撒迦利亚书 14章1节 到 14章21节   背景资料  上一笔
先知撒迦利亚ê信息中有一个真重要ê启示,he就是性命中有苦难,并无尽然lóng是pháiⁿ事,因为苦难mā是上帝teh锻炼他子民ê一种方式,ná亲像先知撒迦利亚所讲ê,tī剩余ê子民中,上帝beh用「火炼」像试验金子仝款(参考十三:9)。因为上帝是圣洁ê,他希望他ê子民mā是圣洁ê。申命记ê作者强调上帝带领以色列人民离开埃及进入旷野漂流四十年,就是用chit种方式teh「考验」in(参考申命记八:2—3)。

chit章经文真像先知耶利米ê信息,讲上帝siōng常用ê三种方式,就是战争、饥荒、瘟疫等来惩罚悖逆他ê子民(参考耶利米书十四:12、廿四:10、廿五:29、廿七:8、廿九:17、三十四:17、四十二:22)。先知撒迦利亚mā tī chit章中,一再提起上帝ê审判,包括有战争、破病,kah炕旱。Ná亲像头前所提起ê,上帝ê审判有惩罚,相对ê,mā会有拯救ê恩典,chit种信息mā是先知文献ê特色之一。

第1节,「上主坐落来审判ê日子紧到à」,这「审判ê日子」,mā就是先知撒迦利亚一再使用「tī hit工」ê另外一种表达方式,这真清楚是teh表示上帝已经来到,却m̄是tī遥远ê天边。先知撒迦利亚指明耶路撒冷会受敌人「掳夺」、「分赃」in ê财物。因为in违抗上帝ê旨意,上帝透过chit种方式来帮助犹大ê以色列人民知影悔改、认罪。

第2节,chit节真清楚描述战争ê实况,包括有耶路撒冷「城会被占领,房屋被洗劫,妇女被强奸,半数ê居民会受掠,残余ê人留tī城内」。Tī撒迦利亚书第十三章9节讲上帝审判ê日子,只有三分之一ê人会留存落来。Tī chia soah讲有一半ê人会hō͘留置tī耶路撒冷,其他ê人lóng被俘虏去做奴隶à。Thang想像会tio̍h战败ê后果是非常惨重。

第3节,chia讲上帝beh「出去kah hiah-ê国家征战」,这teh表示上帝决定出手来惩罚chiah-ê强大ê国家联军,因为in ê行踏已经超过上帝所许可ê范围,in残酷ê手段已经引起上帝ê大受气。

第4节,本章第一pái用「tī hit工」chit-ê词。作者讲hit工是上帝审判ê日子,上帝已经来临,而且是khiā tī耶路撒冷「东边ê橄榄山顶」,上帝beh观看hiah-ê攻击耶路撒冷ê联军thang逞强到甚么时chūn。

第5节,是teh描述耶路撒冷遇tio̍h联军攻打ê情景,当然thang想像会tio̍h hit-ê灾情是非常ê惨重。

先知撒迦利亚特别指出情况ê严重性,ná亲像当年「犹大王乌西雅逃避大地动」仝款,chit件事是发生tī主前760年左右ê大灾难,先知阿摩司bat用chit pái ê大地动做历史背景,做伊hō͘上帝呼召出来传讲起帝信息ê史料根据(参考阿摩司书一:1)。先知撒迦利亚用「大地动」表示:当上帝来临ê时,就会像大地动仝款,人人lóng会heⁿh惊kah四界乱窜,以求保全性命。

Koh讲,mā因为上帝ê审判来临而发生大地动hō͘山谷分裂做做为两半,中间kā出现空隙,致使逃难ê人有机会thang chhōe-tio̍h避难、逃脱ê所在。M̄-koh仝款ê,chit种大地动,会hō͘攻打耶路撒冷城ê联军,感觉真无仝款,in会因为面临大地动而惊惶失措,落荒而逃。M̄-koh却m̄知怎样逃难,因为强大ê地动kā会hō͘ in ê脚酸软而无力逃走。

Chit节讲tī大地动中上帝「来临」,而且是「带所有ê天使同齐来」,表明ê就是beh上帝ài beh进行审判ê工作,天使kā执行上帝审判了后ê命令。地动kah天使连结做伙ê事mā thang参考马太福音第廿八章2节。

第6到7节,这是第二pái用「tī hit工」。Chia特别强调「无koh有寒冷、严霜」。Chit两个词lóng teh表示性命ê苦难,tī chia ê意思就是苦难ê日子会过去。

