希伯来书 1:1-1:4

注释:

Chit章主要teh绍介耶稣是甚么人？会出现chit种问题，必定是tī早期教会中对耶稣ê身分有真chē争论。因为án-ne，chit章一开始，作者就先讲上帝藉tio̍h家己ê kiáⁿ向咱讲话，然后用诗歌来绍介chit位上帝ê kiáⁿ耶稣是甚么人。

Chit段ē-sái讲是chit本册ê前言。一般书信ê写法，lóng会有收件人、请安致意等，m̄-koh chit本书信都无，m̄-koh主题真清楚是teh表达：耶稣基督是甚么人？

第1节，「古早时」，意思是teh指耶稣基督chìn前，m̄-koh mā thang讲是「旧约」ê时代。「kúi-nā pái chē种方法，藉tio̍h先知向我ê祖先讲话」，chit种口语真类似先知文献中ê语气。Chia ê「讲话」mā有含「启示」ê意思。Á「kúi-nā pái chē种」，表示m̄-nā kan-taⁿ是用语言，mā用各种方式，亲像：梦、天使、异象，甚至先知ê身躯语言，亲像先知以西结就有kúi-nā pái用身躯语言来表达上帝ê信息。

第2到3节，tī第1节讲「上帝」，续落来tī chit节就提起「家己ê kiáⁿ」，这表示作者是beh绍介「上帝ê kiáⁿ」，因为án-ne，先讲出「上帝」然后chiah讲「kiáⁿ」，这mā是东方文化里ê一种特色。

	作者讲上帝藉tio̍h「chit-ê kiáⁿ」进行「创造宇宙」，chit句话thang参考约翰福音第一章10节、14节。表明耶稣就是kah上帝同质、同性、同等地位。因为万物ê来源就是藉tio̍h伊而创造ê。这mā是使徒保罗tī腓立比书第二章6节所讲ê，耶稣就是「本来上帝ê本质，却无乱使用kah上帝同等ê特权」，见证耶稣就是kah上帝仝一个体。

Koh讲，作者表达tī耶稣（上帝ê kiáⁿ）身上thang看见三件重要ê大事：一是伊「反照上帝ê光辉」，就是上帝创造万有ê能力，行了真chē神迹奇事ê美妙。二是耶稣ê死，「清除了人ê罪恶」。三是耶稣死去koh活后，升天「就坐tī天顶至koân权力者ê正pêng」，进行审判世界ê工作（参考马太福音十九：28）。

第4节，「天使」，这是上帝身边ê奴仆，tī东方世界里，天使有特别ê身分，是传达上帝信息ê使者，mā是执行上帝旨意ê奴仆。作者讲耶稣ê「地位远比天使崇高」、「高贵」，表示耶稣ê地位连天使lóng无法度比并。

希伯来书 1:5-1:14

注释:

Chit段经文用诗歌表达了耶稣kah天使之间ê差别，mā说明上帝ê kiáⁿ ê使命，并m̄是天使ē-tàng扮演ê角色。

第5到7节，chit三节说明上帝kah天使之间ê关系。

事(tāi)先作者引用诗篇第二篇7节ê诗歌，真清楚说明上帝ê kiáⁿ kah天使完全无仝。诗人Tī chit首诗歌中表明hō͘ 上帝选立ê chit位kiáⁿ，就是拯救者，是列国ê希望。希伯来书ê作者引用这诗句，为tio̍h是beh表明耶稣基督就是上帝所选立ê拯救者，是人类ê ǹg望。

chit三节主要说明天使并无甚么，in只不过是上帝ê奴仆、器具，ná亲像「风」、「火焰」等（参考诗篇一○四：4），lóng是听从上帝ê hō͘唤，执行上帝ê旨意。

「所有ê天使lóng一定tio̍h拜伊」，chit句可能引用自诗篇九十七篇7节ê c句，真清楚表明天使比上帝ê kiáⁿ ê位阶khah低真chē，ná亲像奴仆kah主人之间ê差别。

第8到9节，chit两节说明上帝ê kiáⁿ身分真无仝款；伊是用公义作为统治、管理chit世界ê准则（参考以赛亚书九：6—7）。这说明上帝所差遣到世间来ê拯救者，必定是一位公义、和平ê君王。

第10到14节，chit段经文是引用诗篇第一○二篇25到27节ê诗歌。

诗篇ê作者原本是teh o-ló上帝创造宇宙万物ê伟大。希伯来书ê作者引用chit段诗歌来颂赞耶稣就是基督，是人类ê救主。

而天使「lóng是事奉上帝ê灵」，这清楚说明天使ê工作就是帮助人认bat基督耶稣ê救恩。

希伯来书 2:1-2:4

注释:

Chit章mā是继续teh讨论有关上帝ê kiáⁿ kah天使之间ê无仝。作者努力beh kā chit二者之间ê差别说明清楚，希望耶稣基督ê信徒lóng ē-tàng分辨出来，免得被真chē错误ê信仰认知所迷惑。作者beh kā大家讲：真正拯救者（基督），是上帝ê kiáⁿ，伊就是耶稣，m̄是天使。Tùi chia mā thang看出早期教会有人teh崇拜天使，认为天使既然是上帝ê奴仆，透过天使mā会hō͘人得救。M̄-koh这是错误ê观念。

希伯来书有五段类似警告á是提醒ê话，这是第一段，其他四段是第三章7 节到四章13节；第五章11节到六章12节；第十章19节到39节；第十二章14到29节。

Tī chit段经文中，作者koh一pái说明天使确实有传出上帝ê信息，不听从ê人lóng会受tio̍h审判。M̄-koh天使并无带hō͘人拯救ê ǹg望。因为真正有拯救能力ê，只有上帝ê kiáⁿ。

第1节，chit节清楚指出作者写hō͘受信ê对象，是一阵已经是信耶稣ê信徒，而且可能就是tī信仰中真有年资ê信徒，作者提醒chiah-ê老信徒应该「koh khah坚守所听tio̍h ê真理，免得被潮流冲行」。Tio̍h知影坚守，m̄-thang随便放弃á是改变。

第2节，chia所讲ê「天使所传hō͘咱ê信息」，指ê乃是摩西律法。照申命记第三十三章2 节ê记载，当上帝颁布律法hō͘摩西ê时，有「千万天使kah跟tòe伊」，因为án-ne，犹太人一直深信，摩西律法就是上帝透过天使传达落来ê。如果天使所传ê信息，m̄信ê人会遇tio̍h应得ê惩罚， án-ne若是m̄听比天使koh khah尊贵ê救主亲自所宣告ê信息，kám bē受koh khah大ê惩罚？

第3节，chit节讲「忽略chiah-ni̍h伟大ê拯救」，chit句话无论是tùi旧约来看，á是tùi新约早期ê教会来讲，lóng有仝款ê意义；旧约时代，上帝透过摩西带领以色列人出埃及ê神迹，表明他ê救恩。新约时代，上帝以他ê独生kiáⁿ耶稣来说明他拯救ê疼，chiah-ê lóng tī说明上帝对人性命ê拯救工作是非常珍贵而且重要ê。因为上帝ê救恩就是为tio̍h beh hō͘人避免因为罪所带来ê惩罚。因为án-ne，忽略上帝救恩ê人，等于是藐视上帝ê恩典仝款，是骄傲ê态度，mā是m̄承认有上帝。

第4节，参考马可福音第十六章20 节；使徒行传第二章22节；罗马书第十五章18节。

作者讲「上帝家己用异能、奇事，kah各种ê神迹来加强in ê见证」，为tio̍h是beh hō͘人ē-tàng清楚明白他拯救ê信息。

「Kā圣神ê恩赐分配给咱」，chit句话说明tī每一个人身上，lóng有上帝赏赐ê圣神恩赐，chiah-ê恩赐并m̄是人本身拥有，却是上帝赏赐chiah得tio̍h ê。M̄-koh chiah-ê恩赐lóng是为tio̍h beh见证上帝拯救ê疼，却m̄是用来显示家己ê才能。换句话讲，ē-tàng行神迹、奇事、异能 ê事，并m̄是因为人家己有chiah-ê能力，却是tùi上帝来ê旨意kah圣神ê帮助。因为án-ne，无论是甚么人，ē-tàng行神迹、奇事、异能 ê，lóng是为tio̍h beh见证上帝ê救恩所做ê，若无，就无算是属tī上帝ê旨意kah作为。

希伯来书 2:5-2:18

注释:

Chit段经文说明耶稣基督确实成做人，并且生活tī人间。伊之所以成做人tī人世间，主要是为tio̍h帮助hiah-ê被信仰所困惑，á是因迫害而心生怀疑ê人，thang清楚知影耶稣kah伊同在同齐，mā是跟tòe受苦，并无孤独。

第5节，chit节指出上帝「beh创造ê世界」，这是teh指未来ê世界。Chit世界并m̄是一般所讲ê「天堂」，mā m̄是所讲ê「新性命」，却是指一个新ê时代、新ê秩序，mā就是福音书中所讲ê上帝国度，是用上帝做中心ê境界。

第6到7节，chit段诗歌是引用诗篇第八篇4到6节、第一四四篇3节ê诗歌。

如果人比天使ê位阶iáu低，chit位道成肉身ê救主，mā像人仝款，m̄-koh这并无损伊本来ê荣耀。

第8节，chia讲「上帝hō͘人统辖万有」，chit句话kah创世记第一章26到28节有关，讲上帝创造人ê时chūn是用他ê形像造人，并且赋予人一个非常重要ê使命，就是beh人「管理」一切受造ê万物。Ē-sái讲是，因为人犯罪了后，hō͘ 上帝驱逐出原本享受ê管理权柄，人成做罪人，因为án-ne，无koh享受chit种特权。因为án-ne，作者讲「chit-má并无看见人统辖万有」。

第9到10节，chit两节经文thang参考腓立比书第二章6到11节。

Chit两节ē-sái讲是kui个希伯来书ê主题中心之一，作者beh kā所有ê读者讲：耶稣是真正teh代表上帝ê荣耀。Chia讲耶稣「经过死ê痛苦而得tio̍h荣耀、尊贵ê华冠」，chit句话讲出当时基督徒受tio̍h迫害，真chē人因为án-ne丧命，甚至有ê Tī痛苦中haiⁿ-haiⁿ叫tio̍h。作者透过chit句话teh kā当时ê信徒讲：耶稣是上帝ê kiáⁿ，伊就是上帝恩典ê记号，m̄-koh伊mā经历死亡ê痛苦，ē-sái讲是后来却享受上帝所赏赐ê荣耀kah尊贵。作者希望chit种譬喻，对hiah-ê teh受tio̍h迫害而活tī苦难中ê信徒增加添信心，鼓励in向耶稣基督学习。

Koh讲，chit句「为tio̍h beh hō͘真chē kiáⁿ同齐享受伊ê荣耀」，chit句话thang参考约翰福音第一章12到13节，凡是信耶稣基督ê人lóng ē-tàng成做上帝ê kiáⁿ。

第11节，耶稣ê死，是洗净了人ê罪，续落来hō͘人因为án-ne kah耶稣成做一体（参考约翰福音十七：20—23），成做「一家人」。这mā是约翰福音作者ê观点，认为所有耶稣ê信徒lóng会得tio̍h上帝赏赐ê特权，成做上帝ê kiáⁿ（参考约翰福音一：12）。

第12到13节，这是引用诗篇第廿二篇22节。

诗篇第廿二篇乃是一篇描述上帝所差遣到世间来ê拯救者受难ê诗歌。希伯来书ê作者kā chit诗句引用tī此，有意思beh表明，受难ê奴仆kā传扬出上帝拯救ê疼kah恩典。Á hō͘所有因为耶稣得tio̍h上帝救恩ê人，lóng会同声歌颂o-ló上帝，讲「我beh信靠上帝」。

第14节，这是真重要ê一节经文。Chit句「耶稣本身mā仝款有人性」，对tī早期教会有真特别ê意义，因为tī早期教会里盛传耶稣并m̄是真实ê存在人间，只不过是幻影ê存在而已。如果只是幻影，就无死chit件事。既然无死，mā就无算是koh活ê伟大神迹。M̄-koh koh活乃是基督教信仰ê基础。因为án-ne，当希伯来书ê作者强调「耶稣本身mā仝款有人性」，tú好说明耶稣成做人，而且真实地生活tī人间ê重要性。因为耶稣是实实在在ê人，chiah ē-tàng生活tī人类ê历史里，并kah人同齐受难。M̄-nā án-ne，耶稣koh khah赢过性命siōng大ê苦难――死亡。既然耶稣kah人同受苦难，就会因为koh活，hō͘人mā进入性命koh活ê ǹg望中。

第15到16节，作者mā努力beh安抚hiah-ê对死亡有惊惶ê信徒，hō͘ in知影，就是因为耶稣ê死，替人赎了罪，因为án-ne，做一个罪已经被赎回ê人死去ê时，伊就m̄免koh再惊惶甚么了，因为罪得tio̍h赦免ê人，thang进入上帝国度度里，享受上帝所赏赐ê永恒性命。Án-ne，就bē成做「惊死而一生处tī奴役下ê人」，原因是耶稣已经为信靠伊ê人成做赎罪ê祭，献tī十字架上à。

Chia讲耶稣是「帮助亚伯拉罕ê kiáⁿ孙」，chit句话真重要，已经teh kā犹太基督徒讲，过去in óa靠亚伯拉罕ê救恩，是无正确ê。Tio̍h tńg来信靠耶稣chiah是正确。Chia ê「帮助」一词，是teh指「救拔」、「掠tiâu」，是「ân-ân掠tiâu m̄放」ê意思。Án-ne就koh khah清楚了，耶稣为tio̍h beh拯救chiah-ê信靠伊ê人，用伊ê手「ân-ân掠tiâu m̄放」，kā in tùi堕落入死亡深渊中「掠」tńg来，重新tńg来到上帝面前，因为所有信靠耶稣ê人，lóng已经kah伊成做「一家人」，永远bē分开。

