罗马书 3章21节 到 3章31节   背景资料  上一笔  下一笔
Chit段经文使徒保罗诠释「kah上帝和好」ê意思。基本上,圣经ê教导是:人因为犯罪,致使kah上帝ê关系破坏à。taⁿ,上帝hō͘人有机会thang藉tio̍h耶稣á kah上帝有和好ê契机。使徒保罗终其一生就是beh hō͘大家知影,tńg来到耶稣内面,就等于tńg来到上帝ê恩典中。

Chit段经文开始进一步说明,tī耶稣来到世间,而且为世人献上性命做赎罪祭了后,一切lóng改变à。M̄-nā世人thang藉tio̍h耶稣tī十字架顶ê死,会得thang kah上帝和好,而且耶稣ê救赎恩典,是分享hō͘世间所有ê人,并无对犹太人á是外邦人ê分别。因为上帝是爱世间所有ê人,á m̄是只有爱犹太人。

第21节,使徒保罗先说明上帝「chit-má」亲自向人启示kah他和好ê正确途径,并m̄是因为律法,chit点tú好kah「过去」摩西kah先知ê教导大无相仝。
第22到25节,chit段经文中非常清楚强调两个基本要点:一是每一个人lóng是罪人,罪hō͘人kah上帝ê关系破坏了,而且hō͘上帝ê荣耀失去光彩。M̄-koh,taⁿ上帝beh亲自修复chit种关系,就是第二点:透过耶稣来改善、修复chit种原本已经分裂ê关系。

第24节是非常重要ê一节,chia讲上帝藉tio̍h耶稣kā拯救ê恩典白白赐hō͘人,chit种恩典是无任何代价ê,是无价ê,m̄是人用任何代价ē-tàng来换,á是取代á得来ê。使徒保罗tùi chia beh表明一个基本ê信仰认bat:人无法度用任何方法来取代上帝tī耶稣内面ê救恩。即使是累积真chē行善ê功劳mā无法度换来得tio̍h,chit点对真chē人来讲和-ná真困难,m̄-koh,使徒保罗就是beh表明,如果人ē-tàng用行善来换上帝tī耶稣内面ê救恩,chit种救恩就m̄是所讲ê「白白赐恩典」。

第25到26节是chit章经文ê中心思想。使徒保罗讲耶稣乃是人性命ê「赎回祭」。这是tùi摩西律法提炼出来ê论点,因为摩西律法规定人犯罪了后,tio̍h用献祭ê方式来赎回家己ê罪(参考利未记第十六章)。使徒保罗讲耶稣就是代替人ê罪á献身ê「祭」。换句话讲,耶稣tī十字架顶ê死,就是赎回了人ê罪。Chia讲耶稣ê牺牲是teh「显明上帝ê公义」,注意「公义」chit-ê词,指ê是上帝ê疼,这是怜悯ê疼、疼惜ê疼。另外一方面,「公义」,mā是teh指上帝正确ê审判,无冤枉、偏袒、歪曲等。意思是teh指人犯罪,hō͘ 上帝审判,审判ê结果lóng是正确ê。M̄-koh上帝有爱,愿意藉tio̍h耶稣ê死,hō͘人原本应该被定罪ê惩罚,藉tio̍h耶稣当做「赎罪祭」á赦免、怜悯人,对人「无罪」tháu放。

第27到31节,tī chit段经文中,thang清楚看tio̍h使徒保罗思想ê中心:所有ê人lóng是罪人。既然是有罪ê人,就无甚么好夸口ê。即使遵行律法,mā无法度hō͘人kah上帝之间有合宜ê性命关系,因为人是真软弱ê,ná亲像路加福音第十章25到37节所记载「好撒马利亚人」ê故事中所讲,hit位教律法ê经学教师,即使非常明白律法ê意义,mā是无法度确实遵行律法所规定对厝边ê疼。

Koh讲,非犹太人ê人,并无摩西律法thang循,并无表示上帝无疼in,上帝并无只是犹太人ê上帝,却是所有人ê上帝。上帝爱所有ê世人(参考约翰福音三:16),因为án-ne chiah有耶稣降生tī世界上,为tio̍h是beh hō͘所有ê人lóng因为伊得tio̍h上帝ê救恩。不过使徒保罗强调伊án-ne讲,并m̄是轻视摩西律法,颠倒地,伊讲án-ne是koh khah强化摩西律法ê重要性,ná亲像耶稣讲伊来到世间ê目的,并m̄是be̍h废除摩西律法kah先知教示,á是beh成全(参考马太福音五:17—18),原因是kā犹太久长以来ê误解hō͘导正过来。使徒保罗ê努力就是tī chia,ài当时ê人kā重点khǹg tī摩西律法kah得救亲密结合ê chit-ê结phah开。Hō͘人tńg来到上帝ê kiáⁿ耶稣身上,信耶稣,就是kah上帝重新和好ê关键。Á m̄是遵守律法ê要求。

使徒保罗án-ne讲法,并m̄是teh否认律法ê重要性,却是讲人想beh óa靠遵行律法得tio̍h拯救,根本是行无通ê事。Ná亲像伊tī第20节所讲ê,律法ê效用,是hō͘人知影家己有罪,á m̄是透过律法kah上帝重建和好ê关系。伊强调kah上帝重新建立和好关系,是「只藉tio̍h信」。就是信耶稣,chit点mā thang讲是使徒保罗所有思想ê中心,mā是基督教信仰siōng中心ê基础。

重新查询 专卷研经 罗马书系列
错误回报,请联系comm[@]fhl.net