重新查询
经文:

歌罗西书 1:1-1:14

注释:

Ná亲像头前提起有关使徒保罗写书信ê模式,是照当时罗马时代书写ê方式,有请安,mā有鼓励。M̄-koh仝款ê,伊写书信hō͘教会,差不多lóng是teh处理教会内部发生ê信仰问题,以及信徒tī生活上有违背信仰ê行为出现。Chit章伊就提起tī耶稣基督ê身上thang看见上帝创造ê奥秘,是因为有耶稣基督,kui个受造ê宇宙chiah会得thang kah上帝和好。伊mā同时表白献身传福音ê使命感,会尽所ē-tàng地kā福音传扬出去。

Chit段经文使徒保罗肯定歌罗西教会信徒tī信心kah疼心ê表现,m̄-koh mā忧心in tī信仰ê认知上iáu无够成熟而受tio̍h别人进入教会传达错误信仰ê影响。

第1到2节,ná亲像写hō͘腓立比教会ê书信仝款,chit封书信mā是使徒保罗kah他ê门徒提摩太共同具名写ê,仝款ê,使徒保罗lóng是先自我坚定ê讲是「耶稣基督ê使徒」。

第3到4节,tùi第3节开始,直到第二章5节,使徒保罗teh讨论歌罗西教会ê信仰认知ê tāi-chì。Tī chit两节中,使徒保罗讲伊真感谢上帝,因为有听见该教会信徒对耶稣基督有坚定ê信心,因为án-ne,表现出彼此之间有疼心,án-ne,thang看出歌罗西教会信徒已经表现出两项珍贵ê信仰态度:信心kah疼心。这一直是使徒保罗teh建构一间教会信仰团契siōng-kài重视ê事。

第5到8节,tī chit段经文中,使徒保罗对歌罗西教会ê o-ló,是因为该教会对耶稣基督有信心,对人有疼心,以及对性命存 ǹg望。这to̍h是伊tī哥林多前书第十三章13节所讲「信心、疼心、ǹg望」等三项是永存ê。Á这三项歌罗西教会lóng有具备,而且tī第7节特别提起歌罗西教会是tùi「以巴弗」得tio̍h福音ê信息,án-ne就ē-tàng知影以巴弗极可能就是歌罗西教会ê开拓者。Koh再tùi第四章12到13节ê资料来看,以巴弗mā是老底嘉kah希拉坡里教会ê福音掖种者。伊后来kah使徒保罗同工,并被使徒保罗认定是真好ê同工,in两人tī福音ê事工上ē-sái讲是形影不离。然后tùi第8节thang知影使徒保罗会án-ne写这封phoe hō͘歌罗西教会,是因为以巴弗带去歌罗西教会ê问题,kā歌罗西教会所发生ê事kā伊讲。

第9到14节,tī chit段经文内底thang看tio̍h使徒保罗肯定歌罗西教会ê信徒tī信仰上确实是真有见证,而且有进步,为tio̍h án-ne事,使徒保罗献上感谢。Koh khah重要ê,使徒保罗肯定该教会信徒tī信仰生活上有美好ê见证。第12到13节中特别提起「光明」kah「乌暗」ê区别,就是tī上帝救赎ê恩典分别出来。这救赎ê恩典就tī耶稣基督内面面,而且因为耶稣基督救赎ê恩典而hō͘性命得tio̍h自由。

经文:

歌罗西书 1:15-1:29

注释:

Tī chit段经文中,使徒保罗讲tio̍h教会ê头,就是耶稣基督。每一个信耶稣基督ê人,lóng会因为为kah chit位教会ê头连结而改变性命。M̄-koh chit种性命会随时受tio̍h诱惑。因为án-ne,伊劝勉歌罗西教会ê信徒, tio̍h坚持所领受基督耶稣拯救ê信息。

第15到20节,tī chit段经文中,使徒保罗开始就提起耶稣基督是「hit-ê看bē-tio̍h ê上帝ê形像」。圣经作者一再强调以人ê条件是无法度看见上帝ê(参考创世记十六:13、三十二:30,出埃及记三十三:20)。「形像」teh代表上帝,而耶稣基督teh代表上帝ê形像(参考哥林多后书四:4)。Tī chia,使徒保罗特别强调讲,上帝创造天地万有,lóng是kah耶稣基督有密切关系。换句话讲,kui个创造ê终极目标,就是为显明上帝ê疼。Á耶稣基督表明ê就是上帝爱。Chit种爱ê记号,就是tī十字架上成全出来,hō͘人kah上帝之间有和好ê关系,mā因为án-ne,hō͘受造ê万物lóng tńg来到上帝面前。Tī使徒保罗ê看法里,人若kah上帝和好,万物mā会跟tòe kah上帝和好。

