罗马书 5章12节 到 5章21节   背景资料  上一笔  下一笔
Chit段经文是第五章ê第二部分,使徒保罗进一步说明前一段经文所讨论ê结语。真chē人ài kā chit段话看做是基督教讲「原罪」ê基础经文。其实,基督教信仰并无讲「原罪」,却是讲罪。罪hō͘人kah上帝ê关系破坏à。

因为犹太人一直有一个观念:罪,所代表ê就是「死亡」。因为án-ne,使徒保罗用「亚当」犯罪chit-ê众人lóng知ê故事来说明:tùi「亚当」开始,人类就生活tī「死亡」中,性命是无希望ê。M̄-koh tī耶稣内面,人却thang ǹg望性命ê koh活,kah上帝之间重建和好ê关系。

第12到14节,tùi chit段经文thang看tio̍h使徒保罗讲亚当是犯罪ê源头ê时,伊指ê是人犯罪ê动机ná亲像亚当仝款,想beh脱离上帝ê疼kah教示。人想tio̍h ê就是家己ài做上帝,这是罪诱惑人弃sak上帝ê主因。每一个人lóng有亚当chit种意念。Á上帝ê疼大大超过人chit种意念,他差遣耶稣到世间来,hō͘人藉tio̍h耶稣á会得thang kah上帝kā破坏 ê关系重新修好,耶稣chit种救赎恩典,大大超过tùi亚当延续而来ê罪恶。

Koh讲,tio̍h注意ê是,当使徒保罗tī chia讲「亚当」ê时chūn,是用复数名词,是teh指人类ê意思。因为án-ne,它所代表ê是整体ê,m̄是单一ê。Mā因为án-ne,圣经teh讲罪ê时chūn,它m̄-nā是讲个人ê罪,mā同时讲人类共同ê罪性kah表现。战争就是一个例,是共同体ê犯罪。

「亚当是预表以后beh来ê hit位」,这是一种对照性ê讲法;因为亚当带hō͘全人类ê是毁灭,á耶稣则带来全人类得tio̍h拯救ê恩典。Chit种讲法tī第18节koh一pái出现。所谓「预表」,chit-ê词原本ê意思是teh指「记号」、「模型」、「像」。Tī chia用「预表」,表示亚当kah基督之间有一个「平行」ê状态,意思是teh指亚当犯罪带来人类死亡;基督ê死却带来人类koh活ê希望。因为án-ne,掠准讲是「预表」,真正意思是「对表」,是一种相对性ê现象。M̄是一头ê两端,却是两种完全无相仝、无交集ê平行状态。

第15节,确实,tī犯罪ê亚当kah救赎ê耶稣之间,有极大ê鸿沟,二者根本就无相仝。Chia强调上帝ê疼,tī耶稣ê身上显示出来ê,是khah赢过亚当犯罪带来ê死亡。因为,藉tio̍h耶稣,人thang看见koh活ê性命,这koh活就是超越死亡ê威胁。

第16到17节,chit两节koh一pái说明亚当带来死亡,chit种死亡ê罪,支配了全人类。M̄-koh却tī耶稣内面,thang看见上帝koh khah浩大ê救恩,beh透过耶稣hō͘所有人类藉tio̍h他来得tio̍h性命ê再生―—koh活。

第18到19节,说明亚当带来ê罪过,继续tī众人中间扩大。M̄-koh mā因为耶稣ê救恩,hō͘所有信靠伊救恩ê人,lóng ē-tàng因为án-ne而成做上帝眼中ê义人。

第20到21节,犹太人久长以来有一个观念:只要遵守摩西律法,就是kah上帝ê关系和好。M̄-koh问题是:人为tio̍h beh维护本来ê律法,却订出koh khah chē ê律法,结果因为律法koh khah chē,犯罪ê人mā koh khah chē。原因是人ê罪,hō͘人欢喜去chhōe律法所无规定ê,去做无应该做ê事。M̄-koh当人心中有基督ê疼了后,所想ê,就不会án-ne,却是会改变想法,无koh是chhōe律法上所欠缺ê,却是想beh用疼去补足律法上ê漏洞,á是bē合宜ê部分,好hō͘人kah上帝之间ê关系koh khah和谐、接近。这mā就是伊tī chit-ê节最后所讲ê「上帝ê恩典koh khah丰富」chit句话ê意思,指出当人藉tio̍h律法想beh「称义」ê时,却jú堕落。M̄-koh当人tńg来到上帝tī基督拯救之爱ê内面ê时,就会发见上帝救恩满溢,而且超过人所ē-tàng想像ê chē。

第21节ê「公义」,是teh指怜悯ê疼。Chit种爱,是对人类世界苦难ê性命发出慈爱ê呼叫、安慰之声,而且有实际医、疼惜ê动作(参考马可福音一:41;马太福音十四:14;路加福音十:33、十五:20)。使徒保罗非常清楚表示,人是藉tio̍h「主耶稣基督得tio̍h永恒ê性命」,这「永恒ê性命」mā就是约翰福音ê中心信息(参考约翰福音三:15、16、五:24、六:40、47、十七:2-3)。

重新查询 专卷研经 罗马书系列
错误回报,请联系comm[@]fhl.net