重新查询
经文:

但以理书 1:1-1:21

注释:

Chit本但以理书ê作者虽然tī起头就提起:「犹大王— 约雅敬坐位第三年,巴比伦王— 尼布甲尼撒来到耶路撒冷,围城来攻击(全民版)」(一:1)其实,有bē少圣经学者kā咱讲,chit本经册ê年代比较khah接近tī主前第二世纪,当时犹太人有一位优秀ê领袖名叫马加比。作者可能就是采取小说文体,以古代替背景,讲出当时社会ê景况是beh传hō͘读者ê信息。

Tùi kui本经册就会看tio̍h作者写chit本经册ê主要目的,就是为tio̍h beh说明一件中心观念:信仰一定tio̍h坚持,bē-tàng妥协。即使是tī siōng困难ê情况下,mā m̄-thang改变对上帝忠实ê心,因为上帝就tī咱ê身边,他kah咱同在。这就是但以理书ê中心信息。

Chit本经册thang分做两大部分,事(tāi)先是第一到六章,记载以但以理kah伊ê三个朋友受选进入巴比伦王宫ê故事,说明对上帝忠实ê人,tī性命siōng-kài困难ê时刻,上帝一定会伸手救助。续落来第二部分是第七到十二章,这是记载但以理所看见ê异象,透过但以理所看见ê异象,讲出一个国家ê兴衰,kah上帝ê旨意有密切关系。

Chit章mā是kui本但以理书ê序言,thang了解chit本经册ê背景、人物,kah作者siōng关心ê信仰问题。作者tùi开始就叙述被掠到巴比伦做奴隶ê犹大人民怎样tī异乡tú-tio̍h信仰ê困境,透过但以理kah伊ê三个朋友来说明in坚持表达对上帝忠实ê信仰,因为án-ne,就算是tī siōng危险ê环境下,上帝绝对bē轻视,全能ê上帝一定会伸手救助。

第1到2节,开始就提起故事发生ê背景是tī「犹大王约雅敬在位ê第三年」,chit年应该是主前605年,m̄-koh伊做王并m̄是根据王族继承ê方式得tio̍h ê,却是南国犹大被埃及phah败,埃及王尼哥立伊(原名以利亚敬)为犹大王,并且kā伊ê名改为约雅敬。M̄-koh若是tùi对照耶利米书第廿五章1节,以及耶利米书第四十六章2节ê记载来看,会发现koh khah正确ê时间应该是tī约雅敬做犹大王ê第四年,发生「巴伦王尼布甲尼撒进攻耶路撒冷,围困都城」,并且kā约雅敬王「俘虏了」,同时搜刮了耶路撒冷圣殿kah王室所有ê贵重器物到巴比伦供奉in ê神。

第3到4节,chia提起巴比伦王尼布甲尼撒beh tùi俘虏来ê以色列人民中选出「一kóa王室kah贵族ê青年」,chiah-ê青年一定tio̍h是「无残疾、iân-tâu、聪明、学识丰富、才智过人ê」进入宫廷去服务。Chia mā特别强调chiah-ê teh-beh选出来送入宫廷服务ê青年,lóng tio̍h教导in学习「巴比伦ê语言文字」,这含有一个特别意思,表示in lóng tio̍h学习天文、地理、占卜等chit方面ê学问,thang随时帮助王室ê人解梦(参考但以理书二:2),以及处理一kóa疑难杂症。

第5到7节,chiah-ê被选入宫廷内服务ê菁英,thang每工「享用」宫廷ê「食物kah酒」,训练时间是「三年」,然后「ài tī王面前供职」,表示in是hō͘选出来服侍巴比伦国王ê优秀青年,in lóng是「犹大支族ê人」,包括有「但以理、哈拿尼雅、米沙力、亚撒利雅」等四人,m̄-koh in进入王宫受训ê时,太监总管亚施比拿「kā in赐福起了新ê名,叫伯提沙撒、沙得拉、米沙、亚伯尼歌」。Chit种改名有两种意思;其一是in四个人lóng是属tī国王尼布甲尼撒专用ê仆人,另外一种意思是teh指in四个人lóng会tī亚施比拿 ê教导下接受管理kah命令做tāi-chì。亚施比拿就kah-ná是in四个人ê「教父」仝款。

第8节,chit节是chit章ê中心经文,特别提起但以理「决心不沾王宫ê食物kah酒,免得家己tī礼仪上无清气」。Chia所谓「礼仪上无清气」ê食物,thang参考利未记第十一章ê记载。Koh讲,另外一个可能是teh指祭拜过ê食物。Chit对被俘掳ê人来讲,是非常困难ê一件事,但以理就先去chhōe伊ê教父亚比拿施,请求伊「帮助」。

第9到10节,chia讲亚比拿施确实是真想帮助但以理,ē-sái讲是万一但以理tī lim食上照家己ê方式出了状况,国王若是追究落来,一定会「phut了」伊ê头当做惩罚。这真清楚teh表示亚比拿施是同情但以理,m̄-koh实际上有执行ê困难。

第11到13节,但以理并无放弃chit项坚持,伊去chhōe亚比拿施派来看管但以理kah另三位伙伴ê管家,但以理请求chit位管家hō͘伊「十工」ê时间「试看māi」,tī chit十工内,伊只食菜蔬kah lim白水,然后kā伊kah「hiah-ê食王食物ê少年人比一比」,然后chiah来决定是m̄是允准伊ê请求,m̄食「礼仪上无清气ê食物」。

第14到16节,chit段经文已经teh暗示,有上帝帮助ê但以理等四个人,经过了「十工」了后,in比其他食王宫食物ê人「koh khah健康、koh khah强壮」。因为án-ne,chit位管理ê守卫,就hō͘但以理等人「继续只食菜蔬,m̄食王所配给ê食物」。

第17节,chit节thang看出上帝tī背后帮助忠实tī他ê人。帮助ê方式就是赐hō͘但以理等四个青年「精通各种文献kah学问」,然后koh特别赏赐hō͘但以理有「解释异象kah梦ê才能」,chit句话mā为以后但以理为国王解梦留落来一个伏笔。

第18到21节,chit段经文真清楚讲出tī上帝赐福下,但以理等四个青年经过了三年ê训练,结果确实是成做真有学问ê人,thang解答国王所提出ê「任何难题」,koh khah特别ê是「比全国任何占卜家á是术士好十倍」,tùi án-ne得tio̍h国王ê赏识,因为án-ne「chit四个人被选中留tī王宫服侍」。Chia讲但以理一直留到巴比伦帝国被波斯帝国取代ê时chūn。Á波斯帝国取代了巴比伦帝国时间是tī主前538年。

Án-ne,tùi但以理受掠时代ê主前598年到现今波斯帝国取代巴比伦ê主前538年相距有六十年之久。Koh加上伊被徵召入宫ê时已经成年,若是以二十岁计算,án-ne,伊现在年龄至少mā有八十岁了。Á如果按照第一章1到3节ê记载,这是发生tī主前605年ê战役失败被俘虏ê,但以理应该至少beh九十岁à。Tùi chia thang知影:作者是采用一个古老英雄ê故事,beh鼓励伊hit时代ê读者学习但以理chit种少年人。

经文:

但以理书 2:1-2:13

注释:

如果kā但以理ê背景转tńg来到主前第六世纪巴比伦帝国消灭犹大国,并且俘虏以色列人民到巴比伦去做奴隶ê背景来看,mā看tio̍h一个事实,就是巴比伦帝国对待以色列人民比亚述帝国温和真chē。因为巴比伦帝国俘虏犹大国ê以色列人民去为in服务,而亚述帝国则kā北国以色列人民俘虏了后,kā in卖到外国去做奴隶。

	但以理书mā thang看tio̍h一件事:上帝就是智慧ê来源。作者主要用「解梦」做中心主题,谈起人tī充满危机ê环境中,siōng需要mā是siōng值得óa靠ê,就是智慧。Á圣经kā咱讲,chit种生存ê智慧,并m̄是人生落来就有ê,mā m̄是tùi学习、读册中得tio̍h ê,chit种智慧是tùi认bat上帝中得tio̍h ê。因为上帝就是智慧ê开端(箴言九:10),上帝会帮助人tī困境中得tio̍h生存ê气力,chit点是非常重要ê。

	tī第一章,已经看tio̍h但以理等四位犹大支族ê青年被选入宫廷无jōa久,就tú-tio̍h了麻烦—宫中食物可能是无清气ê。如果in坚持m̄食,恐惊连性命lóng m̄保。M̄-koh in坚持了,而结果是得tio̍h了胜利,chit种胜利并m̄是伊有甚么特别力量,mā m̄是用甚么利益交换得tio̍h,却是因为但以理等四个人对上帝ê绝对忠心,chit点mā是但以理书想beh kā读者讲ê一个重要信息。

    第二章开始叙述因为巴比伦国王眠梦,致使无法度入睡,而国内重要ê术士lóng无法度替国王解梦,hō͘国王感觉非常失望kah震怒,tùi án-ne下令tio̍h kā巴比伦所有ê王宫顾问,包括但以理等四人lóng刣死。后来因为但以理知影chit件事,伊请求国王hō͘伊来解梦。但以理祈求上帝帮助伊,结果解开了国王所做ê梦。

    经文记载巴比伦国王尼布甲尼撒做pháiⁿ梦,结果因为chhōe来ê巴比伦全国所有术士lóng无法度解开国王ê梦,hō͘国王一怒之下,决定处死chiah-ê无用ê术士。

第1到3节,「尼布甲尼撒在位ê第二年」,对照第一章1到2节,是主前605年约雅敬做王ê第三年(耶利米书soah讲是第四年,参考耶利米书廿五:1),因为án-ne,chia应该就是主前第604年。Chit一年但以理等四个人尚且无法度入宫去做甚么事。因为án-ne,天主教《思高圣经学会》版本用「第十二年」,认为án-ne比较khah接近事实。不过,tī《犹太人圣经「TANAKH—The Holy Scriptures」版本》mā是用「第二年」。

「眠梦」,圣经不时用「梦」来表示上帝ê启示(参考创世记三十七:6、9)。因为「梦」是上帝ê启示,因为án-ne,会解梦ê人,就是得tio̍h上帝赏赐ê高深智慧chiah有办法做到(参考创世记四十:8)。尼布甲尼撒王显然是做hō͘伊惊惶ê恶梦,hō͘伊「心内烦乱,无法度入睡」。因为án-ne,伊派人召来全国siōng好ê「占卜家、法术师、巫师、占星家等」,希望in ē-tàng替伊解梦。

第4节,chia讲所有chiah-ê术士是「用亚兰语回答王」chit句话。Mā就是tùi chit节开始,直到第七章止,chit段落lóng是用亚兰文写做ê,m̄是用希伯来文。这亚兰语mā是当时当做普遍ê语言。耶稣mā是讲亚兰语。

第5到6节,国王讲「Lín ài kā我ê梦kā我讲」chit句话,表示尼布甲尼撒王已经bē记得伊做甚么梦,m̄-koh却ài hiah-ê被当代社会看做siōng有智慧ê术士讲出伊所bē记得ê梦,如果讲bē出来,就beh杀害in kah in ê厝。相对ê,若是in ē-tàng讲出梦koh解释梦ê意义,就会有「奖赏」kah「荣誉」。Chit种要求即使tī今á日mā无法度达到。

    第7节,chiah-ê有学问ê宫廷顾问koh一pái请求国王讲出伊ê梦境,m̄-koh因为国王已经bē记得伊所做ê梦,因为án-ne chiah会有高度ê焦虑不安。

	第8到9节,国王尼布甲尼撒非常受气,因为伊m̄-nā无感觉家己ê要求过份,而且iáu认为chiah-ê有学问ê顾问会要求伊kā梦讲出来,乃是一种「拖延」之计。因为án-ne,伊要求chiah-ê宫廷顾问、术士一定tio̍h马上讲出来伊ê梦,并且解释梦境ê意义,以此证明in确实有解梦ê能力。

	第10到11节,chit两节thang讲是但以理书siōng重要ê经文,作者就是beh hō͘读者知影:天下无真正有智慧ê人,除非有上帝ê启示。

作者特别强调「除了神明,无人ē-tàng回答」,原因真简单,连国王lóng bē记得家己所做ê梦,ná别人koh khah无法度知影伊到底梦见了甚么,koh khah免讲beh替伊解梦,解开伊心内ê愁烦。

    「ē-sái讲是神明不tī人间」,chit句话kah基督教信仰差别真大;因为基督教信仰认为上帝是无所不在ê神,上帝就tī人ê性命里。人所无法度ê,tī上帝是事事lóng ē-tàng(参考创世纪十八:14,约伯记四十二:1,马可福音十:27)。

第12到13节,为tio̍h án-ne,国王「大发雷霆」,下令tio̍h刣所有ê宫廷顾问,包括但以理in四个人。

经文:

但以理书 2:14-2:23

注释:

Tùi第14节开始,作者kā焦点lóng khǹg tī但以理身上,就是beh hō͘读者知影:但以理就是一位真正有智慧ê人,伊知影tī性命tú-tio̍h siōng危险ê时刻,一定会óa靠上帝ê带领,chiah ē-tàng度过性命ê危险。

第14到15节,chia讲但以理一知影尼布甲尼撒王ài beh进行chit项诛kah全部参谋策士之令后,伊马上就去chhōe国王身边ê侍卫长亚略。Tī第一章记载但以理bat因为伊kah其他三位被选入宫廷ê青年拒绝食无清气ê食物chhōe过太监总管亚施比拿。现在则为tio̍h全部ê参谋策士赶紧去chhōe侍卫长亚略;伊是执行国王这道命令ê负责人。但以理tùi亚略嘴中知影kui个事件ê始末。

第16到18节,伊问清楚侍卫长实情后,随时就进宫廷去晋见国王,请求国王hō͘伊一kóa时间,伊就ē-tàng回答国王所提出来ê问题:一是国王所做ê梦为何?二是梦ê意义为何?伊mā kā chit件事kā另外三个同在王宫内ê朋友讲。但以理要求chit三个朋友kah伊同齐「向天顶ê上帝祈祷,求伊怜悯,启示这梦ê奥秘,hō͘ in bē致使kah其余ê巴比伦顾问同齐被刣」。

第19节,上帝果然听但以理等四人ê祈祷,hō͘但以理tī异象中看tio̍h上帝对伊启示「奥秘」。Chia所讲ê「奥秘」,就是用人ê智慧、知识、能力、经验所无法度明白ê事,m̄-koh tī上帝指引之下,人就ē-tàng明白chiah-ê kah性命有关ê事。因为án-ne,当但以理得tio̍h上帝hō͘伊ê启示了后,伊随时歌颂上帝ê伟大。 

    第20到23节,这是一首颂赞ê诗歌。是但以理teh歌颂上帝伟大koh奇妙所做ê o-ló诗歌。Chit首诗歌虽然是只有短短ê四节,m̄-koh却是真精美ê诗歌,内容tùi歌颂上帝开始,然后用感谢做结束。

	第20节ê「愿上帝ê名得tio̍h称颂」,这mā是以色列人民tī信仰上必定会表达ê方式,就是无论tī甚么处境之下,lóng是先tùi歌颂上帝开始,因为每一件事lóng有上帝奇妙ê旨意在内面。

	「世世无穷」chit句thang kah第21节ê「改变时间、季节」相配合来看。这表示tio̍h上帝是永恒ê,m̄-koh人ê世界是一直teh替换、改变。

	第21节讲上帝thang改变「时间、季节」,同时mā thang「废王、立王」,这说明了圣经作者提供ê一个基本观念:权力乃是tùi上帝来赏赐。因为án-ne,君王主要目的就是回应上帝ê拣选,m̄是随心所欲(参考罗马书十三:1)。而且上帝mā赏赐「聪明」、「智慧」hō͘敬畏他ê人。

