罗马书 16章17节 到 16章27节   背景资料  上一笔
Chit段经文是最后劝勉ê话。Tùi使徒保罗传福音ê过程中所tú-tio̍h ê情形thang了解,每pái伊开拓一间教会,一离开后,马上就有人跟tòe tī后面进入教会破坏伊所建立ê教会内部和谐。这mā是为甚么伊虽然离开了当地ê教会,却iáu tio̍h ê时常用书信处理教会所发生ê事务ê原因。因为án-ne,伊不时写phoe去处理所发生ê问题。m̄-nā是信仰ê,mā包括了生活方面ê问题,以及信徒彼此之间ê纠纷。

罗马书虽然m̄是为chiah-ê事所写,m̄-koh使徒保罗担心会有人故意去破坏该教会已经领受tio̍h ê福音信息。使徒保罗tī chia用「满足家己ê腹肚」chit句话,来形容hiah-ê专门teh破坏福音事工者ê真正目的,就是kā福音事工看做是「职业」,á无想hō͘性命更新ê使命感。因为án-ne,使徒保罗tī chia ài罗马教会ê众信徒,一定tio̍h防范chit种人进入教会中。使徒保罗tī chia提醒罗马教会ê信徒,讲chiah-ê专门用花言巧语讲「另外一种福音」ê人,乃是「职业传道者」,in m̄是teh传福音,却是为tio̍h「满足家己ê腹肚」。

第17到19节,罗马教会虽然m̄是伊开拓ê教会,伊mā m̄-bat去过,m̄-koh伊ài in预防有人渗透进入该教会去搅乱in tī信仰上ê美好见证。因为chit款tāi-chì tī外面邦ê教会已经屡见不鲜了(参考哥林多后书十一:12—15,加拉太书一:6、9,腓立比书三:2、19)。使徒保罗指出会去骚扰、搅乱教会ê人,是kā福音当做一种职业,chit种人是为tio̍h肚腹之需,出卖良知、真理(参考哥林多后书二:17)。In并m̄是真正teh传扬耶稣koh活ê信息,mā m̄是用耶稣为性命ê主。Tùi第19节thang看出使徒保罗o-ló罗马教会信徒tī信心ê表现上,确实真有口碑。chit-má伊tī chit-ê封信ê结尾ê时,koh一pái表示对罗马教会信徒ê坚定信心非常敬佩。第19节讲in「tī好事顶面聪明,tī pháiⁿ事顶面无知」,所谓「聪明」,指ê是智慧,mā teh表示对tī信靠上帝ê事,ài有坚定ê信心。「pháiⁿ事」,是teh指弃sak上帝ê教导,chit种人是愚戆ê。「无知」,是teh指lóng bē,就算是有人teh教导、诱惑,mā bē去学、去接触。

第20节,chit句「主耶稣赐恩典」,是teh指耶稣ê koh活kah救赎,这是tùi上帝来白白ê恩典,是上帝赏赐hō͘忠于他ê子民,hō͘ chiah-ê忠实ê子民会得thang kah上帝和好。

第21节,「提摩太」,伊是使徒保罗第二pái传福音ê时,tī路司得得tio̍h ê门徒。老母是犹太人,mā是信徒,á老父是希腊人。提摩太tī家己ê家乡路司得kah附近ê以哥念一直有真好ê风评,表示伊是一个真顶真koh认真正青年。因为án-ne,使徒保罗决定带伊同齐去传福音。Tī出发chìn前,使徒保罗iáu特别为提摩太行割礼(参考使徒行传十六:1—3)。「路求」,是使徒保罗tī第一pái旅行传道ê时,tī安提阿教会tú-tio̍h ê宣教同伴,伊是古利奈人(参考使徒行传十三:1—3)。「耶孙」,伊是Tī使徒保罗tī帖撒罗尼迦传道tú-tio̍h暴乱ê时,收留使徒保罗kah西拉到in-tau里避难ê人。因为耶孙帮忙使徒保罗kah西拉,暴徒们大表不满,冲进伊ê厝,并控诉伊,beh掠伊去见地方官。结果伊被要求「缴款具保」后,chiah得tio̍h tháu放(参考使徒行传十七:5—9)。「所西巴德」,伊可能就是使徒行传第二十章4节中所讲ê「所巴特」chit-ê人,bat kah使徒保罗tī马其顿、希腊传道。

第22节,chia讲代写此书信ê人是「德提」,伊真可能是使徒保罗ê秘书。

第23到24节,「该犹」,可能kah哥林多前书第一章14节所提起ê是仝一个人,伊是使徒保罗亲自行洗礼ê信徒。该犹可能mā是一个富有ê人,chiah ē-tàng容纳全体会友「tī in-tau聚集」。「以拉都」,伊是负责财务ê工作。「括土」,这是奴隶ê名,意思是「第四子」。

第25到26节,chit两节是非常重要ê经文,清楚讲出使徒保罗kā耶稣所传「上帝国度福音」,转变成「福音是关系耶稣基督ê信息」,伊kā耶稣kah上帝国度福音亲密地结合做伙。

第27节,chia「全智」ê意思,是teh指一切决定lóng是tī上帝手中。Beh隐藏起来成做奥秘,á是beh掀开来hō͘众人lóng清楚看见,这lóng是tī上帝ê决策,m̄是人ê能力ē-tàng左右。

重新查询 专卷研经 罗马书系列
错误回报,请联系comm[@]fhl.net