加拉太书 1:1-1:10

注释:

加拉太书ē-sái讲是使徒保罗所写书信中非常重要ê一本。Tī这本书信中，伊用长到四篇ê篇幅讨论有关耶稣ê救恩kah摩西律法之间ê差别。原因是tī加拉太ê教会内，有一阵犹太人基督徒非常坚持外邦人基督徒一定tio̍h先受割礼，chiah ē-tàng成做信仰基督ê团契一员，使徒保罗认为这是非常错误 ê信仰认知，甚至伊讲这是「另外一种福音」，kah伊教导in ê无相仝。这一阵人有可能kah使徒行传第十五章1节所提起ê：「有kóa人tùi犹大来到安提阿，开始教导众信徒讲：『除非lín遵照摩西ê律法接受割礼，lín无法度得救。』」是仝一个群人mā无一定。使徒保罗真无客气地指正in tī信仰上ê 错误。

Koh讲，加拉太ê教会中，有人为tio̍h beh打击使徒保罗传福音，故意讲伊m̄是「使徒」。理由真可能kah使徒行传第一章21到22节彼得定出来ê「使徒」之要件有关。M̄-koh使徒保罗认为「使徒」，并m̄是一种虚荣名号，却是一种使命，这使命就是beh见证耶稣tī十字架上救赎ê疼。因为án-ne，伊ê每封书信lóng会强调伊就是「使徒」，因为伊hō͘ 上帝呼召，就是为tio̍h beh见证耶稣福音ê信息。

Chit段经文thang分做两个段落，一是第1到5节，是chit本书信ê序言。二是第6到10节，说明使徒保罗写chit封书信siōng主要ê原因。原来伊听tio̍h加拉太地区ê教会有人去传「另外一种福音」，使徒保罗认为这是非常危险ê事，尤其是chit段经文中，伊一再提起有人tī in中间传「另外一种福音」，可见情形ê严重性。伊甚至认为进入教会传chit种福音ê人，是应该受诅咒ê。

第1节，使徒保罗一再说明家己就是「使徒」。原因是有想破坏伊建立起来ê教会ê人，lóng是放言说伊无「使徒」ê身分。换句话讲，早期教会已经kā「使徒」（意指耶稣ê 11门徒，以及后来补选接替犹大ê马提亚，共计12位，chit段记事thang参考使徒行传第一章21到26节）看做是权威、领袖人物。有in ê推荐，chiah算是传讲福音有「凭证」ê人。M̄-koh，使徒保罗则拒绝án-ne以人为权威ê信仰，因为信仰ê中心m̄是tī人，而tī耶稣。伊写phoe hō͘哥林多教会ê时，就是teh处理chit种因为以人为权威致使ê结党分派问题。因为án-ne，tī chia，使徒保罗讲伊之所以成做「使徒」，「m̄是因为人ê选召，mā m̄是受人ê委派，却是耶稣kah hit-ê hō͘伊tùi死里koh活ê父上帝指派ê。」

第2节，chia伊讲和伊同齐ê众信徒写phoe，m̄-koh并无说明地点tī tó位，甚么人kah伊做伙。真可能是tī第一pái传道结束tńg来到安提阿教会ê时，iáu未上耶路撒冷去chìn前，若án-ne，时间mā可能是tī主后48年ê时chūn。Án-ne，kah伊做伙ê人，就是teh指安提阿教会ê一阵同工、干部、信徒à。

第3到5节，chit段是请安kah祝福ê话。M̄-koh mā讲出基督教信仰siōng重要ê话，就是人ē-tàng脱离罪恶ê束缚，是因为耶稣献上性命所带来救赎ê恩典，并m̄是人有甚么能力ē-tàng hō͘家己得救，完全是上帝ê恩典带来ê结果。

第6到7节，使徒保罗感觉非常惊奇，怎样会有人kā无正确ê福音信息带入加拉太ê教会，而且koh有信徒愿意听hit种m̄是福音ê信息。因为án-ne，伊用「真惊奇」来表示伊ê bē了解，而且清楚说明「无另外一种福音」。唯一ê福音，就是耶稣基督。

第8到9节，使徒保罗用真重ê语气teh强调，无论任何人，若m̄是传耶稣就是基督，是死tī十字架上ê耶稣之福音信息，chit种人，无论是甚么人，lóng是该诅咒ê。

第10节，可能是有人批评使徒保罗kā传统摩西律法ê重要性降低了，因为án-ne认为使徒保罗是为tio̍h「想讨人欢喜」、「得tio̍h人ê o-ló」，chiah会有chit种主张。M̄-koh使徒保罗坚决否认chit种讲法，伊讲伊án-ne做主要ê目的是为tio̍h beh得tio̍h「上帝ê褒奖」。Tī写hō͘帖撒罗尼迦教会ê信中伊án-ne讲：「实际上，上帝看阮会堪得，chiah kā 福音交托阮，阮就照án-ne 来传。M̄ 是 beh hō͘ 人欢喜，是 beh hō͘ 鉴察咱内心ê 上帝欢喜。因为lín 知，阮lóng m̄ -bat 对lín 讲扶挺（phô͘-tháⁿ）ê 话，mā m̄ -bat 有贪心ê 念头，这上帝ē-tàng 为阮做证。 阮做基督ê 使徒，虽然ē-tàng 要求人尊敬阮， 总是， 阮m̄ -bat对lín á是别人，要求归荣光hō͘ 阮。(全民版)」（帖撒罗尼迦前书二：4—6）。伊一再强调伊是kā家己性命ê目标khǹg tī tùi天顶来ê奖赏（参考腓立比书三：14），却m̄是人ê o-ló。因为tùi天顶来ê奖赏是永远ê，tùi人来ê一切lóng是目nih-á，甚至是虚假ê。