第17到18节，清楚说明chit位拯救者耶稣，就是「祭司」。因为伊成做人，所以chiah ē-tàng成做「祭司」，teh代表人类面对tio̍h上帝，并且成做赎罪者，像献tī祭坛上ê羊羔仝款，为tio̍h是beh「hō͘人ê罪得tio̍h赦免」。伊是真正人，生活tī chit世界上，而且「亲自经历过被考验、受折磨ê痛苦」，因为án-ne，chiah ē-tàng「帮助hiah-ê被考验ê人」。这mā是约翰福音第一章14节所传达ê重要信息，讲上帝亲自「道成肉身」来到人间ê意义。

希伯来书 3:1-3:19

注释:

希伯来书ê作者tī chit章koh khah进一步以犹太人认为siōng伟大ê先知摩西做例，说明耶稣kah摩西之间ê无仝，chit对早期教会ê信徒来讲，chit点是非常重要。因为tī早期教会中，盛传旧约时代有摩西，新约时代有耶稣，chit种看法就是kā旧约时代ê摩西kah新约时代ê耶稣khǹg tī同等位置上。Chit种观点mā不时出现tī今á日ê基督徒中，一般ê讲法是：旧约有「摩西五经」，记载上帝救赎ê恩典。新约有「四福音书」记载上帝拯救ê疼；旧约有摩西带领以色列人民出hit-ê奴隶之地埃及，新约有耶稣基督为「新ê以色列」（指基督徒来讲）赎罪脱离因为罪捆绑而变成奴隶；摩西是以色列民族ê祭司，而耶稣则为新以色列人民献身为祭。Chit种看法tī早期教会存在，mā tī今á日ê基督徒中被引用。M̄-koh希伯来书ê作者就是beh纠正chit种看法，认为chit种认知是错kā耶稣ê救恩kah摩西当做仝款等质看待。作者tùi第三章1节开始直到第四章十三节，lóng是teh探讨chit方面ê问题。

第1节，chit节一开始就讲耶稣是「使者kah大祭司」，这是基督徒信仰上tio̍h「宣认」ê。

    所谓「使者」，这字kah「使徒」同字，意思是teh指「奉差遣ê人」。耶稣家己就bat kúi-nā pái讲伊是「奉差遣」到世间来ê（参考马太福音十：40、十五：24，马可福音九：37，路加福音九：48，约翰福音四：34、五：24、30、36—38、六：38）。

    「大祭司」，耶稣就是「大祭司」，然后tī第四章14节koh一pái提起，chit点mā是希伯来书siōng大ê特点。所谓「大祭司」，指ê是上帝kah人之间ê桥梁，有含「中保」ê意思。Tī旧约时代，祭司ê制度分做三级；一是大祭司，二是祭司，三是利未。摩西ê时代，亚伦就是大祭司，是所有祭司中siōng koân位阶者，带领全体以色列人民敬拜上帝。希伯来书ê作者讲耶稣是「永远做大祭司」（参考六：20），赢过亚伯拉罕，像麦基洗德仝款。

第2到6节，作者Tī chit段经文中用摩西kah耶稣作一比较；摩西只是上帝ê奴仆而已，而耶稣却是上帝ê kiáⁿ。作者会án-ne用摩西作比较，可能是当时ê局势对基督徒真危险，迫害ê消息频传，真chē信徒心内不安，甚至tī hiah-ê归属耶稣ê犹太基督徒中，有kóa人想beh重新tńg去犹太教，因为án-ne，作者以摩西来比较，为tio̍h是beh hō͘犹太基督徒知影，in siōng尊崇ê伟大先知摩西，mā不过是上帝ê奴仆而已，m̄-koh耶稣却有koh khah高ê身分，伊就是上帝ê kiáⁿ，是上帝ê疼子。

另外一方面，作者mā用人ē-tàng建造厝做譬喻，讲上帝建造ê是kui个宇宙万物，他比kui个受造ê宇宙万物lóng koh khah有荣耀。所讲ê「厝」，是teh譬喻以色列民族，而「上帝创造万物」则teh譬喻全体人类，指ê是包括一切族群，m̄是单指以色列民族而已。Án-ne就真清楚有区分；摩西是为tio̍h以色列民族受上帝差遣成做奴仆，而耶稣则受差遣成做所有人类ê救主，这就是第3节所讲ê「耶稣比摩西配得koh khah chē ê荣耀」，它ê意思tī chia。

「如果咱坚持所ǹg望ê信念kah勇气，咱就是上帝一间ê人」，chit句话非常重要，对受tio̍h迫害有挥心想beh放弃信仰ê基督徒来讲，这是一句真重要鼓励ê话，kā in讲信仰是需要坚持ê，是需要勇气ê。

第7到11节，tùi chit章第7节起，直到第四章13节止，是希伯来书ê第二段「警告」经文。Chit段第7到11节ê诗歌，是引用诗篇第九十五篇7到11节，mā是一段kah出埃及事件有关ê简略史诗，thang参考出埃及记第十七章1到7节。

人「如果听见上帝ê声音」，却iáu「固执」，就会亲像早年以色列人出埃及进入旷野ê时，心硬而背叛上帝，甚至一再怀疑上帝ê救恩，引起上帝ê忿怒，结果当时年满二十岁以上ê人，除了约书亚kah迦勒ē-tàng进入应允ê迦南地，其余ê人lóng死Tī旷野中（参考民数记十四：29—30）。Chia所讲ê「安息」，表示上帝ê赐福。Á迦南地就是上帝beh赐福hō͘ in ê流奶kah蜜之地。

第12节，chit节讲「心思败坏，m̄肯相信，背离了永生ê上帝」，这lóng tī说明当时ê环境，已经hō͘真chē人无愿意，á是无想beh持守原本已经领受tio̍h ê信息。作者提出警语，ài in「谨慎」，m̄-thang陷入迷惑。Chia ê「心思败坏」，mā teh表示放弃上帝ê救恩。认为人间ê气力chiah是真实，是真危险ê一件事。

第13节，「为罪所迷惑，心肠刚硬」，这表示听bē落去上帝透过耶稣带来ê拯救信息。作者提醒大家tio̍h「趁」iáu有「今á日」ê时chūn，赶紧回心转意来信靠耶稣。同时，所有ê信徒lóng有彼此互相关怀ê责任，beh「勉励」hiah-ê心思软弱ê信徒。Chit节mā thang看出作者有「末日」ê观念，特别是tī he个迫害真严厉ê时代，作者chit种「末世」观念koh khah突显。

第14节，chit节thang对照第6节来看；tī第6节讲坚持所ǹg望ê信念kah勇气，会成做上帝一间ê人，tī第14节chia则成做「基督ê同工」，因为是teh参与福音宣扬ê工作，而这mā是一份极高ê荣誉。

第15到18节，chit段经文koh一pái重复叙述第7到11节所讲过ê，mā thang参考民数记第十四章26到35节。

第19节，说明对上帝有怀疑ê人，就是信心不足ê人，chit种人无法度享受tio̍h上帝ê赐福。

希伯来书 4:1-4:16

注释:

Tī第三章提起享受上帝赏赐ê「安息」，然后chit章进一步解释「安息」chit-ê词ê意义。「安息」chit-ê词，有含上帝ê赐福ê意思，是teh指心内完全ê平静，kah上帝分享他创造万物ê喜乐。因为án-ne，安息日mā thang讲是尽情享受上帝创造ê日子。

第1节，chit节讲「享受上帝所赐ê安息」，是他hō͘信靠耶稣ê基督徒之应允。因为án-ne，信徒就beh有「惊惶ê心」，意思是teh指一定tio̍h小心、谨慎，chiah ē-tàng免tī「失败」而落空。

    第2到3节，chia提起有人仝款「听见福音」ê信息，m̄-koh却因为「无用信心去领受」而hō͘上帝应允ê「安息」落空，这就是第三章一再提起ê，以色列人民tī旷野漂流期间所失去ê福气。M̄-koh有信心领受ê人，而且会坚持chit-ê福音信息ê人，就会得tio̍h chit种福气。

第4节，chit节提起「圣经有一处论到第七工」，这是teh指创世记第二章2节。

第5节，chit节就是民数记第十四章26到35节ê背景。

第6节，chia用出埃及ê以色列人民，因为心硬而无法度进入迦南应允之地，比并hiah-ê先听tio̍h上帝拯救信息，后来koh放弃ê人，比起后来听见却会知影珍惜、坚持ê信徒，二者之间ê差别，就是前者会失去上帝ê应允，后者则享受上帝所赏赐ê安息。

第7节，ê「今á日」，thang参考第三章13节「今á日」，指ê就是「chit-má」。

第8到11节，chit段经文真清楚teh说明一件事：进入迦南上帝应允之地，应该是thang享受「安息」，mā就是上帝ê赐福。M̄-koh以色列人民tī约书亚带领in进入了后，伊hit一代ê人lóng往生，以色列人民就弃sak了上帝（参考士师记二：6—10），这说明以色列人民并无坚守所领受tio̍h ê信息，in放弃了kah上帝之间永恒ê约定。

为tio̍h án-ne，上帝koh一pái以「另外ê安息日」来表明他对人类拯救ê疼。Chia所讲ê「安息日」，表示上帝对性命siōng大ê赐福。M̄-koh因为人犯罪，结果hō͘ chit项thang安息ê福气流失à。因为án-ne，上帝差遣他ê kiáⁿ耶稣来到世界上，就是beh hō͘信伊ê人无koh有劳苦、重担（参考马太福音十一：28—30）。这mā是耶稣来到世界上ê主要原因。

第12到13节，「上帝ê话」，指ê就是创造宇宙万物之性命ê动力。作者真清楚tī chia提出两个基本认bat：一是听从上帝ê话，有ê时确实是一件真痛苦ê事，ná亲像「双刃ê剑」，非常「利剑剑」，会刺透人ê「灵kah魂，关节kah骨髓」，这会hō͘人痛到无法度忍受。M̄-koh坚持落去ê，就会得tio̍h上帝拯救ê恩典。二是有审判，而且非常清楚会根据人所做ê一切进行审判，无任何一个人thang逃避得。会有chit种讲法，是因为犹太人认为有亚伯拉罕作in ê祖先（参考马太福音三：9—10），in就ē-tàng免tī审判，作者tī chia讲无可能ê事，每一个人lóng ài面对上帝ê审判。

第14到16节，tùi第14节开始，直到到第七章28节，chit段经文lóng是讨论有关「大祭司」ê工作kah角色。Chit段经文mā ē-sái讲是希伯来书siōng中心ê经文。作者真详细描述大祭司ê工作kah角色，因为án-ne，bē少圣经学者认为，此经册ê作者必定是犹太人，而且非常熟悉犹太宗教事务者，这mā就是有kóa圣经学者会认为tio̍h án-ne经册ê作者乃是使徒保罗ê原因之一。

第14节thang参考诗篇第一一○篇4节。作者勉励所有ê信徒，tio̍h坚持所信ê耶稣，伊chiah是真正「大祭司」，是「上帝ê kiáⁿ」，已经koh活「进入来上帝ê面前」。

作者koh一pái强调耶稣成做人，kah咱仝款生活tī人间，也kah咱同齐工作，伊mā经历咱ê缺点kah试探，m̄-koh siōng重要ê是「伊无犯罪」（参考七：26）。这mā hō͘咱明白：耶稣kah咱之间siōng大ê差别是：伊是无罪ê，咱是有罪ê。因为án-ne，当咱需要伊拯救ê恩典ê时，伊就是咱「及时ê帮助」。藉tio̍h耶稣，咱thang「大胆来到上帝恩典ê宝座前，好领受慈爱kah恩典」。

希伯来书 5:1-5:14

注释:

Chit章主要teh讨论大祭司制度，是tùi民间选出来ê。不过，tio̍h注意ê是：tī耶稣ê时代，大祭司是由罗马政府任命ê，chit点thang tùi约翰福音第十八章12到14节经文中看tio̍h，hit年ê大祭司是该亚法，伊ê丈人亚那原本是大祭司（主后七到十四年），却因为得罪罗马统治者格拉都（Valerius Gratus）而被废掉大祭司ê职位，由伊ê kiáⁿ婿该亚法tùi亚那ê kiáⁿ以利亚撒（Eleazer）夺取大祭司ê职位。会发生chit种事件ê原因，是kah庞大ê金钱诱惑有关，如果详细读四本福音书中记载有关耶稣进入耶路撒冷圣殿，kā hiah-ê贩卖献祭cheng-seⁿ kah兑换银钱ê商家桌椅、箱柜等物件，全部lóng推翻倒地，就会明白耶稣hiah-ê举动并m̄是故意藐视seng-lí人，却是tī hiah-ê商家、摊贩ê背后，有庞大金钱利益输送入去入大祭司kah圣殿祭司群ê手中，chit点chiah是hō͘耶稣忿怒ê原因。伊控诉chiah-ê宗教领袖kā敬拜上帝ê圣殿变成「贼窝」、「市场」，已经hō͘圣殿远离敬拜上帝ê事loh。

    Chit章mā ē-sái讲是延续第四章14到16节所讨论ê大祭司之角色，ná亲像第四章14节所讲ê：「咱有一位伟大ê大祭司，就是上帝ê kiáⁿ耶稣；伊已经进入来上帝ê面前。」虽然chia希伯来书ê作者讲「大祭司lóng是tùi民间选出来」，m̄-koh伊就是beh强调耶稣是超越所有tùi民监选出来ê大祭司，并明白ê指出，耶稣就是teh带领所有ê人tńg来到上帝面前，清楚认bat上帝救恩ê伟大祭司。

    第1节，chia讲「每一个大祭司lóng是tùi民间选出来」，这简单ê一句话，说明耶稣是大祭司，伊是真正「人」，m̄是幻影，chit点对早期ê教会非常重要。因为早期教会有一影响有淡薄á大ê讲法，认为耶稣是神所以并无真正生活在世间，hiah-ê人看tio̍h ê只不过是幻影而已。Koh讲，大祭司ê主要工作，就是带领人民「事奉上帝，为in ê罪献上礼物kah祭品」，这mā就是现代所讲ê「礼拜」ê意思。