	第22节,chit节讲出了chit位启示奥秘hō͘人知影ê上帝kah其它ê神明有极大ê无仝;其它ê神明并无法度启示人性命ê奥秘,ná亲像hiah-ê术士、占卜者tī当时ê社会中hō͘人认为是siōng有智慧、能力ê人,m̄-koh in mā讲in ê神明乃是无法度明白奥秘ê事,mā不khiā起tī人间。Á但以理等chit四位所信奉ê上帝,却是一位ē-tàng启示性命奥秘ê事hō͘人知影、明白ê上帝,m̄-nā án-ne,chit位上帝iáu ē-tàng明白人tī暗中所隐藏ê一切,因为tī上帝眼中,无任何事物ē-tàng遮盖他ê目睭(参考诗篇一三九:1—6、12)。

第23节ê chit句「祖先ê上帝」真重要,因为作者就是beh kā hiah-ê受tio̍h迫害中ê同胞讲m̄-thang bē记得众祖先ê经历,in mā bat经因为怀疑上帝ê同在,而受tio̍h非常严重ê惩罚。另外一方面,谈起「祖先ê上帝」chit-ê词句ê时,就是beh hō͘读者m̄-thang bē记得祖先亲身体验ê经历,特别是出埃及ê经历。但以理讲chit位上帝垂听伊ê祈祷hō͘伊知影国王所眠梦,并「指示」伊「该怎样向王解梦」。

经文:

但以理书 2:24-2:49

注释:

圣经作者讲出一个明确信息:智慧,是tùi上帝来ê赏赐,有智慧ê人,就是有上帝恩赐ê人,chit种人才是真正认bat上帝(参考箴言九:10)。但以理书ê作者就是tī说明,但以理ê成功,并m̄是因为伊有甚么能力,á是有甚么特殊ê才华;却是因为伊óa靠上帝,走chhōe上帝ê带领,chiah ē-tàng tī siōng危险ê时刻得tio̍h「智慧」,知影怎样克服性命中ê危机。
但以理因为得tio̍h上帝赏赐hō͘伊ê启示,因为án-ne,伊决定亲自向国王讲出国王所做ê梦,以及梦境ê启示。

	第24到25节,chit两节看tio̍h非常有趣味ê对照;当但以理自我推荐kā侍卫长亚略讲伊ē-tàng解释王ê梦。Á侍卫长亚略却teh对尼布甲尼撒王讲伊chhōe-tio̍h ê有一个会解王ê梦ê犹太人。真可能伊对但以理表现出来ê样式真有信心,mā有可能是kah顶pái但以理拒绝接受宫廷提供ê lim食之事件有关pah,hō͘伊对但以理ê认bat非常清楚,知影伊有特别ê智慧,只要伊讲得出口,就必定ē-tàng完成。 

	「我tī犹太俘虏中chhōe-tio̍h一个人ē-tàng解释陛下ê梦」chit句话,确实有特别ê意义。因为tī当时ê社会,并无会kā一个hō͘ in tī战争中phah败ê对象看做是有智慧、有能力ê人。特别是当巴比伦帝国内ê hiah-ê有学问ê人lóng无法度知影到底国王梦见甚么,并且明白其所做ê梦ê内容ê时,竟然tī俘虏中ē-tàng chhōe-tio̍h chit种人,这当然是非常令巴比伦王尼布甲尼撒非常惊kah gāng去并且不得不怀疑,因为这mā thang表示tī巴比伦帝国境内siōng优秀ê知识份子,竟然khah输一个hō͘ in俘虏ê以色列人民。

    第26节,尼布甲尼撒王以怀疑ê语句询问但以理是m̄是真正ē-tàng kā伊ê「梦讲起来,并且解释它ê意思mah?」。

	第27到28节,chit两节讲出但以理书ê中心信息:只有启示「奥秘」ê上帝,chiah ē-tàng hō͘人知影梦。因为梦tùi上帝来ê启示,mā是上帝用来向人显现伊家己ê一个方式。但以理讲上帝透过梦kā「将来beh发生ê事」讲出来,这就是上帝启示ê「奥秘」。

	「奥秘」,这mā是圣经学者kā但以理书列为「启示文学」ê原因。因为chiah-ê「奥秘」lóng kah上帝未来ê审判有关,mā kah上帝teh beh执行他对受造ê万物之计画有关。

第29到30节,但以理真清楚hō͘尼布甲尼撒王知影,伊无比别人聪明,而是beh上帝beh hō͘伊来帮助国王「知影这梦ê意思kah王心中ê意念」。

	第31到35节,chit段经文ê内容lóng是有关尼布甲尼撒王所做ê梦。Tī chiah-ê梦中thang看tio̍h ê就是一座非常奇怪ê大雕像,包括五个部分,有金ê头、银ê胸坎kah手股头、铜做ê腰kah尻川斗、铁做ê腿,以及铁kah土混合做成ê脚。

	如果照chit-ê梦ê图像去造一座chit种雕像出来,一定会发现这是一座顶下真不搭调ê雕像,因为头部是用金制造ê,而脚却是铁kah土制成ê。Koh讲,铁kah土是无法度混kah做伙ê物件,án-ne混合起来ê物件,一定会脱落,无法度结合做伙成做器物。第三,tùi头到脚,是tùi贵重ê金子,到铁kah土ê混kah物。Án-ne ē-tàng看出chit座雕像ê底座siōng脆弱,材质是siōng粗糙。Thang讲它会是不堪一击ê雕像,因为脚无法度承受任何打击。

	第34到35节提起有一块未经人手开凿ê巨石tùi山岩上滚落来,phah中了chit座雕像,用脚头u想mā知,siōng不堪一击ê必定是脚部了,因为脚部是用铁kah土混合造成ê,脚部马上被砸碎了。Á脚部被phah碎,表示chit座雕像无法度koh再khiā立,当然整座雕像就倒à落来粉碎了,甚至严重到被风吹得连碎片mā chhōe bē-tio̍h。

	Koh讲,hit块「巨石却jú滚jú大,最后变成一座大山,覆盖大地」。Chit-ê句话一定tio̍h kah第34节描述chit块巨石ê特色对照teh看;作者讲chit块巨石是一块未经人ê手开凿ê石头。显然ê,无经过人ê手开凿ê山顶巨石,怎样会滚落来?án-ne就表示chit块巨石会滚动落来,乃是其背后有大大超过人ê气力chiah有办法移动它,亲像大地动之类ê气力。如果这真正是大地动hō͘巨石移动,它所beh代表ê就是造物主上帝ê气力。

第36节,tùi chit节开始到第45节,lóng是teh解释头前所提起尼布甲尼撒王所做ê梦。

第37到45节,但以理解说尼布甲尼撒王ê chit-ê梦里,真特别地说明了四个帝国ê出现。Tùi巴比伦帝国开始,然后接落去有「另外一个帝国出现」,以及「第三个」kah「第四个」帝国出现。Tī第七章mā会看tio̍h「四头巨兽」ê梦,有kóa圣经学者讲chia ê四个帝国,kah第七章ê「四头巨兽」mā有譬喻上ê关系。

Chia并无明确kā四个帝国ê名称写出来,一般来讲kā chiah-ê帝国归类成两种讲法;第一种讲法是第一个帝国代表ê就是巴比伦,mā就是现在尼布甲尼撒所掌权ê帝国。续落来ê第二个是玛代帝国,第三个帝国是波斯王朝,第四个帝国是希腊。第二种讲法是第一个帝国乃是巴比伦、第二是波斯、第三是希腊、第四是罗马帝国。M̄-koh大多数ê人比较khah倾向支持第一个讲法。

Teh讨论中比较khah值得注意ê乃是tī第40到43节所提起ê,就是tī第40节提起ê hit-ê「像铁仝款坚强」ê帝国,指ê乃是希腊王朝时代ê亚历山大大帝;tī伊ê时代,hō͘希腊帝国非常强盛,国势达到颠峰ê状况,伊所带领ê军队所向无敌。M̄-koh tī伊死后紧续落来ê帝国,呈现出来ê就是用「铁kah土」混合而成ê帝国。头前已经讲过,chit两项物件是无法度混合做伙ê,如kā它混合做伙mā一定会分裂。Á事实mā确实是án-ne,tī亚历山大大帝死后,帝国之内随时分裂做做两个主要国家,并且是彼此互相对敌,chit两个国家就是「多利买」王国kah「西流古」王国;前者用「土」代表,后者用「铁」表示。Á tī第43节解释了第33节所提起「脚」ê部分,是用铁kah土混合做ê,意思是teh指通婚。Mā就是讲,这分裂ê两国,其统治者lóng想用通婚ê方式来teh象徵两个国家乃是和好如初。M̄-koh以通婚ê方式表示和好,骨底却是各怀鬼胎,彼此lóng想beh争取统治霸权,chit种通婚kan-taⁿ会带来koh khah chē ê憎恨,对tī已经分裂ê帝国并无实质ê帮助。

Chit-ê梦siōng重要ê是tī第44节,但以理讲上帝beh建立一个永远bē败坏ê王国,chit-ê王国beh kā所有顶面所讲ê四个帝国消灭。其实作者是用chit种讲法beh表明一件事:tī西流古王朝ê末代皇帝,mā就是安提阿哥四世ê时代,因为强制ài tī其统治区内彻底执行「希腊化」运动,坚持所有人民一定tio̍h放弃割礼,并且m̄准限制食ê物件,安提阿哥四世并且下命令检查所有统治区内ê犹太人是m̄是有实行割礼,如果发现有犹太婴á实行割礼,就beh kā它刣死,并且kā尸体挂tī母亲ê颔颈上游街示众,而拒绝食猪肉ê犹太人,则kā猪肉塞入去in ê嘴中。阿提阿哥四世并且tī耶路撒冷圣殿至圣所ê祭坛顶以猪肉献祭,而且kā猪血洒tī祭坛上,用chit种方式污秽、侮辱犹太人,主要目的就是强迫犹太人屈服成做一个希腊化ê子民。Chiah-ê资料lóng thang tùi「次经」ê「马加比传」上卷看ê到,mā是引起主前第二世纪ê犹太人反抗运动之主要背景因素。

第45节讲hit块未经人手开凿ê巨石,会消灭所有chiah-ê「金、银、铜、铁、kah泥做ê像」,ná chit-ê帝国指ê是甚么?照第44节所提起ê,he是上帝beh建立ê一个「永无尽期ê王国」。

作者khah强调tī所有chiah-ê大帝国ê统治者,若是以非常强猛ê手段迫害被统治ê人民,伊ê统治时代总有一工是会过去ê,m̄-nā án-ne,上帝一定会拯救他ê子民,绝对bē hō͘ chiah-ê以残酷手段对待人民ê统治者逍遥长远。上帝会亲自掌权、管理他ê子民。

	第46节,尼布甲尼撒王听但以理ê解说了后,随时向但以理—chit-ê被俘虏来ê奴隶下拜,并且iáu下令臣仆beh向但以理「献供物烧香」。Thang想像会tio̍h,当尼布甲尼撒王向但以理下拜ê时,其他在场ê臣仆必定也kah做。Chit种动作ná亲像kā但以理当做「神明」看待ê方式。换句话讲,作者用chit种描述方式,说明有智慧ê但以理tī尼布甲尼撒王ê宫廷中所享受ê特殊地位是非常重要ê,甚至有够额ê气力影响tio̍h国家决策。

    第47节,chit节是尼布甲尼撒王听但以理解说了后ê反应,伊o-ló但以理ê上帝,乃是「万王之主,是启示奥秘ê上帝」。

    第48到49节,尼布甲尼撒王照家己所讲ê,赏赐hō͘但以理真chē贵重ê礼物,mā提升伊,「委派伊管理巴比伦省,并任伊做王家顾问之首」。Á但以理则请求国王kā管理巴比伦省ê事务交由另三位朋友负责,伊专心留tī王宫里服侍国王。

经文:

但以理书 3:1-3:18

注释:

这是非常特别ê一章,因为chit章tùi头到尾都无提起但以理chit-ê人,只有提起kah伊同时被徵选入王宫内ê另外三个人,而chit三个人原本ê名叫:哈拿尼雅、米沙利、亚撒利雅(参考但以理书一:6、二:17),m̄-koh tī chit章中lóng是用巴比伦人ê名(参考三:12、16、19、23、26、28)。

	Koh讲,tī chit章中hō͘咱看tio̍h ê kah-ná但以理对tī chit项国家政策ê决定kah-ná是置身tī外,一点á关系mā无,这kah第二章48节提起ê「王赏赐但以理真chē贵重ê礼物,koh提升伊,委派伊管理巴比伦省,并任伊做王家顾问之首」,有真大ê cheng差,因为kā chit节用来对照第三章开始就提起尼布甲尼撒王beh实施重大ê政策ê时,却无提起但以理是m̄是参与,显然bē合常理。因为án-ne,chit章真有可能是独立ê资料。真可能编撰者用这资料是为tio̍h beh鼓励当时tī希腊化政策之下受tio̍h严重迫害ê犹太人,希望in m̄-thang放弃信仰,tio̍h对上帝有信心,而kā此资料插编tī-chia。

	因为án-ne,mā thang kā chit章单独tùi但以理书中抽出来成做一个独立ê单元来读,因为这是一篇真好ê「殉教者文献」,thang看tio̍h tī政治迫害之下,忠于上帝信仰ê子民怎样忍受迫害,mā学习认bat上帝怎样带领hiah-ê忠实tī他ê子民行过hit种惊惶、不安,以及性命随时有危险ê旅途。

	Chit章比较khah特别ê所在,乃是有一种希腊文版本圣经,包含另外一段长到六十六节ê经文,提起chit三位青年tī火炉中ê情景。Chit段经文tī天主教《思高圣经学会版版》ê圣经中保存,m̄-koh teh改革宗ê基督教圣经中,chit段长到六十六节ê经文则被列入tī「次经」中。

Chit段经文提起巴比伦王尼布甲尼撒铸造一座家己ê金像,不过并无够额ê资料thang证明伊确实做过chit件事。M̄-koh却有史料hō͘咱知影tī希腊帝国时代,安提阿哥四世bat tī「达夫内」(Daphnae)chit-ê所在铸造一座亚波罗(Appollo)金神像,mā bat tī耶路撒冷圣殿khiā立一座「宙斯」(Zeus)ê金神像,安提阿哥四世并且自称做神ê化身,ài人民向伊膜拜(参考Ammianus Marcellinus 22.13.1.),主要目的就是beh摧毁犹太人ê耶和华宗教信仰。

安提阿哥四世为tio̍h beh推动统治之辖区内所有ê人民「希腊化」,下令犹太人bē-tàng为gín-á举行割礼,甚至ài in食猪肉,mā亲自刣猪并kā它献tī耶路撒冷圣殿ê祭坛顶,为tio̍h chit-ê tāi-chì,犹太人bat全力反抗,史学家讲至少有四千个法利赛人为tio̍h beh维护圣殿ê圣洁遇tio̍h屠杀。因为án-ne,thang án-ne了解:chit段经文ê背景就是kah安提阿哥四世推动ê「希腊化」有密切关系。

	Chit段经文mā thang看tio̍h chit三个犹太菁英确实真有信仰原则,并无因为tī巴比伦享受高级官员ê位阶,就kā应该有ê信仰原则hō͘疏忽了á是放弃、妥协。

    第1节,tùi chit节所描述ê chit座金像来看,这是一座非常高大ê金像,ē-tàng看出当时ê巴比伦帝国之富裕。

    第2节,当巴比伦王尼布甲尼撒kā chit座金像造好khiā立起来了后,召集所有ê文武官员参加金像ê揭幕典礼。有kóa学者认为chit座金像并m̄是尼布甲尼撒本人ê金像,却是teh代表巴比伦帝国ê主神「拿布」(Nabu)。巴比伦人认为chit-ê「拿布」神ē-tàng庇护巴比伦人民。