加拉太书 1:11-1:24

注释:

使徒保罗Tī chit段经文中，koh一pái teh解释伊之所以成做「使徒」ê背景，并无tùi任何其他ê人来领受，却是tùi耶稣直接传授启示hō͘伊ê。Á tùi chia开始到第二章10节，是伊tī作自我绍介，说明家己遇tio̍h koh活ê主耶稣了后，怎样接触耶路撒冷ê众使徒，并且提起当时耶路撒冷教会siōng重要ê三个代表者：雅各、彼得、约翰，in lóng支持伊tī外邦人中间所做ê福音ê事工。

第11到12节，因为福音是关系上帝拯救ê信息（参考罗马书一：16），只有上帝chiah ē-tàng拯救人ê性命免tī死亡，因为án-ne，真正福音就m̄是人ê思想，á是用人ê方式ē-tàng编造出来ê故事，á是tùi任何传统学习得来。

第13到14节，chit段经文thang参考使徒行传第八章1到3节、第九章1到2节。使徒保罗并无隐瞒家己过去bat以严厉手段teh逼基督徒ê事。

第15到20节，伊kā加拉太ê教会信徒讲，早tī伊出世chìn前，上帝就已经呼召伊，拣选伊tio̍h出来传福音，chit种看法tī先知以赛亚kah耶利米lóng有仝款ê经历（参考以赛亚书四十九：1，耶利米书一：5）。伊认bat福音，并m̄是tùi别人来学习得到，却是上帝亲自向伊启示chiah有ê，伊无去chhōe toh位使徒传授hō͘伊关系福音ê事。第19节chia提起雅各，伊是耶稣ê兄弟，并m̄是使徒雅各。雅各tī耶路撒冷教会真有影响力，连使徒彼得lóng「惊」伊（参考加拉太书二：12）。

第21到24节，照使徒行传第九章30节ê记载，使徒保罗离开耶路撒冷了后，就家己tńg来大数伊ê故乡去，而大数就是基利家境内ê一个城。伊开始出来传福音ê时，tī犹太地区已经有bē少基督徒，而且tùi耶路撒冷mā渐渐分散到省内各地区。Chiah-ê犹太省各教会ê信徒是有「听见别人讲」使徒保罗归属耶稣ê事，并且听讲伊「chit-má却teh传扬伊过去所beh摧毁ê信仰」，大家lóng认为这是上帝奇妙ê作为chiah有ê改变。

加拉太书 2:1-2:10

注释:

Tī chit章经文中，使徒保罗除了继续说明家己成做福音工作者ê缘由外，mā teh说明无论是外邦人á是犹太人，仝款lóng是领受死tī十字架上ê耶稣所带来ê救恩，无任何一个人thang例外。

Tī chit段经文中，使徒保罗说明伊怎样kah同工巴拿巴去耶路撒冷，以及会见了教会领袖，而且说明伊kah巴拿巴负责tī外邦人地区继续传福音ê使命，而其他ê使徒则tī犹太人中间工作之经过。

第1到2节，chit两节经文thang参考使徒行传第十一章25到30节，使徒保罗kah巴拿巴会去耶路撒冷教会，是为tio̍h beh kā安提阿教会beh赈济耶路撒冷教会sàn-chhiah ê信徒之奉献带去。同时去徵询耶路撒冷教会ê众使徒，有关外邦人加入基督信仰团契是m̄是beh受割礼ê事。Tī耶路撒冷教会，伊tú-tio̍h教会领袖，tī第9节有提起in是雅各、彼得，kah约翰等三人。

第3到5节，tī chia伊特别提起「提多」，使徒保罗伊并无替提多行割礼，ē-sái讲是就是有kóa「假信徒，偷偷á加入教会」，chiah-ê人想beh强迫伊受割礼，使徒保罗坚持tī割礼ê事顶面，m̄做任何让步。因为割礼并m̄是福音ê本质。使徒保罗强调「真理」就是tī耶稣身上。因为伊是hō͘所有ê罪人ē-tàng kah上帝重新和好ê唯一媒介。

第6到10节，tī chit段经文中，使徒保罗强调伊tī外邦人中间担当起传福音ê工作责任，ná亲像彼得tī犹太人中间担当起福音ê责任仝款。伊án-ne讲，mā teh表明tī福音ê事工上，并无分别甚么人比较重要、甚么人比较不重要，á是甚么人大甚么人小，大家lóng仝款是福音ê使徒。Tī chit段经文中，使徒保罗有三pái提起「有名望ê人（á是领袖、柱子）」之话句，而且开始并无指出名，然后到第9节chiah指出，kah-ná mā teh暗示当时耶路撒冷教会mā有「权威」ê阶级á是组织型态出现。M̄-koh伊强调，就算chiah-ê人是有名望ê领袖，mā无hō͘伊任何压力á是新ê指示。颠倒，in koh khah关心ê是伊tī外邦人地区福音事工ê进展，m̄-nā hō͘鼓励，iáu真清楚kā福音事工ê区域作了区隔，伊kah巴拿巴去外邦地区传福音，使徒in留tī耶路撒冷。In只ǹg望使徒保罗kah巴拿巴会记得关心耶路撒冷犹太人信徒中sàn-chhiah ê人ê需要。这mā是后来使徒保罗tī各地传福音ê时，一再努力四界募款，鼓励信徒捐款赈济不余遗力，可见使徒保罗是一个非常尽责ê人。

加拉太书 2:11-2:21

注释:

