出埃及记 5:1-5:9

注释:

16.第五章：
Chit一章到第六章1节，lóng是以「耶和华文献」ê资料为主轴（第3节、第5到23节、第六章1节），搭配tio̍h「以罗伊文献」ê资料为副（第1到2节、第4节）。Chit段经文ê主题是teh说明：以色列人民虽然哀求上帝拯救in，ē-sái讲是，当上帝开始展开拯救计画ê时，以色列人民却无清楚上帝ê拯救工作，因为án-ne埋怨摩西kah亚伦。这说明人ê共同通性，对上帝ê旨意明白非常少，lóng是抱怨比感谢koh-khah chē。

Tùi第五章开始到第十二章，chit段经文lóng围绕tī上帝、摩西kah亚伦，kah埃及国王等三个对象。摩西顺服上帝ê差遣，由亚伦帮助伊，两人同齐去埃及见国王，并且传达上帝ài in带以色列人民出埃及ê事，主要目的是beh带以色列人民去「旷野」敬拜上帝。Mā Tī chit段长到八章ê经文篇幅中，一再看tio̍h埃及国王心「刚硬」ê例，m̄-nā无愿意听从上帝，甚至是变本加厉地残酷对待以色列人民。伊用chit种方式teh对抗上帝，伊beh表明伊chiah是真正「神明」，希伯来人ê上帝，只不过是一个「旷野」神明而已。为tio̍h埃及国王chit种恶劣态度，上帝用十个大灾难严厉惩罚埃及人kah国王，chiah hō͘埃及人kah国王终其尾认识tio̍h以色列人民ê上帝，是bē-tàng污蔑ê。

17.第五章1到9节：
Chit段经文teh说明摩西kah亚伦去见埃及国王，并且kā上帝ài in对埃及王讲，讲述一遍。M̄-koh随时遭遇tio̍h拒绝。M̄-nā án-ne，埃及国王甚至下命令，tio̍h koh-khah加压制以色列人民做苦工。这就回应了第三章19到20节上帝所讲ê话。

第1到2节，摩西带tio̍h亚伦去见埃及国王，真清楚，kā上帝ài in转述kā埃及国王讲了后，埃及王第一个反应是：「上主是甚么人？我何必听从伊？我为甚么tio̍h放以色列人走？我bē认得上主；我mā不放以色列人行。」Chit种话，lóng teh说明tī埃及国王心中，ná旷野ê神，是真低级ê，无能力ê神，chiah会困守旷野。Á伊自认是一个有能力ê神，chiah是真正神，chiah会hō͘埃及富有、国势强大。因为án-ne，当伊tī讲「上主是甚么人」，á是「我bē认得上主」Chit种话ê时，语气lóng是带有鄙视ê意味。

第3到5节，摩西kah亚伦koh一pái重述上帝ài in讲，m̄-koh chit-pái语带警告，若是埃及王犹原不准，会有「疾病á是战争」惩罚以色列人民，致使严重死亡。Á这mā会带hō͘埃及重大ê损害，chit种损害会超过埃及所ē-tàng承担ê范围。M̄-koh埃及国王一听，就koh khah受气，伊认为以色列人口hiah-nih-chē，单单beh饲chiah-ê人就是真大ê负担。现在摩西kah亚伦koh讲chit种带有恐吓，目的只是想beh拖延工作而已。

第6到9节，埃及国王采取压缩以色列人民ê政策，m̄ hō͘ in工程需要ê材料，ài以色列人民家己去载运制砖ê材料，á这必然会增加工ê时，却ài以色列人民交出仝款ê工作数量，chit-ê定会拖延。Á若beh准ê时交出工作数量，就一定tio̍h加班、加工，án-ne kan-taⁿ会增kā它色列人民ê痛苦。M̄-koh埃及国王认为只有án-ne，以色列人民chiah bē想tio̍h beh去「听信妖言」。

出埃及记 9:1-9:7

注释:

5.第九章：
Chit章是由三种资料混合编辑，包括「耶和华文献」ê资料有第1到7节、第13到21节、第23节b句到30节、第33 到34节；「祭司文献」ê第8到12节、第31到32节、第35节a句；以及「以罗伊文献」ê第22到23 节a句、第35节b句等。

Chit章包含三个灾难，有瘟疫之灾（1到5节）、生疮ê灾难（8到11节）、冰雹之灾（13到32节）等。诗篇第七十八篇50到51节ê作者kā「瘟疫」看做是kan-taⁿ比「大kiáⁿ被杀」khah无hiah严重，tī「瘟疫」ê灾难了后，续落来就是杀害大kiáⁿ。