    第3到7节,chia讲参加ê人是包括「大臣kah百官」,而tùi第2节提起所邀请ê官员共计分七级,是tùi中央到地方lóng有代表出席,换句话讲,这是全国性ê一pái大典。第4节提起讲chiah-ê代表来自巴比伦帝国辖区之内ê所有国家、族群、语言系统等lóng包括在内。Tī第5节提起只要听tio̍h各式乐器ê号声一响,所有听tio̍h ê人,无论是甚么身分,lóng tio̍h对chit座「尼布甲尼撒王所立ê金像」坦覆 (thán-phak)下拜。注意chia提起ê乐器,lóng是希腊时代盛行ê乐器。

    Siōng重要ê经文是tī第6节,chia讲「甚么人不坦覆 (thán-phak)敬拜,就beh马上被hiat入去焰火熊熊ê窑里」,意思真清楚,就是处死刑。因为án-ne,所有参加ê人lóng照国王ê命令拜了金像。

    第8到12节,chit段经文讲有人利用chit-ê机会向国王尼布甲尼撒控告犹太人,chiah-ê人真可能就是巴比伦ê hiah-ê术士、占星家等所谓有学问ê人,可能是为tio̍h但以理ê事件,hō͘ in tī国王面前á是巴比伦帝国ê官场上失宠而心生嫉妒。In特别指名讲chit三位「管理巴比伦省政务」ê犹太人—沙得拉、米沙、亚伯尼歌「不拜王ê神明,mā boài向王所立ê金像下拜」。

第13到15节,巴比伦王一听chit项指控,就「大发雷霆」,下令kā in三人带来,并且真无客气ê质问in为甚么beh抗拒命令,beh kā in「hiat入去焰火熊熊ê窑里」。王并警告in m̄-thang「认为会有神明来救in」。伊án-ne讲,tú好teh表示伊比任何神明lóng iáu有权威、力量。

    第16到18节,chit三节是kui章经文ê中心,siōng主要是teh说明chit三位青年深信in所信ê神一定会来拯救in。就算无,in mā bē敬拜尼布甲尼撒王所立ê神像。这已经完全否定了尼布甲尼撒王自认伟大,以及伊想beh扮演神明ê念头,chit对尼布甲尼撒王来讲,是一个真大ê侮辱,特别是chit三位青年竟然是tī大家金金teh看之下讲出chit种话来,对尼布甲尼撒王来讲,koh khah是严重ê侮辱。In深信in所信ê上帝一定会来救in「脱离焰火熊熊ê窑」kah国王ê手,就算无,mā bē下拜。

第6节、第11节、第15节、第17节等等,lóng一再提起「焰火熊熊」ê句话,这有点á ná亲像古代teh刑罚hiah-ê重要罪犯ê时所用ê「火刑」仝款,ná亲像tī罗马帝国统治之下,真chē基督徒就是hō͘绑tī十字架上,然后用火活活烧死仝款。直到中世纪时代,欧洲基督教宗教法庭mā不时以chit种刑罚对待hiah-ê被判做「异端」ê信徒。

这事件表面上看起来kah-ná是一件政治事件,其实应该讲是一件正港ê宗教迫害事件,只是以政治手段来进行。其实mā tùi chia thang看tio̍h尼布甲尼撒清楚,beh kā以色列人民消灭siōng好ê方法,就是先消灭in ê宗教信仰,如果宗教信仰无了,chit-ê以色列民族就会瓦解,因为chit-ê民族之所以ē-tàng连结做伙,就是in ê耶和华宗教信仰之缘故。

经文:

但以理书 3:19-3:30

注释:

Chit段经文讲出沙得拉、米沙、亚伯尼歌等三人被检举了后,被送到国王尼布甲尼撒王面前受审之经过,就是hō͘关入火炉ê窑里去准备处死。M̄-koh上帝ê手伸入火炉中teh庇护in三个,致使in三人毫发未伤,chiah hō͘尼布甲尼撒王深信in三人所坚持ê信仰态度是正确ê,并且下令以后bē-tàng koh再有任何人毁谤in三人。

    第19到21节,chit三节讲出尼布甲尼撒王听in三人ê回答后,「面色变了」,表示伊是气到极点,因为伊原本想beh建立家己tī人民中间ê神明地位、siōng koân权威,taⁿ却被chit三位原本是奴隶、现在被提拔起来做巴比伦省政务官ê犹太菁英所侮辱。因为án-ne,尼布甲尼撒王听了后「大发雷霆」地下令,用比平常温度koân出「七倍」ê火烧烧热窑炉,就是为tio̍h beh烧死chit三位犹太菁英。

	第22到23节,chit两节就是描述火炉比平常koân出「七倍」烧热度ê现象,m̄-nā炉á关不住火,火舌mā tùi「炉冒出」来,而且iáu未烧死chit三位犹太菁英chìn前,就已经先烧死去「执行命令ê兵丁」。

	Tī第24节chìn前,天主教《思高圣经学会版本》圣经有一段长到六十六节ê经文是基督教圣经版本所无ê,tī基督教是kā chit段经文收集tī「次经」中。

    第24到25节,chit节讲尼布甲尼撒王看见这情景,「惊奇地跳了起来」,随时询问身边ê大臣伊所看见ê「三个人」m̄是被绑起来「扔敬焰火里mah」?ē-sái讲是尼布甲尼撒王却看见有「四个人tī火中行来行去」,而且是「都无被缚tiâu,mā无一点烧灼ê款」,伊甚至讲「ná第四个人看起来kah-ná是神」。Chit-ê「神」字mā thang当做「天使」解释。

    第26到27节,chit两节ē-sái讲是kui个事件ê中心经文。Chia讲尼布甲尼撒王亲自对tio̍h焰火正炽ê窑炉,一一teh-hoah in ê名,请in三人出来。结果in三人「马上tùi火中出来」,而在场ê有「总督、省长、副省长,kah其他官员lóng聚lóng Tī chit三个人周围」,chit时in发现chit三个人身上连任何一点点á受伤mā无,包括in ê衫裤、毛发lóng是安好无恙。

    第28节,chit时chūn ê尼布甲尼撒王终其尾讲出o-ló ê声音,伊o-ló chit三个人「宁可冒性命ê危险违抗」伊ê命令,绝对不坦覆 (thán-phak)拜任何神明,指「专一敬拜in ê上帝」。

    第29到30节,尼布甲尼撒王同时「下令」,ài全国ê人lóng bē-tàng「毁谤」in三人所敬拜ê上帝,若无,会严厉惩罚。此外,王koh hō͘ in三人升官。

经文:

但以理书 4:1-4:18

注释:

Chit章提起巴比伦帝国ê皇帝尼布甲尼撒王,尊崇但以理所敬拜ê上帝是siōng伟大ê神,而且相信chit位上帝ê统治是「代代相承」,这实在是非常特别ê一件事。Koh加上chit章显示出尼布甲尼撒王并无因为听tio̍h但以理解析伊ê梦境内容就大大受气,反却是虚心接受,chiah-ê lóng是Tī圣经时代无法度想像ê事。

    其实,作者ê用意并m̄是teh呈现历史ê史实,却是teh暗喻tio̍h:任何一个伟大ê君王,lóng无法度逃过上帝对人类性命ê审判。想beh得tio̍h上帝ê赦免kah怜悯,唯一ê方式,就是悔改认罪,以及秉行公义,疼惜人民ê性命,án-ne chiah是正确ê途径。即使伟大如尼布甲尼撒王,国势坚强壮大如巴比伦帝国,如果无谦卑认罪ê心,无遵行公义统治社会,chit种君王á是国家,lóng会tú-tio̍h上帝严厉惩罚而破碎。Chit点mā是chit章经文所beh表达ê信息。

Koh讲,chit章kah第三章有真大ê差别ê所在,就是chit章ê尼布甲尼撒王清楚会记得家己所做ê梦ê内容。可能因为但以理bat有过解梦ê美好记录,hō͘尼布甲尼撒王真紧to̍h直接chhōe但以理来解梦,并且是先肯定但以理所信奉ê上帝乃是siōng伟大ê上帝。

    Chit段经文是描写尼布甲尼撒王所做ê梦境,伊讲这梦是「恶梦」,hō͘伊「看tio̍h恐怖ê异象」。伊请但以理koh名「伯提沙撒」为伊解梦,因为全巴比伦境内ê术士等lóng无法度为伊解开梦境。

第1到3节,chit三节提起国王ê「通谕」,就表示这是一个全国人民lóng需要遵守ê规则kah命令,bē-sái有任何人thang例外,而且是一经发布,就无法度随便修改(参考以斯帖记八:8)。Chit节特别强调chit份「通谕」ê范围是包括所有巴比伦帝国统治区内,thang讲范围是扩kah所有统辖区之内ê人民。

事(tāi)先伊祝福全国人民「安康」外,伊mā tio̍h向人民讲出上帝向伊「显示」ê神迹。  

第3节是一首o-ló ê诗歌。Chit首诗歌mā thang讲是尼布甲尼撒王ê信仰告白,伊确认上帝是一个伟大而且主权无穷尽ê上帝。

    第4到7节,尼布甲尼撒王讲伊tī困眠中做「一个恶梦,看tio̍h恐怖ê异象」ē-sái讲是伊请巴比伦全国所有ê顾问来帮忙解梦,却都无结果。因为in lóng无法度解开梦境。

第8到9节,尼布甲尼撒王知影但以理ē-tàng帮伊解梦,并且hō͘伊知影怎样tùi这梦境中看tio̍h上帝ê旨意,因为án-ne,伊认为但以理是有「至圣神明ê灵」kah伊同在ê人。因为án-ne,伊请但以理帮伊解梦。

第10到12节,tùi第10节开始ê chit段经文,是有关尼布甲尼撒王所做ê梦ê内容。

Chit-ê梦是用一丛树做基础建构起来ê,伊讲这棵树高总是ē-tàng以「直到顶天」,而且是世界上「所有ê人lóng看会tio̍h」,而且它ê果子「够额全世界ê人lóng食用」,所有生物lóng来食它ê果子。然后有野兽tī树荫下歇困,飞鸟tī枝上「做巢」。

第13节,chit节koh讲伊mā看见「天使」tùi天顶落来。「天使」,这是上帝ê使者,落来主要ê目的就是执行上帝所交带ê命令。

第14到15节,chiah-ê tùi天顶落来ê「天使」teh执行上帝命令,包括beh赶走歇tī树干上ê鸟,kah tī树下ê野兽,并且beh phut倒chit丛大树。然后kā留落来ê残干用「铜条铁条围tòa」,kā它放在野外。Tī第15节ê下半句真特别,tùi树ê异象中,忽然变成「一个人」,而chit-ê人tio̍h kah野兽生活做伙,生活ê样式ná亲像野兽一般,食草、露宿野外。

第16到17节,chia讲chit-ê人ài有长到「七年之久」,无人ê「心智,无koh有人ê想法;伊只像野兽」。会有chit种结果是因为来自「守望ê天使所决定ê」,而chit种决定是上帝掌管ê结果。

第18节,尼布甲尼撒王koh一pái表明只有但以理ê智慧chiah ē-tàng解开梦境ê谜。原因是伊深信但以理有「至圣神明ê灵」kah但以理同在chiah有ê结果。

经文:

但以理书 4:19-4:37

注释:

Chit段经文是但以理为尼布甲尼撒王解释伊ê梦,而这梦确实是kah尼布甲尼撒王ê未来有密切关系,上帝beh透过这梦kā伊讲一定会tú-tio̍h梦境中所启示ê现象。

    第19节,但以理一听tio̍h尼布甲尼撒王所描述ê梦境,就「惊惶得讲不出话来」,颠倒是尼布甲尼撒王鼓励但以理勇敢讲出来。

第20到23节,但以理真清楚kā尼布甲尼撒王讲,梦中ê大树就是代表伊,这说明了当时ê巴比伦帝国非常兴旺、强盛。M̄-koh上帝决定beh惩罚巴比伦帝国,ná亲像他差遣天使落来phut断这棵大树仝款。

第24到27节,但以理继续讲尼布甲尼撒会像这被phut断倒落来ê大树干仝款,然后伊mā会hō͘放ta̍k ná亲像居无定所ê流浪者仝款,长到七年时间。会一直到王知影承认上帝ê主权统治世界,hit时chūn伊chiah ē-tàng重新恢复王权,而且会知影「bē-tàng koh再犯罪,tio̍h秉公行义,怜悯sàn-chhiah人」,只有án-ne chiah ē-tàng hō͘国家「继续昌盛」。

第28节,chia讲但以理所解释出来ê梦境ê意思,结果lóng tī尼布甲尼撒王ê身上实现à。

第29到30节,chit两节讲出过了一段时间,mā就是「十二个月」了后,巴比伦王竟然bē记得但以理ài伊注意ê事,伊开始骄傲起来,看家己所建立ê巴比伦帝国,认为he是伊ê「光荣kah威严」。伊bē记得家己所歌颂ê上帝chiah是性命ê主宰,mā是宇宙万物ê统治者。人就是án-ne软弱,即使清楚听tio̍h了来自天顶ê警告,mā无一定会醒悟而且及时改正过来。

第31到32节,就当尼布甲尼撒王teh为家己ê成就骄傲ê时,天顶有声音传出来,上帝决定beh kā伊ê王权the̍h掉,就ná同伊梦境中所看见ê,伊会hō͘放ta̍k在野外流荡,kah「野兽同齐生活」,teh过「像牛仝款食草」ê生活,chit种时间长到七年。然后,上帝beh ài kā「国权赐hō͘伊所选择ê人」。

第33节,果然,当天顶ê声音讲完了后,真紧,尼布甲尼撒王就hō͘人「赶出去,像牛仝款食草,受露水浸湿。伊ê头毛生做像la̍h-hio̍h ê羽毛,指甲像鸟ê爪」。

	第34到35节,chit两节经文是一首短诗。是经过七年了后,尼布甲尼撒王teh歌颂上帝ê伟大。伊醒悟过来,看tio̍h家己ê卑微,相对ê mā看tio̍h上帝ê伟大。伊mā知影tī chit世界上,无任何力量ē-tàng kah上帝相比。Chia用「举目望天」,表示伊渴望上帝ê怜悯kah救恩。

	第36到37节,这mā是圣经作者一贯ê思路:只要知影悔改,上帝就会赦免kah祝福。显示出上帝ê疼kah怜悯。他惩罚人,为tio̍h是beh帮助人明白家己ê错误,他祝福hiah-ê因为知影错误而悔改ê人。Chiah-ê祝福m̄-nā涵盖过去所受ê苦难,并且thang得tio̍h比以前koh khah大ê福份。尼布甲尼撒王得tio̍h上帝chit种赐福。

经文:

但以理书 5:1-5:12

注释:

开始又koh是另外一个王朝ê背景,无koh是头前四章lóng是以尼布甲尼撒王时代为背景写出来ê故事,chit章是以尼布甲尼撒王ê kiáⁿ伯沙撒继承王位了后ê背景写出来ê。

    其实尼布甲尼撒王并无名叫伯沙撒ê kiáⁿ,chit位名叫伯沙撒ê王,可能是尼布甲尼撒王ê侄á。亚兰文ê「kiáⁿ」mā thang被当做是「孙á」á是「kiáⁿ孙」,mā thang当做是「财产继承人」解释。因为án-ne,有可能是因为伯沙撒ê妈妈乃是尼布甲尼撒ê cha-bó͘-kiáⁿ,若是án-ne,则伯沙撒乃是尼布甲尼撒王ê孙á,这就符合这亚兰文字「kiáⁿ」ê意思à。

	不过,作者tī历史资料上án怎讲述历史史迹并m̄是chit本经册ê主要目的,作者siōng重要ê乃是beh说明以色列人民久长以来贯有ê思想:统治者ê权柄tùi上帝来ê赏赐(参考罗马书十三:1—2),若无以慈爱来治理人民ê君王,lóng bē是上帝所祝福kah欢喜ê对象;而设若一个君王只知影谋财夺利,却对人民生活ê苦难不闻无问,chit种君王乃是上帝所讨厌ê,必定hō͘上帝所弃绝。

