重新查询
经文:

哈巴谷书 1:1-1:17

注释:

Chit章kah第二章仝款,lóng是先知哈巴谷向上帝提出问题,续落来由上帝回答问题。先知哈巴谷tī chit章里提出两个问题,一是上帝为甚么会允准强暴ê人tī社会中猖獗,hō͘善良ê人民受tio̍h极大ê痛苦?为甚么上帝会允准pháiⁿ人欺压义人?二是为甚么上帝会允准巴比伦欺负以色列人民?m̄-koh上帝并无直接回答先知哈巴谷ê问题,却是hō͘先知哈巴谷koh khah清楚,敌人巴比伦ê凶残,对以色列人民确实带来非常大ê伤害。

    第1节,chia一开始就讲哈巴谷是一位「先知」。

    甚么是「先知」?chit-ê名词tī《现代中文译本》后面ê「名词浅注」中án-ne写:「是以色列宗教家ê一种,其职份是向人民传达上帝ê信息á是代上帝发言。先知ê职责无lóng是预言,siōng重要ê事以上帝ê旨意教导当代ê人,hō͘ in归向上帝。」在列王纪上第廿二章14节,记载先知米该雅所讲ê话:「我指永生ê上主chiù-chōa,上主对我讲甚么,我就讲甚么。」这就是所讲ê「先知」ê意思。

    「哈巴谷」,chit-ê名tī希伯来文ê字根有「抱」ê意思。如果咱tùi chit本经册来看,就会看tio̍h先知哈巴谷真正是人如其名仝款,伊拥有一粒忧国忧民ê心,「抱」tio̍h伊ê以色列同胞,希望ē-tàng得tio̍h上帝ê相揽。伊ê信息中一再teh hoah上帝,ài相揽他拣选ê子民。

    第2节,真清楚chit节讲出了kui本哈巴谷书ê中心:期待上帝回应祈祷者ê声音。先知哈巴谷chìn前向上帝祈祷些甚么,咱已经m̄知,m̄-koh chia伊teh询问上帝,iáu koh khah「呼求jōa久」chiah会得tio̍h上帝ê「垂听」?上帝chiah会救in「脱离强暴」?这表示伊á是讲犹大国已经面临外族侵犯ê苦难。In呼求上帝却无听tio̍h上帝ê回应,mā是性命中siōng大ê苦难。

    第3节,chia先知哈巴谷提出了真chē造成性命苦难ê现象,伊讲kui个社会充满tio̍h「毁坏、强暴,四界lóng是phah斗、冤家」。为甚么会有chit种现象出现?这真清楚讲出当时kui个南国犹大ê社会纪律严重败坏,ná亲像先知阿摩司所描述主前第八世纪ê北国以色列仝款乱(参考阿摩司书二:6—8、四:1、五:10—13、六:4—7)。

    第4节,tùi chit句「正义永远bē-tàng伸张」,就thang看出当时ê社会已经失去上帝ê教示,tùi án-ne chiah会有chiah-ê失去公义,pháiⁿ人欺压好人ê败坏风纪之行为出现。

    tī先知哈巴谷ê看法里,chiah-ê败坏风纪ê社会行为,上帝一定lóng知影,m̄-koh伊bē明白上帝怎样会允准chit种事?当弱势者被欺负ê时,in啼哭ê声音一定会传到上帝ê耳中,而上帝怎样会允准苦难者继续被欺负?这就是伊tī第2节大声音对上帝提出ê疑问。

    Tùi第5节到第11节,lóng是上帝回答先知哈巴谷ê询问。Tī第5到7节ê经文中,上帝讲beh「做一件事」,hō͘南国犹大人民听mā「bē相信」ê行动,kan-taⁿ会「真惊奇」。就是上帝beh hō͘「凶猛、残暴ê巴比伦人强盛起来」,而且是会「横跨世界,征服别人ê土地」,in ê行动「目中无人」,chit点真亲像先知耶利米ê信息所讲ê仝款(参考耶利米书廿五:9)。这真清楚表示:上帝beh兴起巴比伦当做惩罚家己子民ê器具,chit点是南国犹大人民听lóng无法度相信ê事。

