启示录 9章13节 到 9章21节   背景资料  上一笔  下一笔
Chit段经文是描述有关第六枝号筒吹响了后,发出ê景象。Tī chia出现ê,并m̄是怪兽,却是「天使」,而且koh一pái出现「三分之一」ê惩罚。咱mā thang讲chit-ê「异象」真特别,原因是tī「异象」中koh有另外ê「异象」(四个天使)出现。

    第13节,「金祭坛ê四角」,照摩西律法ê规定,祭坛顶ài有凸出ê四角(参考出埃及记廿七:1—2),这是当做赦免罪犯用ê(参考列王记上一:50—53)。Tī chia,指chit-ê金祭坛是pái tī上帝面前。Á声音tùi chit-ê金祭坛发出,表示上帝审判ê声音。

    第14节,发出ê声音向chit-ê吹第六枝号角ê天使讲,beh去释放被关ê「四个天使」,in是被关tī「幼发拉底河」。注意tī chit「四位天使」chìn前有加上冠词,表示chit四位天使是真特别ê对象。

    第15节,chit节讲被释放ê「四个天使」,是beh为上帝进行毁灭工作ê。In kā毁灭「全人类ê三分之一」。M̄-koh这mā同时teh表示尚且iáu有「三分之二」ê人类iáu被看顾tio̍h,bē受tio̍h毁灭力量ê波及。

    Tī chia作者用「此年、此月、此日」来表示有一个特定ê时间一到,上帝就会照计画进行摧毁ê工作。

    第16节,骑兵「两亿」,表示骑兵非常chē,chē到无法度数算ê意思(参考诗篇六十八:17,启示录五:11)。

    第17到19节,chit三节描述chiah-ê骑兵ê穿插以及进行毁灭工作ê情景。

    「红得像火,蓝得像蓝宝石,黄得像硫磺」等,chit三项lóng是teh描述灾难来临ê时,连想beh逃避ê空间kah机会mā无。

    「马ê头像狮ê头」,表示chiah-ê马非常凶悍,看起来就hō͘人胆寒心怯。而且会tùi in ê嘴中喷出「火、烟,kah硫磺」等物,chit种描述lóng tī说明,这表示in会带来彻底ê毁灭。而且毁灭ê数字仝款是「三分之一」。

    马ê「尾溜像蛇,顶面有头」,而蛇ê头有毒牙会致人tī死。Chiah-ê lóng teh表示只要被chit种马ê尾溜phah到,必死无疑。

    第20到21节,chit两节chiah是作者约翰想beh提醒读者ê经文。Tī第15节kah第18节lóng有提起第六个天使吹出号角声,原本是beh毁灭「三分之一」ê人类。M̄-koh真正用意,就是beh劝勉hiah-ê iáu有机会得tio̍h拯救ê三分之二,ài in赶快悔改,若无,in mā会亲像hit-ê被毁灭ê人类。

    Chia提起「无tī chiah-ê灾难中被刣ê人」,就是teh指chhun落来ê「三分之二」ê人,可惜是in「犹原不悔改」,继续去拜家己「亲手所造ê偶像」,是「无法度看、无法度听、无法度行ê物件」(参考诗篇一一五:4—8、一三五:15—18,以赛亚书四十四:12—17、四十六:6—7,耶利米书十:3—5)。Mā因为所拜ê是虚假偶像ê神,因为án-ne,bē想beh「悔改」,颠倒,iáu继续做出「凶刣、邪术、淫乱、偷the̍h」等罪恶行踏,kan-taⁿ会为家己带来koh khah大ê惩罚而已。

重新查询 专卷研经 启示录系列
错误回报,请联系comm[@]fhl.net