	因为án-ne thang tùi chit种背景来了解:作者想beh kā当时tī波斯帝国安提阿哥四世统治下受苦ê犹太人讲免担心,上帝一定会真紧to̍h废除施暴tī犹太人ê安提阿哥四世。因为真正有权威ê君王lóng m̄是伊家己有甚么能力,却是上帝赏赐hō͘伊有机会代理管辖上帝ê子民,若无上帝ê允准,任何统治者lóng bē hō͘上帝所祝福,因上帝chiah是咱性命ê主、统治者。

    Chit段经文描述chit位伯沙撒王因为kā in父亲tùi耶路撒冷圣殿所掠夺来ê战利品,teh宴请宾客ê时当做饮酒作乐ê器皿,同时歌颂用金银铜铁等材质所铸造ê神明。结果宫廷中出现异象,所有ê术士、巫师lóng无法度看bat异象而感觉非常惊恐。后来因为太后知影但以理有chit种能力thang解开异象ê意义,而向伯沙撒王kah大臣建议请但以理来解开异象。

    第1到4节,chia讲有「有一工暗时,伯沙撒王邀请一千名大臣来参加盛大ê宴会,lim酒作乐」,这ē-sái讲是宫廷大事,文武百官lóng会出席聚集。为tio̍h beh增加宴席欢乐ê气氛,伯沙撒王命令人kā in父亲tùi耶路撒冷圣殿掠夺而来ê圣物lóng搬出来展示,而其中有kóa器皿当做lim酒作乐ê杯碗,另外有kóa器皿已经被改造成偶像神明。这表示in对耶和华上帝极度ê侮辱。

    第5到6节,就tī大家欢乐畅饮ê时,忽然「有一只人手出现,用指头tī王宫ê粉墙上ná灯光siōng亮ê所在写字」,chit时chūn伯沙撒王看tio̍h,面色变kah非常苍白,「吓得双膝颤抖」。

	第7节,ná亲像顶pái尼布甲尼撒眠梦仝款,伯沙撒王赶紧chhōe巴比伦国内siōng有学问ê人,mā就是宫廷ê顾问来替王解梦,而且mā会hō͘ in siōng好ê奖赏,包括有「紫袍,带荣誉ê金phōa链,tī王国中居第三高位」。

    第8到9节,结果发现所有ê chiah-ê王室顾问都无任何一个人ē-tàng替伯沙撒王解释出异象ê意思。这hō͘伯沙撒王koh khah「惊惶,面色变kah koh khah苍白」。

	「国中居第三高位」,这表示官位kan-taⁿ次tī国王kah王后。Mā有可能除了国王之外,第二高位ê是伯沙撒家己,然后chit-ê会解答墙壁顶文字谜底ê人就是第三高阶官员à。

    第10到12节,chia讲「太后」,chit-ê字ê希伯来文指ê是「皇后」。M̄-koh kui篇经文看起来是khah sêng「太后」,mā就是老母kah kiáⁿ对话。Koh讲,如果是以「老母」(太后)ê身分讲话,则chia ê太后,指ê就是尼布甲尼撒ê bó͘,若无就是尼布甲尼撒ê cha-bó͘-kiáⁿ。因为伊iáu会记得发生tī尼布甲尼撒身上ê事件,因为án-ne赶紧提醒伯沙撒考虑邀请但以理入宫帮助伊处理chit件事。伊提醒伯沙撒王,但以理是一个有「异常ê能力,有智慧kah特殊ê才能,会解梦、解谜、解释奥秘ê事」。

    Chia无jōa清楚到底是发生甚么事,致使但以理已经离开王宫,á是为甚么chit pái ê宴席中伊无被邀请?有人讲hit时但以理已经年老退休,á是因为王朝替换,老臣旧官mā被更换落来,chiah-ê lóng有可能。

经文:

但以理书 5:13-5:30

注释:

Chit段经文描述但以理成(chiâⁿ)实án-ne被召进宫去解释出现tī宫廷墙壁顶ê异象。

第13到16节,当但以理进入王宫了后,国王伯沙撒随时问伊是m̄是就是in父亲所掳来ê「犹太人但以理」?chit句话有轻视但以理ê意思,主要目的是beh但以理明白伊本来ê身分乃是奴隶,taⁿ面对统治者,一定tio̍h遵照指示去行。伯沙撒王á是仝款表示,若是但以理ē-tàng解释出现tī王宫墙壁顶ê异象,伊就会赏赐hō͘伊siōng尊贵ê礼物kah地位。

第17节,但以理tī chit节ê回答ē-sái讲是kui章经文ê中心。作者所beh表达ê就是tī chia:上帝ê仆人对tī来自人间ê奖赏并无重视,甚至会拒绝,因为chiah-ê来自人间ê奖赏真紧to̍h会过去,甚至变质。

第18到19节,但以理先讲述尼布甲尼撒王ê历史hō͘伯沙撒知影,兴旺kah衰败lóng是出tī上帝ê旨意。这已经teh暗示m̄是in父亲有甚么特别能力。
第20到21节,chit两节thang对照第四章31到33节、第36节等等经文。但以理希望用chit种话来警告、提醒伯沙撒,hō͘伊知影发生tī尼布甲尼撒王身上ê事是前车之鉴。
	
第22到24节,chit两节但以理清楚指出伯沙撒ê问题所在。伊虽然无像尼布甲尼撒是hō͘上帝拣选用来惩罚以色列人民ê仆人(参考耶利米书廿五:9),m̄-koh伊却是拥有实权ê一位统治者,应该tio̍h知影怎样谦卑带领人民。但以理真清楚指出伯沙撒ê问题,就是骄傲、m̄知谦卑。Koh khah严重ê,乃是伊kā圣殿敬拜上帝用ê器皿当做玩具般,the̍h出来hō͘伊ê臣仆、众bó͘ kah细姨观赏、lim酒作乐ê路用。M̄-nā án-ne,连尼布甲尼撒王lóng会知影o-ló创造万物ê上帝ê伟大,而伯沙撒却无án-ne,反tńg利用酒宴ê机会,歌颂hiah-ê偶像神明。这是上帝「打发一只手来写chiah-ê字」ê原因。

	第25到28节,chit段经文说明了墙壁顶所写ê toh一kóa字,以及hiah-ê字ê意思。Chia提起壁顶ê文字虽然有四字,m̄-koh其实第一字kah第二字lóng是仝款ê字—「数算」。Chit-ê字tī亚兰古文字kā它称做「Mene」。第三字是「称一称」,亚兰古文是字「tekel」。第四字是「分裂」,亚兰古文字是「uparisin」。照第一章4节ê记载,但以理kah其他三位犹太青年菁英被选入巴比伦王宫ê主要功课,就是学习巴比伦文字kah语言,为tio̍h是beh利用in ê聪明智慧协助料理巴比伦帝国ê国政事务,因为án-ne,chiah-ê古亚兰文应该是所有巴比伦帝国境内所讲ê饱学之士、有学问ê、会看星象、占卜ê人等等lóng会认bat chiah-tio̍h。就án-ne tī chia,咱看tio̍h可能是认bat chiah-ê字并m̄是问题,问题是chiah-ê字beh代表ê意义是甚么?án-ne chiah是真正ê问题所在。

    但以理ê智慧就是表现在chia;伊看会bat,koh khah重要ê,伊知影chiah-ê文字所表达ê意思kah信息。伊真坦白kah伯沙撒讲,tī伊统治之下ê巴比伦帝国会灭亡、分裂,「归hō͘米底亚人kah波斯人」统治。

第29节,伯沙撒按照chìn前所讲ê,kā三样siōng美好ê礼物赠送hō͘但以理,这三项礼物包括「王室ê紫色袍」、「荣誉ê phōa链」、「国内位居第三高位」ê官职。

第30到31节,乃是真chē圣经学者比较khah欢喜讨论ê问题,一者是无资料chhōe-tio̍h波斯帝国有一位国王名叫「米底亚人大流士」ê。另外一方面,mā无资料thang证明伯沙撒是怎样往生ê。而且tī历史年表中mā无「米底亚」chit-ê介tī巴比伦kah波斯之间ê王朝。其实作者只是想用某段历史来写伊想beh暗示读者知影伊hit时代ê现况,并m̄是beh写史实。但以理ê作者就是án-ne,因为伊主要目的是beh说明tī伊ê时代,希腊帝国ê统治者安提阿哥四世会被刣死,而且伊ê国家必定会分裂。

经文:

但以理书 6:1-6:13

注释:

表面上看起来,但以理书是一本以但以理为主角ê经册,m̄-koh读起来却kah-ná每一章lóng是独立单元。亲像:第三章ê经文内容kah前后文并无关连,第四章又koh是另外一个单元。然后,tī第五章却换做另外一个朝代,现在chit章又koh是另外一个新ê朝代开始。故事iáu以但以理为主角,m̄-koh事件soah koh kah第三章真类似。第三章中只有提起但以理ê三个朋友被丢入火炉中,现在第六章则只有但以理被丢入狮坑里。M̄-koh无论是第三章á是第六章,主要lóng tī说明一件重要ê信息:有上帝ê同在,即使性命面临危险,mā m̄免担心,因为上帝会保护他忠心ê仆人。

	如果但以理书ê成册背景是tī主前第二世纪希腊帝国安提阿哥四世统治ê时代,án-ne,咱thang看tio̍h安提阿哥四世就是对犹太人采取严厉ê「宗教净化」政策,伊规定tī其统治辖区之内所有ê人民lóng一定tio̍h完全希腊化,而tī chit项希腊化政策之下,是包含宗教信仰ê要求在内。伊命令所有辖区之内ê人民lóng一定tio̍h信奉希腊人ê神明。伊极力推动希腊化ê宗教信仰,thang Kā chit种政策kā它称做「宗教净化政策」,它真直接就冲击到以色列人民tī信仰上坚持保有ê:独独创造ê上帝chiah是真正神。Mā为tio̍h beh维持chit种信仰,tī安提阿哥四世统治之下ê犹太人确实mā为tio̍h án-ne付出了非常大ê性命代价。

    Tī第五章31节bat交带过米底亚人大流士tī六十二岁ê时chūn,巴比伦帝国改由大流士统治。M̄-koh历史上提供ê资料是波斯王塞鲁士ê将军「哥布利斯」(Gobryas)率军攻入巴比伦城,并且结束loh巴比伦帝国ê时代。Á chia所提起ê大流士,乃是tī主前522年继塞鲁士王ê kiáⁿ「tú彼西斯」(Cambyses, 530〜522 B.C)为波斯帝国ê王,伊原本是国王ê侍从官,名叫「希斯伊斯比司」(Hystaspes, 522〜486 B.C),m̄-koh却得tio̍h军队ê拥护,因为án-ne,当伊tī主前522年继位为王ê时,随时改名为「大流士」(Darius),伊一直掌权直到主前486年。

Koh讲,历史上ê资料mā无提起波斯帝国ê塞鲁士王,á是大流士王有过迫害以色列人民ê宗教信仰之记录,反却是波斯帝国塞鲁士王好款待以色列人民,鼓励in回乡重建家园(参考以斯拉记一:1—4)。因为án-ne,thang án-ne了解:但以理书ê作者并m̄是teh撰写历史史实,却是重视chiah-ê故事beh表明ê信仰意义。

Chit段经文teh描述chit位新ê王听从所有参谋政要ê建议,无明察he是in想beh陷害但以理而设计出ê计谋,因为án-ne,同意发布一道禁止令, ài所有ê人除了向国王祈求外,禁止向任何神明祈祷。但以理决定抗令,继续向上帝祈祷,hō͘伊面临被判死刑ê危险。

第1到2节,tùi文中看tio̍h大流士王是一位真有政治谋略ê君王,伊tī全国设立一百二十个行政区,然后每一区lóng指派一人当行政管理首长,而但以理kah另外两人管理这管理、监督这「一百二十个」行政首长。
	
第3节是作者想beh强调ê重点,是但以理有上帝同在。因为án-ne各项表现lóng真优秀。Ná亲像第五章12节所ê仝款。

第4到5节,thang看出人性ê软弱kah矛盾,就是忌chiah,chit款tāi-chì kah-ná tī每一个地方、每一个时代lóng无停发生。但以理就是tú-tio̍h了chit种问题,因伊ê能力太强而引起其他官员ê嫉妒,决定beh除掉但以理,m̄-koh发现唯一ē-tàng陷害伊ê,就是伊ê宗教信仰行为。

第6到8节,chit段经文是chiah-ê想beh陷害但以理ê官员ê计谋,in向国王献策,ài国王颁布命令规定全国官员tī「三十工内,bē-tàng向任何神明祈祷,á是向任何人祈求甚么」,只准向国王祈求。真清楚这道宗教限制令其实就是针对但以理「量身订造」ê。

第9到10节,国王接受chiah-ê臣仆ê建议,就亲自签署ê诏令,大流士王颁发这道诏令了后,但以理iáu是和平常仝款,无甚么激烈ê反应,kah-ná无kā这道诏令当做一回事看待。伊当然mā知影诏令一出来,想beh更改mā无办法,只有ê途径就是走chhōe上帝ê帮助。伊就和平常仝款每工tī厝内楼顶ê房间ná朝ǹg耶路撒冷ê窗户向上帝祈祷三pái。这是以色列人民tī国家灭亡了后,每工生活中lóng一定tio̍h遵守ê规律。诗篇ê作者tī诗歌中án-ne讲:「Ê-hng、早起、中昼,我beh 哀伤吐气;他mā 会听我ê 声。(全民版)」(诗篇五十五:17)án-ne咱知影早起、中昼、暗时,每工三pái祈祷就是teh指chiah-ê时间。

第11到12节,因为但以理祈祷ê时是kā koh楼ê窗á大开,hiah-ê专心斟酌伊ê一举一动ê仇敌因为án-ne掠tio̍h了chit-ê机会,就集合起来一状告到国王大流士hia去。In提醒国王bat发出这道诏令,而且强调这是无法度更改ê诏令。国王mā同意in ê提醒,表示诏令确实是无法度更改。

第13节,chiah-ê官员主要想谋害ê对象是但以理,因为án-ne,in先向国王讲但以理是「tùi犹大受掠来ê」,chit句话是含有藐视ê意味tī内面。Chiah-ê官员mā teh用语上强化但以理「不服从」国王颁布ê诏令,继续维持伊个人tī宗教信仰上ê规律。换句话讲,chiah-ê人beh hō͘国王大流士认定但以理根本就无kā伊khǹg tī眼内,in ê主要目的,就是想用chit种方式hō͘国王下命令kā但以理丢入狮坑喂狮。


经文:

但以理书 6:14-6:28

注释:

Chit段经文描写大流士王tī艰苦心ê情况下,照伊颁发ê诏令kā但以理hiat去狮坑中,m̄-koh结果上帝kah但以理同在,并无伤害但以理,然后kā hiah-ê控告但以理ê官员hiat入去狮坑中,结果hiah-ê人lóng死tī狮ê嘴中。然后大流士国王发布歌颂但以理ê上帝之颂词,要求全国人民lóng一定tio̍h敬奉但以理所信靠ê上帝。

第14到15节,当大流士王听tio̍h原来chiah-ê官员幕僚是为tio̍h要害死但以理chiah设计出这道诏令,心内艰苦心至极,真想beh救但以理。Á chiah-ê想要害死但以理ê官员则逼国王一定tio̍h赶紧执行伊所发出ê诏令。

第16到18节,国王无办法只好kā但以理掠起来「hiat入去狮坑」,并且祝福伊ē-tàng得tio̍h「上帝搭救」。Mā为tio̍h beh防止但以理逃脱,坑口iáu用石头堵起来,并且贴上盖有国王印玺ê封条。Á国王整瞑无法度安息,因为伊挂念tio̍h但以理ê性命。