    第8到10节,chit段经文thang koh khah清楚看tio̍h巴比伦帝国势力之强,已经是无任何国家ē-tàng防御、抵挡。上帝hō͘先知哈巴谷ê启示中,hō͘伊知影巴比伦帝国会像「豹」、「豺狼」、「la̍h-hio̍h」等动物一般ê凶猛,而且速度之快,hō͘所有ê人来不及「防御」,而且就算能事先防御mā「抵挡不住」in ê入侵。巴比伦军队tùi phah败ê国家所俘虏ê人「像砂粒hiah-ni̍h chē」,chiah-ê lóng teh形容巴比伦帝国差不多摧毁、phah败伊所经过ê国家、族群。

    为甚么会án-ne?若tùi先知耶利米ê信息就thang看出,是因为南国犹大人民一再悖逆上帝ê话,拒绝听从上帝差派ê奴仆先知所传达ê信息所致(参考耶利米书七:13、廿五:3、4、廿六:4、三十五:15、17、四十四:5)。Chiah-ê lóng说明tī犹大人民ê心中根本to̍h无上帝,á是根本就无kā敬拜上帝当做一回事。

    第11节,chia讲出了巴比伦帝国有两种特徵,第一是伊ê势力真强大,ná亲像秋风扫落叶仝款,所经过ê所在lóng势如破竹一般,会khah紧去得mā快,ná亲像第8节所提起ê,像「豹」、「豺狼」、「la̍h-hio̍h」等凶猛动物仝款lóng是用速度快猎杀比in弱小动物出名。第二是巴比伦帝国因为国势甚强,就bē记得什么人是性命ê主,而kā家己当做是神明般ê藐视hiah-ê被伊欺负ê族群。后来先知以赛亚就bat预言巴比伦帝国会hō͘上帝所唾弃(参考以赛亚书十四:14—15),并且hō͘伊mā仝款受tio̍h过去伊强盛ê时对待他国ê残暴手段(参考以赛亚书十四:16—21)。

    上帝án-ne启示先知哈巴谷,有一个真重要ê用意,beh hō͘伊知影:上帝ē-tàng兴起敌人来惩罚以色列人,m̄-koh并无表示hō͘上帝拣选ê奴仆就ē-tàng想beh án怎to̍h án怎,而是beh遵从上帝ê旨意做tāi-chì。巴比伦帝国虽然hō͘上帝拣选,它却无遵行上帝ê旨意,而且koh khah严重ê是iáu kā家己当做神明一般beh kah上帝对抗。因为án-ne,上帝最后á是kā巴比伦帝国kā它摧毁ā。

    第12节,chit节开始是先知哈巴谷koh一pái回应上帝ê话。
    伊先讲述上帝创造ê伟大,他chiah是性命ê主,是保护者。类似chit种o-ló、歌颂上帝ê词句mā不时出现tī圣经中(参考诗篇三十一:14、六十三:1、九十:2、九十一:2、一一八:28、一四○:6、一四三:10,以赛亚书廿五:1)。

    Koh讲,先知哈巴谷并无反对上帝兴起巴比伦帝国来惩罚家己ê同胞,这真亲像先知耶利米仝款,认为巴比伦帝国ê兴起,是因为上帝ê旨意,重新拣选巴比伦帝国ê皇帝尼布甲尼撒王作为他ê「奴仆」(参考耶利米书廿五:9)。

    第13节,是先知哈巴谷提出ê疑问。伊认为即使是兴起巴比伦帝国,mā无法度hō͘伊lóng无节制地kā好人kah pháiⁿ人同齐绑做伙。先知哈巴谷问上帝,如果上帝真正公义,怎样ē-tàng允准无公义ê事发生?如果上帝兴起巴比伦帝国来惩罚以色列人,是因为以色列人行无公义ê事。Án-ne,现在巴比伦人比以色列人iáu koh khah无公义,上帝又ài怎样讲?伊beh问上帝既然知影巴比伦帝国会「毁灭比家己公正ê人ê时」,上帝怎样thang kah-ná lóng m̄知道仝款,若无「为甚么不讲话neh」?

