。因为tī伊ê内面将tùi「奴仆」ê身分提升到「朋友」ê亲密关系。

D. 第16节是真值得重视ê一节,chit节mā是一个有确实认bat信仰ê人lóng会用ê告白。Ná亲像我头前讲过ê,救恩m̄是óa靠人ê能力,是óa靠圣神ê气力。所以做一个人确实认bat信仰后,伊就会讲,伊是hō͘ 上帝所拣选,m̄是伊拣选上帝。是上帝chhōe-tio̍h伊,m̄是伊chhōe-tio̍h上帝。

经文:

约翰福音 15:18-15:27

注释:

Chit段经文tú好kah前一段相对;将第18到25节kah第11到17节相对照看,就会发见在前一段讲tio̍h跟tòe耶稣ê人ê喜乐,á后段经文则kā所有ê跟随者讲会tú-tio̍h ê迫害――被世人所憎恨。而且所遇tio̍h ê憎恨是「无缘无故」ê。

第26到27节koh一pái提起「慰助者」就是真理ê灵。

经文:

约翰福音 16:1-16:15

注释:

第1节ē-sái讲是这章ê结语。耶稣真清楚kā他ê门徒讲,in mā会受难。请mài看轻第2节所讲ê「被赶出会堂」chit句话,一个犹太人被赶出 会堂,等于是判tùi社区生活中驱逐出去仝款。Tī犹太人ê社会里,只有「无清气」ê人,á是「罪人」chiah会被赶出会堂。chit-má是连跟tòe耶稣ê门徒mā会hō͘列入chit种 「乌名单」中。
   
Chia讲tio̍h「真理ê圣神」(慰助者)会来临。他来,主要是建立公义ê审判(10 节)。Koh讲,真理ê圣神mā将成做耶稣工作ê续接者,继续教导门徒认bat真理,明白上帝ê旨意(12到15节)。

经文:

约翰福音 16:16-16:24

注释:

Chit段经文是耶稣真具体地讲出他teh beh受难ê来临。第22到23节讲tio̍h苦难虽然会来临,m̄-koh,续落来苦难了后就有喜乐,ná亲像一个有娠ê妇女生 产了后,对新性命ê出生发出喜乐ê声音仝款。Koh活其实就是一个新ê性命重新开始。使徒保罗讲:「无论甚么人,若kah 基督结联,就是新创造ê 人;旧ê tāi-chì 已经过去,taⁿ lóng 变做新ê。(全民版)」(哥林多后书五:17)其意在此。


经文:

约翰福音 16:25-16:33

注释:

Tùi第23节 开始,到第33节,耶稣一再kā门徒讲,克服头前所讲到ê苦难ê方法,一是奉他ê名祈祷。Chit点mā是约翰福音书ê主题信息之一。二是kah耶稣亲密地结连做伙,就会享受平安。他koh一pái用「上帝――我――门徒(咱)」chit种关系来说明。三是勇敢,因为耶稣已经赢过苦难。基督教信仰就是帮助咱有够额ê信心kah勇气,hō͘咱ê性命tī逆境中无失去正确ê方向。基督徒之所以m̄惊死亡,á是对死亡无koh有惊惶,原因就是因耶稣已经tùi死里koh活,伊战胜了死亡对性命ê威胁。

经文:

约翰福音 17:1-17:26

注释:

Chit一章ē-sái讲是耶稣siōng长ê一篇祈祷文。Tī前面三本福音书中,lóng记载耶稣tī带领门徒用完Pôaⁿ过节暗顿了后,chhōa in到客西马尼园去,并且tī hia耶稣家己离开门徒向天父祈祷。M̄-koh,约翰福音书ê作者tī chia记载ê虽然m̄是客西 马尼园ê祈祷,却是tī Pôaⁿ过节暗顿中ê祈祷。咱知影耶稣bat教导他ê门徒怎样祈祷,ná mā是大家所熟悉ê「主祷文」。Á chit篇祈祷文是福音书中siōng长ê一篇,mā是 siōng好ê一篇值得咱学习ê祈祷文。Thang分做三个段落:

A. 一是第1到8节,伊向上帝祈祷。请注意在chit段经文中,连续出现五次ê「荣耀」chit-ê字眼,而且lóng是kah「上帝」结连做伙。长老教会创会者约翰・加niâ文就是强 调讲:「Kā一切荣耀lóng归hō͘上帝。」有罪ê人ê身上实在是无甚么好荣耀ê,除了上帝ê恩典、怜悯外,人thang提起ê荣耀ê tāi-chì,lóng是来自上帝ê赏赐。另外tio̍h注意ê是,荣耀mā是kah苦难连结做伙。这苦难就是十字架。咱知影上帝后来kā苦难ê十字架变成荣耀ê记号。

B. 二是第9到19节,耶稣为他ê门徒kah跟tòe者祈祷。跟tòe耶稣ê门徒,现在除了彼得等十一个人外(犹大已经去进行卖耶稣ê勾当了),尚且有真chē位是tùi加利利就 跟tòe耶稣来到耶路撒冷ê妇女,mā有bē少民众(请参考路加福音廿三:48)。Chiah-ê人可能就是teh指第6节所讲ê「hiah-ê tùi世界选召出来付托」ê人。请注意第15 节,耶稣ê代祷中并m̄是祈求上帝kā chiah-ê跟tòe者tùi chit世界带走,却是祈求上帝「hō͘ in脱离ná邪恶者」。Chit句话充分说明chit-ê世界就是一个苦难ê世界,m̄-koh,跟tòe耶稣 ê人m̄是tio̍h离开苦难ê世界,á是beh有够额ê力量pái脱邪恶者ê诱惑。这ná亲像耶稣teh教导门徒ê「主祷文」中所讲ê:「求祢 m̄ -thang hō͘ 阮陷落 tī 担当 bē起ê 试炼。求祢救阮脱离hit-ê pháiⁿ-ê。(全民版)」(马太福音六:13)

C. 三是第20到26节,耶稣为所有接受信息ê人代祷。Tī chit段祷词中,总共用了五次「合á为一」。Tùi chia thang思考一件事:「遵照上帝旨意ê 人就是我ê 兄弟、姊妹kah 老母。(全民版)」(马可福音三:35)Chit句话真清楚讲出tī信仰ê内面,大家lóng是一体ê,是「合á为一」ê一个大家庭。Tī真实ê信仰内面,是ē-tàng排除á是超越种族、文化、历史、地理等等传统ê障碍ê。
经文:

约翰福音 18:1-18:11

注释:

Tùi第十八章开始,有关耶稣受掠受难ê事件,四本福音书lóng有详细ê记载,m̄-koh,每一本ê记载lóng会有无仝。

十八:1—10节,第2节讲犹大知影耶稣kah门徒聚集ê所在,chit点tú好mā thang解释为甚么犹大ē-tàng出卖耶稣ê理由。因为hiah-ê宗教领袖想beh掠耶稣,m̄-koh却惊群众(参考马可福音十一:18、十二:12、十四:2)。所以in lóng希望ē-tàng chhōe一个人少、暗中ê机会。Á犹大就是提供chit种机会。

比较特别ê约翰福音书ê作者提起,去掠耶稣ê人包括罗马兵丁,chit点显然有kóa困扰,因为除非彼拉多同意,若无无jōa可能。M̄-koh,照四本福音书ê写 法,彼拉多是一直lóng tī试beh tháu放耶稣,koh怎样可能会派兵去掠耶稣?koh讲,照第13节ê写法,罗马兵丁kā耶稣绑了起来后,是先送到前任大祭司长亚那之 处,mā koh khah无可能。因为án-ne就teh表示罗马兵被犹太人差来使用。Á当时罗马是统治者,bē是án-ne ê作法。