第21到23节,使徒保罗讲过去未信耶稣基督chìn前,人ê言行举止kah上帝之间是有极大ê距离,m̄-koh chit-má藉tio̍h信耶稣基督ê死,会得thang成做上帝ê朋友,有圣洁ê心灵。使徒保罗劝勉歌罗西教会tio̍h持守chit-ê信仰,千万m̄-thang放弃,因为耶稣基督ê死,就是福音,就是基督教信仰ê本质。这mā是为甚么使徒保罗会讲:「因为我决定,tī lín 中间除了耶稣基督kah 他hông 钉十字架ê 信息以外,无beh 提起其他ê tāi-chì。(全民版)」(哥林多前书二:2)原因tī-chia。

第24到27节,tī chia使徒保罗对传福音ê事工有几点看法:(1)伊认为ē-tàng因为传福音而受苦,是一件快乐ê事,因为这表示伊是传承耶稣基督受苦ê救赎恩典。(2)伊讲家己是领受上帝所付托伊ê任务,hō͘伊成做福音ê奴仆,因为án-ne,伊一定tio̍h完成kā福音传开ê使命。(3)chit-ê信息乃是隐藏已久ê奥秘,就是耶稣基督,因为án-ne,信耶稣基督ê人,等于是kah耶稣基督相连结,就是teh分享上帝ê拯救恩典ê荣耀。

第28到29节,使徒保罗认为基督徒siōng大ê使命,就是beh传扬耶稣基督,tio̍h用各种智慧hō͘大家lóng tī耶稣基督内面长大成熟,好tńg来到上帝面前。使徒保罗讲,为tio̍h chit种信念,伊拚命ê beh达tio̍h chit种目标。这就thang看出为甚么伊讲活teh,就是为tio̍h基督ê原因。



经文:

歌罗西书 2:1-2:23

注释:

Chit章使徒保罗讲出歌罗西教会ê问题,就是有人tī教会内传出无符合信仰ê教导,就是hit-ê所讲ê「虚妄ê哲学」、「星宿之灵」、「割礼」等等。使徒保罗强调:只有tī耶稣基督kah伊ê十字架,chiah ē-tàng看见性命ê强壮kah成长ê气力。

第1到3节,tùi第1节thang看出这封phoe m̄-nā是kah歌罗西教会有关,mā kah老底嘉教会ê信徒有关系。Tùi地理起来看,老底嘉、歌罗西、希拉波里等三城镇就是互相隔壁做伙。所以当以巴弗传福音ê时,除了tī歌罗西,mā同时tī老底嘉、希拉波里等城投入福音ê工作(参考四:13),伊thang讲为tio̍h传福音行遍了这三城镇。使徒保罗表示家己mā是án-ne,只为tio̍h福音ê缘故,是尽心尽力地ài kā福音传出去,并且hō͘所有领受tio̍h福音ê人,lóng ē-tàng用疼心团结起来,认bat耶稣基督就是上帝拯救ê奥秘。

第4到5节,tùi chit两节就thang看出有人进入歌罗西教会内,用「花言巧语」想beh诱惑信徒离开真道之路,m̄-koh伊感觉欣慰ê,就是听tio̍h该教会信徒lóng iáu ē-tàng持守tio̍h信仰ê真理,无偏离。Án-ne,歌罗西教会显然是kah加拉太教会ê情况真无相仝(参考加拉太书一:6—7)。

第6到7节,比较以弗所书第二章20节,就会清楚使徒保罗所强调ê,基督徒ê生活就是用耶稣基督为准则,学习伊ê模样,并建立tī伊ê基础上。
第8节kah第20节lóng出现「星宿之灵」ê词句。Tī加拉太书第四章3节、9节mā出现仝款ê词句,这lóng是teh指hiah-ê虚假ê、世俗ê算命、勘舆之术。摩西律法就bat严格禁止以色列人民进入迦南地了后,接受chit种行为(参考申命记十八:10—11)。使徒保罗强调一个基督徒ê信仰是kā性命交托tī耶稣基督ê救恩里,却m̄是khǹg tī人ê哲学理念,á是chiah-ê奇门邪术ê怪谈。