    第14到15节,先知哈巴谷用「海里ê鱼」kah地上ê「爬虫」来形容犹大ê人民,ná亲像一阵无目标mā无人带领而任人宰割ê族群。认为巴比伦人用残酷ê刑具「鈎子」、「网」来对待in,in痛苦,m̄-koh巴比伦人却teh「欢呼」。

    第16节,chit节thang参考耶利米书第十六章18节,先知耶利米就bat传出上帝beh惩罚巴比伦帝国ê原因之一,就是in认为家己ê武力真强,是因为有强大ê武器装备,甚至kā chiah-ê武器装备当做神明一般ê kā它膜拜。现在chia mā是án-ne,先知哈巴谷向上帝控诉巴比伦人并无因为上帝拣选in当奴仆来惩罚犹大人民而敬拜上帝,反却是kā in用来迫害犹大人民ê残酷工具—渔网,当做神明teh膜拜。

   Láu有另外一种讲法,是chia讲「向网献祭」,chit句话mā thang解释巴比伦人kā掠到ê俘虏,当做牲礼仝款,献tī祭坛起来酬谢in ê神明。Á in ê神明可能就是in ê皇帝,á是其他偶像神明。

    第17节,先知哈巴谷问上帝:是m̄是beh继续hō͘犹大人民受tio̍h án-ne残酷ê对待?伊讲「使用刀剑」,指ê是ná亲像讨海人用刀á teh宰杀鱼á仝款,一屑á都留情。

经文:

哈巴谷书 2:1-2:20

注释:

Tī第一章记载先知哈巴谷一再地问上帝为甚么都无回答伊祈祷ê声音。伊ê问题是向上帝祈祷控诉hiah-ê tī国内欺负善良人民ê恶人,伊kā上帝讲讲chiah-ê人一再「毁坏、强暴、四界lóng是phah斗、冤家」,连律法lóng the̍h chiah-ê恶徒无办法(参考一:3—4)。先知哈巴谷án-ne祈祷ê主要目的,当然是希望上帝会赶紧出手好好á惩罚chiah-ê邪恶ê人,thang hō͘犹大王国ê社会ē-tàng看tio̍h正义、秩序、良知。Mā ǹg望因为án-ne看tio̍h国家、社会生存ê ǹg望。

M̄-koh先知哈巴谷失望了;伊失望,因为上帝真慢chiah回应伊ê祈祷,而koh khah hō͘伊失望ê,是上帝回应ê内容竟然m̄是伸手打击á是惩罚hiah-ê为非作pháiⁿ ê恶人,反tńg是beh差遣犹大国ê仇敌—巴比伦帝国,作为他ê奴仆,来惩罚犹大kah人民。而且koh khah hō͘先知哈巴谷受不了ê是,若巴比伦帝国来是惩罚以色列人中hiah-ê做邪恶ê tāi-chì ê人,ná佳哉。M̄是,巴比伦帝国来到in中间,竟然是对kui个国家、社会,mā就是讲,无论好人á是pháiⁿ人,lóng一并迫害、欺负。先知哈巴谷问上帝讲怎样会是án-ne?是m̄是上帝太圣洁了,因为án-ne「绝对m̄看罪恶」?最后,伊真艰苦心问上帝,是m̄是beh hō͘巴比伦帝国ê军队继续用残酷ê手段对待以色列人,伊问上帝讲:「伊kám thang piàⁿ 空伊ê 网,恬恬刣死列国ê 人mā 无保惜??(全民版)」(一:17)

这第二章thang分做两个部分,第一是tùi第1到4节,先知哈巴谷表示一定会等到上帝回答伊祈祷ê声音,结果上帝有回应,而且ài伊kā所听tio̍h ê写落来。第二部分是tùi第5到20节,是上帝回应ê内容,真清楚讲出上帝会惩罚巴比伦帝国,因为in做无应该做ê事。作为上帝拣选ê奴仆应该就是án-ne,m̄-nā是beh传出chit种信息,mā是beh hō͘ hiah-ê受困ê人、有残缺ê人、被冤屈ê人ē-tàng得tio̍h气力、补足、伸冤ê机会,却m̄是加重chiah-ê原本已经受苦ê人陷入koh khah大ê苦难,chit点是一定tio̍h清楚ê。

第1节,chia提起「了望台」并m̄是实在ê一个了望台,却是象徵性ê讲法,因为先知ê另外一个象徵身分,就是khiā tī了望台上ê守望者,伊ê责任就是beh kā所看tio̍h ê景况忠实地传达出来。现tī先知哈巴谷讲beh上守望ê「了望台」去看māi上帝beh伊「讲甚么」,看上帝beh「怎样回答」伊所提出ê问题。

