Tī头前已经叙述过ê，chit「七个the̍h七支号筒ê天使」，mā分做两组，第一组就是第一到第四个the̍h号筒ê天使，第二组是第五到第七个the̍h号筒ê天使。Tī chit一组ê天使kah另外一组天使之间，插入另外一个景象，就是忽然出现一只飞翔tī高空中ê鹰大声teh-hoah，ài另外三个the̍h号筒ê天使吹号。Chit只鹰连续喊了三pái「惨了」，原本是teh代表三pái号角声音会带来ê灾难。M̄-koh却只清楚出现两个灾难ê结束（参考九：12、十一：14），并无清楚指明第三个灾难ê景象á是始末。

    Chit第五到七个天使吹号ê篇幅，tī编辑上kah头前七个印类似，m̄-koh篇幅比前一组ê加长真chē。chit-má chit三个天使吹出号筒声了后，出现ê境界，并m̄是完全属tī地上ê，却是属tī kui个宇宙关连ê景象。另外，tī第六kah第七个天使之间，koh插入另外一个天使（第十章），然后chiah结束第六个天使吹号所带来ê灾难。这就tī头前第六个印kah第七个印开启之间，插入第七章描述ê另外一个景象，是仝款ê编辑方式。这mā是启示录siōng特别ê所在，就是连续循环、koh再循环。

	Chit段经文是描述第五个天使吹号了后，所发生ê景况，重点是tī出现草蜢攻击所带来ê灾难。

    第1节，「一粒星tùi天空坠落来」，这回应第八章10节所提起ê，有一粒大ê星tùi天顶坠落。M̄-koh chia ê星辰是有位格ê，因为án-ne，chia ê星辰mā thang讲是代表天使（参考一：20、二十：1），就是一般所讲ê「堕落ê天使」。若án-ne，chit位堕落ê天使是「接受无底深渊ê锁匙」，表示chit位堕落ê天使掌控tio̍h深渊ê权柄。

    第2节，chit位天使the̍h开启「无底深渊」ê锁匙，结果产生恐怖ê景象，真亲像火山爆发ê时ê情景。因为「日头kah天空」lóng因为chit-ê「kah-ná tùi大火炉」所「冒出来ê烟而变做昏暗」。Chit种讲法，就kah-ná出埃及记中所描述ê「乌暗之灾」仝款（参考出埃及记十：22），看bē-tio̍h日光á是任何光线。

    第3节，「有草蜢tùi烟里出来，落tī土脚」，chit种描述有ná亲像先知约珥书第一到第二章11节所描述ê景象。Tī chia ê草蜢因为是有ná亲像「蝎子所有ê能力」仝款，因为án-ne，表示它有强烈ê攻击力，会带来极大ê伤害。「蝎子」，是有含剧毒ê一种昆虫，大多数出世tī旷野。它攻击人类á是动物ê时，会致使被攻击者因中毒来死。

    Tùi chit节thang看出草蜢本身就已经够额hō͘人类kah生态受tio̍h严重ê伤害，chit-má，草蜢若是加上毒蝎ê能力，表示其攻击带来ê伤害可能加倍，ē-sái灾难koh khah沉重。

    第4到5节，tī chia ê草蜢是hō͘约束tio̍h bē-tàng伤害「地上ê草、树木á是其他植物」，这表示chiah-ê草蜢bē-tàng随意做tāi-chì。这已经说明上帝创造ê物，lóng会听从上帝—宇宙万物ê创造者ê命令做tāi-chì。Chiah-ê草蜢接受命只thang「伤害hiah-ê额头无盖tio̍h上帝ê印ê人」，而且hō͘ in「受痛苦五个月」，bē-tàng「刣死chiah-ê人」。原来chiah-ê草蜢虽然身上带有ná亲像蝎子hit种ê剧毒，m̄-koh m̄是用来杀害人，却是beh惩罚人。Tī启示录第七章4节有提起上帝ê天使the̍h印，beh盖tī人ê额头壳顶，好做记号，免得受tio̍h伤害。Chit种额头有记号，表明ê是分别为圣，是属tī上帝拣选ê子民，ná亲像出埃及chìn前，以色列人民tī门框顶涂上羊血做记号仝款（参考出埃及记十二：13）。

    第6节，chia ê「五个月」字，thang tùi「五」chit-ê数目了解以色列文化里，chit-ê数字mā表示「圆满」、「适当」ê意思。这表示上帝有恩典，hō͘苦难期间不长，只有「五个月」，这真清楚指出一个明确ê时间，m̄是无限期。

    第7节，「草蜢ê款亲像beh上阵ê战马」，tī约珥书第二章4节讲草蜢ná亲像「奔驰ê战马」。Chia讲chit群「草蜢」ê「头壳顶所戴ê kah-ná金冠」，这是一种形容句话，并m̄是真正戴有金冠冕。Chia是用「金冠」来表示它有强大ê气力，ē-tàng征服任何目标kah对象，是胜利者ê形像（参考启示录四：4、十四：14）。Á「面像人ê面」，表示有人ê智慧，知影听从命令做tāi-chì。

    第8节，「像cha-bó͘人ê头毛」，这可能是teh指草蜢ê触须。Ē-sái讲是一般来讲，草蜢ê触须并无长，chia beh表示chit种草蜢ê样式，kah一般ê无仝。「像狮ê嘴齿」，表示in对beh攻击ê对象bē手软，绝对不留情，有真强大ê刣伤力。

    第9节，「铁ê护胸甲」，表示in真强壮，beh打击in，á是被反击ê时无容易受伤。Á有kóa草蜢「tùi翼股发出ê声音像马车奔驰上阵ê声音」，这是teh形容草蜢之多，明明是无法度数算。

    第10节，chiah-ê草蜢有「尾溜」，而且有长「刺」，chiah-ê刺像「蝎子」ê仝款，ē-tàng hō͘受tio̍h攻击ê人，受tio̍h「五个月ê痛苦」。Chiah-ê lóng teh表示chit群草蜢确实kah咱所看见ê一般草蜢大无相仝。

    第11节，「有一个王管辖in」，这说明chit群草蜢是有首领teh带领in。Chia讲首领ê名「希伯来话叫亚巴顿」，chit-ê意思就是teh指「灭亡」。Tī chia同时koh加上了希腊话ê名叫「亚坡伦」，chit-ê意思是teh指「毁灭者」。会用chit两种语言，主要目的是beh hō͘当时ê人lóng ē-tàng明白其意。

    第12节，ná亲像一个报幕者，说明第五个天使吹起第五枝号筒了后ê「灾艰苦心去à」，并且预告「iáu有两种灾难beh来」。就是teh beh吹响ê第六枝kah第七支号筒。