Tùi chit段经文ē-tàng看出使徒保罗后来渐渐kah耶路撒冷教会疏远ê原因。根据使徒行传第十五章ê记载，耶路撒冷ê使徒会议作了重要ê决定，就是外邦人加入教会，除了无需要守割礼外，iáu有下列事项：1.bē-sái食因祭过偶像而无清气ê食物。2.bē-tàng有淫乱ê行为。3.bē-sái食勒死ê cheng-seⁿ kah血（参考使徒行传十五：20）。如果koh加上加拉太书第二章10节所提起ê募款赈济耶路撒冷sàn-chhiah犹太人ê事，án-ne总共是四件。M̄-koh显然ê，并无解决犹太人基督徒对外邦人基督徒ê排斥。单单同齐食饭ê事，就闹到真bē爽快à。

使徒保罗真清楚teh表达一个基本信念：一个人是m̄是得救，并不在tī伊是m̄是有遵行摩西律法，而在tī伊是m̄是因信耶稣而kah上帝建立合宜ê关系。Mā tùi chit段经文中thang看出，使徒保罗等于teh告白家己ê信仰转变之经过，伊是遵循摩西律法ê人，因为明白耶稣tī十字架上死kah koh活ê救恩，hō͘伊成做一个新造ê人。伊认为chit种恩典khah赢过摩西所有ê律法。

第11到14节，chit节提起彼得到安提阿教会访问，原本iáu kah外邦人信徒同齐食饭，m̄-koh后来看tio̍h雅各派来ê人，就退了出来。M̄-nā án-ne，其他ê犹太人信徒，甚至连使徒保罗ê好同工巴拿巴mā受tio̍h影响，chit点是使徒保罗真无欢喜ê事。因为这mā表示耶路撒冷ê犹太人信徒并无真正hō͘外邦人信徒融入tī仝款ê信仰团契中。M̄-koh mā tùi里看出，雅各tī当时耶路撒冷教会显然是siōng有影响力ê人。

第15到16节，使徒保罗强调一个人，无论是犹太人á是外邦人，lóng是因为信耶稣是基督，而kah上帝有和好ê关系，并无óa靠摩西律法ê缘故。因为无任何人ē-tàng óa靠摩西律法来kah上帝有合宜ê关系。

第17到18节，tī chit两节里，使徒保罗提了一个基本观念：若是一个人信了耶稣了后，iáu kah以前仝款，这kah无信是仝款ê。无意义。伊teh强调一个人信了耶稣了后，就应该有新ê性命观念产生出来。

第19到21节，使徒保罗讲伊已经hō͘耶稣盘据tī伊ê性命中，一切lóng是为tio̍h耶稣，kah耶稣亲密地连结tī性命中。伊讲如果一个人是óa靠摩西律法而kah上帝建立合宜关系，chit种人，根本就无需要耶稣ê救恩。Á耶稣ê死，就是白白ê死，无意义à。

加拉太书 3:1-3:14

注释:

加拉太书第三、第四chit两章，是使徒保罗对基督耶稣信仰内涵ê主要骨干。使徒保罗kā焦点转向加拉太ê教会信徒，ài in知影：真确ê信仰应该有ê认知是甚么。

使徒保罗开始用严厉ê语气指责加拉太教会信徒ê「无知」，指in竟然bē记得家己得tio̍h福音是因为圣神tī众使徒身上作工，并m̄是来自遵守摩西律法。因为就是摩西律法kā耶稣钉死tī十字架上ê，而圣神感动门徒，充满in ê心，大大地tī门徒身上做工，而且hō͘ in有能力tùi讲各种方言开始（参考使徒行传二：1—39），chiah有福音往外传播ê结果出来。使徒保罗kah巴拿巴就是tī圣神充满之下，chiah有能力kā福音传向外邦人地区。Chia使徒保罗用犹太人ê祖先亚伯拉罕作例，说明亚伯拉罕ê时代根本就无摩西律法，m̄-koh，伊却是上帝认定tio̍h义人ê人（参考创世记十五：6）。M̄-nā án-ne，上帝iáu允准亚伯拉罕，beh赐福hō͘伊kah伊ê后代，这并m̄是因为亚伯拉罕有甚么好行为，chiah得tio̍h上帝ê赏赐，只因为伊相信上帝，就是án-ne简单。Chit种hō͘ 上帝称做「义人」ê，是出tī上帝ê恩典，并m̄是因为人有甚么够好ê条件，根本无算是所讲ê遵行律法行为。

第1到5节，tī chit段经文中，使徒保罗开始反问加拉太地区ê信徒，in是怎样得tio̍h认bat耶稣ê救恩ê？绝对m̄是因为摩西律法，却是因为上帝ê圣神chiah有ê，in mā因为领受圣神ê气力，chiah有神迹出现tī in中间。使徒保罗希望唤醒in注意当初信耶稣ê时ê经历。

第6到9节，tī chia，使徒保罗强调犹太人祖先亚伯拉罕成做上帝眼中ê义人（参考创世记十五：6），hit时，伊iáu未受割礼，这割礼是后来chiah有ê。割礼，是beh表明in kah上帝建立特殊关系。因为án-ne，犹太人kah上帝有特别关系，并m̄是在tī割礼，而是beh像亚伯拉罕仝款，顺服上帝ê旨意chiah是重要。伊特别用一个关键话句：「有信ê人就是亚伯拉罕ê真kiáⁿ孙。」这已经phah破了tùi血缘来看信仰ê问题。Chit种信，就是beh建立tī信耶稣ê救恩上。 