第10节提供真重要ê资料,就是彼得身上带tio̍h弯刀,将祭司长ê奴仆马勒古ê正pêng耳á削掉à。


经文:

约翰福音 18:12-18:27

注释:

十八:12—27节,第14节thang参考约翰福音第十一章45到57节。

A. 咱tùi第19到24节中看tio̍h约翰福音书作者teh描述耶稣被审ê过程,kah头前三本福音书真无仝款,tī chia作者写tio̍h耶稣对tī大祭司ê盘问,lóng有提出答辩,这kah前三本福音书写tio̍h「耶稣缄口,一言不发」(马太福音廿六:63,马可福音十四:61)真无仝款。

B. 第15节chia所讲ê「另外一个门徒」到底是甚么人?无人知影。有人讲是约翰福音书ê作者,mā有人讲是埋葬耶稣ê亚利马太ê约瑟,因为伊mā是犹太人ê siōng koân法院ê 议员(路加福音廿三:51),因此kah大祭司熟悉。M̄-koh,mā有人讲是犹大,因为伊是kah大祭司勾结出卖耶稣ê人,m̄-koh soah koh想beh知影议会怎样审判耶稣,所以会想进去。

经文:

约翰福音 18:28-18:40

注释:

第28节讲犹太人众领袖m̄敢进入彼拉多ê总督府,为tio̍h beh保 持洁净ê身躯守Pôaⁿ过节ê暗顿。M̄-koh,in却bē记得偷偷á做chit种违法ê审问,心中已经无清气à。莫怪耶稣常指责in是虚假ê人,m̄是无原因。Mā thang tùi chia提供 ê资料想tio̍h,hit位罗马ê军官派人请求耶稣去为伊器重ê奴仆医病时,后来koh派人去kā耶稣讲m̄免了,只要耶稣「吩咐一声」就ē-tàng,后来真正耶稣只出一声,罗马军官ê奴仆就好了ê神迹(路加福音七:1—10),原因就是犹太人bē轻易地进入外邦人ê厝,免得家己mā变成无清气ê人。

A. 第31节提供真重要ê资料,就是犹太人无处死ê刑罚权。Án-ne看起来,司提反ê死,有可能mā是得tio̍h罗马当局ê同意chiah进行ê。

B. 约翰福音ê作者kā重点khǹg tī第37节,耶稣真清楚讲tio̍h伊所建立ê国度是无仝tī chit世界ê国度。Bē-bái,因为耶稣传福音ê中心信息就是「上帝国」。是用上帝做中心ê世界。

经文:

约翰福音 19:1-19:16

注释:

约翰福音书ê作者kah路加福音书ê作者lóng真清楚讲出彼拉多真想tháu放耶稣,并且bat三pái当众宣告伊查bē出耶稣「有甚么罪名」;to̍h是第十八章38节、第十九章4节、6节等等。

A. 约翰福音书kah头前三本福音书无仝ê所在,乃是作者特别强调彼拉多想tháu放耶稣,所以伊先命hō͘伊ê兵丁鞭phah耶稣,希望用chit种方式换来tháu放耶稣ê可能性。M̄-koh 是,伊ê努力显然无成功。因为宗教众领袖真有计画地利用群众ê声音,结果是群众ê声音盖过公义ê审判(请参考路加福音廿三:23)。

B. 第2节chia讲为耶稣穿上「紫色ê外袍」,比较正确ê应该是罗马兵丁ê军袍――深红色ê棉袍(请参考马太福音廿七:28)chiah-tio̍h。因为「紫色ê外袍」这tī当时 是相当贵重ê衣物,如果已经为耶稣戴上了用刺phè编织ê「冠冕」,头ê边额必定会流血,若是血滴落tī「紫色ê外袍」上,ná损失thang就大à。何况chit种「紫色ê外袍」恐惊在场ê人mā无可能有,即使包括彼拉多在内是m̄是有能力á是资格穿「紫色ê外袍」,lóng iáu有问题。