    第2到3节，chit两节大祭司mā是人，既然是人，就有人软弱ê特质。因为án-ne，身为人ê大祭司耶稣，mā会知影用「温和」ê方式对待hiah-ê「无知kah犯错误ê人」。而且大祭司m̄-nā beh为「人民ê罪献祭，mā一定tio̍h为家己罪献祭」，chit句话是根据利未记第十六章11到14节，摩西律法规定亚伦beh为家己kah伊ê家属献赎罪祭。

    第4节，chit节讲tio̍h大祭司是一项「尊贵地位」ê工作，因为是「上帝选召ê人chiah ē-tàng做大祭司，像亚伦仝款」是上帝亲自拣选ê。可惜ê是tī耶稣ê时代，大祭司已经沦为罗马政府操控ê政治筹码，用来控制犹太人ê社会组织。其实作者tī chia以亚伦为例，是beh说明一个重要ê认bat：当大祭司并m̄是用人ê影响力争得tio̍h ê。Chit点tī耶稣时代chìn前ê马加比时代已经发生，差不多lóng是统治阶层chiah ē-tàng担任。因为án-ne，政治统治者往往会利用职权任命大祭司，而无经过由人民选出，koh khah m̄是由上帝拣选。

    第5节，chit节是引用诗篇第二篇7节ê诗歌。
Chia讲tio̍h耶稣当「大祭司ê尊贵地位」，是上帝亲自拣选，并且kah耶稣之间有约，伊是上帝ê kiáⁿ，上帝做伊ê老父，chit点tùi约翰福音thang清楚看出来，mā是耶稣一再讲上帝就是伊ê老父ê原因（参考约翰福音五：17、36、六：32、十：36、十三：3）。

    第6节，chit节thang参考诗篇第一一○篇4节ê诗歌。有关「麦基洗德」ê事，thang参考创世记第十四章17到24节ê记事。创世记作者讲chit位「麦基洗德」祭司，mā同时是一个君王。作者有意表示：耶稣就是大祭司，mā是一位伟大ê君王。

第7到8节，chit节thang参考马可福音第十四章35到36节，耶稣kah门徒守最后晚餐了后，前去客西马尼园祈祷，伊tī极痛苦中，祈求上帝hō͘「苦杯」离开伊，m̄-koh m̄是照伊ê意思。伊愿意顺从天父ê旨意。Tī路加福音第廿二章44节讲，耶稣tī客西马尼园祈祷到「汗珠像大滴ê血滴落tī土脚」，可见耶稣ê祈祷非常迫切。

Koh讲，耶稣被钉tī十字架上ê时，bat大声hoah（参考马可福音十五：34、37），而伊所呼喊ê话是引用诗篇第廿二篇1节ê诗歌。

第9到10节，作者Tī两节表明耶稣因为是「完全」奉献，hō͘ chit项奉献达tio̍h siōng高峰。因为án-ne，上帝透过伊hō͘所有「服从伊ê人永远得救」有「根源」。因为án-ne，上帝「宣布」耶稣就是亲像「麦基洗德」仝款，担任大祭司。

    第11到14节，chit段经文tùi第11节开始，直到第六章12节止，是希伯来书劝勉信徒ê第三部分。Mā tùi chit段经文thang清楚看见作者写chit本经册ê主要对象，并m̄是初信ê基督徒，却是已经归属耶稣已经有一段时间ê信徒。M̄-koh in ê信仰显然无成长，而且iáu真软弱，无进步。Ná亲像使徒保罗指责哥林多教会ê信徒仝款，讲in iáu停留tī lim奶ê阶段，bē-sái食饭（参考哥林多前书三：1—2）。

	作者tī第11节chia讲是因为大家对耶稣成做一个大祭司ê角色认bat无清楚，ná亲像一般人会问ê问题：一位伟大ê拯救者，怎样ē-tàng以被钉死tī十字架起来当做替人类ê罪作赎罪ê祭品？chit种事太深奥了，无容易了解。久长以来，chit-ê问题一直就困扰tio̍h真chē基督徒。其实，作者tī chia讲早期教会ê基督徒「听觉迟钝」，类似chit种话mā出现tī马可福音作者笔下ê耶稣门徒（参考马可福音六：52、八：17）。因为hiah-ê人无法度理解为甚么耶稣既然是伟大ê大祭司，却无享受世间大祭司ê荣耀，反tńg是被钉死tī十字架上。

	Tī第12到14节作者用「食奶」kah「食干饭」做对比，指出一个信徒如果已经来到教会一段真长ê时间，就应该成做别人ê老师，却m̄是老是beh别人用siōng简单ê信仰功课来教导。换句话讲：老信徒应该成做新ê信徒ê老师，而不应该停留tī「新信徒」ê阶段，接受别人ê帮忙。

	「上帝信息ê第一课」，tī中文《和合本》这「第一课」是用「小学」，tī《台语汉字本》圣经仝款用「小学」，天主教《思高版本》用「初级教材」，这是teh指siōng简单ê功课。表明初代教会信徒tī信仰上并无明确ê进步ê意思，这是真可惜ê事。

希伯来书 6:1-6:20

注释:

Chit章真清楚继续teh说明成长ê信仰，是tī生活上thang见证出来ê。信仰绝对m̄是口号，á是停留tī思想中，却是有确实ê行动，chit种行动是tī工作kah生活中展现出来。

第1到3节，chit三节是继续第五章11到14节ê劝勉，希望众信徒ē-tàng进步，而m̄-thang总是停留tī信仰ê初步阶段。Tī chit三节经文中，作者提起几点重要ê信仰要义内容：（1）懊悔，指承认错误ê意思。（2）信上帝，相信只有一位创造宇宙万物ê神。（3）洗礼，早期教会看做非常重要ê入信礼仪。有洁净、洗荡过去ê罪ê意思。Mā就是犹太教ê洁净礼。（4）按手礼，通常lóng是teh洗礼了后，象徵祝福ê意思。若是beh差派人去传福音，按手除了表示祝福，mā表示赋予权柄。（5）死人koh活，基督教信仰siōng根本ê要义。（6）永远ê审判，亲像马太福音第廿五章31到46节耶稣所讲ê最后审判。

　　作者希望基督徒m̄-thang总是Tī顶面所讲chiah-ê问题上phah转，而是beh继续走chhōe koh khah积极ê信仰见证。亲像：洗礼，就m̄-thang总是停留teh争论tio̍h用「浸礼」á是「滴礼」ê仪式上，而应该继续问：洗礼了后，人怎样过洁净ê生活，án-ne chiah有意义。

    第4到6节，chit段经文讲出tī希伯来书作者ê时代，有信徒离开教会，并且重头tńg来到in本来ê信仰内面，无koh坚信耶稣就是性命ê救主。作者ê看法是：一个人tī未信主chìn前，得tio̍h福音了后，因「悔改」而归属耶稣。chit-má「弃sak正道」了后，就无法度koh再叫chit-ê人「重新悔改」。伊ê意思是「弃sak正道」ê人，就是「koh一pái kā上帝ê kiáⁿ钉十字架顶，公然侮辱伊」，chit种人怎样ē-tàng有「koh一pái悔改」ê机会？无可能ê。作者ê意思并m̄是讲上帝不接受悔改ê人，却是讲chiah-ê会án-ne，是因为in ê心硬chiah会做chit种选择。既然án-ne，就一定tio̍h家己负起侮辱上帝ê责任。这就ná亲像耶稣所讲ê：「独独无论啥人亵渎圣神，伊
绝对bē-tàng 得tio̍h 赦免，因为伊是犯tio̍h 永远bē-tàng 赦免ê 罪。」(全民版)」（马可福音三：29）

第7到8节，作者用田地种作做譬喻，chit-ê譬喻类似以赛亚书第五章1到7节，先知以赛亚讲tio̍h葡萄园ê譬喻，hiah-ê无结出好葡萄ê果园，teh-beh拆除它ê围篱，hō͘野兽来食园á内ê果子，并糟蹋它，hō͘它荒废。作者tī-chia引用chit-ê比喻，主要teh说明好ê koh有整理过ê田园，必定会「吸收雨水，生长菜蔬」，这是有上帝赐福。相对ê，hō͘田园荒废ê，必定会生出真chē「无用ê刺phè kah蒺藜」，chiah-ê只有ē-tàng用「火烧毁」，ná亲像「被诅咒」仝款ê「危险」，bē有上帝ê赐福。

第9到12节，作者写hō͘信徒ê chit本书信有责备mā有鼓励，chit段话kah第4到6节hiah-ê弃sak正道ê信徒tú好呈现对比。作者激励hiah-ê tī信仰上坚持ê信徒，hō͘ 伊真koân ê肯定。伊讲in有坚定ê信仰，就是「koh khah接近拯救」ê目标。作者提醒信徒，上帝是「公道ê」，绝对无bē记得in tī「工作kah疼心」上所表现出来ê美好见证。伊ài chiah-ê tī工作kah疼心有见证ê信徒，bē-tàng有「pîn-tōaⁿ」ê心，án-ne chiah ē-tàng「领受上帝ê应允」。这是天顶ê应允，是hō͘ hiah-ê头尾热心tī福音事工ê人。因为chiah-ê人m̄-nā家己有坚定ê信心，而且ē-tàng帮助别人。

第13到15节，作者Tī chit段经文中以犹太人ê祖先亚伯拉罕为例，讲上帝bat用家己ê名「chiù-chōa」beh「应允」hō͘伊，chit项应允就是「多子多孙」（参考创世记十二：2）。亚伯拉罕就「耐心等待，终其尾得tio̍h上帝所应允ê」chit项赐福。

第16节，chit节是为tio̍h beh解释第13节所提起ê上帝以家己ê名chiù-chōa。因为上帝就是kui个宇宙万物ê创造者，当他用家己ê名chiù-chōa ê时，表示kui个宇宙万物lóng是担保品仝款。因为án-ne，做一个人用比伊「家己大ê chiù-chōa」，chit种chiù-chōa就会「结束人kah人中间一切ê争执」，原因是chit位koh khah大ê人会担中间保，负起chiù-chōa所讲ê责任。

第17到18节，chit两节作者特别强调上帝ê应允是「永远bē改变家己ê计画」，原因是tī上帝ê应允中mā包含他ê誓言，因为上帝是神圣ê，他所讲ê话必定会实现，tī他实践所应允ê誓言chìn前，他bē改变他ê应允。这mā是圣经作者一再强调ê，上帝是一个「信实」守约ê神。这mā是希伯来书ê作者beh表明白：tī上帝ê应允内面，有含上帝ê誓约tī其中。因为án-ne，作者ài所有信徒一定tio̍h「掠tiâu」chit项应允ê「ǹg望」，不beh hō͘之溜行、消失。

第19到20节，作者tī chia提起所有ê信徒ē-tàng有chit种「ǹg望」，就是thang领受上帝ê应允，chit种tùi上帝来ê应允ná亲像「性命之锚」一般。Ná亲像船进入港口ê时beh放落「锚」，hō͘船停泊tī港口ê时chūn，thang稳定落来，「koh安全koh可靠」。

另外一方面，作者tī chia mā kā耶路撒冷圣殿「至圣所」ê观念引用tī此；犹太人一直有一个观念：「至圣所」乃是上帝显现kah大祭司对话ê所在，是神圣之地，mā是每一位大祭司一生所期待ê事（参考路加福音一：8—11）。Á基督徒则siōng期待ē-tàng进入上帝ê国度，m̄是人间圣殿ê「至圣所」ê所在。因为án-ne，做「大祭司」ê耶稣，伊已经成做所有信徒ê「先驱」进入上帝ê国度，伊是teh带领所有信靠伊ê人进入了上帝ê国度里。Án-ne，耶稣带hō͘信靠伊ê人有安全、稳定ê性命，ná亲像一艘船进入港口，弃sak了锚一般安稳。

希伯来书 7:1-7:28

注释:

这kui章ê篇幅lóng是teh绍介麦基洗德chit位大祭司。M̄-koh无论是tī旧约创世记第十四章17到24节，á是诗篇第一一○篇4节，lóng只是提起麦基洗德是祭司，却都无提起伊ê身世背景，á是伊到底是怎样出现ê。不过因为创世记第十四章提起亚伯拉罕kah麦基洗德之间有过互动，因为án-ne，差不多犹太人lóng知影麦基洗德就是一位大祭司。

    第1到2节，chit两节thang参考创世记第十四章18到20节ê记载。
Chia mā hō͘「麦基洗德」chit-ê名下一个定义为「正义ê王」。
Koh讲，所谓「撒冷」，指ê是耶路撒冷。因为「撒冷」chit-ê名mā有「平安」ê意思，因为án-ne，「撒冷王」ê另外一个意思就是「和平ê君王」，这kah以赛亚书第九章6节所讲hit位teh beh来临ê弥赛亚是一个「和平ê君王」ê意思仝款。麦基洗德既是耶路撒冷ê王，mā是「至koân上帝ê祭司」，伊同时拥有两个地位。

第3节，这是真特别ê写法，kah创世记第十四章ê写法有kóa差别；tī创世记虽然无绍介麦基洗德ê身世背景，读起来会hō͘人感觉是资料不全。M̄-koh tī希伯来书chit种写法，则有意表明：麦基洗德乃是tùi天顶降落来ê一位「大祭司」，是上帝所差派专程来到世间ê。因为án-ne，作者用「伊kah上帝ê kiáⁿ类似」chit句话来形容。