6.第九章1到7节：
这是第五个灾难，mā是致使性命死亡ê瘟疫之灾。Tī旧约圣经，先知耶利米一再提起上帝惩罚悖逆ê以色列人，就是用「战争、饥荒、瘟疫」等chit三种（参考耶利米书十四：12、十六：4、十八：21、廿一：7、9、廿四：10、廿七：8、廿八：8、廿九：17）。以色列人离开埃及后，tī旷野mā一再得罪á tú-tio̍h上帝惩罚所带来ê瘟疫（参考出埃及记三十二：35、民数记十一：33）。

第1到5节，因为埃及国王「心犹原刚硬」，因为án-ne，上帝koh一pái差遣摩西去告诫埃及，特别hō͘埃及王知影，伊所藐视ê「希伯来人ê上帝」ài伊「放以色列人民行」，thang hō͘ in去「敬拜」上帝。Koh一pái说明宗教信仰ê重要性。如果埃及王拒绝，上帝一定会用「惊人ê灾难」，mā就是瘟疫来惩罚伊kah埃及人民。

第4节kah第八章23节仝款，上帝ài kā以色列人tùi埃及人中区别出来，以色列人无像埃及人会受tio̍h瘟疫ê灾难。当埃及人ê厝畜大量死亡ê时，以色列人ê厝畜连一只mā bē减少、死去。

第6到7节，摩西向埃及国王讲完上帝chit种信息ê隔工，埃及人ê牲畜果然大量暴毙，á以色列人却连「一只mā无死」。当埃及王听tio̍h以色列人ê厝畜lóng无受tio̍h伤害ê时，伊非常受气，m̄-koh心iáu是仝款「刚硬」。
Chit-ê瘟疫ê灾难thang看tio̍h损失ê虽然是家畜，m̄-koh，埃及ê经济是受tio̍h重创ê。表面上是马、驴、骆驼、牛、绵羊，kah山羊等损失，m̄-koh像马、驴、骆驼、牛等iáu牵涉tio̍h交通、运输，以及耕种ê问题，因为in大量死亡á hō͘埃及全国陷入瘫痪。

出埃及记 19:1-19:15

注释:

17.第十九章：
Chit章ê资料比较复杂，是由「祭司文献」ê资料（第1到2节、第23到24节a句），「以罗伊文献」ê作品（第7到8节、第10节、第13节b句到14节、第16节b句到17节、第19 节等），以及「耶和华文献」ê资料（第9节、第12到13节a句、第15节、第16节a句、第18节、第20 到22节、第24节b句到25节）编辑而成，另外mā有编者加上去ê第4到6节等。

Chit一章主要是teh说明以色列人民已经来到西奈山下，chit-ê时chūn tú好满三个月。上帝beh颁赐诫命hō͘以色列人民，因为án-ne摩西要求以色列人民怎样准备接受上帝ê诫命。

18.第十九章1到15节：
Chit章开场白真清楚说明以色列人民「离开埃及，tú好teh满三个月」，来到西奈沙漠，然后tī西奈山下扎营。Tī chia，摩西上山去朝见上帝。可见摩西kah上帝之间ê关系真亲密。

第4到8节，上帝ài摩西转告hō͘以色列人民知影，上帝ài kā in当做家己拣选ê子民，m̄-koh in一定tio̍h用顶真态度遵守kah上帝之间所立ê约，án-ne chiah ē-tàng成做上帝ê子民，是「神圣ê国民，是事奉上帝ê「祭司」。就án-ne，摩西kā以色列人民ê领袖召集过来，kā上帝传hō͘ in知影。Á以色列人民非常聪明，in一听上帝beh kah in立约，成做神圣ê国民，in就真一致回应讲，beh「遵照上主做」。第8节清楚说明一个被上帝拣选ê人á是民族，非常要紧ê事，是「tio̍h遵照上帝做」，á m̄是照人ê命令，á是人ê意思。

第5节真重要，chit节讲「全世界lóng属tī」上帝，m̄-koh只有以色列人民chiah是上帝ê「选民」，chit节已经讲出了以色列民族kah上帝之间ê特殊性。In一定tio̍h koh khah小心谨慎言行举止，遵tùi上帝去行。先知阿摩司就bat指责in违背上帝ê律法诫命，因为án-ne，tī全世界所有民族中间，上帝beh先the̍h以色列人民作惩罚对象，因为in并无kā上帝ê拣选当做荣耀（参考阿摩司册三：2）。

第9到13节，chia上帝表示伊kah摩西讲话，而且讲话ê时chūn，beh hō͘全体以色列人民lóng听得见。M̄-koh chit时chūn ê以色列人民一定tio̍h洁净己身，绝对bē-tàng jú界，因为上帝beh降临tī西奈山，in一定tio̍h真严格地保持kah上帝之间ê距离。

第14到15节，摩西kā上帝ê要求lóng转告以色列人民，ài in洁净身躯，而且洗涤衫裤，同时bē-tàng有性行为。