第2节,现在上帝开始回答伊ê问题。事(tāi)先是beh先知哈巴谷kā听tio̍h ê信息「清楚写tī板上」。而且是清楚写落来,好「hō͘人一看就读得出来」。

第3节,chit节上帝预告他teh beh ài beh进行ê计画,m̄-koh无提供确实ê时间,只要先知哈巴谷「等tio̍h」,而且真清楚kā伊讲,「tāi-chì一定发生,而且bē耽延」,因为「时chūn就beh到à」。

第4节,「义人会因为忠信而得性命」chit句话非常重要,使徒保罗bat引用chit节经文,m̄-nā tī伊写hō͘罗马教会ê书信中,mā tī伊写hō͘加拉太教会ê书信中mā引用chit节经文(参考罗马书一:17,加拉太书三:11)。M̄-nā án-ne,连希伯来书ê作者mā引用chit节经文(参考希伯来书十:38)。

上帝hō͘先知哈巴谷ê信息就是「忠信」,这mā是kui本圣经重要信息之一。所讲「忠信」,指ê是beh对上帝存忠实ê信心,m̄-thang有怀疑。
另外一方面,chit节mā提起另外一个重要信息,就是「邪恶ê人bē-tàng活teh」。所讲「邪恶ê人」,意思就是对上帝无忠实,无kā上帝当做性命ê主宰者,á是去拜偶像神明者。Ná亲像头前已经讲过,巴比伦帝国ê毁灭是它ê皇帝kā家己当做神明,想beh kah上帝比高低(参考以赛亚书十四:14—15)。Á tī巴比伦帝国chìn前ê亚述帝国皇帝mā仝款有chit种问题(参考列王记下十八:35),上帝绝对bē允准chit种国王á是领导者存在。

第5节,tùi chit节开始直到第20节止,先知哈巴谷传出ê信中,有五个灾祸,作者tī chia lóng用「受灾了」来形容,包括tī第6节、第9节、第12节、第15节、第19节等等。

第5节,上帝ê话真清楚告地诉先知哈巴谷,人siōng大ê问题就是贪婪。使徒保罗讲贪婪就是拜偶像(参考以弗所书五:5,歌罗西书三:5)。伊mā讲贪财是万恶之源(参考提摩太前书六:10)。

第6节,chia第一pái提起「有灾祸à」,指ê是巴比伦是一个贪婪ê国家。因为第5节讲tio̍h贪婪者征服了真chē国家,并且kā别人ê物件独占。M̄-nā án-ne,而且视像第5节所讲ê,「征服了一个koh一个国家」,却iáu bē满足。

第7到8节,chit两节已经讲出了哈巴谷书siōng中心ê思想:贪婪ê行为kā会kah报复ê惩罚连结做伙。人用甚么方式贪取得tio̍h ê财富,mā会仝款ê方式hō͘人用来对付伊。

注意tùi第7节开始,是用第二人称ê「你」来讲述chit-ê宰压别人ê对象。显然先知哈巴谷已经得tio̍h上帝清楚ê指示,ài伊传话hō͘当时ê统治者巴比伦帝国,hō͘该国统治者知影in所做ê恶质行为,m̄-nā bē koh再hông称做上帝ê奴仆,反tńg会hō͘ in成做上帝忿怒、而且beh直接惩罚ê对象。因为án-ne,用「你」来表示。

第9节,这是第二pái讲「受灾了」。Chia继续谈起无妥当得tio̍h ê财富,tī chia特别指出是tùi抢劫得来ê,这是上帝所不允准ê行为。虽然因抢劫而拥有真chē财富,m̄-koh却惊惶、心内不安,因为án-ne,会kā家己ê厝建造tī高高ê堡垒上,并且有森严ê警卫保护tio̍h,chiah-ê人认为án-ne会真安全。

第10节,讲上帝认为chit种想法是真愚戆ê,因为上帝若是beh惩罚,任你怎样躲避、警戒森严lóng是无用ê。Chia提起有真chē国家会倒抛,即使有真严密ê戒备mā是无用,kan-taⁿ会增加侮辱家己ê机会而已。

第11节,chit节指出chiah-ê tùi抢夺tio̍h来ê财富,用来建造美丽堂皇ê厝,结果tī上帝审判ê日子来到ê时,chiah-ê富丽堂皇ê厝,就会倒落来而且压tī chiah-ê厝内享福ê人ê身上。Chia用「墙上ê石头」kah「栋梁」chit两个名词,lóng是建造坚固、美丽厝必要ê建材。无论chiah-ê建材jōa好,á是会hō͘上帝摧毁,而且是成做惩罚ê刑具。