第10到12节，chit节使徒保罗用真严重ê话谴责hiah-ê iáu坚持一定tio̍h「遵守律法为凭藉ê人」，讲in「lóng是活tī诅咒之下」，意思是chiah-ê人都无珍惜耶稣ê救恩，甚至有鄙视（siùⁿ）耶稣救恩ê态度。伊ê观点是：如果人ē-tàng藉tio̍h实践律法而kah上帝有合宜关系，上帝就bē差派耶稣降生到世界上，并且tī十字架上牺牲家己ê性命。使徒保罗引用哈巴谷书第二章4节ê经文，强调tio̍h对上帝绝对ê忠心，只有án-ne chiah ē-tàng得救，绝对m̄是因为守摩西律法ê缘故。伊提供一个基本观念：律法并无仁慈、怜悯、恩惠，只有严格规定一定tio̍h遵守，m̄-koh却无法度感动人心，既无法度感动人ê心灵，就bē改变人ê心归向上帝ê救恩。

第13到14节，伊强调耶稣已经承担了人ê罪所带来ê诅咒，thang hō͘人脱离律法所讲ê罪ê束缚、锁枷。耶稣án-ne做，绝对m̄是只为tio̍h犹太人，却是包括外邦人，也ē-tàng领受上帝赏赐hō͘亚伯拉罕ê福气。

加拉太书 3:15-3:20

注释:

Tùi第15节开始到第五章12节，使徒保罗Tī chit段经文中，kā律法kah上帝tī耶稣里ê救恩，两个之间ê差别作了明显ê譬喻kah说明。使徒保罗真用心向加拉太教会ê信徒解释真正福音是tī耶稣ê救恩，m̄是tī摩西ê律法。伊mā用真严厉ê语气谴责hi̍t 所在区ê信徒ná会是hiah-ni̍h「轻易」就相信犹太人所坚持摩西律法ē-tàng带来得救之道？这mā是hō͘伊既艰苦心koh受气ê原因。

第15到18节，使徒保罗引用契约来说明，上帝kah亚伯拉罕立约，其实hit-ê约是teh表明上帝ê应允，而且上帝一直坚持守tiâu hit-ê约。Tī上帝kah亚伯拉罕立约ê时，并无摩西律法出现，有chit-ê律法是出埃及了后发生ê。因为án-ne，亚伯拉罕hō͘ 上帝看做义人，并m̄是因为伊有遵守甚么律法，完全是上帝恩典。因为伊听从上帝ê旨意。

第19到20节，tī chia使徒保罗说明律法ê功用，就是hō͘人知影家己犯甚么罪。伊特别说明律法需要有人来宣告，m̄-koh救恩tùi上帝直接临到人ê性命里。

加拉太书 3:21-3:29

注释:

Chit段经文thang看出使徒保罗siōng大ê努力，就是beh kā犹太人kah外邦人之间ê藩篱phah破，所以伊讲「属基督ê」，就是「Lín 既然属基督，就是亚伯拉罕ê kiáⁿ 孙，就ē-tàng承受上帝对亚伯拉罕ê 应允(全民版)」（第29节）。基本上，tī使徒保罗ê思想里：无论是toh一种人，只要是tī基督耶稣内面，就是新造ê人，一切lóng是重新koh来（参考哥林多后书五：17）。Tī耶稣里，人bē koh再去强调伊是属tī tó一个族群kiáⁿ孙，á是有甚么祖先kah上帝有特殊关系，所有ê关系重点lóng tī耶稣，大家就是kah耶稣结合而连结做伙ê。

第21到22节，使徒保罗并无否认律法mā是tùi上帝来ê。M̄-koh伊讲上帝颁布律法诫命hō͘以色列人民，mā是beh hō͘ in ē-tàng存活落去，因为án-ne chiah会有chit句遵守上帝ê一切命令，就ē-tàng存活，事事顺利ê话出现（参考申命记五：32-33）。M̄-koh重要ê是使徒保罗tī chia用了chit-ê「如果」一词，tú好讲出事实上人却是真正无法度完全遵守上帝所颁布ê一切律法诫命，chit点chiah是真正ê问题所在。若无，就bē有耶稣降生而且被钉死tī十字架上ê救赎工作。

第23到25节，使徒保罗回答了有人án-ne问：若是tī无耶稣chìn前，以色列人民岂无lóng是无法度得救？使徒保罗强调tī耶稣降生chìn前，就是用摩西律法来暂时「看守」tio̍h人kah上帝之间维护和好ê关系，chit-má耶稣既然已经来临，就应该tńg来到耶稣ê身上，却m̄是继续用摩西律法。因为án-ne，信耶稣，chiah是性命ê根本。

第26到29节，tī chit段经文中，使徒保罗一再用「成做一体」chit-ê观念，说明每一个信耶稣ê人，就是kah耶稣成做一体，而所有信耶稣ê人，彼此之间成做一体，phah破了人kah人之间ê隔阂，包括社会阶级、血缘、性别等等。

加拉太书 4:1-4:7

注释:

加拉太书第四章是继续第三章ê主题，使徒保罗真清楚说明为甚么耶稣ê救恩，khah赢过久长以来犹太人引认为凭ê摩西律法当做得救根据。

Chit段经文是继续前段有关摩西律法kah信耶稣之间ê关系。
第1到5节，使徒保罗提起犹太人律法是规定13岁以上chiah算成人，开始负担圣殿ê纳税kah维护圣洁ê义务。M̄-koh却tio̍h等到20岁chiah ē-tàng登入户嘴中（参考出埃及记三十八：26，民数记一：3、18）。因为án-ne，tī chit chìn前lóng有人来替chit-ê gín-á承担管理ê责任。等到长大ê时，伊就beh家己负担。使徒保罗用chit种方式teh说明一件事：信仰beh成长，m̄-thang总是tī摩西律法上phah转，án-ne会ná亲像bē大汉ê gín-á仝款。使徒保罗用「星宿之灵」chit-ê词句，说明犹太人tī宗教礼仪上已经到à僵化ê程度，in kā摩西律法看做是对人性命拯救ê法宝。其实，chiah-ê律法ná亲像天顶ê星宿仝款，有一定ê规律，chiah-ê规律说明上帝创造ê精细，m̄-koh，kah人是m̄是ē-tàng得救并无关系。因为án-ne，使徒保罗认为tī信仰上成熟ê人，bē koh再以宗教礼仪、规律等作为得tio̍h拯救ê根据，却是会明白耶稣chiah是性命ê救赎主。