第11节,使徒保罗tī chit节讲tio̍h有关割礼ê问题。伊强调真正割礼不应该是肉体ê记号而已,ná亲像先知耶利米所强调ê,真正重要ê割礼,应该是心灵上ê(参考耶利米书九:25—26)。割礼表示是kah上帝之间有性命ê约,chit-má所有信耶稣基督ê人,就是tī耶稣基督救赎ê恩典里,领受了割礼,这割礼thang摆脱肉身ê罪性。

第12节,chit节thang看出早期教会已经非常流行ê洗礼,甚至tī外邦人地区已经用洗礼取代了犹太人ê割礼。M̄-koh两个lóng teh表明kah上帝立约ê意思。使徒保罗tī chia强调洗礼所beh表明ê,就是kah耶稣基督同死,mā同koh活。

第13到15节,使徒保罗讲歌罗西教会ê信徒因为信耶稣基督,chit-má会得thang得tio̍h上帝赦免所有ê罪、过犯,thang脱离犹太人所强调ê律法之束缚,tī耶稣基督ê十字架救恩里,thang成做一个自由ê人,无koh是灵界、掌权者ê俘掳。Án-ne,就ē-tàng看出使徒保罗传福音ê中心信息,就是耶稣基督kah伊ê十字架救恩。

第16到19节,chit段经文koh一pái强调耶稣基督就是教会ê元首,结连tī伊ê内面,灵性ê性命自然会生长。除了伊,其他ê一切学说对性命来讲lóng已经无koh是重要ê à。Tī chit段经文中,thang看tio̍h歌罗西教会中,有人会kā摩西律法中有关「lim食、节期、月朔,á是安息日」等规律当做kah上帝ê救恩有密切关系,使徒保罗讲chit种人,就是hō͘律法所束缚ê人,无得tio̍h自由。使徒保罗希望歌罗西教会ê信徒,不beh hō͘ hiah-ê「有特殊远见、故作谦卑、崇拜天使ê人」所迷惑。Tùi chia mā thang看出有kóa错误ê信仰进入教会内。使徒保罗ài信徒lóng清楚知影:只有耶稣基督,其他ê,lóng m̄是救恩ê中心。

第20到23节,chit段经文mā thang看tio̍h早期教会非常流行「禁欲主义」ê生活态度。使徒保罗khah强调ê是:tī耶稣基督内面,ē-tàng成做一个自由ê人,性命是被tháu放ê。伊写hō͘加拉太教会ê书信中án-ne讲:「为tio̍h beh hō͘ 咱自由,基督已经 kā咱 tháu 放, 所 以,lín tio̍ h khiā hō͘ 在,m̄ -thang koh hō͘ 人压制做奴隶。(全民版)」(加拉太书五:1)肉体ê禁欲并无表示就是接近属灵,却是来自心灵ê洁净chiah是真实ê,chit种洁净ê心灵,是建构tī心思意念ê更新,而且kah chit世界ê腐败有所距离(参考罗马书十二:1—2)。

经文:

歌罗西书 3:1-4:1

注释:

Kah其他ê书信仝款,使徒保罗ê书信除了讲tio̍h正确ê信仰认知外,mā会tī书信ê另外一部分提起怎样kā信仰kah生活连结做伙。伊ài用「旧」kah「新」ê生活样式,á是用「属世ê」á是「属天ê」等思考模式做对照,为tio̍h是beh表示tī耶稣基督内面,性命应该是有所转变chiah正确。

Tī chit章经文内底,伊mā讲tio̍h奴仆kah主人之间ê关系,ē-tàng看出来tī使徒保罗ê观念中,并无排除奴隶制度,因为蓄奴tī伊hit-ê时代是社会ē-tàng允准ê现象。伊m̄-nā tī chit书信中讲tio̍h,mā tī以弗所书里提起。

第1到4节,使徒保罗讲tio̍h基督徒应该是属tī天顶ê公民(参考腓立比书三:20),因为án-ne,关心天顶ê奖赏应该是比重视地上ê财物iáu来得要紧。Tī伊ê看法里,天顶ê事kah地上ê事,这是两种完全无仝ê境界。属天ê,是永恒ê性命,是bē败坏ê,因为是kah耶稣基督同koh活ê性命(参考二:12—13)。伊tī chia特别用一个名词来说明,就是所讲ê「真性命」。Chit-ê词thang对照约翰福音第十四章6节,耶稣基督讲伊就是「道路、真理、性命」。 