C. 约翰福音书ê作者认为彼拉多希望用鞭phah ê方式,ē-tàng消除á是减低群众对耶稣ê恨意。所以当伊命令鞭phah耶稣后,koh带耶稣出来hō͘群众看,希望群众看tio̍h被鞭phah得遍体鳞伤ê耶稣,会改变本来喊叫处死ê态度。

D. 鞭phah,这mā是真残酷ê一种刑罚。Chit种鞭子是用兽皮制成,包兽骨á是铅丸,phah tī人ê身上,差不多是皮肉绽裂,有ê人甚至会因此残废,koh khah严重ê是当场死去。犹太人规定siōng chē只有ē-tàng phah三十九下(请参考哥林多后书十一:24)。M̄-koh罗马人并无chit种限制。

E. 第7节值得注意。Chit节说明in带耶稣来chhōe彼拉多,是因为in无处人死刑ê权(十八:31)。M̄-koh,in却无明确ê证据够额判耶稣死刑,因为耶稣m̄是 现行犯(比如讲污秽了圣殿ê神圣,á是污蔑了摩西律法ê尊严)。所以in移送耶稣来彼拉多ê所在时,控告ê罪状是相当政治性ê――煽动人民向罗马皇帝纳税 (请参考路加福音廿三:2、5)。chit-má,in担忧彼拉多因为tī政治上ê理由不足,beh tháu放耶稣,koh开始讲耶稣冒犯了宗教上ê理由――亵渎上帝。这mā是in原 本决定kā耶稣害死ê原因(请参考马太福音廿六:65)。根据利未记第廿四章16节,chit种罪一定tio̍h用石头phah死。

F. 第12节kah第15节,lóng thang看出犹太人宗教领袖为tio̍h beh除掉耶稣,已经会失去in本来ê信仰kah政治态度,tī信仰上,in坚持只有上帝chiah是in ê王(请参考士师记八:23,撒母耳记上八:7、十二:12)。Tī政治上,in一直teh走chhōe独立运动,反对罗马ê统治。

经文:

约翰福音 19:17-19:27

注释:

彼拉多tī钉耶稣ê十字架顶写了一块牌á,写「拿撒勒人耶稣,犹太人ê王」,而且用三种文字写成ê,并拒绝犹太人宗教领袖ê修改意 见。请注意,chia讲耶稣是「拿撒勒人」,其意思真清楚,指ê就是耶稣乃是个实实在在ê人,生活tī拿撒勒chit-ê小乡镇地方。

第24节是引用诗篇第廿二篇18节。
就tī chiah-ê最后ê时刻,耶稣kā他ê老母马利亚交托hō͘「伊所意爱ê门徒」。

经文:

约翰福音 19:28-19:30

注释:

Chit段经文记载耶稣讲了两句话:「我口渴。」「成了!」chit句「我口渴」,引用自诗篇六十九篇21节,诗人teh向上帝走chhōe援助时,控诉仇敌 对待伊ê情况:「我饿了,in hō͘我毒药;我渴了,in hō͘我酸醋。」「成了」,这是耶稣完成伊受上帝差遣到世界起来ê工作,已经完工。是用伊ê性命划下句 点。

耶稣tī十字架上ê「七言」如下:
A. 路加福音第廿三章34节:「老父,赦免in,因为in m̄知家己teh做甚么。」
B. 约翰福音第十九章26到27节:「老母,瞧,你ê kiáⁿ!」「瞧,你ê老母!」
C. 路加福音第廿三章43节:「今á日你tio̍h kah我同齐tī乐园里。」
D. 马可福音第十五章34节:「我ê上帝,我ê上帝,你为甚么离弃我?」。
E. 约翰福音第十九章26节:「我口渴。」
F. 路加福音第廿三章46节:「老父,我kā家己ê灵魂交tī你ê手里!」
G. 约翰福音第十九章27节:「成了!」