第6到7节，使徒保罗tī chia所谓「kiáⁿ ê灵」，是teh指「基督ê灵」，就是「圣神」，这是上帝tī人性命中做工ê气力。做一个人心中有上帝ê灵进入，就会亲像kiáⁿ仝款称呼上帝就是伊ê「阿爸！我ê老父！」这就等于是上帝「亲生ê kiáⁿ」仝款，kah上帝有「父子」关系。Chit种讲法，已经脱离了tùi摩西律法规定中所提起ê「割礼」记号关系，mā突破了tùi亚伯拉罕被拣选而来ê传承，无koh是只有犹太人才是亚伯拉罕ê kiáⁿ孙，却是任何一位以耶稣为救主ê人，lóng是亚伯拉罕ê「真kiáⁿ孙」（参考加拉太书三：7）。

加拉太书 4:8-4:20

注释:

Tī chit段经文中，使徒保罗用真诚恳ê语句，呼吁加拉太地区ê信徒一定会听从伊ê劝导，m̄-thang koh一pái陷入hit种错误 ê信仰认知。

第8到11节，加拉太地区教会ê信徒「过去」并「m̄-bat上帝，被hiah-ê m̄是神ê神明所奴役」，m̄-koh「chit-má认bat上帝」后，就不应该koh再tńg去「chhōe hiah-ê无能无用ê星宿之灵」。使徒保罗表示真担忧加拉太ê教会信徒iáu死守tio̍h未信主chìn前ê一kóa观念，包括有：
「日子」，这是teh指犹太人宗教节日，亲像：安息日、禁食日等。
「月份」，指「新月」，意思是每月初一、十五ê祭祀活动。
「节期」，包括Pôaⁿ过节、五旬节、Tòa棚节等等。
「年份」，这是teh指七年一pái ê安息年，以及七七四十九ê五十「禧年」等。

伊并m̄是讲chiah-ê节期不重要，却是讲若认为坚守chiah-ê节期而得救，kan-taⁿ会hō͘ in已经领受ê福音信息落空而已，因为真正hō͘人得救ê，并m̄是chiah-ê。

第12到16节，使徒保罗恳切地地ǹg望，加拉太ê教会信徒会听伊ê劝勉。伊tī chia提起家己身躯有病，m̄-koh并无说明是甚么病。对照第15节来看，使徒保罗kah-ná有目睭方面ê疾病。因为tī第六章11节特别伊写chit封书信ê字，是「大ê字」，表示伊有眼疾所以tio̍h大ê字chiah ē-tàng看清楚。甚至in中间iáu有人bat想kā家己ê目睭换hō͘使徒保罗。M̄-koh mā有chit种讲法：使徒保罗医了别人ê病，á伊为甚么无法度先医好家己ê病？chit种传言tī加拉太教会中流传tio̍h，对hiah-ê信心软弱ê人确实造成影响。Mā可能hiah-ê传「另外一种福音」ê人，藉chit-ê理由讲伊是hō͘上帝惩罚，因为伊无教导加拉太地区教会信徒遵守摩西ê律法ê缘故。M̄-koh过去ê加拉太信徒并无受tio̍h影响，却是接纳使徒保罗tī in中间传福音。chit-má kah-ná一切改变à，伊讲出实话，有人因为án-ne beh kah伊做对，chit点hō͘使徒保罗感觉哀伤。

第17到20节，使徒保罗指出hiah-ê传讲「另外一种福音」ê人，其实是teh欺骗in，kan-taⁿ想beh孤立使徒保罗而已。伊讲家己ê心情ná亲像老母面对有娠生产ê时ê痛苦一般teh看待加拉太教会，为tio̍h是beh希望in ē-tàng成长茁壮。M̄-koh看tio̍h in目前受tio̍h「另外一种福音」影响，伊非常担忧。

加拉太书 4:21-5:1

注释:

Chit段经文内底，使徒保罗koh一pái引用亚伯拉罕ê例说明tī基督里，成做一个「自由人」ê真意。Chit种「自由」m̄是tùi摩西律法传承「割礼」ê约束。伊kā亚伯拉罕kah莎拉、夏甲之间ê关系，譬喻成两种「约」ê关系，伊kā夏甲譬喻成tī旷野ê约束，而kah莎拉之间ê关系，譬喻成是完全tùi上帝来ê恩典。上帝ê恩典乃是hō͘人得自由ê气力，m̄是hō͘人成做被束缚者、成做奴隶。伊强调一个siōng基本ê观念：tī耶稣里，是自由ê人，性命是得tio̍h释放ê。

第21到22节，使徒保罗举出亚伯拉罕ê两个kiáⁿ，一个是tùi女婢夏甲生ê，就是用实玛利。另外一个是tùi莎拉（伊讲是「自由ê cha-bó͘-gín-á」）生ê，就是用撒。