第5到15节,使徒保罗tī chit chit段经文kā第1到4节所讲ê「属天」kah「属地」ê内容,koh再作进一步ê说明。所谓「属地」ê事,包括欲望、淫乱、污秽、邪情、恶欲、贪婪、忿怒、暴戾、仇恨、讲毁谤kah污秽ê话、彼此欺骗等(第5到9节)。Á「属天」ê部分,则有「更新ê形像」,hō͘人完全认bat上帝,而且无koh区分所讲ê犹太人、外邦人,而ē-tàng tī生活上有怜悯、慈爱、谦逊、温柔、忍耐ê心、宽容、彼此赦免,然后加上爱,因为爱hō͘ chiah-ê结连做伙(第12到14节)。使徒保罗讲因为爱,上帝chiah拣选歌罗西教会ê信徒做他ê子民。Chit点mā是成做基督徒siōng大ê荣耀,koh khah需要珍惜。伊讲这就是上帝对一个被拣选ê基督徒全新ê创造,有新ê形像出现,chit种新ê形像会kā过去hiah-ê区隔人kah人之间ê「割礼」、「犹太人kah外邦人(希腊人)」、「野蛮ê kah未开化ê」、「奴隶á是自由人ê」等lóng消除掉。所有chiah-ê lóng tī耶稣基督内面完成。

第16到17节,使徒保罗劝勉歌罗西教会ê信徒,tio̍h学习hō͘耶稣基督丰丰富富ê恩典永远存在心内,彼此互相教导、苦劝,用真诚ê心灵歌颂上帝ê救恩。伊讲无论做甚么,讲甚么,lóng tio̍h「奉主耶稣ê名」感谢上帝,这mā是耶稣基督教导他ê门徒所讲ê话,伊讲:奉他ê名无论向上帝求甚么,上帝lóng会成全(参考约翰福音十四:13—14、十六:23—24)。

第三章18节到第四章1节,chit段经文thang对照以弗所书第五章21节到第六章9节,tī chit段经文中,使徒保罗讲tio̍h基督徒ê人际关系,而且是先tùi夫妻ê关系讲起,然后讲tio̍h父母kah子女,续落来讲tio̍h奴仆kah主人ê关系。Tī所有chiah-ê关系中,使徒保罗强调一点:所有ê chiah-ê lóng一定tio̍h建立tī一个基础上,就是耶稣基督ê疼。伊认为chiah-ê关系lóng是teh见证每一个人是敬畏主耶稣基督,因为是伊ê救赎恩典,chiah hō͘人拥有chiah-ê赏赐,mā chiah hō͘人ê性命有意义,有得救ê ǹg望。若是无chit种心境,就算有世间ê一切,mā是枉然。

经文:

歌罗西书 4:2-4:18

注释:

Tī chit封书信beh结束前,使徒保罗koh一pái劝勉歌罗西教会ê信徒,tio̍h时刻警醒,免得受tio̍h诱惑而弃sak信仰。然后,ná亲像其他书信结尾仝款,伊kā身边真chē同工ê名列上去,m̄-nā是hō͘教会ê信徒有所认bat,mā等于teh表明伊ê书信mā是封感恩ê信,记念chiah-ê bat kah伊同工奋斗过ê伙伴。

第2到4节,非常重要ê,使徒保罗m̄-nā是替教会ê信徒祈祷,伊mā tio̍h歌罗西教会ê信徒为伊kah其他同工代祷,这已经讲出一个重要ê信念:信徒彼此之间tio̍h互相代祷。因为会彼此代祷,chiah会hō͘大家tī无仝ê所在传福音,也ē-tàng藉tio̍h耶稣基督ê名祈祷而hō͘大家连结做伙。Tùi第3节thang看tio̍h使徒保罗是tī监狱中写chit封书信。因为伊坚持beh上诉到罗马法庭。