第4到10节，chit段经文mā是tùi创世记第十四章18到20节ê背景为底，主要以三点说明麦基洗德是一位tùi上帝来ê特别使者：

(1)连亚伯拉罕mā向麦基洗德「纳」了十分之一ê战利品，chit项举动非常特别，尤其这kah利未人tùi献祭物件中抽取十分之一ê意义无仝。

(2)麦基洗德为亚伯拉罕祝福，这表示伊比亚伯拉罕ê位阶iáu koh khah koân，因为tī古代只有tī上位ê人thang为下位ê人祝福。因为án-ne，作者tī chia讲「hō͘别人祝福ê比hit-ê受祝福ê人khah伟大」。(3)麦基洗德并无亲像利未人，in照律法规定「收取十分之一」，m̄-koh iáu是会死去；m̄-koh麦基洗德虽然「mā收取十分之一，却是活teh ê」，并无往生。

作者用顶面所讲这三点来表明一个重要ê信息：犹太人心目中siōng重要ê祖先亚伯拉罕，lóng会向麦基洗德行顶面所讲chiah-ê举动，就thang想像麦基洗德是jōa-ni̍h-á尊贵à。

第11到12节，chit段经文讲tio̍h耶稣ê背景，并无有祭司ê身分，因为耶稣是属tī犹大支族ê kiáⁿ孙，而祭司乃是利未族ê kiáⁿ孙。会án-ne有耶稣ê出现，是因为祭司ê传承出了问题，这问题无tī血缘ê传承，却是来自心灵ê洁净。当时因为人心堕落，弃sak了上帝ê正道。因为án-ne，作者tī chia讲「若是利未祭司ê制度ê工作是完全ê，就用不着有另外一种麦基洗德—m̄是亚伦—制度ê祭司出现」。Án-ne，既然「制度改变，律法mā得改变，这是真正常ê事。

第13到14节，「咱ê主」，指ê就是耶稣。伊并无属tī利未支族ê kiáⁿ孙，却是属tī犹大支族ê人，m̄-koh chit支族ê人「从来无人当过祭司，tī祭坛前供职」过，摩西律法mā无从来m̄-bat有提起这犹大支族ê人有当祭司ê份。M̄-koh chit-má主耶稣已经成做像麦基洗德仝款ê大祭司，而且带领所有信靠伊ê人tńg来到上帝面前。因为án-ne，过去摩西律法ê规定，chit-má lóng无适合koh再用à。

第15到19节，tī第3节作者bat讲过麦基洗德「无老父，无老母，无身世族谱，mā无生死ê记录，伊kah上帝ê kiáⁿ类似，永远作祭司」，这就清楚说明麦基洗德并m̄是根据利未人继承祭司条例来ê。因为án-ne，tī第七章6节bat提起「麦基洗德不属tī利未ê世系」。chit-má作者讲「另外一个像麦基洗德ê祭司已经出现」，chit句话是用来形容耶稣ê身分。既然麦基洗德不属tī祭司，耶稣当然mā就不属tī利未族ê kiáⁿ孙。因为án-ne，tī第16节作者就讲耶稣基督「并m̄是因为世系继承落来ê条例」。

	Chia讲「世系继承下ê来条例」，意思是teh指祭司是tùi利未人根据相关ê律法条文传袭落来ê。Chiah-ê律法规定包括有：

第一、一定tio̍h先沐浴洁身。

第二、穿全套ê祭司礼服。包括tùi头壳顶ê帽á到身上ê长袍。

第三、由大祭司用油膏tī利未人ê头壳顶，表明设立为祭司。Á chiah-ê油mā tio̍h抹tī祭坛上。

第四、宰刣羊羔，并kā羊羔ê血抹tī祭司ê正耳垂、正手大头拇、正脚大头拇，然后koh再kā chhun落来ê血泼洒tī祭坛ê四周。

第五、完成chiah-ê礼仪了后，所有被膏立ê祭司lóng一定tio̍h留tī圣殿中七工不准离开。七工了后chiah算全部完成。这就是希伯来书作者tī chia所讲ê「世系继承落来ê条例」。

	Tùi顶面所讲chiah-ê继承条例看tio̍h一个重点，就是非常重视外表ê礼仪。Chiah-ê tī人看起来是非常重要，m̄-koh却无法度突破一点：人心内ê意念。礼仪ê kui个过程lóng是人thang用目睭看会tio̍h，m̄-koh人心内ê意念则无法度用目睭看会出来。因为án-ne，必定会有真chē属tī人「软弱bē-tàng，无路用」ê部分。

作者并m̄是讲chiah-ê律法规矩不重要，伊并无否认chiah-ê成做祭司所一定tio̍h具备ê kui个过程，却是指出膏立祭司即使有chit种kāu枝叶，iáu是有无完全ê所在，因为án-ne，chiah需要有一个koh khah完全ê来补足缺失。Á chit-ê补足ê方式，就是由上帝亲自差遣来到世间ê耶稣执行。因为有耶稣成做大祭司ê带领，hō͘「咱thang接近上帝」，án-ne chiah是siōng好ê「ǹg望」。

第20到22节，chia分别出利未ê祭司，kah上帝差遣ê耶稣之间，二者身为祭司身分ê差别；利未成做祭司，上帝并无发出任何「誓言」，m̄-koh tī耶稣身上，上帝「bat chiù-chōa，绝bē改变心意」，beh hō͘耶稣「永远作祭司」。作者引用诗篇第一一○篇4节ê诗歌，说明耶稣就是永远ê祭司，因为án-ne，伊成就了「khah美好ê约ê保证」。

第20到25节，chit段经文作者继续提起利未系统ê祭司kah耶稣成做祭司之间ê差别。作者tī chia强调一个基本ê差别是：以前被封立ê祭司虽然真chē，m̄-koh lóng死去而耶稣是永活ê祭司，因为án-ne，无人mā无需要有人来继承。Mā因为伊永远活teh，所以伊一直是siōng ē-tàng带领hiah-ê人「亲近上帝」，mā是siōng ē-tàng替信徒向上帝「求告」ê祭司。

第26到28节，chit段经文继续说明耶稣成做大祭司，kah一般ê大祭司无相仝。

一是耶稣是「圣洁、无过错、无罪」ê，因为án-ne，伊被「提升到诸天之上」。M̄-koh一般大祭司是有罪ê人，会死。

二是伊只献祭一pái，就是「Kā家己献上」，án-ne一pái就完成救赎ê工作，m̄-koh一般ê大祭司是需要ta̍k工献祭。

三是摩西ê律法「封立无完全ê人为大祭司」，相对ê，上帝所设立ê chit位大祭司，就是他「永远完全ê kiáⁿ」，是上帝「chiù-chōa应允」hō͘人ê恩典。

希伯来书 8:1-8:13

注释:

作者tī chit章经文中继续强调siōng伟大ê祭司就是耶稣，伊kah过去tùi利未人推选出来ê大祭司有甚么无仝，以及原本利未人推选出来ê大祭司之工作是甚么，而耶稣做大祭司为tio̍h人类所献上ê又koh是甚么祭。

基本上，thang án-ne了解：tùi第八章到第十章，teh讨论ê主题内容，主要ê根据就是耶利米书第三十一章31到34节ê经文所延伸出来。Tī先知耶利米ê信息里，提起上帝kā kah以色列人民立「新ê约」，这「约」无koh是外表ê，却是刻tī人ê心内，chit种「约」chiah会永远存在。希伯来书ê作者就是用先知耶利米ê信息来开启犹太人基督徒对耶稣有新ê认bat，希望in koh khah清楚chit位上帝亲自差遣到世间来ê大祭司，伊成做人类kah上帝之间siōng好ê「约」ê记号，其意义是深远ê，mā是贵重ê，作者希望读者会珍惜chit份tùi上帝来赏赐ê贵重礼物。其实，作者想beh表达ê观念是：耶稣是新约，这新ê约赢过旧ê约。

第1节，因为耶稣就是直接tùi上帝来ê大祭司，而且上帝ê kiáⁿ。若是无人ē-tàng比得麦基洗德，he koh怎样有人ē-tàng kah耶稣相比？当然koh khah无可能。这就是作者tī chia所beh表明ê一个结论。因为án-ne，伊tī chia用「重点」来形容chit-ê结论。然后作者进一步讲tio̍h耶稣就是伟大ê祭司。伊之所以伟大是因为伊「坐tī天顶至koân权力者ê宝座正pêng」，chit句话非常重要。Chit句话teh表明耶稣是上帝kah人之间ê桥梁，ná亲像信仰上ê「媒人」仝款，替人当做担保者。

第2节，「至圣所」设tī圣殿siōng内面ê所在，tùi列王记上第六到八章thang清楚看见圣殿建造得非常富丽堂皇，是由siōng好ê工匠负责雕琢殿内各种物件。大祭司每年一pái带赎罪祭ê血进入「至圣所」、mā是上帝kah大祭司会面ê所在（参考利未记十六：13—15、希伯来书九：7）。因为án-ne，任何大祭司beh进入，lóng一定tio̍h谨慎照规定ê礼仪进行。M̄-koh chit-má耶稣基督当大祭司所服事ê圣所，并m̄是用人ê手kah金饰物件所建造ê，却是上帝家己建造ê，án-ne chiah是「真圣幕」。

第3节，chit节thang参考第五章1节：「每一个大祭司lóng是tùi民间选出来，被指定替人民事奉上帝，为in ê罪献上礼物kah祭品。」作者讲既然大祭司需要献祭，耶稣mā仝款。M̄-koh耶稣siōng特别ê所在，伊m̄是用牛á是羊等chit种祭牲作为祭品，却是用家己ê性命代替了所有ê人ê罪，献tī上帝ê祭坛顶à。

第4节，耶稣并无属tī利未族人，因为án-ne tī chit世间无可能当祭司，因为tī chit世间有照摩西律法设立ê祭司做献祭ê工作。

第5到6节，这是真特别ê经文；作者认为地上所有ê，lóng是「天顶圣幕ê副本kah影像」。Chit种讲法kah当时非常流行ê希腊思想有密切关系。因为希腊思想认为世间ê事物是虚幻、不实在、暂时ê，是tùi天顶映照落来ê「影像」而已。M̄-koh作者tī chia强调耶稣所事奉、献祭、服事ê，lóng比地上ê祭司khah优越，因为伊ê祭司身分有上帝ê「应允」tī其中，是「介tī上帝kah人之间作中间人ê约」而成做祭司。

第7节，原本上帝颁布hō͘摩西转达hō͘以色列人民ê「约」是美好ê，m̄-koh以色列人民kā它破坏了（参考耶利米书三十一：31—32）。因为án-ne，chiah需要立第二个「约」，chit-ê「约」就是所讲ê「新约」。

第8到12节，chit段诗歌是引用耶利米书第三十一章31到34节。重点tī上帝beh kah以色列人民立新ê约。这新ê约kah旧ê约之间ê差别，就是新约是写tī咱人ê心坎上（第10节），旧ê约则以「割礼」做记号（参考创世记十七：7—14）。

第13节，mā因为有新ê约出现，因为án-ne，过去旧ê约就无存在ê价值，就会「急速消失去」，无koh出现。

其实，这mā是使徒保罗一再强调ê，摩西律法并bē-tàng hō͘人得tio̍h性命ê拯救，只有ē-tàng hō͘人知影家己ê罪而已（参考罗马书七：7—11）。

希伯来书 9:1-9:10

注释:

Tī chit章作者引用旧约时代以色列人出埃及后，进入旷野ê时建造ê圣幕来说明耶稣做一位大祭司，其所扮演ê角色是甚么。希伯来书是写hō͘犹太人基督徒看ê，因为án-ne，犹太人对tī圣幕是一点á mā不生份。Á tī圣幕中是用约柜做以色列人民kah上帝之间约ê记号。因为有圣幕，就有负责管理kah带领人民到圣幕敬拜上帝ê祭司。Koh再tùi圣幕演变到落尾进入迦南应允之地后ê圣殿，祭司lóng扮演非常重要ê角色。因为祭司就是beh带领人民以祭祀礼仪敬拜上帝，学习认bat上帝ê疼，这是非常重要ê工作，马虎bē-tàng ê事。

希伯来书作者提起ê祭司工作，就是用旧约时代圣幕ê背景所讲ê规定，kā耶稣定位tī伟大ê祭司ê角色上。作者讲耶稣带领所有信靠伊ê人进入来上帝ê面前，直接领受上帝所赐永恒ê性命。

Chit段经文ê背景kah出埃及记第廿五到廿六章有密切ê关系；作者引用出埃及记所记载关系圣幕（后来ê圣殿）之各项礼仪规定，来表明一个重要ê信息：chiah-ê礼仪规定lóng只是表面ê象徵。如果礼仪不周全，只要修正to̍h ē-sái。

第1节，所谓「头一个约」，指ê就是旧约。有记载两项重要ê事，其一就是「礼拜ê规例」，另外一项是「礼拜场所」。前者，非常清楚记载tī摩西ê律法中，明确ê规定祭司应该怎样进行献祭ê礼仪，特别是tī利未记第一到七章真清楚记载各种无仝ê祭祀方式kah内容。Á后者，是teh指出埃及记第廿五kah廿六章以后所记载关系建造圣幕ê事。这圣幕是tī摩西带领以色列人出埃及进入旷野ê时代所建造ê，主要目的是做敬拜上帝ê路用。

第2到5节，chit段经文lóng是记载有关圣幕内面ê设施。

Tī第2到3节提起圣幕里有两个部分，就是里、外两个部分；前一个部分就是所讲ê「外部」，mā就是祭司进入ê所在。然后是内面ê部分，chia就是只有大祭司chiah thang进入ê所谓「至圣所」。圣幕里有灯台、桌á、供饼等物件。Chiah-ê lóng tī出埃及记第廿五章31到39节记载kah非常清楚。Tī第3节记载有关「至圣所」里ê设施，包括有烧香用ê金香坛、约柜等物件。烧香用ê香坛之所以hông称做「金香坛」，是因为它ê外面有用纯金包裹，án-ne chiah thang tī顶面点香。Chiah-ê香ê调配方式kah一般家庭所使用ê绝对无仝；「至圣所」所用ê香是用siōng好ê香料调配起来ê，为tio̍h beh献tī「至圣所」hō͘上帝ê，当然tio̍h用siōng好ê。

