先知撒迦利亚kah先知哈该ē-sái讲是仝一个时期ê先知，chit两位先知lóng有一股非常火热ê宗教情操，希望以色列同胞ē-tàng赶紧排除一切困难，kā耶路撒冷圣殿重建起来。In非常清楚知影，只有án-ne chiah ē-tàng kā回乡ê以色列同胞重新凝聚起来。Tī chit两位先知ê眼中，重建敬拜上帝ê耶路撒冷圣殿，chiah ē-tàng hō͘做奴隶长到半个世纪之久ê以色列同胞，重新得tio̍h性命ê尊严，hō͘所有tī巴勒斯坦ê以色列人民，lóng ē-tàng透过敬拜上帝，看tio̍h上帝ê救恩继续tī in中间teh带领，m̄-thang因为tú-tio̍h阻碍就失去信心kah ǹg望。

先知撒迦利亚ná亲像先知以西结、但以理仝款，不时看tio̍h异象，总共十四章ê篇幅中，tùi第一章开始直到第六章，lóng是记载伊所看tio̍h ê异象，chiah-ê异象tī撒迦利亚书占真大ê篇幅。Koh khah值得注意ê是chit本经册被新约启示录引用ê经文相当chē，总共引用了廿八次，这是真特别ê所在。Mā thang án-ne了解，先知看见异象是真普遍ê经验，亲像先知阿摩司mā看见异象（参考阿摩司书七：1—9、八：1—3）。先知以赛亚kah耶利米mā lóng看见过异象（参考以赛亚书六：1—7，耶利米书十八：1—4、廿四：1—3）。Mā所以有kóa圣经学者欢喜kā撒迦利亚书mā列入启示文学作品ê中间。Á启示ê作品hit内面容差不多lóng kah上帝ê审判有密切关系，chit点tī撒迦利亚书中mā是án-ne。

Chit章记载先知撒迦利亚看见三个异象，一个是马ê异象，二是四个角ê异象。每一个异象lóng teh代表一个意义。

Chit段经文记载有关先知撒迦利亚hō͘上帝呼召出来传达信息ê经过。Tī十二位小先知中，有六位lóng有详细绍介身世背景，包括先知何西阿、阿摩司、弥迦、西番雅、哈该、撒迦利亚等，chit对了解in信息ê意义上帮助真大。

第1节，chit节讲先知撒迦利亚是tī「大流士做波斯皇帝ê第二年八月」出来传达上帝ê信息。这是tī主前520年10月底。Kah哈该书第一章1节记载先知哈该ê年代仝款。因为án-ne thang真清楚知影先知撒迦利亚kah先知哈该乃是仝一个时代ê人。

「易多ê孙á比利加ê kiáⁿ儿」，尼希米记第十二章4节则记载易多乃是利未族人，而且是属tī祭司阶级者。所以thang知撒迦利亚m̄-nā是祭司mā是先知，kah先知以西结仝款（参考以西结书一：3）。

第2到3节，chia无讲上帝ài先知撒迦利亚传信息hō͘什么人，m̄-koh tùi「Lín祖宗」chit句话就thang清楚知影对象是khiā起tī犹大kah耶路撒冷地区ê犹太人。Á chiah-ê人主要lóng是hông掳去巴比伦做奴隶chit-má回乡ê民众。信息ê内容是beh回乡归国ê以色列人民「转向」上帝，这「转向」一词是teh指悔改ê意思。

第4节，chit节提出撒迦利亚ê祖先们，mā就是用色列人民拒绝听从上帝奴仆ê呼声，teh过「邪恶犯罪ê生活」，「不顺从」上帝，结果致使亡国。Chit种信息对tùi巴比伦被释放tńg来ê以色列人民来讲非常刺耳，m̄-koh却是非常实际。

第5节，hiah-ê拒绝上帝话语ê「Lín ê 祖先tī tó位？ Hiah-ê 先知kám 会永远活teh ？(全民版)」，因为he已经是大约七十年前ê事loh。Hit时代ê人lóng过去à，ē-sái讲是历史ê痕迹iáu-koh。

第6节，先知撒迦利亚koh一pái提醒以色列人民tio̍h注意，上帝是有计画ê，他会照所计画ê进行。该毁灭ê，上帝绝对不赦免。该赐福ê，上帝bē bē记得á是亏欠。伊ê祖先们就是因为拒绝听从上帝ê话，结果是「自食苦果，后来in悔改」，上帝chiah带领in tńg去故乡来。