    第12到13节,这是第三pái提起「受灾了」。Chia提起「凶刣立邑」,意思用人ê血建造起来ê城市。表示tī攻进一个城市ê时,大屠杀hit-ê城ê居民,然后kā之占领独占。Chia所用ê「血」字,是用复数名词,因为án-ne,thang讲是大屠杀ê意思,á是刣死无thang数计ê人ê性命。M̄-koh即使án-ne mā bē安宁,因为上帝beh hō͘ chiah-ê lóng ná亲像被大火吞食一般,最后lóng会「付之一炬」,消失殆尽。

    第14节,chit节是引用以赛亚书第十一章9节ê诗歌。主要teh说明上帝是公义ê神,伊毁灭邪恶者以残酷手段建立起来ê血腥城市,来彰显他ê荣耀。

第15到17节,这是第四pái提起「受灾了」。Chia提起巴比伦人怎样侮辱、戏谑hō͘伊统治之下ê人民(参考诗篇一三七:1—3)。M̄-koh仝款ê情形mā会倒抛tńg来到巴比伦人ê身上,包括ná亲像锉黎巴嫩山林ê树木,现在m̄-nā chiah-ê锉者会hō͘ phut倒,连hiah-ê原本被吓(heⁿh)惊而逃走ê动物,mā lóng会成做tńg来吓pháiⁿ chiah-ê bat欺负in ê人。

    第18节,chit节讲出真正ê问题,m̄-nā是tī犹大人民身上,mā tī巴比伦人身上,lóng是一阵拜偶像ê人民,当tāi-chì发生ê时,想beh chhōe神明庇护,结果lóng是空忙一场,因为虚假ê神明是「连话lóng bē讲」,koh kā怎样回应拜伊ê人民ê祈求?不可能。

第19节,这是第五个「会受灾」à。Chit节讲出哈巴谷书信息ê中心之一,就是拜偶像神明ê结果,就是甚么都无,甚至会失落所有ê一切。虽然chiah-ê偶像神明是用「金银包糊tī」,he是无性命ê物件。

第20节,chit节tú好讲出耶和华上帝kah chiah-ê虚假ê神明成一个鲜艳ê对比;前述ê假神,是无性命ê,即使人用尽siōng好ê方式拜它,mā是bē回答任何问题。M̄-koh tī圣殿中ê耶和华上m̄是án-ne,他是一个有尊严ê上帝,因为án-ne,敬拜者lóng一定tio̍h用肃静、顶真ê态度,因为真正神是bē-tàng侮谩、亵渎ê。

经文:

哈巴谷书 3:1-3:19

注释:

先知哈巴谷ê时代可能就是tī犹大王约雅敬ê时期(主前609~598年),hit时chūn ê南国犹大已经是摇摇beh坠、国势非常危险,真chē人想办法beh离开伊去,koh khah chē人则荒淫过日,根本就m̄知国家破碎、社会瓦解ê危险。Kui工所想ê就是án怎图谋koh khah chē ê财富,以及sńg弄权术满足家己ê私欲。这mā是为甚么先知哈巴谷看了后,甚感痛心而向上帝祈祷控诉ê原因(参考一:3—4)。

不时会听tio̍h一种讲法,就是司法乃是维护一个社会正义最后ê防线。M̄-koh tī一个混乱不安ê社会,司法往往成做犯罪得帮凶,这mā是主前第八世纪ê先知阿摩司提出ê控诉内容之一,讲tī伊hit-ê时代,司法已经无法度替人民伸张正义了(参考阿摩司书五:10、12—13、15),可惜ê是先知阿摩司ê呼声并无得tio̍h当代人ê重视,甚至iáu有伯特利大祭司亚玛谢警告伊、驱赶伊,ài伊离开tńg去厝里(参考阿摩司书七:10—11)。M̄-koh真正ê问题并m̄是先知阿摩司讲出危言耸听ê话,伊是传出上帝真实ê信息,m̄-koh人民并无接受,甚至拒绝伊ê劝勉。结果,北国以色列就tī主前721年被亚述帝国灭亡à。