	第4节讲tio̍h有关约柜里放tio̍h盛tio̍h吗哪ê金罐子，背景记载tī出埃及记第十六章33到34节为tio̍h是beh hō͘以色列人民知影食吗哪，是kah上帝之间有性命bē-tàng分离ê性命关系。Á亚伦hit支发过芽ê拐á则记载tī民数记第十七章。约柜内面放tio̍h两块刻写tio̍h十诫ê石版，这是teh表明以色列人民kah上帝之间立有永远ê性命ê约，世世代代lóng bē改变。
第5节thang参考出埃及记第廿五章17到22节。

第6到10节，chit段经文讲tio̍h关系进入圣所ê规定。

第6节讲一般ê祭司只有ē-tàng进入「圣幕ê外层举行礼拜仪式」，chia所讲ê「圣幕ê外层」，thang分做两部分，一是tī圣幕外ê祭坛，另外一个是圣幕到至圣所之间ê所在。

第7节提起只有大祭司chiah thang进入「至圣所」内面，而且是「每年只有一pái」ê「赎罪日」（犹太历七月十日，参考利未记廿三：26）chiah thang入去。大祭司tio̍h带动物ê「血」，因为血ē-tàng赎罪（参考利未记十七：11），大祭司用chiah-ê动物ê血来「为家己kah人民赎罪」。

	第8节，tī chia所讲ê「圣神藉tio̍h chiah-ê安排来指明」，chit句话涵盖以后到第10节所讲ê，所有chiah-ê繁琐ê祭祀礼仪lóng是「外表ê规例」，并bē-tàng hō͘人ê心内完全，chit点thang tùi in每年lóng一定tio̍h举行「赎罪」ê礼仪看出来。

    第9到10节，chit节作者hō͘一个全新ê解释，讲圣幕ê外层「象徵tio̍h现今ê时代」，表明无论圣幕内外所有ê献祭，lóng无法度hō͘人ê「心内完全」。作者强调献祭牵涉tio̍h ê，只不过是「lim食kah无仝ê洁净仪式而已，是属tī外表ê规例」，无法度建构人心内ê真诚kah敬畏ê心灵。

希伯来书 9:11-9:22

注释:

Chit段经文作者讲tio̍h旧约记载献祭赎罪ê规律，tī耶稣钉死tī十字架上ê时，流出来ê血就是赎罪ê记号à。

第11到12节，chit节真清楚讲耶稣「基督已经来à；伊做大祭司」，这表示耶稣就是「救赎者」（基督ê意思）。伊救赎ê对象「koh khah大koh khah完全」，比起用人ê手建造起来ê圣幕，只有针对以色列民族，耶稣所献祭救赎ê范围koh khah大。因为伊用ê是「家己ê血」做救赎ê代价，m̄是旧约时代用「山羊kah小牛ê血」作祭物。

第13到14节，作者tī chia表明耶稣用伊ê血献祭，thang「净化」人ê「良心」，除掉人ê「腐败行为」。作者chit种说明已经讲出耶稣带hō͘所有信伊ê人一个全新ê性命形像，mā是性命ê改造。Ná亲像使徒保罗讲ê：「无论甚么人，若kah 基督结联，就是新创造ê 人；旧ê tāi-chì 已经过去，taⁿ lóng 变做新ê。(全民版)」（哥林多后书五：17）血是代表性命（参考利未记十七：11），因为án-ne，当耶稣以伊ê血献祭，mā就是献上家己ê性命，mā表示所有信伊ê人lóng kah伊ê性命成做一体了（参考约翰福音十四：20）。因为án-ne，基督ê献祭是「完整ê」，kah过去人所献ê祭无仝款。

第15节，「基督成做这新约ê中间人」，mā就是保证人ê意。保证所有听tio̍h福音信息ê人，lóng ē-tàng得tio̍h上帝所「应允永恒ê福泽」。人是「藉tio̍h」耶稣ê「死」，chiah ē-tàng修复kah上帝之间因为罪带来ê隔阂，taⁿ人thang kah上帝重新建立合宜ê关系。

第16到18节，chit两节用「遗嘱」来表示关系ê建立。这是一般人lóng ē-tàng理解ê事。一般来讲，血是带表性命。旧约时代用动物ê血表示立约，mā表示赎罪。新约就是耶稣用家己ê性命所流ê血来表明赎罪，mā用来表示建立新ê约。

第19到21节，chit段经文提起旧约时代以色列人民kah上帝所立ê约，虽然已经过去à，m̄-koh hit-ê「约」iáu是仝款有性命ê基础。作者引用出埃及记第廿四章4到8节所记载ê，上帝命令摩西带领亚伦kah伊ê kiáⁿ拿答、亚比户，kah以色列全体民族代表到西奈山顶领受诫命。当摩西tùi山顶落来后，kā上帝「一切ê命令kah规例」陈述hō͘全体以色列听，然后伊tī山脚起造一座祭坛，并差派一kóa少年人向上主献cheng-seⁿ，作为烧化祭kah平安祭，koh再kā chiah-ê cheng-seⁿ ê血洒tī祭坛，以色列人民回应讲：「上主所吩咐一切ê命令，咱愿意顺从遵行。」

希伯来书作者用犹太人非常熟悉ê血kah性命之间ê关系来表明一件siōng重要ê事：旧约时代是用动物ê血来赎罪，m̄-koh新约时代则由耶稣基督以家己ê血来替所有ê人赎罪。Chit种性命远比用动物ê血赎罪koh khah贵重。

第22节，「差不多各种器皿lóng是用血洁净ê」chit句话所讲ê「各项器皿」，是teh指tī圣幕中里排设ê各项敬拜用ê器皿，包括灯台、桌á、祭坛等等等chiah-ê kah敬拜有关ê物件。这mā是犹太人久长以来ê传统，每年「赎罪日」ê敬拜中，大祭司就一定tio̍h kā献祭cheng-seⁿ ê血洒tī所有圣殿内ê物件，用chit种方式象徵chiah-ê器皿lóng已经被洁净à。
「无流血，就无赦罪」，chit句话回应了第15节所讲ê，耶稣就是用家己ê血来赎所有ê人ê罪，伊取代了旧约用cheng-seⁿ ê血，伊流家己性命ê血作为kah上帝立约ê记号。

希伯来书 9:23-9:28

注释:

希伯来书ê作者引用当时siōng流行ê希腊思想观念，认为地上ê一切乃是天顶ê「影像」、「副本」，所以地上一切lóng是「虚幻」ê，天顶ê chiah是真实。因为án-ne，作者Tī chit段经文中koh一pái表明chit种观念，提起天顶ê比地上ê khah美好，既然地上ê圣殿（á是会幕）需要用洁净礼来表明它ê圣洁。仝款ê，天顶ê圣殿就koh khah需要用「koh khah好ê祭物去洁净」。

第23节，希伯来书作者引用了旧约祭祀礼仪ê规定，因为利未记tùi第十一章开始直到第十五章止，lóng是记载有关各项洁净ê礼仪规律，包括怎样ê情况之下是无清气ê，ài怎样ê方式chiah ē-tàng表示洁净。

	第24节，耶稣并m̄是利未家族ê kiáⁿ孙，照人ê族谱来看，伊是属tī犹大系统ê kiáⁿ孙，因为án-ne，伊从来无进入「人手所造ê圣所」为任何人举行过类似ê祭祀礼仪，伊是上帝ê kiáⁿ，直接tùi上帝来ê。因为án-ne，伊是直接就进入上帝tī天顶ê居所，带所有óa靠伊ê人到上帝面前。

第25到26节，chia提起犹太人ê大祭司每年lóng tio̍h「带cheng-seⁿ ê血进入来至圣所」，相对ê，耶稣并无需要án-ne，而且伊「一pái」就完成了献祭ê功效，hō͘人ê罪ē-tàng洁净。

	第27节，chia讲「人人一定有一死，死后有上帝ê审判」，chit句话对当时充满tio̍h希腊思想ê大众来讲是真oh接受kah理解ê，因为tī希腊思想中认为：人只要一死，一切lóng结束loh。Á chit句「死后有上帝ê审判」hō͘当时ê人无法度理解，人lóng死去，上帝ài怎样审判？基本上基督教信仰认为性命是永恒ê，无死亡。因为án-ne，怎样hō͘这永恒ê性命有一个善恶ê区别，就是tùi有审判ê观念来看。上帝无可能hō͘作恶ê人mā thang久长享受他ê慈爱，koh khah无可能hō͘ hiah-ê遵行他旨意ê人一直受tio̍h轻视。上帝必定会kā遵行他ê旨意者kah违背他教示者区分出来，hō͘这二者tī永恒ê境界里分开就一定tio̍h进行审判ê工作。圣经中chit种例bē少，像马太福音第廿五章31到46节，tī审判ê日子里，kā好kah pháiⁿ ê ná亲像区分绵羊kah山羊一般，明显区隔出来。Koh亲像tī马太福音第十三章47到48节，用渔网捞起海里ê物件，kā鱼á分开，kā好ê收入来，pháiⁿ ê弃sak。类似chit种例真chē，lóng是teh说明审判ê意义。因为án-ne，死后有审判，这是基督教信仰真重要ê一个环节。Kui本圣经lóng一再提起上帝一定会审判。

第28节，ē-sái讲是希伯来书作者一再努力beh表明当时ê犹太人基督徒耶稣koh再临时并m̄是来审判ê，却是来「拯救迫切thèng候他ê人」。

希伯来书 10:1-10:18

注释:

有人认为希伯来书ê作者真可能就是使徒保罗，原因是有真chē观念á是论调实在真亲像使徒保罗ê讲词。Chit章就是一个siōng好ê例，作者讲tio̍h有关律法kah救恩ê问题。对犹太人来讲，摩西律法有绝对ê权威。M̄-koh，希伯来书ê作者beh hō͘当时ê犹太人知影，即使是摩西律法有绝对ê权威，却m̄是带领人tńg来到上帝面前ê途径，真正ē-tàng帮助人tńg来到上帝面前ê，m̄是律法中所规定ê hiah-ê带有kāu枝叶ê敬拜、献祭礼仪，真正hō͘人ē-tàng tńg来到上帝面前ê，乃是上帝ê kiáⁿ耶稣拯救ê疼，而chit点tú好是使徒保罗ê思想中心（参考罗马书四：21—28），莫怪有人会讲希伯来书ê作者就是使徒保罗。Chit章就是teh讨论chit方面ê差别。

希伯来书ê作者tī笔法上有真大ê特色，亲像tī第八章7节讲：「头一个约若无甚么缺点，就无需要立第二个约。(全民版)」（希伯来书八：7）koh讲：「若kā牛á 是羊ê 血kah 牛母á ê 骨灰hiù tī 无清气ê人ê身上，都会hō͘ in圣化清气，何况基督是通过永远ê 圣神，献他家己无缺点 ê 本身 hō͘ 上帝；他 ê 血 kám无 koh khah 会 hō͘ 咱 ê 良心清气，thang脱离死亡ê 行为，来服事永远活ê 上帝？(全民版)」（希伯来书九：13—14）Chit-má koh讲：「如果敬拜上帝ê人ê罪真正lóng得tio̍h洁净，in就bē koh再有罪ê意识，一切献祭ê事mā就ē-tàng停止。」（本章第2 节）chit种笔法ê特色是：相对性，á是讲是比较性。

第1到4节，chia说明律法ê功效是非常有限ê。这mā是使徒保罗ê思想，人如果靠遵行律法就ē-tàng得救，án-ne就无需要耶稣ê救恩。Tī chia mā提出chit种观点：如果律法是完整ê，就无需要每年lóng献上祭物表示罪已经得赎à。这表示无论怎样献祭，á是献了jōa-chē祭牲lóng并bē-tàng解决人ê罪ê问题。

第5到7节，chit两节是引用诗篇第四十篇6到8节ê诗歌。
摩西律法中规定五种祭，一是烧化祭、二是平安祭、三是素祭、四是燔祭、五是赎罪祭等。作者引用诗篇ê诗歌，主要teh说明上帝欢喜ê，并m̄是各式各种ê献祭，却是欢喜人遵行他ê旨意。Tī弥迦书第六章6到8 节就有仝款ê讲法，上帝并无欢喜人献祭hō͘他，他只希望人跟tòe伊行世间ê旅途。大卫犯罪了后，醒悟过来ê时写诗，tī诗歌中伊讲：上帝无欢喜牲祭，上帝喜爱ê是忧伤痛悔ê心（参考诗篇五十一：16—17）。

第8到9节，chit两节是继续解释头前ê诗歌。表示上帝并无欢喜人ê献祭，因为人虽然有献祭，却往往无Kā chit种献祭所beh表达ê意义，表现tī生活á是工作中。因为án-ne上帝chiah会以「基督ê牺牲代替」过去所有ê献祭。

第10节，chit节thang参考马可福音第十四章36节。耶稣「遵行了上帝ê旨意，献上家己ê身躯」，就án-ne成功地kā所有属tī上帝ê子民lóng「圣化」归hō͘上帝。

第11节，chia koh一pái强调讲虽然「祭司ta̍k工khiā-teh事奉上帝，kúi-nā pái献上仝款ê祭物」，m̄-koh并无解决人ê罪ê问题。

第12到13节，chit段经文koh一pái引用诗篇第一一○篇1节。作者koh一pái强调「基督献上一pái永远有效ê赎罪祭」。

第14节，chit节ē-sái讲是希伯来书ê中心思想，mā重复叙述第10节所讲ê过ê，hō͘所有信靠耶稣ê人lóng因为án-ne「圣化归主」，得tio̍h永恒ê性命。

第15到17节是引用耶利米书第三十一章31到34节。
第18节，chit节mā是tùi第七章15节以来，直到第十章17节ê一个结论。作者希望读者m̄-thang被真chē繁复、外表好看ê祭典礼仪所迷惑，chiah-ê只有ē-tàng hō͘人ê眼目满足，m̄-koh并bē-tàng解除人ê罪，因为真正ē-tàng hō͘人ê罪得tio̍h赦免ê，乃是上帝ê恩典，而且这恩典是tùi上帝来本身，并无óa靠人ê祭典礼仪。

