启示录 6章1节 到 6章8节   背景资料  上一笔  下一笔
Tùi第六章开始直到第十一章止,ē-sái讲是启示录siōng主要ê部分。Tī chit段经文中,记载有关用七个印加封ê册卷被phah开(六:1—八:1),以及tùi phah开ê册卷中所出现ê七个天使吹起号筒ê情景(八:2—十一:19)。

    Tī phah开ê七个印中,koh分做两个段落,第一个段落是前四个印(六:1—8),第二个段落,是后三个印(六:9—八:1)。M̄-koh比较特别ê所在,是第七个印tú phah开,就koh出现连串ê「七支号筒」,每一个号筒lóng有一个吹号ê天使。Chit七个号筒有一kóa部分重复头前七个印之信息,m̄-koh mā有真chē新ê信息出现。这就kah-ná七个印加上七个号筒,然后彼此相连攀结交织做伙,不断重复mā不断「脱」出。这「脱」出来ê部分,就是七个号筒ê信息,而交织做伙ê,就是重述七个印ê意义。

    Chit段经文是记载羊羔phah开七个印中ê前四个印,chit四个印所表明出来ê,就是罪恶,为人类社会带来祸害。M̄-koh无论chiah-ê罪恶是多强大力量,lóng会因上帝ê忿怒、惩罚,面临大灾难—战争、饥荒、瘟疫,并且受tio̍h野兽攻击。每pái chit四个印一phah开,lóng会重复一个重要ê动词,就是「来」。续落来就有一匹无仝颜色ê马会出现。这是一种编辑上ê技巧,teh说明人类tī苦难中ê一种心灵ǹg望,期待tio̍h公义ê上帝ê审判会赶紧临到,好制止当teh毁灭人类世界ê邪恶力量。

    第1节,这是开启「第一个印」,四个活物中ê一个发出「雷轰ê响声」圣经作者ài用「雷轰ê响声」来表达上帝临到,á是他ài beh进行审判ê工作,启示录作者kúi-nā pái使用「雷轰」、「响声」ê词,lóng是teh表达chit种信息(参考四:5、十一:19、十四:2、十六:18)。对照第四章7节,chit第一个活物是「狮」。

    「来!」,chit-ê「来」字,tī希腊文mā thang当做「去」ê意思解释。M̄-koh tī chia,以及以后ê「来」字中,这是对骑tio̍h马ê骑士讲ê。骑士骑马ê速度jú快,表示耶稣koh再临ê时辰已经接近,审判ê时刻随时会来临。

    第2节,「看见一匹白马」,然续后落来讲chit匹马所代表ê意义是「得胜」,mā用来表示好兆头,而且「得胜koh得胜」。M̄-koh比马iáu重要ê是「hit-ê骑马ê」,伊得tio̍h胜利者ê「冠冕」,这并m̄是代表传承王位ê王冠。

    Chia讲骑士手上the̍h「弓」,表明这是来自外族攻击者所用ê兵器。「弓」mā thang代表「军队」。

    第3到4节是phah开「第二个印」,第二个活物讲话,如果对照第四章7节,第二个活物乃是小牛。Chia并无清楚讲出是甚么人phah开「第二个印」,m̄-koh thang理解,必定是「羊羔」chiah有资格kah能力。Chit位骑士所骑ê马是「红色ê」。「红」,chit-ê字有含血、溅血ê意思,这tú好就是战争死伤者身上ê所呈现ê画面,这mā是人世间siōng残酷ê影像:家己人「互相残杀」。这表示「内战」频繁,tú好kah第一匹白马所代表ê外患相对照。Mā因为án-ne,用「红色」ê马来表示血溅四界,人民ê性命被严重摧残。

    「一把大剑」,这mā是战场上ê兵器。表示杀戮ê事件kā层出不穷。

    第5到6节,phah开「第三个印」,出现ê是一匹「乌马」,这代表ê就是食物缺乏,这kah饥荒有密切关系。Thang án-ne了解:战争kah饥荒是分bē开ê,因为战争,hō͘人力lóng投入了战场,田园自然会废耕。因为废耕,á是田园成做战场,就bē有任何收成,饥荒tòe之而来。

    「Hit-ê骑马ê手中the̍h一个天平」,就是古代ê秤,tī chia mā是一种象徵饥荒ê时代,按照公道分配粮食,m̄-koh每一个人所分配到ê食物非常ê少,无够生活所需要ê。因为tī chia讲每工所得tio̍h ê「工资只有ē-tàng买一公升小麦」,á是只买tio̍h「三公升大麦」,表示生活已经陷入困境。

    若是用一工ê工资是一个「银á」(denarius,参考马太福音二十:2),一个银á tī平时thang供一间六口食饱三餐。Tī平时一个银á大约thang买tio̍h八到十二升ê小麦,á是二十á是三十升大麦。饥荒,另外一方面所呈现出来ê社会问题,就是经济上有严重ê通货膨胀。

    「橄榄油kah酒bē-tàng糟蹋」,表示tī饥荒、缺乏粮食ê时代,任何thang食物lóng真珍贵。

    第7到8节,这是phah开「第四个印」,看tio̍h ê是一匹「phú色ê马」。Chit种颜色mā是死亡了后尸体ê颜色,因为án-ne,「phú色」所代表ê意义,就是「死亡」。Á kah「死亡」相tòe ê就是「阴间」。

    Chia讲死亡「管辖四分之一ê土地」,表示iáu有四分之三乃是清气ê,有性命ê,m̄是被「死亡」kah「阴间」所控制。M̄-koh被控制ê所在,则有「战争、饥荒、瘟疫,kah地上ê野兽」等tio̍h beh惩罚人。

重新查询 专卷研经 启示录系列
错误回报,请联系comm[@]fhl.net