第8节,chit节thang参考以西结书第四十七章,该章描述ê先知以西结tī异象中所看tio̍h ê新耶路撒冷城。可能是受tio̍h先知以西结ê影响,先知撒迦利亚tī上帝临在ê耶路撒冷mā会是án-ne;伊提起tī上帝审判了后ê耶路撒冷城,以后be7 koh会缺水,却是成做一座流出泉水ê城市,人民不需要惊惶缺水ê苦难,无论是「旱季雨季lóng仝款」,而且水量tú好符合所需要ê,bē siuⁿ chē mā bē siuⁿ少。Chit种讲法续接第7节所提起,有上帝坐阵指挥ê所在,阳光永远bē消失,水mā bē减少。其实这就是伊甸园ê景况。
第9节,chit节kah第7节载tī中文《和合本》有「hit日」,《吕振中教授版本》、天主教《思高圣经学会晓版本》,包括希伯来原文mā有,可惜《现代中文版本》有省略。

Chit节是公开宣告上帝已经来统治chit-ê世界à。先知撒迦利亚讲「上主beh做全地ê王」,chit种句话,已经teh说明只有创造宇宙万物ê主宰耶和华上帝,chiah是性命ê主。因为他是赏赐光kah水hō͘他子民ê主宰。

第10到11节,chit两节看tio̍h一个全新面貌出现ê耶路撒冷城kah过去无仝款;teh过去,它一直真轻易ê就被敌人来侵犯。M̄-koh今后以后be7 koh是án-ne,因为有上帝ê看守,chit-ê城会ná亲像建造tī高山顶ê城市仝款,m̄-nā tī国防上守卫容易,而且tùi真远就ē-tàng看见它散发出来ê光芒。所以khiā起tī其中ê人民kā thang「安居乐业,无koh有被歼灭ê危险」。

第12节,chiah-ê攻击耶路撒冷ê国家、人民会hō͘上帝严厉惩罚,而惩罚则ná亲像患tio̍h癞ko病仝款恐怖(参考申命记廿八:27—35)。

第13节,koh一pái用「tī hit工」,表示上帝审判ê结果,就是hō͘ hiah-ê攻击上帝城池ê咱人陷入「混乱、惊惶」中,甚至彼此hō͘斗、攻击。

第14到15节,当chiah-ê联军来攻打in ê时,有上帝出来抵挡,并且犹大ê以色列人民mā加入抵抗ê行列,而且phah赢,thang分享因战胜所得tio̍h ê战利品。除了这以外,hiah-ê战争用ê工具,包括「马、骡子、骆驼、驴á,以及敌人营地所有ê动物,mā lóng tio̍h染上惊人ê疫病」,这表示会半遂敌军ê撤退ê动力,hō͘敌人败得koh khah凄惨,因为连beh撤退mā无办法à。

第16到19节,chit段经文说明新ê耶路撒冷kā成做万民敬拜ê所在,hiah-ê过去bat来攻打耶路撒冷ê国家、君王lóng kā明白,独独万军ê统帅耶和华上帝chiah是真正君王。所以in lóng会主动来耶路撒冷朝圣。

Chia特别提起「Tòa棚节」,chit-ê节期是teh庆祝农作物收成后准备收藏起来,有连续长到八天ê时间举行感恩庆祝活动(参考利未记廿三:33—38)。Chit-ê节期mā是用色列人民欢欣歌舞ê活动,用来感谢上帝赏赐农作物ê恩典,是所有以色列人民lóng tio̍h参加。用tī chia强调所有ê国家lóng tio̍h来过chit-ê节期,表示所有国家就án-ne知影上帝chiah是万物ê主宰,mā是所有性命ê主。包括当时siōng具实力ê国家mā仝款beh来敬拜上帝,感谢上帝。先知撒迦利亚chit种信息是teh表明一件事:如果连埃及mā抵挡不了上帝ê惩罚,án-ne,其它地区就koh khah免讲à。

第20节,chia koh一pái用「tī hit工」,mā是撒迦利亚书最后ê一个上帝之日,tī chit工,一切世上万民、万国lóng是属tī上帝管理ê。Chia讲「连马ê铃铛上mā kā刻上『圣化归上主』chit句话」,就kah「圣殿内ê锅」kah「祭坛头前ê碗」仝款,lóng是属tī圣洁上帝所用。这表示过去ê马是用来战争ê,chit-má是kah chiah-ê圣殿献祭用ê器皿仝款,全部lóng tio̍h用来敬拜上帝。Koh讲,过去只有以色列人民chiah是分别为圣ê子民,现tī所有ê人lóng是à。

第21节,最后一句话讲「上主—万军统帅ê圣殿内无koh有做买卖ê人」。Chia所讲「做买卖ê人」,tī中文《和合本》用「迦南人」,《台语汉字本》mā是用「迦南人」,而天主教《思高圣经学会晓版本》是用「商人」,而《吕振中教授版本》则用「贩卖ê人」。原来犹太人欢喜用「迦南人」chit-ê名词来形容teh生意场合中用不诚实方法来欺骗对方ê人。用「迦南人」另外iáu有一种用意,就是teh指无清气、思想不端正ê人。Tī chia表示来到敬拜上帝ê场所,人bē有贪婪ê念头、污秽ê思想,却是会用诚实ê心敬拜上帝(参考约翰福音四:23—24)。

重新查询 专卷研经 撒迦利亚书系列
错误回报,请联系comm[@]fhl.net