第23到26节，夏甲生以实玛利，是因为kah亚伯拉罕同房而有娠生落来ê。M̄-koh莎拉则完全是上帝应允而得tio̍h ê。因为hit时莎拉已经九十岁。Beh自然生落来是绝对无可能ê事。使徒保罗用chit种譬喻方式，kā莎拉kah夏甲譬喻做「两种约」。其实，tī以色列人民kah上帝之间并无「两种」约，唯一ê「约」是上帝kah以色列人民之间ê关系：以色列人民是上帝ê子民，耶和华是以色列人民ê上帝。换言之，以色列人民kah上帝之间唯一ê「约」，就是以色列人民尊崇耶和华上帝是独一ê上帝。除了耶和华上帝以外，无别ê上帝。「夏甲，伊来自西奈山，所生ê lóng是奴隶」，chit句话是teh指摩西tī西奈山上领受上帝ê律法。M̄-koh chiah-ê律法后来演变成束缚人ê规条，人成做律法ê奴隶。使徒保罗提醒加拉太ê信徒tio̍h注意，m̄-thang总是kā耶路撒冷挂tī嘴中，若是无真实ê心，就无真正自由。人会利用堂皇ê建筑来骄傲，却bē记得上帝chiah是性命ê óa靠。

第27节，chit节是引用以赛亚书第五十四章1节先知ê预言，主要teh说明被俘虏到巴比伦做奴隶ê以色列人民，会得救、被释放。当in得tio̍h释放ê时，ná亲像一个cha-bó͘人生产仝款，经历痛苦生gín-á ê时，hit种欢喜m̄是人ê言语所ē-tàng描述，mā m̄是无产痛经验ê人所ē-tàng明白ê。伊讲，一个经验过耶稣救恩ê人ê性命感觉就是án-ne。伊ê性命力是丰富ê，远khah赢过所有一切律法、风俗。

第28到30节，使徒保罗引用创世记第廿一章9到10节经文ê背景，koh一pái譬喻犹太教徒kah基督徒之间ê差别；chit种差别在tī：一是用摩西律法为救恩记号ê犹太人，一是因为上帝特别恩典而得救赎ê基督徒。虽然前者「迫害」后者，m̄-koh tī最后，迫害者反而成做失落者，因为in得bē-tio̍h in原本应该得tio̍h ê福份，就kah-ná以实玛利kah夏甲被赶出家门仝款。

第31节，是kui个论述ê结语，使徒保罗讲基督徒「是自由ê cha-bó͘-gín-á所生ê」，意思是teh指上帝借耶稣救赎出来ê，是上帝特别ê恩典。

使徒保罗特别针对割礼ê问题提出严肃、而且一屑á都无让步ê反驳。伊认为家己是真有资格批判chiah-ê强调割礼ê人，因为伊家己就是犹太人，属tī「便雅悯支族」ê kiáⁿ孙（参考罗马书十一：1），伊mā「比别人koh khah积极遵行犹太教规，koh khah热心遵奉祖宗ê传统教示」（参考加拉太书一：14），bat「受过祖先一切律法ê严格训练，热心事奉上帝」，是犹太人出名经学教师迦玛列ê学生（参考使徒行传廿二：3），后来因为tī大马士革遇tio̍h koh活主耶稣，chiah顿悟过去严格遵行摩西律法，并认为只有án-ne chiah ē-tàng得tio̍h永恒性命ê认知是极大ê 错误，因为án-ne，伊改变，并进一步koh积极转向见证耶稣koh活ê信息。以伊chit种背景kah条件来批判摩西律法ê问题，是非常有份量，mā够条件ê。为tio̍h án-ne，tùi第五章2节开始，伊无koh解释上帝tī耶稣里救恩比摩西律法koh khah重要，却是直接批判遵守摩西律法ê问题。

Chit节mā是继续前段论述ê结语之一。做一个基督ê信徒，是已经被释放ê自由人，应该勇敢地扛起胸膛，m̄-thang有自卑kah惊见笑ê念头。

加拉太书 5:2-5:15

注释:

整段经文ê重点tī对割礼kah得救ê问题画出一条清楚界线：受割礼á是无受割礼，m̄是性命中siōng重要ê事，siōng重要ê是beh表现出有实际爱人ê行动之信心。虽然加拉太ê教会内有偏离信仰ê认知，m̄-koh使徒保罗iáu是对in有充分ê信心，伊mā希望hi̍t 所在区ê信徒ē-tàng重新拾回信心，用信心彼此相疼，互相勉励。

第2到4节，使徒保罗koh一pái强调，若是信耶稣了后，iáu去受割礼，就表示对耶稣拯救ê恩典ê信心不足，另外一方面，既然beh受割礼，因为割礼是tùi摩西律法来，án-ne就tio̍h遵守全部律法chiah正确，无法度只遵守割礼，却忽略其他ê律法。

第5到6节，chit两节是真重要ê经文，使徒保罗真清楚表明：有无割礼，已经m̄是重要ê事，siōng重要ê，就是beh kā上帝tī耶稣里拯救ê疼付诸实际行动。

第7到10节，使徒保罗当然知影tī加拉太ê教会内面，有人teh诱惑信徒tńg去遵守摩西律法，使徒保罗讲chit种人ná亲像pháiⁿ掉ê酵母仝款，会败坏kui个教会。伊深信chit种人必定会受tio̍h上帝惩罚。

第11到12节，使徒保罗对hiah-ê一再强调守割礼非常重要ê人，提出非常无客气ê谴责，伊ài chit种人kui气就kā家己阉割to̍h好。伊讲chit句话有当时ê背景，是因为当时ê加拉太地区民间宗教信仰siōng大ê神明是「锡伯利」（Cybele）。Tī「锡伯利」神庙里ê祭司lóng一定tio̍h阉割。因为án-ne，使徒保罗借用chit-ê背景讲hiah-ê口口声声teh主张割礼ê人，如成（chiâⁿ）实hiah-ni̍h重视割礼ê重要，thài会无ài干脆家己先阉割掉会koh khah「洁净」。Ē-sái讲是，chit句话有另外一个意思，就是犹太人如果生殖器被阉割掉，就无法度参加「上主ê聚会」（参考申命记廿三：1）。因为án-ne，chit句话mā有另外一面ê意思，是teh指一再ài外邦人受割礼ê人，就是teh引chhōa人弃sak上帝ê道路。