第19到20节,国王大流士是关心但以理ê安危,彻瞑未眠到天光ê时,急忙赶到狮坑去探望但以理,并且称呼但以理为「永远活ê上帝ê仆人」,问但以理是m̄是上帝有救伊「脱离狮ê口」?当国王发现但以理安然无恙,伊肯定但以理ê上帝就是「永远活ê上帝」,伊ê问题真有意思,如果但以理无回答,表示但以理已经被狮食掉死去,chit种上帝,bē是「永远活ê上帝」,因为「永远活ê上帝」会看顾他忠实ê仆人kah子民chiah-tio̍h。虽然大流士王看起来真关心但以理ê生死,m̄-koh伊mā想beh知影到底但以理不时teh绍介chit位全能ê上帝是m̄是真正就是「永远活ê上帝」,án-ne chiah是大流士王话中ê意思。

第21到22节,chit时但以理回应大流士王ê询问,并且tùi狮坑中kā大流士王讲,上帝「差派天使来封tiâu狮ê口」,hō͘ chiah-ê狮无法度伤害伊。但以理强调上帝会án-ne做,是因为上帝知影但以理乃是「无辜」ê,伊并无做任何「冒犯」国王ê事。换句话讲,但以理hō͘大流士王知影,真正ê问题m̄是tī伊,却是tī hiah-ê设计chit-ê计谋之众官员ê身上。

第23到24节,大流士王当然听bat但以理话中ê含意,随时命令人kā但以理tùi狮坑中khiú出来,然后koh「下令掠所有控告但以理ê人」,然后「Kā in kah in ê bó͘、kiáⁿ lóng hiat入去狮坑」,结果in lóng死tī狮ê嘴中。Chiah-ê被丢入狮坑ê官员,人iáu未落到坑底,就lóng被狮食掉了,可见chiah-ê狮已经是饿到一看见猎物,便迫不及待tùi坑底跳起来抢食à。

但以理书ê作者写chiah-ê故事,其实是有一个目的,希望tī安提阿哥四世统治下受tio̍h迫害、诬陷ê以色列人民ē-tàng得安慰,beh hō͘伊ê同胞知影:hiah-ê诬陷in、hō͘ in受tio̍h迫害ê,有一工lóng会陷入家己所设计ê罗网中。

第25节ê「世界各国」,这只有ē-tàng是tī伊统治辖区之内行得通而已。

第26到27节,koh一pái强调但以理所敬拜ê上帝chiah是真实、「永生ê上帝」。因为是「永生ê上帝」,就teh表示他chiah是真实,而且他统治ê权柄chiah会「永远长存」。

圣经ê作者ài用类似「永活ê上帝」来绍介上帝,表现在「永活」ê方面,就是以上帝会行神迹奇事来说明。Tùi带领以色列人民出埃及、入旷野、进入迦南地,现在则拯救但以理,chiah-ê神迹奇事lóng tī说明chit位「永活」ê上帝并m̄是活tī某一个阶段、某一个所在,却是跨越ê时空ê上帝,而且bē受tio̍h人ê能力所限制,因为真正「永活」ê上帝,有他家己ê工作计画。

经文:

但以理书 7:1-7:14

注释:

Tùi第七到十二章,这是属tī但以理书ê第二部分。这部分全部lóng是属tī但以理个人看见ê异象,一般来讲lóng kā chit部分纳入圣经中属tī「启示文学」ê类别。Tī这部分siōng有趣味ê事是,头前六章讲但以理有聪明ê智慧,会解梦,甚至连巴比伦王尼布甲尼撒bē记得ê梦,伊lóng ē-tàng替国王chhōe tńg来,而且iáu会解梦,hō͘国王清楚明白伊所做ê梦,á是所看见ê异象ê意义。Ē-sái讲是,现在轮到家己看tio̍h异象,却无法度明白到底是怎样一回事,并且家己mā会惊惶、烦恼所看见ê异象,ná亲像伯沙撒所看见ê异象仝款,因bē明白梦ê意思而担忧,iáu koh khah询问出现tī伊面前ê天使chiah得tio̍h明白。

第七章ē-sái讲是但以理书中siōng中心ê一章,因为chit章tú好thang kā头前部分kah后面部分做一个连结。特别是tī第七章读起来就kah-ná似bat相识ê款,原来tī第二章有记载尼布甲尼撒王bē记得家己ê梦,被但以理chhōe tńg来,但以理讲这梦谈起有四个帝国。Tī这第七章里,mā是谈起有四个帝国,而且lóng是第四个帝国siōng强大。

「四」,chit-ê数字tī以色列文化中有真特殊ê意义,它teh表示「普遍」á是「适当」ê意思。「四」ê倍数就是「四十」,chit-ê数目咱就比较khah熟悉à。亲像摩西tī埃及王宫「四十年」、tī旷野「四十年」、以色列人民tī旷野漂流「四十年」、耶稣基督tī旷野接受试探「四十工」等等,lóng kah「四」有关。

Chit段经文是但以理看见ê异象,án-ne包括四头怪兽tùi海里出来,这四头怪兽分别像狮、熊、豹,以及一只十角兽等。另外ê异象是看见宝座顶坐teh ê「万古永存者」,有上千上万甚至是上亿ê人khiā tī其面前。续落来tī暗时ê异象中看见一位kah-ná人子ê出现。M̄-koh伊却无法度理解chiah-ê异象ê意思。

    第1到3节,「伯沙撒做巴比伦王ê第一年」,chit句话并m̄是史实ê资料。作者是想藉用chit种方式kā第七章了后ê后半部kah头前六章ê部分连结起来。因为重要ê乃是teh记述但以理看见ê异象,却m̄是伯沙撒当巴比伦帝国ê王。

「异象」,这是超出一般人所ē-tàng了解ê图像,mā thang当做是一种梦境。第3节讲这异象包含tio̍h「四头巨兽tùi海里起来」。Tī以后ê经文中描述chiah-ê「巨兽」mā thang当做「怪兽」理解。

第4节,这是「第一头巨兽像狮」,m̄-koh m̄-nā有「la̍h-hio̍h ê翼股」,mā「有人ê头脑」。狮,Tī圣经中代表凶猛ê动物,mā thang当做雄壮ê军队。先知耶利米就bat kā巴比伦帝国譬喻成像狮仝款(参考耶利米书四:7、四十九:19),形容军队雄武坚强,无国家ē-tàng抵挡仝款。Chit节讲但以理tú-teh看chit只巨兽ê时chūn,忽然间看tio̍h巨兽ê翼股被剪除了,这表示巨兽无法度koh再飞了,而且需要藉tio̍h其他ê气力chiah ē-tàng khiā稳。

第5节,chia提起第二头巨兽像「熊」,它ē-tàng「用两只后腿khiā立」,而且嘴齿「咬tio̍h三根胸坎á骨」,这是teh指波斯帝国tī主前546年征服了kui个波斯湾地区,并且tī主前538年消灭了巴比伦帝国,然后tī主前525年phah败埃及。

第6节,第三头巨兽是亲像「豹」。这是比熊iáu koh khah凶残ê动物,特别ê所在是tī它ê尻脊骿有「四个」像鸟仝款ê「翼股,koh有四个头」。Chia ê头表示四个统治者,包括:塞鲁士、大流士、亚达薛西(Artaxerxes)、薛西(Xerxes)等四位。

第7到8节,这是第四只巨兽,m̄-koh chit只巨兽siōng特别,长相mā siōng奇特,m̄-nā有「大铁牙」,mā有「十个角」,然后tī chiah-ê角中,生出一个「小角」,而且chiah-ê小角「Kā原有十角ê三个拔掉」。Koh khah恐怖ê是这小角「有人ê目睭kah一章讲夸大话ê嘴巴」,这明明是怪物中ê怪物,莫怪一开始就讲chit只巨兽看起来「hō͘人恐怖」。

第9到10节,chit两节提起一个新ê场面,就是「万古永存者」出现坐tī他ê「宝座顶」,续落来讲「伊宣布开庭」,并且kā「案卷」掀开来,ài beh进行审判ê工作。

作者以东方社会官场ê审判场面形容上帝ê审判情景。Chit种描述审判者出现ê特徵,有「洁白」ná亲像雪仝款ê衫裤,ná亲像光一般ê火焰,但以理书ê作者讲「万古永存者」,指ê就是上帝。他出现ê时m̄-nā有顶面所讲chiah-ê景象,koh khah特别ê,乃是tī他ê身边有千千万万ê服事者。

Chiah-ê服事者主要就是听从上帝ê差遣,去执行上帝所命令in ê工作。

第11到12节,这是真值得注意ê两节经文,因为chia提起tāi先被惩罚ê,乃是第7节所提起ê ná第四头巨兽,而chit只是siōng hō͘人看了就感觉恐怖惊惶ê怪兽,它被审判者刣死。Á前述ê另外三只则只有剥夺「权柄」而已。会án-ne处分ê原因,是kah第8节以及11节所提起「讲夸大ê话」有关系。因为「讲夸大ê话」表示骄傲、狂傲,而这tú好lóng是历代真chē残忍ê统治者siōng典型ê问题。

第13到14节,chit两节ē-sái讲是但以理书中siōng重要ê一段经文,chit段经文之所以重要,是因为chia提起一个重要ê名词「人子」,被福音书引用来teh代表耶稣基督ê身分(参考马可福音九:9、十四:62)。

「人子」chit-ê词,tī希伯来文是「ben adam」,意思就是teh指「有人性ê人」。头前lóng指巨兽、怪兽,m̄-koh chia用「人子」,表示一位来自天顶ê上帝所差遣ê,降临来到,chit-ê受差遣者是「有人性ê」,kah hiah-ê怪兽、巨兽ê lóng无人性,完全是颠倒ê。所谓「有人性」,意思就是有上帝ê「形像」,而上帝ê「形像」乃是他ê疼,并且是用疼来「管理」受造ê万物。Chit-ê「人子」就是带上帝ê疼来「管理」世间万国。因为是teh代表上帝,因为án-ne chit位「人子」接受上帝所hō͘ in ê「权威、光荣kah王权」,就是为tio̍h beh hō͘世间万国、万民lóng服事伊。

如果koh再kā chia ê「人子」身上所有ê荣耀、权柄等对照以赛亚书第九章6到7节,以及第十一章1到9节等等先知ê诗歌,就会发现先知以赛亚所讲ê是一位tùi上帝来ê拯救者,而但以理书则讲tio̍h上帝beh针对hiah-ê tú-teh受苦难中ê人民讲ê,mā仝款是谈起有一位拯救者会来临,chit位拯救者有上帝ê荣耀,mā会永远统治tio̍h上帝ê子民。

经文:

但以理书 7:15-7:28

注释:

Chit段经文是上帝ê天使为但以理解释伊所看见ê异象ê意思。

第15到16节,但以理因为看见异象而感觉「烦恼,非常不安」,因为án-ne伊请坐tī宝座前ê「一个侍从」为伊解释所看见ê一切。

第17到18节,chit两节是chit-ê侍从为但以理解释伊所看见ê异象。

这「四头兽」表示四个teh beh兴起ê四个帝国,这是teh指巴比伦、米底亚、波斯、希腊等。Chit位侍从天使续落来讲上帝ê子民会成做kui个世界ê中心,领导所有ê国家、民族、人民归向上帝。

第19到20节,但以理向这为侍从天使表示伊想beh koh khah清楚有关「第四头巨兽ê事」,因为chit只怪兽竟然有十个角,而且tī chiah-ê角中会koh发出另外一个小角,然后chit-ê小角会kā另外ê角拔掉三个。Chit种怪兽到底beh说明ê是甚么?tī chit只怪兽ê身上有非常尖锐ê嘴齿,mā有真坚硬ê脚够额践踏hō͘伊咬伤ê对象。Chit-ê「小角有目睭kah讲大话ê嘴巴,显得比其他ê角koh khah惊人」。作者无明讲chit-ê「角」就是安提阿哥四世,真可能就是hit时tú好就是伊用残酷ê手路teh迫害犹太人,hō͘作者无法度明讲。

第21到22节,重点就tī chit两节,因为chit两节提起chit-ê小角kah上帝ê子民phah起仗来,这真清楚表示出chit-ê角已经m̄是一般ê角,却是会相战ê「角」,因为án-ne,thang明白作者是用「角」来形容á是teh代表「国家」。M̄-koh却看tio̍h chit-ê小角并无虚弱,敢kah上帝ê子民相战,而且战赢。只有强盛ê国家、民族chiah会有chit种企图心。M̄-koh作者强调上帝一定会伸手出来拯救他ê子民,会出来帮助他受屈ê子民,为他ê子民伸张正义。

第23节,侍从天使讲「第四头巨兽」就是「第四个帝国」,其实这是teh指希腊帝国,mā就是亚历山大大帝所建立ê。这希腊帝国kah其他帝国无仝ê所在,包括它ê武力强大,ē-tàng并吞全世界,mā有能力蹂躏、粉碎全地。

第24到25节,chia指出后来兴起ê chit-ê王真厉害,伊推翻了十个王中ê三个,而且是jú来jú有力量,mā因为án-ne敢用狂妄ê话藐视至高ê上帝。Chit-ê新出来ê王,就是头前所讲ê安提阿哥四世。其实chit本经册主要目的就是teh述说chit-ê以残酷手段逼害犹太人ê王,会遇tio̍h上帝严厉ê惩罚,因为án-ne,tùi第26到27节就是beh解释上帝怎样用他奇异ê手惩罚chit-ê嚣张ê王,并且永远消灭伊。

值得注意ê是tī第25节提起安提阿哥四世会统治耶路撒冷长到「三年半」ê时间。就是tùi主前167年6月到主前164年12月,前后就是三年半久。

第26到27节,chit两节ē-sái讲是但以理书作者写chit本册ê主要用意,就是beh hō͘所有当时tī困境中ê人民知影,上帝一定会替他ê子民伸冤,他一定会「审判」这嚣张狂傲ê统治者,并且beh「彻底消灭伊」。然后上帝beh hō͘他ê「子民接收世界各国ê大权」,并且hō͘ in永远统治全世界,chit对苦难中ê上帝子民来讲是一件真ē-tàng鼓舞人ê信息。

第28节,但以理听tio̍h chit种解释了后,忽然感觉「非常惊惶,面色苍白」,m̄-koh伊kā tùi侍从天使所诠释ê异象ê意思「lóng存在心内」。


经文:

但以理书 8:1-8:14

注释:

Tùi第八章开始,koh恢复到像头前第二章4节以前,用希伯来文写。原本tùi第二章4节直到第七章28节chit段lóng是用亚兰文写做ê。会用chit种文字写ê原因,真有可能是作者引用ê资料来源chē为亚兰文ê作品有关系。Mā有另外一种可能性,就是会分别用亚兰文kah希伯来文写chit本经册,是因为这两部分ê作者并无相仝,然后编者kā它编撰做伙,主要是kah主前第二世纪中叶安提阿哥四世统治之下ê犹太人所受之苦oh得有密切关系。特别是tùi第七章以后,直到第十二章,lóng是kah chit种背景有关连。第八章koh khah清楚thang看出当时历史ê脉络,因为chit章写出犹太人被欺压ê景况。因为án-ne,第七到八chit两章lóng是teh写同仝款ê事件,只是所用文字kah笔调大无相仝。

    Chit段经文是但以理第二pái看见异象,而这异象内容真亲像第七章所提起ê仝款,只是chia是用公绵羊kah公山羊当做异象ê内容,说明公山羊欺负公绵羊,而且是jú来jú骄傲,力量mā jú来jú大,大到ē-tàng攻击天军kah星辰,m̄-nā án-ne,iáu敢公然地对抗天军统帅,mā毁坏了圣殿。Á chit种情形却会继续长到一千一百五十工之久,chit段时间内,圣殿因为无人去献祭而荒废à。

第1到2节,chia讲时间是tī「伯沙撒在位ê第三年」,he就是tī主前550年到549年之间。M̄-koh头前有提过,作者注重ê并m̄是teh述说史实,却是teh取历史背景讲述伊hit时代发生ê事。虽然chia讲是第二个异象,而第七章1节提起ê异象是第一个,真容易掠做是第八章ê异象是接连tī第七章了后发生ê。不过,头前已经提起过,这是仝一个件异象,只是以无仝ê方式描述而已,因为án-ne,thang讲这并m̄是第二个异象。Tī第七章讲但以理看tio̍h ê异象是发生tī巴比伦,现在soah讲异象出现ê地点是tī「以拦省ê书珊城」ê「乌莱河边」。以拦,这是波斯帝国ê首府,书珊城则以拦ê省会。乌莱河则tī城ê东边。