经文:

约翰福音 19:31-19:37

注释:

Chit段经文是约翰福音特有ê资料。Chit段经文提供一个真重要ê信息:耶稣ná亲像献祭tī十字架上ê「羊羔」仝款,是完整ê献祭。根据摩西ê 律法规定,献祭用ê羊羔一定tio̍h无残缺ê chiah thang(请参考利未记三:6、四:3、23、28、32、五:15、六:6)。耶稣是连一条骨头mā无phah断,这所beh传达ê信息是:他是完整ê献祭tī十字架上,为人类ê罪,成做献祭ê羊羔。

A. koh讲,第36节chit句「骨头连一条mā bē-tàng phah断」,是采用出埃及记第十二章46 节有关食Pôaⁿ过节暗顿,规定准备ê小羊一定tio̍h是整只完整,连骨头lóng是好ê、无折断ê。Chit间表示ê是:出埃及乃是性命ê再生,是新性命ê开始。耶稣tī十字架上ê死,等于hō͘咱得tio̍h一个新ê性命。

B. 第37节是引用自撒迦利亚第十二章10节。Chit节经文是先知撒迦利亚teh预言有一工,大卫ê kiáⁿ孙kah耶路撒冷ê居民teh-beh重新建造,m̄-koh这一定tio̍h仰望hit位「被in刺死ê」。这已经teh说明耶稣就是án-ne应验先知所讲ê话,他就是犹太人期待甚久ê弥赛亚。

经文:

约翰福音 19:38-19:42

注释:

比较四本福音书,就会发见chit位「亚利马太ê约瑟」,m̄-nā是耶稣ê门徒,mā是犹太人siōng koân议会(三和林)ê议员,mā是财主,甚受人民ê尊 敬。Koh khah重要ê是mā期待上帝主权ê来临。路加福音书ê作者讲伊「无附kah别人ê计谋kah行为」,á约翰福音ê作者则强调伊「因惊犹太人ê领袖,m̄敢公开」伊是 耶稣门徒ê身分。Án-ne看起来,kah-ná耶稣ê门徒m̄-nā十二个,却是koh khah chē,其中包括数目不详ê「未公开」者。

A. Koh讲,约翰福音ê作者认为m̄-nā是亚利马太ê约瑟去处理耶稣ê尸体,iáu有尼哥德慕。In带三十公斤用没药kah沉香混合而成ê香料去处理耶稣ê尸体。

B. 第40节讲「这是犹太人安葬ê规定」,chit种讲法无jōa正确,因为会用香料处理尸体,以及用布将尸体包裹起来并m̄是犹太人ê风俗,是埃及人ê传统风俗。Iáu有, 用三十公斤ê香料,mā m̄是一般人使用得起,只是因亚利马太ê约瑟是「财主」chiah有办法án-ne做。伊并且kā耶稣埋葬tī伊新处理过ê墓地,这是「无葬过人ê新墓 穴」,这表示亚利马太ê约瑟为耶稣所做ê lóng是siōng好ê。

经文:

约翰福音 20:1-20:10

注释:

抹大拉ê 马利亚kah彼得lóng ē-tàng进入坟墓内,可见chit-ê坟墓ê洞穴相当大,够额hō͘人进入。是甚么人phah开挡tī墓穴ê大石头?照马太福音第廿八章2节ê记载,是「主ê天使tùi 天顶降落来,kā石头滚开,坐Tī顶面」。四本福音书lóng记载抹大拉ê马利亚等几位妇女tāi先到坟墓去探墓ê。In去ê主要目的,是beh用香料抹耶稣ê尸体(请参考路加福音廿四:1)。

A. 看bē-tio̍h耶稣ê尸体,这是in tú-tio̍h ê事实。只有耶稣ê头巾kah麻纱。换句话讲,坟墓内是空ê,耶稣并无tī坟墓内面。

B. 值得深思ê问题是:坟墓是关不住koh活ê神迹,án-ne,用真chē精神、金钱tī坟墓上,有甚么意义?

经文:

约翰福音 20:11-20:18

注释:

约翰福音书ê作者提供特别资料――koh活ê耶稣亲自显现hō͘抹大拉ê马利亚看见。

A. 四本福音书共同ê写法是,koh活ê耶稣出现时,无人认bat伊。Lóng是当koh活ê耶稣开嘴叫出人ê名,á是做出某一个种动作,比如擘饼分hō͘门徒时,大家chiah想起原来 是耶稣。约翰福音chit段经文所记载关系koh活ê耶稣,显现hō͘抹大拉ê马利亚看见时,马利亚并m̄-bat耶稣,当耶稣叫出伊ê名后,伊chiah清楚过来。

B. 请注意第17节,约翰福音书ê作者认为是koh活ê耶稣ài抹大拉ê马利亚去kā伊讲ê兄弟,m̄-koh抹大拉ê马利亚则走去kā其他ê门徒讲伊已经遇tio̍h koh活ê耶稣。 这kah头前三本福音书lóng讲有特别ê人,á是天使(马太福音明确ê讲是天使,廿八:5)出现,ài抹大拉ê马利亚去转告门徒这koh活ê消息。

C. 所以咱知影koh活ê耶稣,并m̄是人chhōe-tio̍h ê,却是伊显chit-má人ê面前,并且是伊亲自启示人明白伊、认bat koh活ê伊。

经文:

约翰福音 20:19-20:31

注释:

四本福音书所描述有关耶稣koh活ê事迹lóng有一个共同点:真奥秘。Ná亲像约翰福音书ê作者所记载ê,当「门徒聚集做伙,门ân-ân地关tio̍h」, ē-sái讲是,就tī chiah-ê时chūn,koh活ê耶稣忽然出现(19节)。换句话讲,koh活ê耶稣ē-tàng穿过「ân-ân关teh」ê门。Á他是怎样入去ê?然后tī第26 节mā是仝款,「门关teh,ē-sái讲是耶稣忽然显现,khiā tī in中间」。这到底是一个怎样ê身躯?真实ê?á是虚幻ê?如果是虚幻ê,他ê手却是thang触摸ê。这是koh活ê siōng koân奥秘,大大超过咱人ê理解能力。M̄-koh,咱看tio̍h koh活ê耶稣kah门徒同齐食饭(路加福音廿四:30)。Á做门徒「认出伊来」ê时chūn,「耶稣忽然无看tio̍h 了」(路加福音廿四:30—31)。Koh活ê神迹说明一个真重要ê信息:上帝siōng伟大ê创造。Chit-ê伟大ê神迹m̄是用人ê知识、能力teh理解。是人ê心灵kah上帝ê 爱相对遇时,就会明白。这mā是信仰siōng重要ê关键。信仰m̄是完全靠理性推理就ē-tàng完全明白,它有koh khah重要ê部分:心灵ê功课。Chit点mā是咱ài认真学习ê部分。 Ná亲像koh活ê耶稣对多马所讲ê话:「你因为看tio̍h我chiah信mah?hiah-ê无看见á信ê是jōa-ni̍h-á有福ah!」

A. 约翰福音书ê作者kā伊写chit本册ê主要目的tī第31节说明出来,为tio̍h「是ài lín信耶稣是基督,是上帝ê kiáⁿ,并且ài lín因信他来得tio̍h性命。」kah马可福音书ê作者写法tú好颠倒,伊ê写法是将该册ê第一句话就清楚表明伊写chit本册ê主要目的:「上帝ê kiáⁿ,耶稣基督ê福音是án-ne开始ê。」然后chiah开始书写耶稣ê事迹。