第13到15节，使徒保罗kā信仰ê内涵真清楚点出来，就是疼。其实这mā是耶稣ê教示。第13节ê「互相服事」，指ê是「彼此成做对方ê奴仆」ê意思。人除了tio̍h疼上帝，iáu beh kā对上帝ê疼表现tī人类社会生活ê层面里，就是beh「爱人如己」。耶稣就是上帝爱人类ê终极表现，chit点就是使徒保罗所beh见证ê。伊劝勉加拉太教会ê信徒，应该tī教会团契生活中，彼此学习「互相服事」，来表现爱ê真谛。伊提醒加拉太ê信徒，若是彼此相争、hō͘咬，结果lóng会灭亡。

加拉太书 5:16-5:26

注释:

Tī chit段经文中，使徒保罗续接第13节所提起ê放纵情欲，以及kah圣神之间ê差别做明显ê对照。Thang kā chit段经文比对伊写hō͘罗马教会ê书信第八章1到17节，就会明白使徒保罗所讲ê「圣神」kah「人ê本性」之间ê差别。

第16到18节，使徒保罗提醒加拉太ê信徒，一定会顺服圣神ê引chhōa，别hō͘私欲hō͘迷惑。只要有圣神引chhōa，就bē陷入诱惑中而无法度自拔。

第19到21节，tī chit段经文中，使徒保罗举出人ê本性之欲望有下列chiah-ê现象：淫乱、秽行、邪荡、偶像崇拜、巫术、仇恨、争斗、忌恨、恼怒、好争、分派、结党、嫉妒、酗酒、狂欢宴乐，以及其他类似ê事。伊讲有chiah-ê问题ê行踏，lóng bē成做「上帝国度ê子民」。

Tī「本性」ê前三项，mā就是淫乱、秽行、邪荡等，指ê lóng是伦理道德ê生活层面。Á拜偶像、巫术等两项，指ê是无正确ê信仰行为。Chit点tī哥林多教会siōng-kài严重。

仇恨、争斗、忌恨、恼怒、好争、分派、结党、嫉妒等八项，是teh指一个人ê社会生活行为，chiah-ê lóng kah疼心ê表现背道而驰。Chia ê「仇恨」，是复数名词，意思是m̄-nā对个人有仇恨，mā是teh指团体性ê仇恨，比如种族之间ê对立。这对当时ê犹太人kah外邦人之间ê隔阂有特别明显ê启示作用，因为犹太人对伊族人常怀有藐视、敌视ê态度。

酗酒、狂欢宴乐，这两项lóng kah lim食行为有关，kah圣神所结ê果子――节制――相违背。知影节制，需要信仰ê气力来支撑，因为人本性上ê软弱ê时常ē-sái人陷入「贪婪」ê意念里，而lim食、酗酒只是「贪」ê具体表现，其它包括意念上ê，特别是tī酒狂、狂欢宴乐，lóng需要大笔ê金钱，人往往teh贪取koh khah chē钱财了后，就tī lim食顶面具体表现出浪费ê行踏。

第22到23节，若是tī「圣神」引chhōa之下，人chiah ē-tàng结出圣神ê果子，有：博爱、喜乐、和平、忍耐、仁慈、良善、忠实、温柔、节制等共九项。Chia所指ê「博爱」，是用「agape」，意思是「永bē改变ê疼」，á是讲「无法度比较ê疼」，mā是teh指「无私ê疼」，是只有付出，而不求回报ê疼。明明知影会有性命ê危险，iáu是勇往直前。

第24到25节，chit两节是chit段经文ê中心，使徒保罗劝勉加拉太ê信徒，ài kā hit-ê会致使人死亡ê「本性」lóng kah耶稣同齐钉tī十字架上，hō͘伊死亡。Án-ne chiah ē-tàng hō͘人tī圣神ê带领下，过新ê属灵生活。伊koh一pái劝勉in，m̄-thang骄傲、彼此激怒、嫉妒等，这mā是teh kā in讲，ài有宽阔ê心胸，kah谦卑ê心灵。

加拉太书 6:1-6:10

注释:

Tī chit章经文内底，使徒保罗无koh为割礼kah耶稣tī十字架上ê救恩之间ê差别作辩护，却是kā信仰带入生活中来讨论。这mā是伊ê书信ê特色，就是tī结尾lóng会讲起信仰kah生活ê连结。Tī这章中，伊认为一个真基督徒无应该koh再停留tī表面上ê记号，而是beh活出信仰ê果子来为福音做见证，chit点chiah是重要。伊用信仰结出果子ê人kah tùi放纵情欲所结出果子ê人，二者之间ê差别做个说明。

Chit本加拉太书信有一个重要ê信息，就是劝勉大家tī共同信仰ê团契里，tio̍h成做「彼此」ê共同体。当有一个人犯错，tio̍h认为「彼此」lóng有责任。当有人犯错ê时chūn，不是beh抱持「幸灾乐祸」ê态度，却是先省察家己是m̄是mā犯仝款ê 错误。

第1到5节，所谓「偶然犯过错」，指「m̄是故意」所做ê 错误。「纠正」，是teh指「补网」、「接骨」ê意思。就kah-ná一个人tī无注意ê情况下，摔断了「骨头」，大家tio̍h帮助chit-ê人，kā摔断ê骨头接合起来。因为án-ne，chia ê「纠正」，mā有弥补、愈合ê意思。Mā如仝一个讨海人teh修补已经破损ê渔网一般。M̄是弃之无ài，却是修补，是细腻、疼心ê修补。所以使徒保罗讲beh用「温和ê方法」纠正。伊强调一个信仰团契里，siōng重要ê，就是「彼此分担重担」，这mā是耶稣教导中ê「彼此相疼」ê意思。有好ê行为ê时，m̄是用来kah别人比较，因为上帝清楚人ê心思意念。第5节ê「每一个应该担起家己ê担子」，chit句话真清楚teh说明m̄-thang推辞责任。