第3到4节,这是但以理所看tio̍h异象ê描述。Chia提起有只公绵羊,它ê气力真大,无任何足以抵挡chit只公绵羊ê气力,它力大到ē-tàng向三个无仝ê方向撞去,无任何动物ē-tàng逃脱它ê势力范围,「它欢喜怎样就怎样,jú来jú猖狂。」chit句话ē-sái讲是对这公绵羊siōng重要ê描述。

第5到7节,chit段经文讲但以理看tio̍h ê异象是:tú-teh想所看见chìn前hit只公绵羊猛力撞向四方ê时chūn,却忽然出现另外一只公山羊出现,它ê速度非常紧,是快到「脚bē-tio̍h地」,它朝向hit只公绵羊「猛冲过去」,它有真大ê气力,比chìn前ê hit只公绵羊koh khah大,kā公绵羊撞倒tī土脚,「无人ē-tàng救它」。照第21节ê解释,chit只忽然出现ê公山羊是teh指希腊帝国。

波斯帝国是tī主前538年取代了巴比伦帝国,而巴比伦帝国则tī经过两百年统治了后,mā就是tī主前336年被亚历山大大帝所灭,希腊帝国因为án-ne建立。

    第8节:chit段经文提起chit只凶猛ê公山羊也kah头前hit只公绵羊仝款,当家己有能力了后就开始狂傲起来,而且是「jú来jú狂傲」。M̄-koh它怎样想mā想bē到它ê「角」会断à。Chia是teh指希腊亚力山大大帝忽然tī主前323年破病过身,因为无kiáⁿthang继承伊ê王位,因为án-ne伊死后帝国分裂做做四个区域,就是马其顿kah希腊由迦掖得(Cassander)统治;埃及chit-ê地区由多利买将军(Ptolemy)统治;叙利亚由西流古将军统治(Seleucus);小亚细亚地区则由利新马可(Lysimachus)统治。这mā就是chit节所讲ê,chit四个角发出来了后,「各指向无仝ê方向」,因为in lóng各据一方,发展家己ê版图kah势力范围。

    角,这Tī圣经中不时用来表示能力、权威ê意思。

    第9到12节所提起ê tī chiah-ê角中间ê一角koh长出一个小角」,chit种讲法ná亲像第七章8节所提起ê,Tī十个角中间「长出另外一个小角」仝款。Chia特别指出chit-ê新长出来ê小角真有能力,m̄-nā向南方、东方伸展,koh khah重要ê是它伸向了「美好之地」,扩张了它ê势力,而且强大到够额第十节所讲ê「Kā一kóa天军kah星辰摔倒tī土脚,并践踏in。」chia所讲ê「美好之地」,是teh指巴勒斯坦ê以色列人民khiā起之地(参考耶利米书三:19)。Chia讲这长出来ê小角mā是真狂傲,力量强大到「攻击天军kah星辰」,chit句话已经teh暗示这新ê王安提阿哥四世出现,伊用残酷手段对待以色列人民;伊禁止以色列人民tī圣殿献祭,mā为tio̍h beh阻止tī圣殿献祭,伊进行了严厉ê「宗教净化」政策,下令禁止以色列人民守割礼,若被发现,m̄-nā gín-á会hō͘刣死,而且会kā被刣死ê gín-á用索á挂tī母亲ê颔颈上游街示众。M̄-nā án-ne,伊甚至故意kā以色列人民认为无清气ê动物—猪ê血泼洒tī圣殿ê祭坛顶,并kā刣死ê猪tī祭坛上烧化献祭hō͘希腊ê神明「宙斯」。伊同时强迫以色列人民一定tio̍h kah伊仝款,到圣殿去祭拜希腊人ê神明「宙斯」。就án-ne,伊毁坏了圣殿,hō͘人民无法度继续tī圣殿献祭hō͘上帝。有kóa以色列人民为tio̍h求生存,只好顺从安提阿哥四世ê规定,去做无应该做ê事。

第13到14,但以理听见m̄是只有一位天使,却是有几位天使同时出现,而且in之间有对话。In提问第11到12节所提起ê耶路撒冷城kā tú-tio̍h ê景况,甚么时chūn chiah会过去。有一位回答讲「会继续一千一百五十工」。

经文:

但以理书 8:15-8:27

注释:

Chit段经文提起天使加百列出现tī对但以理解释伊所看见ê异象。这异象就是tī说明希腊帝国会发生ê事。

第15到16节,chia讲有一个天使出现,伊就是加百列。这加百列ê天使mā bat出现tī新约路加福音第一章26节,伊受上帝差遣去通知tī拿撒勒ê马利亚,hō͘伊知影圣神kā藉tio̍h伊有娠生落来耶稣基督。现在chit位加百列天使则被差遣beh说明但以理看tio̍h ê异象。

第17节,看见天使反tńg惊惶起来,天使加百列kā但以理讲,伊所看tio̍h ê异象kah「历史ê终局」有关,mā就是希腊帝国ê结局,而这tú好回应了第13节ê一位天使所问ê问题—这会继续jōa久?

第18到19节,但以理真可能是惊惶过度而「会失去知觉」昏倒tī土脚。加百列扶起伊并kā伊讲有关上帝ê愤怒beh惩罚这狂傲ê希腊帝国之结局,意思是希腊帝国会受tio̍h上帝严厉ê审判。

第20到22节,chia说明了第3节kah第5节之公绵羊kah公山羊所代表ê意义,乃是指米底亚kah波斯帝国,以及后来ê希腊帝国。Á第一个王就是亚历山大。这帝国就tī亚力山大往生了后分裂做做为四个国家。

第23到26节,chit段经文lóng是teh描述安提阿哥四世ê面貌;伊是「凶恶」、「诡诈」、「奸巧」、「骄傲」ê君王,mā因为án-ne,伊策划ê事往往顺利成功。表面上看起来,安提阿哥四世kah-ná成功了,m̄-koh伊ê成功、兴旺只不过是暂时性ê而已。作者希望透过chit种方式,hō͘ hiah-ê因为受tio̍h迫害而tī苦难中ê同胞有耐心等待希腊帝国「终局」ê来临。作者tī chia提起安提阿哥四世「beh公然对敌万王之王」,伊想beh扮演上帝,ài人民崇拜伊,认为伊是神。M̄-koh结果是自取灭亡。现在天使加百列特别强调讲但以理所看见ê异象「一定实现」,并且ài伊得「保密」。原因是上帝有家己ê计划,无希望但以理kā chit异象ê含意讲出去。

第27节,chit节讲虽然天使加百列已经说明了,ē-sái讲是但以理á是bē了解,siōng主要原因是chiah-ê神迹奇事á是异象,不时lóng是超出了人性命ê经验之外,而且大大超过人ê理性思考范围所致。

经文:

但以理书 9:1-9:19

注释:

Kā第九章kui章读落来,就会发现第3节了后原本是接上第21节,可能是后来编者加笔添入了第4到20节chit段祈祷文。不过mā有圣经学者认为原本就有一篇祈祷文,是后来编者teh编撰chit本经册ê时,发现仝款有关系耶路撒冷预言ê事(第2节kah第24节),而且lóng kah先知耶利米ê预言有关,因为án-ne,认为kā chit两份资料放做伙会koh khah清楚。M̄-koh无论是甚么款ê看法,lóng有一个共同ê主题:耶路撒冷城会koh一pái复兴。作者主要目的ná亲像头前所讲过ê,beh鼓励mā安慰受难ê犹太同胞。希望chiah-ê话ē-tàng鼓励in有koh khah坚定ê信心,m̄-thang改变心志而弃sak原有ê信仰,上帝一定会伸出援手拯救in脱离苦难。

    Chit段经文是但以理tī灵修ê时,有感tī先知耶利米ê预言以色列人民会koh再被掠到外国去,耶路撒冷会荒废长到七十年时间ê事,禁bē-tiâu一阵悲伤tùi心底油m̄-koh生,因为án-ne,伊向上帝恳切祈求。

    第1节,chia ê「亚哈随鲁」,就是「薛西」(Xerxes)王,伊是tī主前486到465年执政,m̄-koh大流士王并m̄是伊ê kiáⁿ,颠倒ê,应该是大流士一世(DariusI)是亚哈随鲁王ê老父chiah-tio̍h。

第2到3节,chia提起但以理tī灵修ê时,读圣经提起有关先知耶利米ê预言ê tāi-chì,chit段经文thang参考耶利米书第廿五章9到14节,上帝藉tio̍h先知耶利米传出信息,讲犹大人民会tī巴比伦teh过奴隶ê生活长到七十年。伊为tio̍h án-ne事悲伤到禁食、穿麻衣、坐tī尘埃上「恳切地」地向上帝祈祷。

    第4节,tùi chit节开始,是但以理以非常哀伤痛悔ê心teh祈祷,恳切求上帝赦免伊ê同胞所犯ê罪过。Tī这节伊提起两点;一、上帝是信实ê,他「信守」所立ê约。二、上帝有「无变ê疼」。

    第5到6节,但以理tī chit祈祷文中承认家己所犯ê错误,伊提起违背「约」ê主要原因,并m̄是in m̄知á是bē记得,却是故意违背,因为上帝bat派出仆人先知对以色列ê领导者kah全国国民讲话,ē-sái讲是无人想beh听。先知以利亚、耶利米等lóng bat有严厉ê控诉。M̄-nā án-ne,in iáu kā上帝ê仆人刣死(参考列王记上十九:10)。

    第7到8节,tī chit两节中,但以理强调上帝ê作为「头尾公正」,可惜ê是「犹大kah耶路撒冷ê居民」却因为悖逆上帝ê旨意、教导而被异国统治,以色列人民被流放到各国去。拒绝上帝ê话,结果只是「自取其辱」而已。

    第9节,这是真重要ê一节,但以理讲虽然以色列人民悖逆上帝ê旨意,m̄-koh上帝á是仝款以「怜悯」、「赦免」对待以色列人民。

    第10到14节,chit段经文是但以理继续前一段忏悔祈祷文,Tī chit段忏悔祈祷文中,重要是teh表明:

一是表明上帝是公义ê神,他无冤屈人,因为án-ne以色列人民受严厉惩罚乃是罪有应得。
但以理提起耶路撒冷被毁灭,乃是罪有应得,并m̄是冤枉。伊特别提起耶路撒冷城所受tio̍h ê惩罚比任何一个城市受惩罚iáu koh khah严厉,m̄-koh chit种惩罚并无冤枉,却是公义ê上帝确实遵行kah以色列人民之间所立之「约」。

二是即使受tio̍h惩罚,mā坚信上帝ê惩罚是公正ê。Chit点是chit篇祈祷文ê中心内容之一,tī第7节、第14节等等lóng强调上帝ê审判是公正ê。当圣经teh描述上帝是公正ê时,mā有另外一个意思,就是teh指上帝乃是慈悲怜悯ê上帝。

三是虽然án-ne,以色列人民á是无认罪、忏悔。这真清楚teh说明以色列人民确实是心硬、固执。

第15节,但以理koh一pái提起上帝用他「大能」ê手带领以色列人民「出埃及」,chit件事一直是in永远无法度bē记得ê事。M̄-koh以色列人民却头尾无停ê「做pháiⁿ犯罪」。

第16节,但以理mā是tī祈祷中koh一pái恳求上帝息怒。因为上帝ê惩罚已经hō͘附近族群、国家lóng用「轻蔑」ê眼光看待「耶路撒冷」kah以色列人民。

第17到19节,chit三节经文一再重复但以理向上帝祈求「垂听」伊ê祈祷。伊特别提起被毁坏ê耶路撒冷「圣殿」。Tio̍h注意ê是但以理并m̄是teh控诉安提阿哥四世亵渎圣殿ê行踏,却是teh恳求上帝赦免怜悯伊ê以色列同胞,就是因为in ê犯罪,chiah致使in原本看做siōng神圣ê所在mā遇tio̍h仇敌ê亵渎、诋毁in tùi祖先传承落来siōng神圣之地。但以理知影耶路撒冷城遇tio̍h摧毁乃是上帝对以色列民族严厉惩罚ê结果,因为án-ne,伊恳求上帝赦免、息怒,m̄-thang再生气,并且hō͘耶路撒冷城重见光明,thang hō͘圣殿显现出上帝ê荣耀。因为以色列人民若是有完好ê耶路撒冷城,in就ē-tàng重新tī圣殿用隆重ê礼仪来敬拜上帝。Koh讲,但以理祈求上帝施下特别恩典—大怜悯,却m̄是以色列人民有甚么值得o-ló á是值得上帝看做美好ê事。却是如果上帝照他ê公义行审判,必定会为以色列人民带来无法度承受ê重担,甚至kui个民族lóng有可能灭亡。因为án-ne,但以理tī chia提出了恳切地ê哀求,求上帝凭他ê「大怜悯」来接纳以色列犯罪ê同胞。

经文:

但以理书 9:20-9:27

注释:

Tī前一段经文看tio̍h但以理ê祈祷文内容中,伊恳求上帝m̄-thang受气,对以色列人民犯罪ê事恳求上帝息怒。因为耶路撒冷圣殿已经遇tio̍h安提阿哥四世ê亵渎到惨不忍睹。Á耶路撒冷圣殿ê毁坏所代表ê意义,乃是上帝无koh继续kah以色列人民同在,因圣殿所代表ê是上帝临在以色列人民中间。

现在chit段经文siōng主要是记载上帝ê天使加百列来对但以理讲话。Tī第八章bat记载天使加百列奉上帝之命帮助但以理解读伊所看tio̍h ê异象,现在则koh奉命来帮助但以理明白伊所读ê经文中,有关先知耶利米所预言ê「七十年」之事件。比较khah特别ê是,chit段经文并无说明但以理听天使加百列解释了后有甚么回应,这kah一般解梦后ê反应无jōa仝款。

第20到23节,ná亲像头前讲过ê,第20节mā thang续接tī第3节了后,因为án-ne读起来mā是真顺口ê。但以理祈祷中一个重要ê内容,就是「承认」犯罪。就tī伊向上帝祈祷ê时chūn,上帝差派天使加百列以「飞」ê方式,真紧来到但以理ê祈祷中。Chia讲时间是tī「献晚祭」ê时chūn,这大概是tī下晡五点á是六点ê时,通常以色列人民lóng是以日头落山ê时间为准。天使加百列kā但以理讲上帝已经听伊ê祈祷,并且差派伊向但以理解释chìn前提起有关先知耶利米所讲有关「七十年」预言ê事,上帝beh赏赐hō͘但以理有够额ê「智慧」ē-tàng「明白」上帝启示ê预言。

第24到25节,chia讲「七个七十年」,这先注意以色列文化中对数目的看法,in ài用数字来teh代表象徵性ê意义。「七」所代表ê是「神圣ê」、「有福气ê」、「圆满ê」,是含有上帝旨意在内面ê特殊数字,因为kah上帝创造天地完成ê时间有密切关系。Án-ne看起来,tī chia ê「七个七十年」,chia ê「七个」应该是一种表徵「加倍」ê意思,意思是teh指hō͘ in tī七十年ê奴隶生活中「加倍」痛苦。Mā是teh警告以色列人民一定tio̍h透过受掠做奴隶ê痛苦,知影忏悔认罪。若无,kan-taⁿ会为in带来koh khah大ê灾难,延长了上帝惩罚in ê时间,直到in「完全」、「彻底」悔改为止。Chit时上帝beh赦免以色列人民ê罪恶,带kā in赐福「永久ê正义」。然后上帝beh hō͘耶路撒冷城tī经过「七个七年」了后ē-tàng重新建造起来。