B. 有真chē圣经学者认为约翰福音应该是到chit章ê 31节就结束loh。第21章真可能就是后来增加入去ê。

C. koh讲,第30节mā hō͘咱知影,iáu有真chē有关耶稣ê事迹tī早期教会中流传tio̍h,这mā就是路加福音书ê作者tī hit-ê福音ê开场白中所讲ê:「已经有kóa人从事写作,报导tī咱中间所发生ê事。」可惜ê是,chiah-ê报导、流传ê事迹无纪录落来,á是保存落来。若无,咱对耶稣ê事迹ê认bat必定会koh khah丰富。

经文:

约翰福音 21:1-21:14

注释:

Chit段经文是koh一pái记述有关耶稣koh活hō͘他ê门徒看见ê经过。故事ê经过真像路加福音第五章1到11节,耶稣呼召彼得兄弟kah雅各兄弟ê情景。

A. 原先,耶稣被钉死tī十字架上后,包括彼得在内,「所有ê门徒lóng离弃耶稣,逃走了。」(马可福音十五:50)众门徒以彼得带头,koh tńg来到加利利去重操旧业―― 掠鱼。In kah-ná想用chit种方式忘掉耶稣被钉死tī十字架上ê悲伤,á是讲心中ê极大失望。因为in bat弃sak一切所有ê跟tòe耶稣去了(路加福音五:11)。结 果耶稣被钉死tī十字架上。这不hō͘人失望chiah怪。M̄-koh,就tī chiah-ê时chūn,koh活ê耶稣显现在in面前。

B. tùi第二十章kah chit一章记载有关耶稣koh活hō͘门徒看见ê记事来看,咱发现:众门徒是tī生活、工作中,一再发现耶稣无死,他是活活地tī in ê生活、工作中。

Mā thang讲,in每一工ê生活、工作,到处lóng ē-tàng看tio̍h耶稣就tī in身边,kah in同在。虽然耶稣是被钉死tī十字架上了,而且mā埋葬了。M̄-koh,tī门徒ê经验中,耶稣却是活活kah in做伙。连食饭lóng是án-ne感受。

C. 第14节讲chit-pái是第三pái显现。第一pái是tī第二十章19节,第二pái是tī第26 节。
经文:

约翰福音 21:15-21:19

注释:

Chit段经文真紧hō͘咱想tio̍h彼得有三pái否认耶稣kah伊ê师徒关系。Chia koh活ê耶稣连续三pái询问彼得「你疼我mah」chit-ê问题。Kah-ná有意思beh提醒伊:彼得ah,你iáu会否认我mah?

彼得ê回答是真坚定,ná亲像耶稣teh预言伊会三pái否认ê时chūn,伊mā是用真坚定ê语气对耶稣讲:「我若tio̍h kah 祢做伙死,mā 绝对bē m̄ 认祢!(全民版)」(马可福音十四:31)现在当耶稣第三pái koh再问彼得「你爱我mah」了后,作者讲彼得「就难过起来」。因为chit种连续三pái ê询问,而且mā thang理解chit三pái ê询问,是严肃ê,因为 chit种询问是有「性命之约」ê内涵tī内面。即使是咱听起来mā会有无好ê感受。特别是chit段询问是编排tī彼得kah其他门徒捕到真chē大鱼ê事件了后,chit种「你爱我 mah」ê问话,mā是teh问讲:「你kám ài我赢过chiah-ê大鱼?」咱kā chit种情节换到今á日,如果咱ê seng-lí非常大,而且真好。当耶稣对咱án-ne问ê时chūn,咱会怎样回答?
经文:

约翰福音 21:20-21:25

注释:

到底作者所讲ê「耶稣所意爱ê hit-ê门徒」是甚么人?真chē人teh问。M̄-koh,我就是无够额ê资料thang回答。第24节讲出chit本福音书ê作者就是耶稣所意爱ê人。

廿一:25节,thang kā chit节比较第二十章30节,意思是仝款ê。今á日koh khah thang来证明chit位作者所讲ê,描述、讨论有关耶稣ê事ê册,实在siuⁿ-chē、siuⁿ-chē。

重新查询