希伯来书 10:19-10:39

注释:

Tùi第19节开始，是另外一段劝勉、警告ê话题。Mā是tùi第19节开始，直到chit本书信ê最后，mā就是第十三章21节为止，谈论ê主题lóng是「信心」。Án-ne，thang看出chit本书信ê kui个大概轮廓，就是：第一章到第十章18节，lóng是teh讨论有关耶稣ê身分；伊比天使ê地位koh khah崇高（第一到二章），mā赢过摩西、亚伦kah约书亚（第三到四章），koh来以麦基洗德ê身分来比并耶稣基督（第五到七章），然后第八到十章18节lóng kā主题放teh讨论有关耶稣就是上帝kah人之间所立新ê约ê记号。chit-má chit段经文就是最后一个部分，讨论有关信心ê问题。

第19到20节，chit两节是真重要ê经文，thang参考第四章16节。
作者tī chia讲人thang tńg来到上帝面前，面对tio̍h上帝，kah上帝和好，是因为「藉tio̍h耶稣ê死」所带来ê救赎恩典，hō͘所有信靠耶稣ê人thang「坦然进入来至圣所」，以前只有tī每年ê「赎罪日」大祭司chiah thang进入「至圣所」，chit-má则连「咱」lóng ē-tàng进入，无koh需要hō͘大祭司来代表咱。另外，就是无koh限定只有「赎罪日」，á是特别ê时间，却是任何时chūn lóng thang面对上帝，直接kah上帝对话、注意听上帝ê声音。因为上帝ê疼已经tī耶稣身上表明出来。

	第21到22节，chia koh一pái强调所有ê信徒lóng一定tio̍h准备洁净ê心灵来亲近上帝。Chit点是非常重要ê认bat，kui本希伯来书beh传达ê信息：kah上帝立「新ê约」，而这「约」一定tio̍h是真实ê。因为án-ne敬拜上帝需要用真诚ê心灵，这mā是耶稣ê教示。

作者tī chia提起「用已经蒙洁净、无亏ê良心，kah清水洗过ê身躯，来亲近上帝」，这是teh指一个人已经悔改、认罪，而且有受过洗礼ê礼仪来讲。作者用chiah-ê词句，是beh hō͘ chiah-ê已经悔改认罪ê犹太人基督徒知影in lóng已经受过洗礼，只要信靠耶稣，就ē-tàng直接面对上帝，却m̄是koh一pái tńg来到犹太人传统ê礼仪里去走chhōe拯救ê ǹg望。

第23节，「持守」chit-ê词，意思是要紧紧掠tiâu m̄放已经公开承认ê信仰告白。Chit份信仰告白是teh ǹg望上帝ê赦免kah拯救。希伯来书ê作者koh一pái强调上帝ê应允是真实可靠ê，他一定会赦免、赦免人ê罪。

第24到25节，chit两节特别提起当时犹太人基督徒中已经发生ê状况—有人弃sak了聚会。特别是tī「主ê日子快到」ê时刻，mā就是「末日」teh要来临，有chit种彼此关心、劝勉，心中ê操心kah不安chiah会减到siōng低ê状况。

第26节，chit节真清楚表示「故意犯罪」是上帝无法度接受ê事，等于是真难得tio̍h上帝ê赦免。因为信徒「故意犯罪」等于是teh亵渎、践踏上帝神圣ê救赎恩典仝款。Koh讲，chia ê「故意」一词，mā有「连续不断」ê含意，意思是teh指一而koh再、koh再而三ê行为。

第27节，作者讲每一个信耶稣ê人lóng会清楚知影有审判。因为án-ne，面对上帝ê审判，就一定tio̍h以「战战兢兢」ê态度teh thèng候，却m̄是随便无妥当一回事。

第28到29节，chia提起摩西律法规定「只要有两个á是三个证人证明」某人ê「过犯，就一定tio̍h处死，不蒙赦免」（参考申命记十七：2—7）。如果摩西ê律法lóng án-ne规定，Hit位耶稣是「上帝ê kiáⁿ」，是上帝亲自差派到世间来ê救主，人若是kā耶稣ê救恩当做图谋私利ê工具，á是kā耶稣ê救恩看做废物仝款，随意弃sak，he会是甚么后果？M̄免解释mā thang清楚。

第30到31节，chia引用申命记第三十二章35节，讲上帝必定会报应。因为上帝是一个公义ê上帝，他bē hō͘被压迫者一直受tio̍h冤屈。使徒保罗bat引用chit节经文来劝勉罗马教会ê信徒（参考罗马书十二：19）。基督徒一直认为：所有ê 被造物，无一项ē-tàng 对上帝隐瞒；万物lóng暴露tī他ê 目睭前；咱ê 行踏lóng tio̍h 对他交带清楚(全民版)。（四：13），呼吁大家m̄-thang轻忽上帝ê审判。

	第32到33节，希伯来书ê作者tī chia提起信徒中间有人非常勇敢，并无因为「tú-tio̍h真chē痛苦」而放弃信仰。虽然所遇tio̍h ê迫害hō͘人感觉非常难堪，甚至家己已经受到à「侮辱kah虐待」，mā安慰hiah-ê因为信仰受tio̍h迫害ê人，kah in「khiā tī一边」，这lóng是美好ê见证。

第34节，chia提起真chē信徒所受tio̍h ê困境，就ná亲像「囚犯」仝款，甚至连「所有ê财物lóng被夺行ê时chūn」，为tio̍h福音ê缘故mā「甘心忍受」苦难。

第35节，作者深信有chit种坚持ê信徒，将来必定会得tio̍h「极大ê报赏」，因为án-ne，作者鼓励in「m̄-thang丧失勇气」。

第36到37节，作者引用诗篇第九十五篇7到11节，诗人提醒以色列人民一定tio̍h趁「今á日」ē-tàng听tio̍h上帝ê声音ê时，m̄-thang心硬，而是beh赶紧悔改归向上帝。作者引用chit种诗歌，就是teh鼓励信徒ài忍耐，因为上帝审判ê「hit日子」真紧to̍h会来临，bē「迟延」，却是「koh过一下á」就会来到。希伯来书ê作者一直有强烈ê暗示：审判ê日子teh beh来临，bē延迟jōa久，ài忍耐落去，m̄-thang放弃，免得过去忍受ê苦难因为无法度坚持而变成落空，án-ne就真可惜。

第37节，这是引用哈巴谷书第二章4节。
作者主要mā是teh鼓励众信徒m̄-thang因为等待来馁志，tio̍h对上帝有绝对ê忠心，án-ne chiah是领受天顶奖赏siōng重要ê凭据。

第39节，chit节是为第十一章先做踏话头。作者kā chiah-ê犹太人基督徒讲，hō͘ in知影有「信心」，chiah ē-tàng hō͘人免tī「沉沦」。Chia所讲ê信心，意思是对上帝绝对ê忠实、不怀疑。Koh讲，信心，mā是teh指继续不间断ê状态，m̄是某一个段ê时期信心真好，其他ê时段就真差。却是一直保持无变ê态度，继续无停持守tio̍h，m̄敢有任何疏忽。

希伯来书 11:1-11:16

注释:

Chit章是讨论有关信心ê问题。因为当时有bē少信徒已经弃sak信仰，离开教会，无koh参加聚会，koh khah严重ê是，有人「故意犯罪」污辱了上帝ê圣名。因为án-ne，chit章ê主题内容就是讨论关系「信心」是甚么。作者tùi亚伯开始论述，一直讲tio̍h先知撒母耳，内容lóng 着（tio̍k）眼tī「信心」chit-ê题目上。Ài beh特别注意ê是：作者论述「信心」ê时，是teh指对上帝beh有信心，伊是tī chiah-ê基础上讨论信心ê问题。Koh讲，mā tùi chit章举出例来谈论信心，thang看出作者对旧约信仰人物非常熟悉。

Chit段经文lóng是用亚伯拉罕做题材，讨论关系信心ê问题。
第1节，chit三节为「信心」下了简单ê定义，讲「信心是对所ǹg望ê事有把握，对无法度看见ê事ē-tàng肯定」，chit句话指出对「信心」ê基本观念：它是超越现实生活范围时间、空间ê限制。Ài beh特别注意ê是，它是「看bē-tio̍h」以及对tī「将来」ê领域，因为án-ne，绝对m̄是属tī「过去」ê。

「把握」，指ê是「保证」、一定ē-tàng成就ê意思。Á「肯定」是「证明」。这是当时法庭ê用词，表示一切已经「定谳」，m̄免koh再辩论、申诉á是hoah冤枉。

第2节ê「古人」，意思是「过去ê长辈」，tī chia是teh指耶稣以前ê信心典范。如亚伯拉罕等人，mā就是本章第4节后面所列举ê伟大信仰者。作者讲chiah-ê信仰前辈会án-ne得tio̍h「上帝ê o-ló就是因为in相信上帝」ê缘故。

第3节，作者对创世记第一章kah约翰福音第一章所讲ê「太初」ê创造有表示伊ê观点：宇宙ê开始，一定tio̍h以信心去了解，不是beh亲目看见chiah明白。

第4到7节，chit段经文主要teh说明「古人」中三位信仰ê典范，其一是「亚伯」，koh来是「以诺」，第三位是「挪亚」，in三位是旧约圣经中大家所熟悉ê对象。

咱并无清楚作者为甚么会选亚伯，因为亚伯ê故事并无长，而且无甚么特别ê记事，有ê只是伊ê献祭博得上帝ê欢喜，m̄-koh却遇tio̍h兄哥该隐ê嫉妒而被杀害。「伊虽然死去，iáu-koh藉tio̍h这信心讲话」，chit句话是teh指亚伯ê血「tùi地下出声，向上帝哭诉」（参考创世记四：1—12）。

第二位是用诺，伊就是圣经中两位无经历「死亡」中ê一位，另外一位是先知以利亚，in两位lóng是由上帝直接带到天顶去。以诺siōng特别ê所在是：伊活在世间总共三百六十五年，一直kah上帝「有密切ê交往」，这就是作者所讲ê，以诺tī「伊被提升以前已经得tio̍h了上帝ê欢欣」ê意思。后来「上帝kā伊接去，伊就phah m̄见去」（参考创世记五：21—24）。这是因为伊活teh ê日子lóng一直保持kah上帝「有密切交往」ê缘故。

第三位是挪亚，伊ê故事一直是siōng顶港有名声下港有出名ê，有关伊ê故事记载tī创世记第六到九章，mā是chit三个人事迹中篇幅siōng长ê一位。创世记ê作者讲挪亚乃是hit-ê时代「惟一ê好人；伊kah上帝有密切ê交往」（参考创世记六：10），chit句话充分表示伊对上帝有绝对ê信心，并且tī生活上有好ê见证。Ài tī犯罪充满ê环境中，成做「惟一ê好人」，确实是需要非常大ê信心chiah有办法达tio̍h。因为án-ne，上帝警告伊，他teh beh毁灭kui个世界，ài伊到山顶造大船，因为上帝beh用大水毁灭他所造ê世界。只有伊ê全家kah所有清气kah无清气ê动植物被挑选进入大船中而得已避难。

第8到10节，tùi第8节开始直到第19节ê经文lóng是teh绍介以色列人民ê祖先亚伯拉罕，伊mā hông称做「信心之父」。伊被看做以色列民族siōng典范ê「古人」（前辈、祖先）。有关伊ê事迹记载tī创世记第十二到廿三章。

Tī chiah-ni̍h长ê篇幅中，作者主要teh绍介亚伯拉罕顺服上帝ê呼召，以及相信上帝ê应允，beh赏赐hō͘伊kiáⁿ kah土地ê故事。Chit句「kah领受上帝仝款应允ê以撒kah雅各tòa tī帐棚」，chit句话表示tùi亚伯拉罕开始，直到孙á雅各等三代，lóng是过bē稳定ê漂流生活，m̄-koh in lóng对上帝有绝对信心。

第11到12节，chit两节提起亚伯拉罕ê bó͘「莎拉」已经年老而且「过了生育ê年龄」，m̄-koh却「相信上帝会持守伊ê诺言」，tī撒拉年满九十岁ê时，上帝赏赐hō͘伊有娠生kiáⁿ。虽然亚伯拉罕「已经死去，tùi伊一个人所传落来ê kiáⁿ孙却像天顶ê星kah海边无数ê沙粒hiah-ni̍h chē」，而这mā是上帝hō͘ in祖孙三代ê诺言。

第13到16节，chia提起两个重要ê认bat：

一是亚伯拉罕、以撒、雅各等人，都无进入上帝所应允in beh赏赐ê土地，而且无ná亲像上帝所讲ê，会有ná亲像天顶ê星、海边ê沙hiah-nih-chē ê kiáⁿ孙。当年雅各kah伊ê kiáⁿ孙进入埃及ê时chūn，家族ê人口mā不过chiah只有七十名而已（参考创世记四十六：27）。离上帝对in所应允ê实在相差siuⁿ远，特别是当in khiā起ê所在tú-tio̍h严重饥荒，iáu koh khah千里迢迢地迁徙到埃及去寄居ê时，in iáu是对上帝ê应允存坚定ê信心。因为án-ne，希伯来书ê作者讲in是「到死有信心ê人」。In bē因为无看tio̍h上帝ê应允，就怀疑上帝ê疼，á是失去对上帝ê信心；反tńg存坚定ê信心认定上帝ê应允一定ē-tàng实现，这就是对上帝有绝对ê信心。

二是知影家己tī chit世间只不过是出外人，是旅客。Chit点非常重要，因为有chit种认bat，就会kā希望存khǹg tī上帝手中，hō͘上帝去安排。Tùi听tio̍h上帝ê应允，直到in由摩西开始带领以色列人民迈向应允之地，án-ne前后相差大约有长到五百年ê时间，in一直以信心、耐心teh等待。