第26到27节,chit两节就非常清楚谈起但以理书作者真正想讲ê事loh;因为tī chia所讲ê时间就是伊tī主前第二世纪,mā就是安提阿哥四世ê时代。

第26节一开始提起「过了chit时期」,chit句话一定tio̍h tńg来到第25节最后所提起ê耶路撒冷kā「khiā立七个六十二年」。Tùi主前538年到经过「七个六十二年」,mā就主前104年ê时chūn。

Chia所讲ê「上帝选出来ê领袖会hō͘枉刣」,可能是teh指tī主前171年有一位重要ê大祭司名叫阿尼亚三世(Onias ṲI),伊ê兄弟耶孙(Jason)用钱o͘-se统治者,夺取伊ê大祭司ê职位,并使弄人kā伊刣死(参考马加比传下四:7—8、33—38)。Chia mā提起耶路撒冷城kah圣殿「会hō͘一个王侯ê入侵军队所摧毁」,这是teh指主前168年,安提阿哥四世带兵进入耶路撒冷城,劫掠了圣殿所有ê贵重器物,并tī圣殿ê祭坛顶刣猪。Á「结局kā像大水冲来」,thang想像ê到大水冲来了后,就是一无所有,koh khah sêng是毁灭一般,m̄-nā是财产被毁,性命mā lóng会遭遇到极大ê损伤。

Chia mā提起「缔结盟约七年」,这是安提阿哥四世当皇帝ê时间。Chit句话里是teh谴责一kóa弃sak家己同胞ê犹太人,当安提阿哥四世掌权了后发生ê事。根据「次经—马加比传上」第一章11到15节ê记载有以色列人民kah统治者勾结,鼓励同胞接受安提阿哥四世严厉推行ê「希腊化」。M̄-nā án-ne,in mā拒绝koh再接受祖先kah上帝之间立约ê记号—割礼。

Chit节ê「ná毁灭性ê thang憎ê物」chit句话,tī第十一章31节koh一pái提起,chit句话mā被耶稣基督引用来形容末日来临ê景象,并且提醒大家tī大灾难发生ê时,tio̍h注意防范ê方向。

Chit句「ná毁灭性ê thang憎ê物」就是tī指安提阿哥四世是亵渎圣殿神圣ê人,伊kā希腊神像khǹg tī圣殿ê至圣所中。上帝ê愤怒绝对bē罢休,一定会惩罚伊,直到伊死亡为止,这神像chiah会被移行。

经文:

但以理书 10:1-11:1

注释:

但以理书tùi第十章到第十二章lóng是kah异象有关,而且chiah-ê异象ê信息是直接tùi上帝来ê启示。Á第十章ná亲像踏话头,第十一章则有关启示ê内容,而第十二章是有关这启示ê结语,同时mā是但以理chit本经册ê结论—上帝chiah是真正性命之主。

	头前已经有提起过,但以理书并m̄是beh写历史,却是藉用历史背景写作者hit时代ê事件,chit-ê认bat真重要。另外一点,虽然是藉用历史背景,作者mā无照历史年代ê顺序编排,而chit点通常mā lóng是圣经作者欢喜ê笔法,因为án-ne chiah bē teh迫害ê时代,被当时ê统治者发现而遇tio̍h迫害á是杀害。

    第1节,「塞鲁士做波斯王ê第三年」,塞鲁士是波斯帝国ê开国皇帝,伊tī主前538年phah败巴比伦帝国,并且取代了巴比伦帝国统治下ê所有地区。因为án-ne,chia讲「第三年」,应该是teh指主前535年。Chia讲但以理看见异象,致使伊「真oh了解」。

第2到3节,因为异象真令但以理惊恐,ná亲像伊过去看tio̍h ê异象仝款,mā是深感恐慌kah不安(参考七:15、28)。伊悲伤了「三个礼拜」ê时间,用一种灵修ê方式,食真简单ê食物,无整理仪容,表示心内ê哀伤。

第4到6节,chia ê「正月」,是teh指以色列人民ê「亚笔月」,是teh指Pôaⁿ过节ê节日。但以理koh一pái看tio̍h ê异象,chit-ê异象显然无像是一般人,比较khah接近天使ê模样。「细麻纱」,这是当时siōng真贵、高级ê布料,而其中siōng出名ê产品就是埃及手工织品。身上ná亲像「宝石发光,面孔像sìh-nà发亮」等,chiah-ê记载lóng是teh说明天使代表上帝来临。

第7到10节,chia并无记载kah但以理同在同齐ê人到底有几个人,á是chiah-ê人是甚么人?只记载讲看见异象ê人,只有但以理一个人,其他ê人可能是因为发现但以理teh看见异象了后「面色大变」,lóng因为án-ne而「lóng非常恐慌,逃走bih起来」。但以理看tio̍h异象了后,是「坦覆 (thán-phak)tī土脚,会失去知觉」。M̄-koh,就tī chit-ê时chūn,chit-ê异象中ê天使忽然用手扶tio̍h但以理。M̄-koh伊á是感觉惊惶而「全pi̍h-pi̍h-chhoah」。

第11节,chit节thang对照第九章23节,天使加百列bat kā但以理讲,上帝垂听伊ê祈祷。Chit位受上帝差派来ê天使mā是讲因为「上帝非常欢喜」但以理,因为án-ne,现在beh传达上帝ê信息hō͘伊。

第12节,「mài惊」,chit句话不时出现tī天使对人讲ê话(参考路加福音一:30、二:10,马太福音廿八:5,马可福音十六:6)。Chia讲但以理一开始祈祷,因为伊真「谦卑」,所以上帝垂听伊ê祈祷,chit对但以理来讲是一个真大ê鼓励。

第13到14节,真奇怪ê一节,并无啥容易明白为甚么上帝ê天使会tú-tio̍h「波斯ê护国天使拦阻」伊,而且是tī「天使长米迦勒」帮助下,chiah ē-tàng来到但以理chia。原来古早时圣经作者有chit种观点,认为每一个人ê身上lóng有一位天使teh保护tio̍h,mā同时teh记录tio̍h人生活中ê各种言行举止(参考马太福音十八:10)。仝款ê,tī每一个民族、国家内,mā lóng有上帝派ê守护天使(参考约书亚记五:14,撒迦利亚书一:7—12)。M̄-koh上帝特别恩待以色列民族,差派天使长米迦勒做以色列人民ê守护天使。因为án-ne,当chiah-ê民族á是国家tú-tio̍h了危险ê时,chiah-ê守护ê天使就有责任起来保护伊守护ê对象。

Chia讲波斯ê守护天使无想beh hō͘加百列去传达这美好ê消息,为tio̍h án-ne,hō͘ chit位但以理ê天使费尽了长到三个礼拜ê时间kah伊争斗,后来得tio̍h守护以色列ê天使长米迦勒帮助chiah ē-tàng解脱。

    第15到17节,但以理对chit位天使讲,看tio̍h异象ê时已经惊惶到讲不出话来,现在是天使摸了它ê嘴唇,chiah开启了伊讲话ê能力。M̄-koh伊á是有表示家己ê软弱无力。

    第18节,chit位天使听了后,koh一pái伸手「扶」但以理,hō͘伊「恢复了气力」,加添了伊ê气力。

第19节,chit位天使koh一pái用鼓励ê话hō͘但以理知影,上帝确实「非常欢喜」伊,ài伊「坚强」起来。就tī chit时chūn,但以理kā天使讲,伊ê气力恢复à,thang kā上帝ê信息传hō͘伊。

第20到第十一章1节,chit位天使kā但以理讲,伊带来上帝ê信息hō͘伊,并且讲beh kā chit写tī「真理册」上ê信息启示hō͘但以理明白。所谓「真理册」,指ê就是「性命册」上ê事,这性命册是记载人类ê所行所讲。这mā thang讲是上帝ê「计画册」。续落来,chit位天使kā但以理讲,伊tio̍h赶紧tńg去「kah波斯ê护国天使作战」,续落来就是「希腊ê护国天使beh出现」,表示波斯帝国kā结束伊统治时代,换做是希腊帝国来临。M̄-koh天使长米迦勒会继续守护tio̍h以色列民族。

经文:

但以理书 11:2-11:20

注释:

Chit章开始真清晰地指出背景就是希腊帝国时代ê景况。事(tāi)先是说明tī安提阿哥三世ê时代背景。作者主要teh说明一件事:上帝必定会为他ê子民伸冤,mā会审判欺压他子民ê仇敌,一定会拯救他ê子民脱离被迫害而受苦难ê日子。
	
Kah其他ê先知文献有一个仝款ê所在,就是作者一再努力beh hō͘以色列人知影,上帝会拯救以色列人。虽然统治者真有权势,mā有够额ê财力thang蓄养真chē精良ê部队,m̄-koh chiah-ê lóng无法度抵挡上帝愤怒ê惩罚,因为上帝绝对bē hō͘伊ê子民永远生活Tī痛苦ê境遇中,他一定会伸出援手帮助他ê子民脱离迫害者ê手。人siōng大ê毛病,lóng是将军事武力当做siōng好ê武器,不时会用它来威胁、甚至是挟持伊邦异族ài in听从顺服,m̄-koh m̄-thang bē记得,真正力量m̄是tī chiah-ê,却是tī上帝。类似chit种信息tī先知文献中非常丰富,只要上帝出手,人即使有siōng精良ê科技武器mā是枉然(参考诗篇三十三:13—22)。

圣经ê作者hō͘咱一个明确ê指标:无论是一个人、民族á是国家,若beh期待上帝ê拯救,siōng基本ê前提就是beh tńg来到上帝ê面前,承认上帝就是咱性命ê主宰,chit种社会、民族、国家chiah有希望。

第十一章谈起希腊帝国ê历史,thang成两个部分,其一就是第2到20节,主要teh说明安提阿哥三世ê兴起kah没落,以及第二部分tùi第21节到45节有关安提阿哥四世ê故事。

Chit段经文是记载希腊皇帝安提阿哥三世治理时代ê情形。

第2节,chit位天使讲ài kā「真实」ê话kā但以理讲。Chit-ê意思就是讲:这是上帝beh天使转达ê信息,虚假bē-tàng。天使是上帝ê仆人,bē-tàng违背上帝ê旨意乱讲话。

Chit节讲波斯以后iáu有「三个王beh统治,以后iáu有第四个王」。其实在历史上并无所讲ê第四个王国,tī波斯开国之王塞鲁士统治了后,koh来就是「大流士」一世(Darius I)、「亚达薛西」(Artaxerxes)。若讲有第四个王,真可能就是teh指「薛西一世」(Xerxes I)。Á chit位「薛西一世」大约是tī主前486到465年统治波斯帝国。Tī伊统治之下ê波斯帝国ē-sái讲是个黄金时代,mā因为án-ne,hō͘伊兴起beh攻打希腊帝国ê念头。Tī主前480年伊真正兴兵去出征,m̄-koh无想tio̍h会失败。这就是此节所提起ê「伊beh向希腊国挑战」。

第3到4节,「有一个勇猛ê王会出现」,这是teh指亚历山大大帝,伊mā是希腊帝国ê开拓者,伊统治ê时间并无长,是tùi主前336年到323年,只有十三年时间,to̍h是因为破病而往生。伊往生ê时chūn,mā是正当伊ê统治大业达到「siōng高峰ê时chūn」。M̄-koh无人会料想ê到伊会tī chit-ê时chūn往生。Mā因为án-ne希腊帝国就「分裂」成四个部分,chit点tī第七章4到7节中有提起但以理看tio̍h一个异象,讲有「四头巨兽tùi海里起来」,所指ê就是希腊帝国tī亚历山大大帝了后分裂ê景况。因为亚历山大大帝并无kiáⁿ「伊ê王国kā由别人统治」。

第5节,chia提起「埃及王」,是teh指多利买王(Ptolemy),伊控制埃及kah巴勒斯坦地区。M̄-koh有另外一位将领是控制巴比伦kah叙利亚地区,这就是西流古一世(Seleucs I)。In两位原本是好朋友,因为西流古一世tī主前316年为tio̍h逃避叙利亚总督安提格奴(Antigonus)ê追杀而到埃及去避难,得tio̍h 多利买ê庇护,伊就效忠于多利买王。并且得tio̍h 多利买王ê支持,出兵phah败并刣死了安提格奴,而重新控制了叙利亚,mā成做希腊帝国tī亚历山大大帝了后一位杰出ê领袖。

第6节,主前250年,多利买二世想利用家己ê cha-bó͘-kiáⁿ贝尼丝(Berenice)当做筹码嫁hō͘安提阿哥二世,并且附上真chē真贵ê陪嫁品,藉机想beh扩张领土版图,而条件是安提阿哥二世一定tio̍h kah原配夫人拉欧迪丝(Laodice)离婚,而且iáu koh khah废除拉欧迪丝kah伊生ê gín-á王储ê地位。为tio̍h chit件事,拉欧迪丝非常愤怒,伊串连效忠于伊ê将领一直teh chhōe机会报复。

当多利买二世tú-teh陶醉家己ê策略成功ê时,四年后忽然往生。就tī伊往生了后,贝尼丝因为tī婚姻生活上并无hō͘安提阿哥二世感觉满意,就án-ne安提阿哥二世趁此机会kā贝尼丝hō͘废掉,然后koh一pái kā原配夫人拉欧迪丝chhōa tńg来王宫。伊一入宫就进行报复行动,kā贝尼丝kah伊kah安提阿哥二世所生ê gín-á刣死,mā刣死贝尼丝ê tùi仆,并且设法毒死伊ê丈夫安提阿哥二世泄恨。

第7到8节,贝尼丝ê兄哥继承老父ê王位,kā它称做多利买三世。伊bat利用安提阿哥二世宫廷内chit种家族斗争ê时,趁机会出兵替家己ê小妹报复。沿途路过杀戮真chē,攻落ê城市bē少。Kā chiah-ê城市ê「神像kah神殿里ê金器银器lóng带tńg来埃及」,丰富了埃及ê国库「过了几年ê太平日子」。

第9节,「叙利亚王」安提阿哥三世继承王位了后,真想重振国势,造成埃及极大ê威胁。

第10到12节,「叙利亚ê众王子」中ê「一个王子」,指ê就是安提阿哥三世(Antiochus ṲI, 223〜187 BC),真想beh koh再攻打埃及,因为án-ne积极准备,除了招募佣兵之外,mā囤积真chē粮食。然后tī主前219年对埃及作战,作者讲伊ê军队势如破竹般ê勇猛,kā埃及ê军队phah得落花流水,mā夺回了原本失去ê巴勒斯坦大片土地。M̄-koh却tī主前217年,koh一pái攻打埃及军队tī 拉飞尔(Raphia)ê时,却被埃及国王多利买四世phah败。Mā因为chit pái埃及战胜,hō͘埃及军队俘虏获真chē军队、战利品,kah收tńg来失土。可惜伊并无趁胜追击,hō͘安提阿哥三世有机会养精蓄锐,koh一pái整军备武等待机会beh倒抛。

    第13到16节,chit段经文koh一pái描写埃及kah叙利亚之间ê战役,chia讲安提阿哥三世经过了长到十四年ê准备,伊徵集koh khah chē ê军队beh攻打埃及。就tī主前205年,埃及王多利买四世往生王位由只有五岁大ê 多利买五世继承,伊根本无法度料理国事,只有ē-tàng由别人来摄政辅佐。安提阿哥三世认为机会难得,就tī主前203年,联合马其顿王飞利普ê军队,kah埃及ê军队开战,双方军队tī巴尼亚斯(Paneas)交锋。Á犹太人中间,有人为tio̍h个人ê利益,支持并赞助了安提阿哥三世攻打埃及。安提阿哥三世此举m̄-nā kā埃及ê军队逼退,mā收复了kui个巴勒斯坦地区。M̄-koh原本参与协助安提阿哥三世对抗埃及ê hiah-ê犹太人认为会为家己ê同胞á是家乡带来安稳、自治ê机会,可惜事kah愿望相违背,因为tī第16节真清楚写出,安提阿哥三世带hō͘巴勒斯坦ê,竟然是「横行无忌,无人ē-tàng抵抗」,安提阿哥三世并无感谢犹太人支持伊,反tńg虐待khiā起tī巴勒斯坦ê犹太人。