	司法,是维护社会秩序ê气力。M̄-koh执法者若是无信仰ê良知,就真容易陷入知法犯法ê危险中。先知哈巴谷ê时代mā像先知阿摩司时代所发生ê类似司法官贪污ê问题出现。这就是tī本册第一章4节伊所讲ê:「律法无力量,无作用;正义永远bē-tàng伸张。Pháiⁿ人欺压义人,正义被歪曲à。」先知哈巴谷只好走chhōe上帝ê协助,伊kā chiah-ê不应该发生ê事全盘向上帝控诉。	

	第三章标题上写「哈巴谷ê祈祷」,其实只有第2节chiah是伊ê祈祷词,其它ê应该是先知哈巴谷tùi历史ê回顾提出ê劝勉,mā thang讲是先知哈巴谷ê信仰告白,伊kā家己所认bat历史中ê上帝见证出来。

	第1到2节,「祈祷」,这是kah上帝对话。一个人beh kah上帝保持美好ê关系,siōng好ê方式就是祈祷。心中有上帝ê人,一定会祈祷。拒绝祈祷,á是无祈祷ê人,不可能kah上帝维持良好ê互动关系。向上帝祈祷,siōng基本ê要件,就是tùi诚实开始。

	先知哈巴谷讲「听见」上帝ê「作为,心中就充满敬畏」,这是伊tùi回顾历史脚迹,发见上帝tī以色列民族ê历史上行了真chē伟大神迹奇事,mā因为án-ne,伊chiah会讲心中充满tio̍h敬畏。这伟大神迹就是带领in祖先行出埃及过红海,进入旷野漂流,然后到应允之地迦南。因为án-ne,伊祈求上帝koh一pái「重新」显示chit种大能,并tī忿怒ê中间显示出上帝ê「怜悯」。因为伊相信,只要上帝koh一pái显现过去发生tī in祖先中ê神奇作为,犹
大人民看tio̍h一定会悔改,án-ne就ē-tàng得tio̍h上帝ê怜悯kah赦免。

	第3到4节,thang参考申命记第三十三章2节。

    「以东」、「巴兰山」,chiah-ê lóng tī说明上帝出现ê所在。上帝出现ê时特有ê现象,就是有极大ê「荣耀」出现,hō͘人无法度正面去看。另外chit种「荣耀」mā teh表示强烈ê亮光,带hō͘ kui片大地lóng充满tio̍h性命ê活力。

    另外一方面,chia teh讲上帝ê荣耀ê时,mā有另外一个意思,是teh表明上帝kah以色列人民订立永远ê「约」。圣经ê作者teh强调上帝kah人立约ê时,是用他ê荣耀来立约。因为án-ne,kah上帝立约就是一种极大ê荣耀。

	第5节,chit节teh述说以色列人民进入旷野了后,因为悖逆上帝ê旨意遇tio̍h ê灾难,包括有因为「瘟疫」带来ê大量「死亡」。

	第6节,chit节所描述ê内容tú好说明上帝出现ê时,kui个大地反应ê态度。Tī出埃及记第十九章16到22节记载上帝出现tī以色列人民面前ê时ê景况,是「雷电交加,一朵密云tī山顶出现,号角声大tân」。作者讲上帝用「雷」响声音回答摩西所讲ê话。莫怪以色列「全体人民猛烈phi̍h-phi̍h-chhoah」,因为会惊惶。先知哈巴谷tī chia强调,即使是tī人看起来是永远存在ê山丘高岭,只要上帝命令一出,山丘马上就会倒落来。换句话讲,除了上帝以外,无任何受造物thang「永恒」存在tio̍h。

	第7节ê「古珊」kah「米甸」,这是teh指Tī旷野中两支非常凶悍ê游牧民族,m̄-koh无论in jōa-ni̍h-á强猛,若是连高山峻岭听tio̍h上帝ê声音mā会崩塌,hit人koh算甚么?m̄-nā会惊惶,koh khah是一听tio̍h上帝来到就全身pi̍h-pi̍h-chhoah。因为上帝来到,就是beh审判、惩罚。

第8节,chit节开始提起河流kah海洋有异样,现在看tio̍h河川海洋会造成大灾难,in认为必定是因为上帝发出受气ê缘故。

Koh讲,当上帝带领以色列人出埃及时,就是用云柱带领以色列人(参考出埃及记十三:21、十四:19—20),保护tio̍h in。Koh khah奇妙ê是,上帝透过云柱遮tòa埃及精锐部队ê目睭,hō͘ in根本看bē清楚红海海水分开ê实况,致使部队进入海中ê时chūn,发生混乱,结果hō͘埃及精锐部队全军覆无(参考出埃及记十四:24—25、28),这就是此节经文所讲ê,上帝hō͘他ê子民tī战争中获胜。