作者提醒大家，只要人kā心思意念kah性命ê目标khǹg tī上帝hia，对上帝有绝对ê信心ê时，上帝并无会因为人ê软弱就无koh承认人kah他之间ê关系。上帝是慈悲ê上帝，他mā bē人因为一时受tio̍h诱惑弃sak了他，就记恨、受气，无koh chhap人，却是会tī人知影悔改、认罪后，犹原接纳人成做他ê子民。

第16节，chit节ē-sái讲是希伯来书作者siōng主要ê用意，teh kā当时受难á是tī信心摇动ê众信徒讲，众祖先之所以得tio̍h上帝ê祝福kah应允ê果子，是因为in相信有「天顶khah美好ê家乡」，tī hia，上帝就是in ê上帝，iáu替chiah-ê有信心ê信徒预备了一座城，hō͘ chiah-ê忠实信徒永远khiā起。

希伯来书 11:17-11:31

注释:

Chit段经文除了第17到19节继续提起亚伯拉罕ê记事外，第20到22节是讲tio̍h创世记中描述ê以色列另三位族长，包括有以撒、雅各，kah约瑟。然后tùi第23节开始到第29节，是记载摩西带领以色列人民离开埃及进入旷野ê记事。Á第30到31节，是记载约书亚带领以色列人民进入上帝应允之地ê迦南地。

    第17到19节，上一段讲亚伯拉罕hō͘ 上帝拣选，并且深信hō͘伊ê应允。Chit段则讲亚伯拉罕ê信心，连上帝beh伊献上「独子」以撒，伊mā一屑á 都无怀疑地遵照上帝ê旨意。原因是伊深信上帝ê应允kah赏赐，必定会实现，即使伊献上独子以撒，上帝iáu是会hō͘伊「Kā以撒tùi死里领了tńg来」。

第20到22节，chit三节经文提起「以撒」、「雅各」、「约瑟」等，in三位lóng是创世记中族长历史ê代表者。Tùi亚伯拉罕以后，就是in三位续接族长ê角色。In ê故事分别记载tī创世记第廿七章27到40节；创世记第四十七章29到31节、第四十八章8到20节；创世记第五十章24到25节。Chiah-ê经文lóng共同讲述一件事：in祝福下一代，lóng是谈及未来ê事，却m̄是目睭前ê事务。信心，就是对未来有ǹg望并深信不疑。

第21节讲雅各tī临终ê时「扶tio̍h家己ê拐á敬拜上帝」，这并m̄是因为伊年老行动不便，却是因为kah上帝ê天使相ián ê时，天使tī伊ê大腿窝phah了一下，hō͘伊因为án-ne跛脚（参考创世记三十二：22—32）。

第23到29节，chit段经文除thang参考出埃及记之外，mā thang参考使徒行传第七章20到44节。Chit段tùi摩西出世开始，讲tio̍h摩西带领以色列人出埃及、入旷野ê情形。

第25节讲摩西「无愿意tī罪恶中享受片刻ê欢乐」，chit句话是teh指埃及人当teh奴役以色列人民，kā in当做奴隶驱使。Á摩西当时是埃及王子。M̄-koh伊认同家己是希伯来人，拒绝参与迫害同胞ê事。因为án-ne，当伊看见希伯来人被埃及人欺负ê时，便挺身护卫hit-ê被欺负ê同胞。

第26节是希伯来书作者劝勉当时信徒ê话；伊kā大家讲，所有ê财宝、人间ê富贵，lóng m̄比上帝ê奖赏重要。m̄-koh beh得tio̍h上帝tùi天顶来ê奖赏，就一定tio̍h有坚定ê信心chiah ē-tàng得tio̍h。

第27节kah第15节意思仝款；亚伯拉罕原本ē-tàng tńg去故乡，因为对上帝有绝对ê信赖，因为án-ne，亚伯拉罕一离开哈兰，就无koh回头。仝款ê，摩西带领以色列人出埃及后，就无koh tńg去，因为伊看tio̍h未来，看tio̍h上帝所赏赐hit-ê美好ê「流奶kah蜜」之地。

第28节，thang参考出埃及记第十一到十三章。
第29节，thang参考出埃及记第十四章。
第30到31节，chit两节thang参考约书亚记第一到三章，以及第六章。Chit两节是记载约书亚带领以色列人民进入迦南应允之地ê经过。

希伯来书 11:32-11:40

注释:

Chit段经文作者做总结，说明历代信仰前辈所留落来ê足迹，是无法度详细算得完ê。作者概略地讲述chiah-ê信仰ê伟人，lóng bat历残酷ê刑罚，m̄-koh坚定ê信心hō͘ in赢过苦难。即使tī in中间有人因为án-ne被「石头击毙」（参考历代志下廿四：20—22）、「被锯子锯断」、「被刀剑刣死」，m̄-koh一丝á都无减低in对上帝顺从kah坚定ê信心。

第32节，chit节tùi士师开始讲起，直到先知撒母耳kah其他ê众先知。M̄-koh士师是只有提起以下四位士师，分别是：
基甸，参考士师记第四章6节到第五章15节。
巴拉，参考士师记第六章11节到第八章35节。
参孙，参考士师记第十一章节到第十二章7节。
耶弗伊，参考士师记第十三章24节到第十六章31节等等。
其他士师iáu有俄陀聂、以笏、珊迦、底波拉、陀拉、睚珥、以比赞、以伦、押顿等都无提起。特别ê是只写「巴拉」，却无讲底波拉。

Koh讲，tī君王中只有提起「大卫」一个人而已，而tī先知ê方面只有提起「撒母耳」，其他就用一句「众先知ê事迹」概括了，而无描述。

第33到34节，chit两节提起chiah-ê士师之所以ē-tàng phah败「周围ê国家」，是因为in「施行正义，领受上帝ê应允」，chia ê「施行正义」，意思是teh指大卫听从上帝ê话来治理国家（参考撒母耳记下八：15）。

「in堵住狮ê口」，chit句话可能kah 但以理有关（参考但以理书六：18—23）。

「扑灭了焰火」，是teh指但以理ê三位朋友，mā就是沙得拉、米沙、亚伯尼歌，in三人因为拒绝向偶像下拜而被掠tio̍h尼布甲尼撒王面前，尼布甲尼撒王iáu为tio̍h án-ne大发雷霆下令kā in丢入火窑并用比平常烧热七倍ê焰火烧in，m̄-koh in三人lóng安然无恙。相关记事参考但以理书第三章。

「逃脱了刀剑ê杀戮」，这是teh指先知以利亚（参考列王记上第十九到廿一章）、以利沙（参考列王记下六：31）等境遇。

「击败了外国ê军队」，chit句话可能指希西家王因为óa靠上帝ê大能，结果围困耶路撒冷ê亚述军队hō͘ 上帝ê天使刣死殆尽，为耶路撒冷解危。
第35到38节，chit段经文kā真chē信仰事迹lóng合做伙。

「藉tio̍h信心，有kóa妇女接纳hiah-ê tùi死里koh活ê亲人」，这可能指撒勒法hit位照顾先知以利亚ê寡妇，先知以利亚hō͘伊ê独kiáⁿ tùi死里koh活（参考列王记上十七：17—24），mā可能指hit位接纳先知以利沙ê寡妇，先知以利沙mā bat hō͘伊ê kiáⁿ tùi死里koh活（参考列王记下四：18—37）。

「另外有kóa人拒绝被释放，宁可死tī酷刑下」，chit句话除了隐喻tio̍h旧约先知撒迦利亚ê遭遇（参考历代志下廿四：19—22），mā thang讲是teh指早期教会信徒tú-tio̍h困境并遭遇迫害，m̄-koh lóng m̄屈服。

第36到38节，mā讲出早期教会信徒tú-tio̍h ê迫害是非常严厉。作者连续提起几种惨遭凌辱ê情形，包括「戏弄、鞭phah、捆绑、囚禁、石头击毙、锯子锯断、刀剑刣死」等。Chiah-ê描述lóngtī先知运动中thang看会tio̍h，亲像：先知以利沙tī路上被一kóa少年人讥笑伊（参考列王记下二：23）；先知米该雅则被亚哈王下命令关tī监狱里（参考列王记上廿二：26—27）；先知耶利米则苦难bē少，伊甚至为tio̍h án-ne iáu诅咒家己ê出世（参考耶利米书二十：7、14—18）；先知撒迦利亚，mā就是大祭司耶何耶大ê kiáⁿ，伊是hō͘约阿施王命hō͘人用石头kā伊tī圣殿ê庭园里phah死（参考历代志下廿四：17—22）；而传说中先知以赛亚是tī玛拿西王时代hō͘人用锯子锯死ê；约雅敬王bat派人到埃及去掠先知乌利亚押解tńg来国，并命hō͘人kā伊刣死（参考耶利米书廿六：20—23）。另外mā有人为tio̍h信仰ê缘故四界逃亡ê情形。亲像tī亚哈王朝ê时代，王宫主管俄巴底就bat救出一百个先知，kā in藏tī磅空里，以逃避亚哈王ê bó͘耶洗碧ê追杀（参考列王记上十八：4）。

作者用顶面所讲chiah-ê人ê信仰见证，来说明早期教会忠实信徒tú-tio̍h ê境况是仝款ê，虽然面临危险，m̄-koh都无改变in对上帝ê忠心。

    第39到40节，chit两节是chit章ê结论。作者想讲ê一句话，就是chiah-ê人lóng是坚持信仰到最后ê人，mā因为án-ne in thang「领受」khah美好ê赏赐。虽然chiah-ê人都无tī in有生之年看tio̍h上帝hō͘ in ê「应允」，ē-sái讲是in tùi bē改变心意，mā无因为性命tú-tio̍h困境、危险，甚至面对死亡ê威胁有一丝á ê摇动，in iáu-koh坚持所信ê。作者想beh表达一个重要ê信念：并m̄是一定会看tio̍h成果出现chiah是有信心。信心是对未来性命ê ǹg望，mā就是第1节所讲ê，是「对所ǹg望ê事有把握，对无法度看见ê事ē-tàng肯定」。

另外一点：信心，是超越时间、空间限制ê。作者一再引用旧约信仰伟人为例，主要teh说明：chiah-ê人mā会kah chit-ê代有信心ê人同齐得tio̍h上帝ê应允。换句话讲：只要有信心，就bē致意时间ê早暗，mā无受地理空间ê限制，顶一代kah chit-ê代ê信徒tī耶稣基督内面lóng是一家人。

希伯来书 12:1-12:29

注释:

续接第十一章讲tio̍h有关信心ê问题，作者kā焦点转移到耶稣基督ê身上。作者先tī第十一章一一提出旧约圣经中ê信仰伟人来作见证，供当时代ê众信徒参考，看过in ê信仰见证了后，伊ài基督徒学习耶稣基督，想像耶稣基督是怎样以信心忍受性命ê苦难，伊khah强调ê是：真正信心是会堪得考验ê。如果信心不堪考验，án-ne就无法度讲是信心。因为真实ê信心是得tio̍h够额ê气力去面对性命ê苦难，chit种信心chiah有意义，chiah有存在ê价值。因为án-ne，咱mā thang看tio̍h作者tī chit章所提起ê，lóng是kah实际生活有关ê。换句话讲，学习耶稣基督ê信心，就是在学习怎样kā信心应用tī生活中，因为耶稣基督就是kā信心实践teh生活里。Án-ne，就ē-tàng知影信心m̄是用讲ê，却是一定tio̍h tī每日ê生活中实践出来。

第1节，作者ài大家排除一切困难，kā焦点khǹg tī耶稣基督身上；伊就是咱信心ê源头kah结尾。Ná亲像使徒保罗ài用竞技场上ê赛跑仝款，希伯来书ê作者mā用「奔走」来形容信仰ê历程。如果有障碍物tī路上，就一定tio̍h kā它除掉，若无，无法度来到最后ê终点。信仰是一场竞赛，kiu-kiu就输à。只有勇往直前chiah thang期待胜利ê结果。

第2节，ē-sái讲是chit章ê中心主题；作者希望基督徒会kā目标放在学习耶稣基督。Tī第十一章，作者举了真chē例lóng是kah信心有关ê好见证者。M̄-koh作者并无希望tī有真chē例thang看了后，反tńg看见基督徒亲像一个无设定好目标ê竞赛者四界东张西望，bē记得siōng美好ê目标。伊只希望大家会专心一意ê注目看耶稣基督；伊就是所有基督徒信心ê建造者，mā是终极目标。

	第3到4节，这是一段真有意思ê经文；作者劝勉基督信徒ài kā焦点khǹg tī耶稣基督ê身上，伊希望大家多想看耶稣基督kah十字架ê意义。Chit点mā是使徒保罗写phoe hō͘哥林多教会所讲ê，伊只传耶稣基督kah伊ê十字架。Á十字架就是苦难。作者提起十字架ê痛苦，是tùi hiah-ê人心中ê「憎恨」引起，chit种憎恨是因为罪ê缘故。M̄-koh相对tī基督徒所受ê苦难，尚且iáu bē致使像耶稣基督án-ne受tio̍h十字架仝款ê苦难。

第5到6节是引用箴言第三章11到12节ê经文，kā上帝ê管教譬喻成父母对子女ê管教仝款，是为tio̍h gín-á好。讲上帝ê管教，是为tio̍h beh hō͘所有信靠ê人lóng得tio̍h益处。作者讲上帝ná亲像父母teh「鞭phah伊所收纳ê每一个kiáⁿ」，用chit种方式来「管教」忠心tī耶稣基督ê人，伊讲这就是上帝ê疼。Chit种观点thang参考诗篇第一○三篇13节，诗人讲父母怎样疼子女，上帝mā是án-ne疼惜他ê子民。

第7到11节，chit段经文ê重点是tī最后两节，作者讲：苦难并m̄是平白无故来到，上帝mā bē冤枉人，其中lóng是有上帝ê旨意。作者kā苦难当做是上帝管教ê方式，为tio̍h是beh导正人ê错误á是hō͘伊koh khah美好。