第6节，chit节是非常重要ê信仰观念「分享」，这mā是基督教信仰siōng中心ê信息。上帝kā他siōng美好ê礼物――独生kiáⁿ耶稣――kah有罪ê人类分享。基督信徒就应该tio̍h学习kā siōng好ê礼物带来kah每一个人分享。

第7到8节，有真实信仰ê人lóng会清楚知影，上帝是欺骗bē-tàng ê。因为上帝鉴察人ê心内。会欺骗ê人，无论是欺骗人á是欺骗上帝，lóng是teh kā众人讲，家己并m̄相信上帝。会欺骗人ê人，结局mā会hō͘人欺骗。因为án-ne，一个人掖种ê是甚么，就会收tio̍h甚么果子，这是一点mā虚假bē-tàng。「一个人种甚么，就收甚么」，这是当时一句流传甚广ê谚语。Chia ê「种」，是teh指掖种。是teh指tī信仰ê态度上。正确ê信仰，对性命ê意义极大。

第9到10节，「行善」，这m̄-nā是teh指财物上ê施舍，koh khah是指传福音ê事工。使徒保罗劝勉加拉太ê信徒，m̄-thang tī传福音ê事工上，被邪恶ê势力hō͘赢过，ài有信心等待。真实ê福音事工，一定会得tio̍h上帝ê赐福。Chia ê「时chūn到à」，指ê是临终ê意思。Mā thang指终末审判、上帝奖赏ê时刻来临ê时。因为án-ne，当人iáu活teh ê时chūn，m̄-thang停止传福音ê工作，无论是m̄是随时有成果出现，siōng重要ê是tī福音事工上把握机会，因为m̄知甚么时chūn，上帝会呼召咱tńg来天家。对同属信仰ê对象，lóng tio̍h看做是家己厝人仝款，hō͘ in接纳和好款待。

加拉太书 6:11-6:18

注释:

使徒保罗ê书信差不多lóng是伊口述，由别人代笔（参考罗马书十六：22）。Chit本书信mā不例外，tùi第一章1节开始到第六章10节止，lóng是使徒保罗口授，别人代笔写ê，m̄-koh tùi chit章第11节开始到路尾，使徒保罗kah-ná有意iáu未尽ê感觉，想beh koh再补充一kóa话，mā thang看出伊心中对加拉太教会因为听从另外一种福音ê操心。

Tī chit段经文中，使徒保罗koh一pái kā伊写chit封信ê主要目的，giú tńg来到伊chit封书信siōng重要ê主题：是m̄是守割礼，kah得救无关。一个人是m̄是得救，siōng重要ê是tī耶稣十字架顶救赎ê恩典。

第11节，伊讲chit段经文是伊亲自写「大ê字」，真可能kah第四章14到16节所提起ê目睭疾病有关。

第12到13节，当时有人惊为十字架tú-tio̍h迫害，原因是当时罗马政府看信耶稣是一种新ê宗教，而tī罗马帝国统治下，只有犹太教是ē-tàng允准ê合法宗教信仰。因为án-ne，展宝家己有割礼，表示家己并m̄是属tī基督信徒，án-ne就ē-tàng免除被迫害ê危险。M̄-koh信仰若是惊苦难，chit种信仰态度不值得学习。Á若是连割礼lóng thang用来夸耀，这就是teh曲解割礼ê意义。

第14节，一个真正耶稣信徒，不会晓夸耀别ê，却是只会晓夸耀耶稣ê十字架。请注意，耶稣ê十字架所代表ê乃是「苦难kah救赎」。虽然因为坚持信靠耶稣有苦难，m̄-koh却对性命ê得救深存ǹg望。这mā是使徒保罗讲家己是身上「带耶稣ê伤痕」ê原因，是teh指为tio̍h耶稣ê缘故，伊宁可接受迫害，mā无妥当协，因为伊对得救怀有无变ê ǹg望。

第15节：chit句：「受割礼á是无受割礼lóng无算甚么；重要ê是咱tio̍h成做新造ê人。」ē-sái讲是chit-ê书信ê中心经文。

第16节，chia讲「愿所有遵照这原则ê人」，就是teh指接受耶稣为救主ê人。Á「一切上帝ê子民」，是teh指所有信耶稣就是基督ê人（参考加拉太书三：26、28），无种族、肤色ê分别，只要是信耶稣ê人lóng是。「平安」，这是teh指心灵ê安定，无koh有惊惶侵入心中。「怜悯」，这是teh指上帝ê仁慈kah无变ê疼。

第17节，使徒保罗希望以后bē koh再听tio̍h加拉太教会有chit种听信另外一种福音ê tāi-chì发生，因为chit款tāi-chì kan-taⁿ会hō͘伊带来「麻烦」。Chia ê「伤痕」，mā thang当做印记解释。古早时ê奴隶，身上lóng有主人用烧红ê铁块所烙下ê记号，来预防止奴隶逃走。因为án-ne，使徒保罗讲伊「身上带基督ê伤痕」，chit-ê意思真明显，是beh hō͘加拉太ê信徒知影，伊头前所劝勉in ê话，并m̄是出tī权威，á是伊有甚么特殊地位，却是tī耶稣ê十字架里，伊ná亲像一个奴隶般，是耶稣救恩下ê奴隶，伊ê工作就是为耶稣ê救恩做见证。

第18节，这是祝福ê话。Mā是使徒保罗ê书信ê特色。