第5到6节,tī使徒保罗传福音到外邦地区去ê时,基督徒是少数,tī非基督徒是大多数ê社会环境中,基督徒ê角色就显得突出。因为án-ne,kah非基督徒谈话ê时,就beh有智慧,而且tio̍h把握机会,因为这mā是传福音ê好契机。M̄-koh tī chit种环境,若m̄是拥有智慧ê言论,真容易kah人对谈ê时,反tńg hō͘家己陷入迷惑中。这mā是耶稣基督教导并提醒门徒所讲ê,差遣in去传福音,有ná亲像kā羊差派进入狼群里仝款危险(参考马太福音十:16)。因为án-ne,有充足ê智慧,chiah会知影怎样回答问题。

第7到14节,tī chit段结尾ê经文中,伊提起几位同工,包括有:
「推基古」;伊是使徒保罗忠实ê同工,代表使徒保罗到各地去探访(参考以弗所书六:21,提摩太后书四:12,提多册三:12)。伊特别派推基古去访问歌罗西教会,因为án-ne,真可能chit封书信就是请推基古带去ê。

「阿尼西谋」,chit pái是kah推基古同行去访问歌罗西教会。伊原是腓利门厝内ê奴隶,逃走出来,后来信了耶稣基督。为tio̍h伊,使徒保罗写phoe hō͘腓利门,替伊求情(参考腓利门书)。

「亚里达古」,伊是马其顿ê帖撒罗尼迦人,kah使徒保罗同在以弗所经历暴乱(参考使徒行传十九:29),然后kah使徒保罗前往希腊,koh再转tńg来到马其顿、特罗亚(参考使徒行传二十:4—5)。使徒保罗为tio̍h beh上诉而到罗马去,伊mā一直陪伴tī使徒保罗ê身边(参考使徒行传廿七:2)。

「马可・约翰」,伊是使徒保罗第一pái传道ê时,kah巴拿巴同齐同行ê,后来因为先离开。使徒保罗tī第二pái ê时chūn bat拒绝继续带伊加入,mā因为án-ne来致使使徒保罗kah巴拿巴之间有争执(参考使徒行传十五:36—39)。可能了后chit件事并无影响siuⁿ大,á是继续siuⁿ久,后来有改变,使徒保罗koh继续带伊同行,并且认为伊是thang信靠ê同工(参考提摩太后书四: 11)。使徒保罗tī chit封书信中先替马可・约翰绍介,希望若是马可・约翰去访问歌罗西教会,期待伊会得tio̍h温暖ê接待。

「别号犹士都ê耶数」,只有tī chia提起,无其他ê资料,真可惜。

「以巴弗」,头前有提起过,伊就是歌罗西教会ê开拓者。使徒保罗讲以巴弗无停地teh为歌罗西教会代祷,恳求天父上帝hō͘该教会信徒有美好ê信心,m̄-nā án-ne,mā同时teh关心老底嘉kah希拉坡里等教会、代祷。因为这两教会mā lóng是用巴弗建立ê。其实,这mā是每位传道者共同ê心境,会为家己奉献性命开拓起来ê教会kah信徒代祷,teh关心信徒灵命ê成长,期待ē-tàng koh khah坚定、成熟,án-ne chiah是siōng大ê安慰。

「路加医生」,伊就是写路加福音kah使徒行传ê作者。当使徒保罗tī罗马坐监ê时,伊陪使徒保罗做伙。

「底马」,伊后来mā离开了使徒保罗,因为伊贪爱世间ê需要(参考提摩太后书四:10)。

第15到18节,tī chit段经文中,使徒保罗请歌罗西教会信徒替伊转达请安hō͘下列ê人:
「宁法」,可能是老底嘉人,提供家己ê khiā家作聚会ê场所。值得注意ê是,使徒保罗ài歌罗西教会kā chit封phoe读完后,转交hō͘老底嘉教会。另外,伊mā有信hō͘老底嘉教会,希望歌罗西教会mā会读hit封书信。可惜ê是,已经chhōe bē-tio̍h伊写hō͘老底嘉教会ê书信à。
「亚基布」,tùi腓利门书2节thang知影伊kah使徒保罗同工。伊可能担当歌罗西教会ê牧养事工。

第18节,除了讲祝福ê话外,使徒保罗特别强调,chit封书信是伊「亲手写」ê。其实,比较正确ê讲法,是伊口述,然后有人替伊执笔(参考罗马书十六:22)。然后伊讲家己是「带锁链」,表示伊目前正tī罗马监狱中写chit封书信。

重新查询