第9节,「hō͘河流裂开大地」,chit句话beh tùi上帝ê创造来看,tī创世记第一章就记载上帝用水分开大地kah海洋。仝款ê,tī以色列人ê眼中,只有上帝chiah有chit种能力,hō͘河流穿过大地,而且河流之深,非人ê能力所ē-tàng挖掘出来。其实,chit句话mā teh说明当埃及人teh敬拜尼罗河神ê时chūn,in却m̄知河流就是tùi上帝来ê创造。

第10节,chit节thang参考创世记第七章11到12节,上帝用大水淹灭大地所有ê一切。作者就是用上帝hō͘「地下深渊ê泉源lóng裂开,开天窗,天空所有ê水闸mā lóng phah开,倾盆大雨下了四十暝日」之久。

第11节,thang参考约书亚记第十章十二到十四节ê记载,约书亚带领以色列人攻打亚摩利人获胜了后,伊带领以色列人向上帝献上感谢ê祈祷中,就有祈祷上帝hō͘日头停落来tī空中bē振动。当日头停落来,月娘mā就跟tòe停落来。

第12到15节,tùi chit段诗歌thang看见先知哈巴谷想beh tùi历史ê脉络来说明,只要óa靠上帝ê手带领、扶持,无论是甚么强猛ê军队lóng无法度动。Chit段诗歌mā说明了上帝án怎带领他ê子民行出敌人侵犯ê危险。Chit段经文m̄-nā跨越了出埃及ê事件,而且是tī耶路撒冷被包围ê时chūn,上帝ê手扶持了以色列人民,hō͘敌人因为án-ne受伤而退(参考列王记下十九:32—37)。

先知耶利米ê信息中就真清楚指出,上帝beh差遣使者phah败强大ê巴比伦帝国,hō͘ in ê君王kah军队lóng无thang逃避,无论in建造ê堡垒jōa-ni̍h-á坚固,上帝一定会kā它摧毁,因为巴比伦帝国ê皇帝m̄-nā侮辱上帝ê子民,mā同时亵渎了上帝ê神圣(参考耶利米书五十一:52—58)。

    第16节,为甚么人听见上帝ê声音就会pi̍h-pi̍h-chhoah?因为一听tio̍h上帝来临ê声音,就知影上帝ê审判已经来到,kui个人就倒ti7土脚à。就ná同在第三章2节所提起ê,一听tio̍h上帝所行ê各种神迹奇事,就会生出敬畏ê心仝款,知影ná绝对m̄是随便thang轻忽ê大事。仝款ê,听tio̍h上帝来临,mā期待他ê拯救赶紧来到。以赛亚书第廿一章3到4节讲先知以赛亚讲上帝惩罚巴比伦帝国ê时,会像「旋风刮过沙漠,灾难beh tùi恐怖ê所在来到」,当伊看见chit-ê连串惨酷ê景象」来临ê时,心中开始有惊惶kah痛苦,伊讲chit种痛苦ná亲像一个临盆ê产妇仝款。

	第17到18节,chit两节ē-sái讲是先知哈巴谷书siōng精华ê经文。

	葡萄树、无花果树、田地、羊群、牛群等,chiah-ê lóng是当时以色列人民siōng重要ê经济动力。如果因为发生灾难而失去所有ê chiah-ê物件,是m̄是iáu koh khah相信上帝?是m̄是iáu koh khah对上帝忠实?先知哈巴谷ê答案真清楚,he是肯定ê,而且是非常坚定。

第19节,上帝就是力量ê赏赐者。Á是讲上帝乃是性命ê泉源,这ē-sái讲是kui本圣经siōng重要ê信息。因为án-ne,tio̍h óa靠ê是上帝,却m̄是因为有军事武力ê关系,这mā是诗篇第三十三篇、第四十六篇ê作者所提供ê信息。

「像母鹿仝款脚步稳健」,「tī高山顶安稳行走」,chiah-ê lóng tī说明有上帝ê带领之下,即使是经过崎岖ê性命旅途,mā m̄免丧志馁志,因为上帝就是siōng好ê带领者、保守者。「母鹿」,teh表示性命ê韧性,坚忍ê性命力tùi它身上thang看出来。

重新查询