第六章ê中心思想，是结构tī第14节所讲ê，信耶稣ê人会tùi án-ne无koh生活「tī律法之下，却是tī上帝恩典下」，chit句话说明性命ê转变，特别是tī kui个性命óa靠ê基础上，有完全颠倒ê支柱。

律法，是人订来维护生活规范ê，á恩典是上帝ê拯救，会hō͘人有心存感恩ê态度来做行为准则，对人产生出来ê结果是完全无仝款ê。M̄-koh thang理解使徒保罗会án-ne用chiah-ni̍h长ê篇幅一再论述，是因为有人回应使徒保罗讲，认为只要信耶稣，一切就lóng无关系à。使徒保罗khah强调真正信耶稣ê人，是会用感恩ê心来改变性命态度。Koh讲，伊强调耶稣就是上帝拯救ê恩典，并m̄是用人ê气力á是任何代价thang换来得tio̍h。Mā就是上帝恩典并m̄是商场上ê物件，只有以谦卑、感恩ê心领受，chiah会对人ê性命产生意义。

Tī chit段经文内底，有两个真大ê特色，其一是差不多每节lóng是「相对句」ê型态；亲像：
(1)第15节：无tī律法之下vs.tī上帝恩典之下。
(2)第16节：做罪ê奴仆，结果就是死vs.顺服上帝，就ē-tàng成做义人。
(3)第17节：lín bat vs.chit-má lín。
(4)第18节：tùi罪中被tháu放vs.成做义ê奴仆。
(5)第19节：以前放纵、为非作pháiⁿ、做罪ê奴仆vs.chit-má beh奉献家己、做义ê奴仆、成做圣洁ê器皿。
(6)第20到22节：以前做罪ê奴仆vs.chit-má作上帝ê奴仆。
(7)第23节：罪ê代价是死亡vs.在主耶稣基督内面得永恒性命。

第个特色，是用「奴仆」chit-ê词chē kah九pái，而且lóng是用对照句ê方式出现，就是tùi「罪ê奴仆」到「上帝ê奴仆」，使徒保罗用chit种词teh表明一个人性命ê转变，而且完全ê转变。这mā是基督教信仰所讲ê，一个人性命ê改变，tùi pháiⁿ转换到好；tùi恶变成善；tùi死亡到得tio̍h新性命；tùi失落到得tio̍h（参考路加福音十五：7、10、24、32）。明白chit-ê信息了后，对基督教信仰就是有透彻ê了解à。