Tùi chit章ē-tàng看出使徒保罗kā kui个论述焦点lóng khǹg tī亚伯拉罕身上，伊强调一个中心思想：亚伯拉罕是因为「信上帝」，上帝chiah称伊为「义人」（参考创世记十五：6）。伊信，是因为上帝hō͘伊ê应允，á chiah-ê应允是伊当时lóng看bē-tio̍h ê，一直到伊ê后代kiáⁿ孙约书亚ê身上chiah实现。Tùi亚伯拉罕到约书亚带领以色列人进入迦南地，chit段时间真长，至少超过五百年以上，虽然亚伯拉罕看bē-tio̍h，mā摸bē-tio̍h，ē-sái讲是伊确实相信，这是hō͘上帝认定伊是「义人」ê主要原因。Á m̄是因为亚伯拉罕有甚么好行为，chiah得tio̍h上帝ê喜爱。使徒保罗ê chit-ê论点，mā是犹太人无法度否认ê。

Chit段经文有一个基本前提需要注意，当使徒保罗提出亚伯拉罕来做伊论述ê重点ê时，已经说明一项重要ê认bat：旧约kah新约之间有bē-tàng分割ê关系。

第1到4节，使徒保罗特别以亚伯拉罕为例，犹太人只要讲tio̍h亚伯拉罕就会引认为荣。M̄-koh犹太人清楚知影，亚伯拉罕并m̄是因为有甚么好行为á被拣选，kahhō͘ 上帝称呼为义人，却是因为伊信上帝对伊ê应允。Ná亲像头前已经讲过ê，圣经只要讲tio̍h「恩典」，就表示he是上帝白白ê赏赐，á m̄免人ê任何条件来换。因为án-ne，伊用大家生活上所熟悉ê，就是工人得tio̍h工资ê时，伊会认为he是伊应该得tio̍h ê。M̄-koh，如果是恩典就m̄是án-ne了；因为真正恩典是：原是不应该得tio̍h ê，却tī lóng无条件之下得tio̍h，án-ne chiah是恩典真正意义。上帝ê救恩就是chit种恩典。

第5节，chit节ài beh特别注意，上帝会宣判一个罪人为无罪，是因为chit-ê人信上帝。因为án-ne，当上帝差遣伊ê kiáⁿ耶稣到世间来，甚么人相信，甚么人就会得tio̍h上帝赦免ê恩典。M̄-koh圣经真清楚讲上帝bē kā不义ê人、犯罪ê人当做义人。换句话讲，对tī有罪ê人，上帝一定会有公正ê审判、惩罚（参考出埃及记廿三：7），án-ne chiah ē-tàng显示公义ê上帝ê特性。就是因为án-ne，上帝chiah会hō͘耶稣降生到世间来，为有罪ê人当赎罪祭。

第6到8节，大卫感觉家己是一个hō͘ 上帝赦免ê人，因为án-ne，chiah ē-tàng kah上帝有合宜ê关系。一个真正悔改ê人，是不会kah伊所得罪ê人讨价iáu价，ná亲像大卫知影家己m̄-tio̍h，伊无kah上帝计较，因为伊认为上帝iáu存留伊ê性命，就是极大ê恩典。第7到8 chit两节是引用诗篇第三十二篇1到2节ê诗歌。使徒保罗引用chit两节诗歌ê主要目的，是teh强调一个基本信念：若上帝chiâⁿ实beh追究人ê罪，无任何一个人ē-tàng安然khiā立tī上帝面前，这mā是伊tī第三章23节所强调ê：「人人lóng犯罪，亏欠了上帝ê荣耀。」

第9节，这是真重要ê一节，使徒保罗koh一pái提起上帝赦免ê恩典，m̄-nā tī犹太人中间，mā tī外邦人身上。这mā表示上帝ê疼，大大超过所有犹太人所想像ê范围。使徒保罗koh一pái说明亚伯拉罕并m̄是完人，á是完全无犯罪，却是有上帝赏赐hō͘伊特别恩典，因为伊对上帝有绝对ê信心，因为án-ne，上帝「就算伊为义人」。换句话讲，亚伯拉罕kah所有外邦人仝款，lóng是罪人。
第10到12节，chit段经文强调一个认bat：亚伯拉罕并m̄是tī受割礼了后chiahhō͘ 上帝认为是义人，却是tī伊受割礼chìn前就已经被认定à。所以，割礼m̄是伊成做义人ê条件。伊án-ne讲，是beh说明割礼m̄是上帝kah一个人有合宜关系á无ê要件，这要件是在tī信耶稣。使徒保罗进一步说明，对犹太人来讲，亚伯拉罕是in ê祖先，m̄-koh对外邦人来讲，则传承属灵ê「父子」关系。