罗马书 6章1节 到 6章14节   背景资料  上一笔  下一笔
罗马书tùi第一章18节开始到第三章20节,是讲tio̍h有关人犯罪,致使kah上帝之间出现隔阂。然后tùi第三章21节起,直到第四章25节,lóng是teh谈一个人ē-tàng kah上帝重新和好,是因为耶稣十字架救赎ê缘故。续落来tī第五章讲咱是因为信耶稣á得tio̍h上帝拯救ê恩典,这恩典是tùi上帝来白白ê赏赐,并m̄是人ê努力á是功劳换来到ê。

罗马书ê第六章到第八章39节,是使徒保罗teh解释一个信耶稣ê信徒,应该有ê信仰态度kah认知。Tī chit段长到三章篇幅ê经文中,伊tī第六章细讲人án怎tùi罪ê奴役中脱离,得tio̍h性命ê真自由。然后第七章伊koh再解释怎样tùi律法ê诅咒下得tio̍h真正自由,同时,伊mā kā家己ê心灵做一个彻底告白,hō͘咱知影人有多软弱。续落来tī第八章,伊讲tio̍h怎样tī圣神ê带领下,成做一个有真实性命ê人。

使徒保罗tī第六章讲tio̍h一个性命有基督同在ê人,是有koh活性命ê人,伊讲chit种人就是脱离罪恶ê人。使徒保罗真正用意,是beh指出当人透过律法,知影所犯ê罪jōa-ni̍h-á重,就会想tio̍h上帝赏赐ê恩典,而且白白得来ê时,就koh khah应该tio̍h知影谦卑,而且会用感恩ê心来领受,án-ne chiah是正确ê态度。

使徒保罗Tī chit段经文中,一再强调一个信耶稣ê人,等于kah耶稣ê性命相连结,m̄-nā kah耶稣同死,mā将kah耶稣同koh活(参考第8节)。使徒保罗强调:信仰,是性命ê连结。若是将信仰kah性命分离,hit种ê信仰就ná亲像穿衫仝款,随时thang更换。M̄-koh若是将信仰kah性命连结做伙,án-ne就等于人ê身躯kah灵魂仝款,是bē-tàng分割ê。所以chit段经文ê主题就是teh kah耶稣「合做一个」ê基督徒。一个真正信靠耶稣ê人,无koh是原来ê家己,却是性命中有耶稣ê形象,kah耶稣亲密结合做伙ê人,伊kah耶稣同齐同钉十字架,mā同齐koh活。Chit种人会拒绝作罪恶ê奴隶,因为伊已经kā家己献hō͘上帝à。这mā是使徒保罗所常用ê:成做「新造ê人」(参考哥林多后书五:17、加拉太书六:15、以弗所书二:15、四:17—24)。

第1到4节,tùi第1节就thang看tio̍h有人确实是误解,á是讲故意扭曲使徒保罗所讲ê上帝tī耶稣内面拯救恩典ê意思义。原因是tī第五章20节所提起ê「罪jú增多,上帝ê恩典mā koh khah丰富」chit句话。这mā tùi第三章8节伊mā bat提起chit种问题。使徒保罗真清楚表明,罪,hō͘人ê性命死亡。死去ê人怎样ē-tàng继续犯罪?无可能ê事。伊讲,一个真正kah耶稣连结ê人,就是kah耶稣同死tī十字架上,m̄-koh却因为耶稣ê koh活,mā 跟tòe齐koh活,chit种koh活就是teh过新ê生活样式。

第5到10节,chit段经文一再强调kah耶稣「合做一个」ê重要性,表明ê是一个人若真正信耶稣是性命ê救主,chit-ê人就是kah耶稣无分离ê人,伊必定tī信仰上真清楚,是kah耶稣同死,mā会kah耶稣同koh活。Chit种人,就是脱离了死亡威胁ê人。是一个无死ê人,á chit-má活teh,是「为上帝á活」。使徒保罗chit种讲法tī加拉太书第二章20节mā出现,伊讲:「Án ne,chit-má teh 活ê 我m̄ 是原来ê 我,是基督tiàm-tī 我内面teh 活;我chit-máteh 活,是靠信上帝ê Kiáⁿ teh 活;基督疼我,为tio̍h 我放sak 性命。(全民版)」

第11节,使徒保罗强调一个kah耶稣连结ê人,就一定tio̍h kā家己当做是已经是死去ê人仝款,是过去tī罪恶中ê人已经死去à,chit-má活teh ê我,是因为有上帝tī耶稣内面ê救恩á活。伊一再用「为上帝á活」,chit句mā thang讲做「tī上帝内面活着」,因为上帝就是行伟大神迹者,他hō͘死á埋葬ê耶稣,koh活起来。Koh活,就是永恒ê性命。所以做一个人kah耶稣「合做一个」了后,藉tio̍h耶稣ê koh活,信ê人,mā就跟tòe耶稣koh活起来,这就是tī上帝内面活着。因此thang án-ne了解,一个信耶稣ê人,就是时刻会想tio̍h上帝就tī伊性命中,就ná亲像使徒保罗siōng欢喜讲ê,是有耶稣活tī伊ê性命里。

  第12到14节,chit三节经文thang讲为头前ê经文做一个总结。使徒保罗beh厘清一个重要ê观念,并m̄是讲一个信耶稣ê人已经脱离了罪,就认为tùi án-ne bē koh再有罪ê问题出现。Ná亲像头前已经讲述过ê,脱离罪ê束缚,是离开了罪ê主宰,m̄-koh却tùi án-ne成做罪ê对敌者。所以需要不时kah罪对抗。伊讲一个信耶稣ê人,是无koh作「邪恶ê工具」,却是成做「公义ê器皿」。这是相对ê话句,「工具」kah「器皿」lóng是teh指「武器」ê意思。使徒保罗甚至讲beh穿上帝所赐ê「全副武装」,为tio̍h是beh对付罪恶ê诱惑(参考以弗所书六:10—13)。注意这处圣经所讲ê「公义」,指ê就是「规范」,mā是属tī上帝教示ê准则。上帝ê「规范」包含怜悯、赦免、慈爱、公正。「公义」包括了基督徒应该有ê siōng基本之伦理行为。


重新查询 专卷研经 罗马书系列
错误回报,请联系comm[@]fhl.net