作者tī chia提出两点：
一是上帝ê管教，为tio̍h是beh hō͘咱成做圣洁ê子民。作者提出信仰观念上非常重要ê认bat：上帝是「圣洁」ê，因为án-ne，属tī上帝tī基督耶稣内面ê子民mā一定tio̍h mā「圣洁」chiah thang。这mā是摩西转告以色列人民一定tio̍h认清ê事（参考利未记十九：1—2）。换句话讲，圣洁ê上帝，bē允准他ê子民是随便、lah-sap、不守规矩、纷乱ê。Á圣洁ê siōng基本要件，就是tùi忠实开始做起。

二是上帝ê管教，为tio̍h是beh hō͘基督徒「ē-tàng结出平安ê果子，过正直ê生活」。

所谓「平安ê果子」chit句对照第十章19节所讲ê：「咱藉tio̍h耶稣基督ê死thang坦然无惊惶进入来至圣所。」Tī犹太人ê观念中「至圣所」乃是上帝khiā起ê所在。换句话讲，藉tio̍h耶稣基督ê死，所有信靠伊ê人thang「坦然无惊惶」tńg来到上帝ê面前。

Chit种tī耶稣基督内面ê平安，是赢过性命苦难ê平安，因为耶稣基督已经赢过chit世界ê苦难（参考约翰福音十六：33）

    第12到13节，参考以赛亚书第三十五章3节。
先知以赛亚ê诗歌主要是针对teh beh来临ê拯救，对以色列受苦ê人民发出拯救信息中ê一句诗歌，表示上帝beh带领以色列人民，hō͘ in thang挺直khiā立起来，m̄免koh再惊惶。希伯来书ê作者引用chit句诗歌mā是chit-ê意思，ài所有基督徒勇敢向前行，m̄免惊惶，因为有koh活ê耶稣基督同在，必定ē-sái「跛了ê脚」重新「得tio̍h气力」thang自由行走。

第14到15节，希伯来书ê作者一再强调基督徒应该过「圣洁ê生活」，而依使徒保罗ê看法，基督徒ê圣洁生活应该kah chit-ê世界有所区隔（参考罗马书十二：1—2）。作者讲无过圣洁ê生活，「就无人ē-tàng见tio̍h主」，这表示圣洁是基督徒身上ê记号。

「Tio̍h努力kah人和睦」，chit句话thang参考罗马书第十二章18节。
Tī chit段经文中，作者一再重复「tio̍h谨慎」，不beh hō͘上帝ê恩典「会失去」，mā m̄-thang成做「遗害人群」ê「有毒植物」，这是teh指hō͘别人会失去上帝tī耶稣基督内面拯救ê恩典，去拜偶像神明（参考申命记廿九：18）。

第16节a句，chia讲「淫乱」，这是teh指对上帝无忠实，mā就是信仰混淆ê意思。M̄-koh mā thang讲是teh指tī性生活上无检点。使徒保罗就bat严厉谴责哥林多教会发生chit款tāi-chì（参考哥林多前书五：1）。

第16节b句到17节，chia用以扫为例，thang参考创世记第廿五章27到34节，以及第廿七章有关以撒为雅各祝福，m̄-koh无为以扫祝福ê故事。希伯来书ê作者引用chit种故事背景，主要teh说明一件事：如果基督徒无过圣洁ê生活，等于是teh出卖家己ê身分仝款。上帝tī所有信了耶稣基督ê人ê身上做「印记」（参考哥林多后书一：22，以弗所书一：13）。

    第18到24节，作者想beh kā「西奈山」kah「锡安山」做一个对比；「西奈山」是上帝颁布诫命hō͘摩西转交hō͘以色列人民ê所在。当摩西chhōa以色列人民接近「西奈山」准备接受上帝ê诫命ê时，上帝用云彩、火焰等遮tòa in（参考出埃及记第十九章、廿四：12—17）。对以色列人民来讲，「西奈山」ê经验是惊惶ê，mā是顶真ê律法规范，kah严厉ê惩罚。这是旧约所描述上帝居所ê部分。Á「锡安山」所表明ê是有新约ê含意，是kah旧约无仝。希伯来书ê作者引用「锡安山」ê「上帝居所」观念，来譬喻上帝所khiā起ê天顶。是人thang接近ê所在。Tī第十章19到20节，作者表示耶稣基督已经替所有信靠伊ê人，铺好势一条通往上帝「至圣所」ê道路，大家thang「坦然无惊惶」kah上帝面对面。Á耶稣基督以伊tī十字架上所流落来ê血铺出chit条通道。因为耶稣基督就是上帝kah人之间ê中保。

第25到29节，这是作者koh一pái语重心长地劝勉犹太人基督徒，m̄-thang bē记得过去以色列人民ê祖先tī出埃及入旷野时代hit段ê时期所犯ê错误，ná亲像头前一段所提起ê tī西奈山下，in得tio̍h上帝透过摩西颁布hō͘ in ê律法诫命，ē-sái讲是以色列人民并无遵守，mā因为án-ne，in ê祖先lóng受tio̍h上帝严厉ê惩罚（参考出埃及记第三十二章）。chit-má，上帝是亲自差遣伊ê独生kiáⁿ耶稣基督来到世间，亲自kā hit-ê永恒性命ê信息传hō͘所有信靠耶稣基督ê人，主要目的mā只有一点：就是希望所有信徒ē-tàng专心事奉上帝，用敬虔ê心敬拜上帝。作者提醒所有ê信徒：上帝虽然怜悯，却mā是「毁灭ê火」。这是引用申命记第四章24节：「因为上主—lín ê上帝像炽烈ê火焰；伊不容忍任何kah伊对立ê神明。」作者有一个心愿：希望所有基督徒tī chit迫害来临ê时刻，m̄-thang受tio̍h诱惑有放弃信仰ê念头，而是beh有坚忍ê信心直到世界ê末à。

希伯来书 13:1-13:25

注释:

有kóa圣经学者认为chit章是属tī希伯来书ê「附录」部分。M̄-koh mā有kóa圣经学者认为m̄是án-ne，认为chit章tú好ē-tàng看出希伯来书ê作者ài读者知影一件重要ê信息：如果信仰只是一种理论ê讲词，无实际生活ê指导，则希伯来书kā会hō͘人感觉它是不切实际ê一本经册。作者写chit章，就是beh hō͘读者知影：信仰应该确实在生活上见证出来。无chit种见证，信仰就真容易落入空谈，失去意义。

	Án-ne，thang看出chit本经册主要teh讨论一个重要ê主题：信心。特别是tī第十章39节ê所在，作者用「咱并m̄是退却而沉沦ê人；咱是有信心而且得救ê人」chit句话，为第十一章做一个踏话头。因为第十一章kui章lóng teh讨论有关「信心」ê问题。然后tī第十二章，作者以耶稣基督做讨论「信心」ê议题，伊讲：「咱tio̍h注视耶稣，因为伊是咱信心ê创始者kah完成者。」（十二：2a）chit句话mā是kui本希伯来书siōng重要ê一句话，mā thang用chit句话来作结论。希伯来书ê作者siōng主要ê目的，就是beh hō͘犹太人基督徒知影信靠耶稣基督绝对是正确mā是应该ê，如果无信靠耶稣基督，人ê性命面临苦难ê时chūn，会m̄知如何是好，甚至会失去本来对性命ê期待。所以伊用chit句话来说明耶稣基督乃是一切信心ê开始kah结束。

	续落来第十三章作者提起几点kah早期教会团契生活有关ê事，包括：(1)兄弟之间ê hō͘爱；(2)接待外出客旅ê，而这mā是摩西律法ê规定，因为以色列人民bat tī埃及做奴隶（参考利未记十九：33—34）；(3)关心hit-ê些tī监狱中受难ê人；(4)婚姻ê关系tio̍h忠实；(5)bē-tàng贪心；(6)记念传道者等。

第1节，「Lín tio̍h常有手足相疼之情。」chit句thang参考约翰一书第四章20到21节；罗马书第十二章10节。爱，就是先tùi疼家己ê兄弟姊妹开始。

第2节，「tio̍h接待出外人到lín厝里。Bat有人án-ne做，竟tī无意中接待了天使。」，chit节thang参考创世记第十八章描述亚伯拉罕接待三位出外人，结果in竟然是接待了上帝kah两位执行命令ê天使。

第3节，chit节提起「会记得」tī监狱中「坐牢ê人」，以及「会记得hiah-ê tī患难中ê人」，而且lóng强调「kah-ná lín mā kah in同齐坐牢」，á是「kah-ná lín mā tī患难中仝款」，这tú好teh说明kah苦难者同受苦ê基本精神（参考罗马书十二：15，哥林多前书十二：26a）。耶稣基督mā bat强调过，tī审判日子来临ê时，去探望tī监牢里ê人，tī天顶会得tio̍h一大奖赏（参考马太福音廿五：36）。Chit节mā反应了初代教会有真chē基督徒受tio̍h严厉迫害ê事件，被关入监狱ê信徒mā真chē。

第4节，chit节提起对婚姻ê关系，一定会严格守「约」ê关系。旧约圣经一再强调上帝kah以色列人民之间ê关系，就ná亲像夫妇一般（参考以赛亚书五十四：5、六十二：4，耶利米书三十一：32，以西结书十六：8，何西阿书二：16）。耶稣基督teh教导民众ê时，就真清楚表示，除非有婚外情ê事发生，若无，就应该tio̍h坚守双方所立ê婚约（参考马太福音五：31—32）。作者mā强调淫乱ê行为，上帝绝对m̄准。

第5节，「m̄-thang贪慕钱财，tio̍h满足tī家己所有ê。」耶稣基督mā劝勉民众tio̍h「躲避各种ê贪婪」，因为「一个人无论怎样富裕，伊ê真性命不在乎伊有jōa-chē财产」（参考路加福音十二：15）。使徒保罗就真清楚讲「贪婪等于拜偶像」（参考以弗所书五：5，歌罗西书三：5），伊mā劝勉提摩太tio̍h kā信徒讲，学习知足ê重要性（参考提摩太前书六6—10）。

第7节，chit节提起过去传福音hō͘ in人，有ê因为迫害而丧失性命，有ê终生tī福音事工上确实是鞠躬尽瘁，chiah-ê人lóng留落来了美好ê信仰模样，是值得新一代信徒学习ê典范。

「向lín传上帝信息ê人」，chit句话指ê就是耶稣基督。这mā是使徒保罗所讲ê，伊只传耶稣基督kah伊死tī十字架ê信息（参考哥林多前书二：2）。

第8节，chit节真清楚讲tio̍h只有耶稣基督是tùi上帝来ê，伊chiah是永远存在。人ê世代真紧会过去，包括君王、领袖、财富、知识lóng仝款。

第9节，并无清楚说明甚么是「怪异ê学说」，m̄-koh接落去则提起「m̄-thang óa靠食物ê规例」，有可能是早期教会有kóa信徒真讲究lim食ê问题。Ná亲像使徒保罗写hō͘罗马教会、哥林多教会ê信lóng提起lim食问题仝款（参考罗马书十四：14—23，哥林多前书八：1—13）。可能因为犹太人对清气kah无清气ê食物有过度ê洁癖，致使tī教会里mā引起争执。作者tī chia强调，真正信仰bē受tio̍h食物ê影响。

第10到12节，犹太ê大祭司献祭ê是动物，而烧chit种牲祭是tī耶路撒冷城外，而tī圣殿完成chìn前是tī圣幕ê营外。M̄-koh耶稣基督是kā家己当做献祭tī十字架上，而伊是hō͘带到耶路撒冷城外ê各各他。伊用死tī十字架上流出来ê宝血洗荡人ê罪。

第13节，chit节是teh鼓励犹太人应该去chhōe耶稣基督献祭所带来ê救恩，而siōng好ê方式就是「分担他所受ê凌辱」。因为kah耶稣基督同死，就会跟tòe耶稣基督同koh活（参考罗马书六：8—9）。因为耶稣基督已经甘愿被钉死来救赎人类，咱应该tio̍h学习他ê模样愿意为福音忍受一切凌辱。

第14节，「咱无永久ê城；咱是teh走chhōe hit-ê将来ê城。」chit句话真清楚teh说明这世间ê一切lóng是目nih-á ê，m̄-koh tī天顶ê chiah是永远ê，使徒保罗mā强调chit种信仰认知（参考腓立比书三：14）。

第15节，作者强调基督徒是会公开「宣认」耶稣基督ê名（参考罗马书十：10），用chit种方式来表示荣耀上帝ê名。

第16节，会知影「行善kah帮助别人」，因为上帝欢喜人做chit种事（参考使徒行传二十：35，罗马书十二13）。

第17节，作者tī chit节已经说明传福音ê工作，就是tī「看顾」人ê「灵魂」，作者强调tio̍h「听从传福音工作者」ê教导，因为传福音工作者lóng「beh向上帝交帐」。传福音工作者siōng欢喜ê事，就是看见信徒会听从in ê教导，án-ne，tī福音ê事工上in会jú做jú欢喜。颠倒，in「会灰心」，án-ne对传福音工作者kah信徒来讲，都无好处。

第18到19节，提起「代祷」ê重要性。这是基督教团契生活中真重要ê信仰功课。为传福音工作者代祷是一件真重要ê事。

第20到21节，这是作者为收phoe者ê祈祷kah祝福。Chia提起耶稣基督就是「大牧者」，而耶稣基督mā自喻为好ê牧者（参考约翰福音十：11—16）。
Chia强调上帝就是赏赐「平安」ê神，mā藉tio̍h耶稣基督内面成全了上帝tī每一个信徒身上ê拯救工作。

第22到25节，chit段经文是此信ê结尾。第23节讲提摩太bat被关tī监狱里。伊kah使徒保罗同时tī罗马监狱，因为án-ne，有人认为希伯来书就是使徒保罗ê作品。伊tùi监狱写phoe hō͘腓立比教会、歌罗西教会，lóng同时提起提摩太ê名，讲in两人同时写phoe（参考腓立比书一：1，歌罗西书一：1）。不过mā有可能是别人写ê，hit人当时mā tī使徒保罗身边。