第17到19节,叙利亚安提阿哥三世虽然伊phah败埃及ê军队,mā占领了巴勒斯坦地区,m̄-koh继续扩张国家版图ê心愿却从来无一丝á减少。主前197年安提阿哥三世kā家己ê cha-bó͘-kiáⁿ克丽帕狄雅(Cleopatra)嫁hō͘埃及王多利买五世。M̄-koh伊ê cha-bó͘-kiáⁿ竟然怂恿家己ê丈夫多利买五世kah罗马联盟共同抵抗家己ê祖国叙利亚。这就是第17节所提起ê,安提阿哥三世ê计划「对伊无好处」ê原因。虽然án-ne,安提阿哥三世á是积极地前后tī主前196年到192年间攻落一kóa城镇,同时占领了马其顿ê几个地区。Chit种扩张版图ê举动当然会引起罗马帝国kah临近国家ê giâu疑。主前191年,马其顿得tio̍h罗马ê支援,tī特摩派里(Themopylae)phah败安提阿哥三世ê军队。隔年,罗马ê将军西比欧(Lucius Cinosephale Scipio)koh率兵kah之对抗,安提阿哥三世ê军队惨败,只好撤退tńg来叙利亚,m̄-koh mā付出极大ê代价,就是beh割地赔款。

第20节,chit-ê起来继承安提阿哥三世ê王位者,就是伊ê kiáⁿ非罗巴达,mā就是所谓西流古四世(Seleucus IV Philiopator)。伊并m̄是一个聪明有智慧ê君王,可能因为受tio̍h老父一定tio̍h赔款hō͘罗马帝国ê影响,因为án-ne伊只知影「欺压人民,横征暴敛,为tio̍h beh增加王国ê财富」。伊ē-sái讲是一位昏庸ê统治者,根本就无算是甚么治国理想kah远见。Chit节讲伊统治「无久伊就会hō͘刣」。这就是chit节所讲ê伊「m̄是死tī战争」ê原因。


经文:

但以理书 11:21-11:45

注释:

前段部分teh绍介希腊统治者安提阿哥四世窜起ê经过,后段部分teh绍介伊ê政权会毁灭ê原因。

历史是一面镜子,自古以来,人类siōng残酷ê行为,就是想透过战争解决国家、民族之间ê争端,mā想用武力ê方式,hō͘对方降服。M̄-koh从来无一个国家、民族,是用武力ē-tàng hō͘对方心服口服,反tńg kan-taⁿ会加添仇恨而已。

	第21节,chia讲「有一个邪恶ê人」,chit-ê人就是teh指安提阿哥四世。伊tī听tio̍h兄哥西流古四世(Seleucus IV Philiopator)被刣死后,赶紧tùi罗马赶tńg来。无想tio̍h伊ê财政大臣希流多路(Heliodorus)深惊安提阿哥四世tńg来夺取王权,就án-ne伙同部下设计beh kā它刣死,想beh拥护西流古四世尚且年轻ê kiáⁿ继位,án-ne伊就ē-tàng成做辅佐国王ê大臣掌控大权。M̄-koh却无想tio̍h chit时安提阿哥四世tú好tùi罗马赶tńg来。伊表示ē-tàng辅佐家己ê侄á,然后就「乘人不备」刣死了侄á,夺取了「政权」。

	第22到24节,安提阿哥四世是一个真有心思谋略ê人,伊想tio̍h原本忠于兄哥西流古四世ê旧臣会不安kah不满,因为án-ne积极地布局,以ta̍k个击破ê方式,甚至包括「上帝ê大祭司在内」,chit位大祭司就是teh指阿尼亚三世(Onias ṲI),因为伊并无听从安提阿哥四世ê指挥,坚持不配合推动巴勒斯坦地区希腊化政策而被废除大祭司ê职务,而安提阿哥四世接受阿尼亚三世ê兄弟耶孙(Jason)ê o͘-se hō͘耶孙继承大祭司ê职务(参考九:26)。另外一方面,伊mā积极giú lóng埃及,因为当时埃及王室ê政权bē稳,亟需kah希腊修好,安提阿哥四世就利用chit-ê机会kah埃及外交订定ê安全协防关系,巧真有技巧来 巧夺取了真chē原本属tī埃及ê巴勒斯坦地区,就是第24节所提起ê「siōng富庶ê省份」。Mā因为án-ne,造成以色列人民koh khah大ê伤害。

    第25到28节,表面上安提阿哥四世是kah埃及联盟,m̄-koh并m̄是甚么安全联盟,却是为tio̍h beh养精蓄锐,准备tī有机会ê时去攻打。主前170年伊出兵埃及,以雄厚ê军队入侵埃及,埃及军队死亡惨重,国王多利买六世逃亡。安提阿哥四世就án-ne kā埃及纳入了伊管辖ê范围。Tī主前169年,伊带胜利ê军队班师回朝路经耶路撒冷ê时chūn,开入城里到圣殿去搜刮了所有ê财宝,掠夺了圣殿中所有ê金器、银器,并且屠杀了真chē维护圣殿神圣ê祭司、法利赛人,这就是第28节所提起ê内容(thang参考次经—马加比传上一:20—25)。

第29到30节,安提阿哥四世顶pái chiah大败埃及,mā搜刮了耶路撒冷圣殿所有ê宝贵器物,taⁿ koh kā koh一pái出兵埃及。主前168年,伊koh一pái带兵出征埃及。无想tio̍h chit pái罗马帝国决定出兵帮助埃及。Chia提起「基提人ê舰队」指ê就是罗马人。Mā tùi chia thang看tio̍h主前168年代,罗马ê海军已经ē-tàng真有效率运载大军对敌希腊军队,并且开始进入欧洲ê其它地区。当安提阿哥四世chit pái因罗马军队而折tńg去ê时,伊听取一kóa幕僚ê建议,认为tio̍h beh彻底改变犹太人ê宗教信仰,chiah ē-tàng hō͘犹太人kah伊族人完全混合,增加伊统治ê能力。

第31节,安提阿哥四世派军「亵渎圣殿」,所谓「毁灭性ê thang憎ê物」chit句话(参考八:13—14、九:27节),指ê就是安提阿哥四世故意进入耶路撒冷圣殿,kā猪tī圣殿里刣死,并且kā猪血hiù tī至圣所ê祭坛ê四个角,然后kā猪献祭tī祭坛上。伊放纵部队四界掠夺、强暴妇女等等恶质行踏lóng hō͘人发指。M̄-nā禁止犹太人进入圣殿献祭,甚至iáu tī圣殿ê至圣所内khiā立宙斯ê神像,然后koh强迫犹太人一定tio̍h向宙斯神像献祭,hō͘ in ê心灵受创甚重。

第32到35节,chit段经文中提起有kóa犹太人「忠心跟tòe上帝」,in「起来反抗」。Mā有「民间明智ê众领袖会教导平民,hō͘ in明白」,chia所提起ê「民间明智领袖」,就是teh指马加比家族,后来in率领以色列人民起来反抗。Mā因为chit种反抗,付出ê伤亡代价mā非常高,有ê「战死、被火烧死、被抢夺,á是俘虏」,mā有ê村落、家族被「屠杀」,mā有「明智ê领袖会hō͘杀害」等,chiah-ê lóng是为tio̍h抵抗安提阿哥四世而付出惨痛ê代价。作者强调chiah-ê带头起来反抗安提阿哥四世ê人是牺牲,m̄-koh in英勇ê作为就成做「洗荡」人民心灵siōng好ê效果,hō͘人民tī信仰上thang「纯洁」,走chhōe上帝ê帮助、带领。

    第36到39节,安提阿哥四世傲慢ê态度猖狂到家己认为「比任何神明伟大,甚至高过万神之神—上帝」。伊去「拜祖先无拜过ê ná守护堡垒ê战神」,mā利用「信奉异教神明ê军队防守伊ê堡垒」,然后用犒赏厚禄ê方式买收顺服伊ê军队指挥官。   
                                                                                                                          
第40到41节,但以理书ê作者持守tio̍h一个明确ê思路:狂傲ê人结局会hō͘上帝所歼灭。Chia提起埃及koh一pái出兵来攻打安提阿哥四世,而且是倾巢而出。安提阿哥四世为tio̍h beh对付埃及ê大军,kui气将军队带入巴勒斯坦,利用过境耶路撒冷ê时chūn,koh一pái掠夺耶路撒冷,chit pái ê路过所造成ê耶路撒冷城之损伤,大大超过以前ê任何一个时刻。有「成千上万ê人」被安提阿哥四世所刣。主要原因就是伊koh一pái进入圣殿搜刮一切财物、器皿。M̄-koh chia提起「以东、摩押、亚扪」等三个族群ê人ē-tàng逃脱。

第42到45节,埃及并无战胜,m̄-koh,真chē「珍藏ê金银财宝kah其他贵重ê物件」lóng hông掠夺而去。安提阿哥mā听tio̍h真chē「tùi东方kah北方」传来对敌伊ê军事行动,hō͘伊koh khah受气,就tī大受气之下「刣尽灭绝真chē人」,tùi chia thang看出伊手段ê残忍。M̄-koh上帝决定beh除掉伊。Tī主前163年,安提阿哥四世忽然间生了一场不明ê病,结果死tī伊征战途中ê波斯塔贝城(Tabae)。

经文:

但以理书 12:1-12:13

注释:

读但以理书会发现chit本经册中有真chē「异象」,tī chiah-ê「异象」ê背后,lóng有作者beh探讨真chē ê社会问题,尤其是统治者对当时以色列人民逼ê事件,致使以色列人民生活tī非常痛苦中。但以理书ê作者用「异象」ê方式来鼓励伊ê以色列同胞,ài in以勇敢、坚定ê信心仰望上帝ê救恩。伊深信上帝必定会为他ê子民伸冤,受tio̍h逼ê上帝子民必定会得tio̍h拯救。Chit种信息对当时正Tī痛苦中ê以色列同胞来讲,确实有真大ê鼓舞作用。

	但以理书ê作者teh kā伊讲hit-ê主前第二世纪时代,tī希腊安提阿哥四世极尽残酷ê统治之下m̄-thang放弃信仰,tio̍h相信上帝必定会审判。虽然有真chē以色列人放弃原有ê信仰,跟tòe安提阿哥四世ê命令去拜宙斯神明,mā有人开始放弃家己以色列人ê身分,kā家己彻底改变成做希腊公民,teh过kah希腊人仝款ê生活。但以理书ê作者beh鼓励hiah-ê iáu未放弃信仰ê以色列同胞,m̄-thang放弃原有成做一位上帝选民ê荣耀。

第1到2节,chia讲守护以色列民族ê是「天使长米迦勒」,伊beh出现tī in中间,注意chia用了一个真重要ê词「hit时」,这是teh指上帝审判ê时刻。但以理书ê特色是,并m̄是由但以理扮演先知ê角色讲出上帝beh惩罚ê时间,却是由天使亲自kā但以理讲。Chia讲会出现「立国以来siōng大ê灾难」,可惜chia并无说明清楚到底是怎样ê大灾难,只有讲这大灾难ê情况乃是空前ê。有时灾难是tùi上帝来ê惩罚,m̄-koh有koh khah chē ê灾难乃是因为人类犯罪引起ê结果。Chia所指ê灾难,乃是安提阿哥四世对犹太人迫害所带来ê,m̄-koh上帝并无会袖手旁观,hō͘ chit种灾难无辜地延续落去,上帝必定会施行拯救。

Chia mā提起hiah-ê名「登记tī性命册上ê,lóng会得tio̍h拯救」。圣经有kúi-nā个地方lóng提起有关性命册ê事。亲像:诗篇第六十九篇28节;腓立比书第四章3节;启示录第三章5节等等。以色列人民自古以来就有天使kah性命册ê观念,认为一个人出世了后,天顶就有一位专门负责看顾chit-ê人ê天使,会记录落来伊所看顾ê chit-ê人ê言行举止,来当做上帝审判ê根据。

Koh讲,但以理书作者mā提起真重要ê一件事:真chē已故ê人会koh活。Koh活chit-ê概念tī旧约圣经中真少提起,除了chia,tī以赛亚书第廿六章14节mā有记载。作者认为hiah-ê tī性命册上有名ê人m̄-nā是koh活,iáu会享受永恒ê性命,相对ê,tī性命册上chhōe bē-tio̍h名ê人,kā永远受尽侮辱。

第3节,chit节是为第2节ê享受永恒性命ê人进一步提起享受chit项福气者,乃是「明智ê领袖」kah「教导gōa人秉公行义」ê人。所谓「明智ê人」,乃是对上帝永远忠心,bē改变心志,即使tī siōng艰困ê时chūn,mā持守tio̍h上帝ê旨意者。Á「教导chē-chē人秉公行义」者,是teh指hiah-ê遵行上帝ê教示者,bē因为受tio̍h迫害就改变应该遵守ê规律。Chit两种人lóng是作者所khah强调tī性命册上留有名ê人。Chit种人,会像天顶ê星辰仝款,永远发出光芒。

第4节,真清楚看tio̍h「世界ê末日」,而末日kah审判lóng是相连结ê。另外一方面,谈起末日ê tāi-chì ê时,往往是非常奥秘ê,因为末日ê事并m̄是一般人ê智慧thang明白,ná乃是上帝beh施行审判ê作为,而上帝ài怎样进行他公义ê审判,人ê智慧无法度理解,因为án-ne,除非有上帝亲自启示,若无,无法度óa靠人ê知识明白。天使ài但以理kā「chit卷合起来,加上封印,一直到世界ê末日」,表示这是只有tī审判者同意下chiah ē-tàng看ê册。

第5到6节,但以理tī chia koh「看见两个人」出现tī河边,中间有一个人问chit位kah但以理讲话ê天使「tio̍h等jōa久chiah结束」chiah-ê奇异ê事。In所询问ê,mā to̍h是大多数以色列人民一再询问ê问题:甚么时chūn,以色列人民thang建立家己ê国家?甚么时chūn,上帝会收tńg来他ê受气,hō͘以色列人民家己治理,不koh受到外族人ê统治?

第7节,chit位天使真清楚讲出时间是「三年半」,chit-ê数目mā是第七章25节出现第四只怪兽所出现ê意义。Kah第八章13到14节所提供ê时间是一千一百五十工类似。

	第8到10节,但以理进一步询问tī毁灭ê时间一到ê时,到底会有甚么「结局」会出现?天使并无直接回答伊,而且iáu叮咛伊不beh kā所看tio̍h、听tio̍h ê事传讲出去,「tio̍h保密封闭到末日」。原因是tī第4节已经记载chiah-ê异象所beh表明ê信息已经加上「封印」,无koh启开,除非ê时机已经来临。天使并且清楚说明苦难iáu会继续落去,仝款ê,邪恶ê人并无会罢手,in á是会继续迫害上帝子民ê工作。M̄-koh真正有智慧ê人lóng会明白,「会领悟」上帝ê旨意kah奇妙ê作为。

	第11到12节,chia提起ê数目是「一千两百九十工」,然后koh讲「一千三百三十五天」。Chiah-ê数目上ê意义到底tī tó位?真oh明白。Tùi主前168年安提阿哥污辱圣殿开始,直到圣殿洁净了后重新恢复敬拜,总共经过了一千两百九十工。M̄-koh tī第12节ê一千三百三十五天是怎样来ê,已经无法度查考。

	第13节,「hiah-ê忠心到底ê人」是有福气ê人,án-ne chiah是但以理书作者写chit本经册ê主要目的,因为teh迫害ê日子,这mā是唯一ē-tàng讲出ê一句看起来并无甚么特别新鲜ê话,m̄-koh却mā是siōng重要ê话。因为但以理「忠心到底」直到伊「安息」ê时chūn,án-ne伊「koh活」ê时chiah ē-tàng享受上帝ê「奖赏」。



重新查询