这是最后写hō͘七间教会ê最后一封phoe，mā是第七封，是写hō͘老底嘉教会ê信。这mā是一封责备ê信，因为老底嘉教会tī上帝眼中，真ná亲像一间真「无性命力」（无冷无烧）、而且「jōa-ni̍h-á悲惨可怜」ê教会。「老底嘉教会」chit位词后来mā变成一特有ê意思，是teh形容一间无活力ê教会。Á是讲beh形容一间教会无活动力，无任何事工thang讲ê时，就会讲这是一间「老底嘉教会」。

第14节，「老底嘉」城，这是tī主前第三世纪中叶，叙利亚王安提阿哥二世（261～246B.C）建造ê，为tio̍h是beh记念伊ê bó͘老底丝（Laodice），伊特别kā chit-ê城市号名「老底嘉」。Chit座城设tī莱卡斯（Lycus）河ê附近，距离非拉铁非东南方大约有六十五公里ê所在，是一个交通中心，mā是一个商业城市，ē-sái讲是小亚细亚siōng富裕ê商业lóng会城市。素以纺织业出名hia迩，特别是当地ê毛料色泽乌乌光泽，羊毛地毯品质甚佳，mā有医学院，致使hit-ê城mā同时是小亚细亚ê医疗中心，医疗水准非常高，特别是目药膏远近驰名。Chit-ê城ê犹太人真chē，大约有七千gōa cha-po͘人。若是koh加上妇女、gín-á，犹太人ê数目就koh khah chē出kúi-nā倍à。因为án-ne，hit-ê城特别允准犹太人thang保有家己ê犹太教信仰。

主后61年，hit-ê城因为受tio̍h强大地动摧毁，当时罗马皇帝尼禄原本想beh支助重建ê经费，m̄-koh hit-ê城ê人民拒绝接受罗马皇帝尼禄ê好意，原因是hit-ê城因为商业兴盛，经济能力甚强，不过mā有人认为he是kah hit-ê城犹太人人数真chē有关。因犹太人差不多lóng是经商，koh tī商业上控管经济影响力非常大，chiah-ê犹太人对尼禄皇帝无好感，in用拒绝接受补助chit种方式来减少罗马帝国政府对hit-ê城ê干涉。

老底嘉是kah歌罗西、希拉坡里chit两个城隔河相看，chit三个城市tú好形成一个大ê都会区域。Chit三间教会真有可能lóng是由以巴弗所创设ê（参考歌罗西书四：12—13）。使徒保罗teh写hō͘歌罗西教会ê书信中，mā交带beh kā该书信转交hō͘老底嘉教会信徒看，mā同时ài歌罗西教会信徒阅读伊写hō͘老底嘉教会ê书信（参考歌罗西书四：16）。可惜ê是，使徒保罗写hō͘老底嘉教会ê书信，chit-má已经chhōe bē-tio̍h。Hit-ê教会ê信徒lóng是tī宁法chit位姊妹ê厝聚会。目前hit-ê教会已无koh存在，可能就是kah hit-ê教会「不冷不烧热」有关系。

Chit张phoe所提起ê内容，lóng是责备ê话，无任何o-ló ê言词，ē-sái讲是七封phoe中，siōng严苛ê一封，比起tī前一讲所提起写hō͘撒狄教会ê书信iáu koh khah严厉。这可能是kah hit-ê教会ê信徒因为生活太富裕而陷入堕落ê中间有关。

Chit节讲见证老底嘉教会之败坏者，乃是一位「阿们」、「忠实可靠」、上帝创造之根源者。所谓「阿们」，意思是teh指心中所想ê lóng是「真实ê」。

「上帝创造之根源」，chit句话thang参考约翰福音第一章1到4节；歌罗西书第一章15到17节；希伯来书第一章2节等等，chiah-ê经文lóng说明耶稣基督就是一切性命ê根本。离开耶稣基督，人ê性命就会lian去、死去。

第15到16节，「不冷不烧热」，这是teh指老底嘉教会呈现出来ê信仰状态。Chit种态度ê特徵就是认为信仰并m̄是in性命siōng重要ê事，thang有thang无，kah-ná是性命中ê身外ê物，无一定tio̍h拥有。Koh讲，作者用「不冷不烧热」chit-ê形容词来描述，真可能是kah当地ê地理环境有关；就是tī老底嘉城附近有温泉，chiah-ê温泉ê水流经一片广大平原了后来到老底嘉城ê时，已经无亲像tú涌冒出来ê温泉水hit种热phut-phut ê，却是温温ê。Á继续落去流到歌罗西城ê时，原本热phut-phut ê温泉水，已经变成冷泉水。因为án-ne tī当地流行tio̍h一句话：「烧热温泉有疗效作用，冷泉水hō͘人精神饱足，只有温温ê泉水，hō͘人倒尽胃口。」chit句话tú好反应出chit节所讲ê「我倒愿意你á是冷á是烧热」ê意思。因为无论是烧热á是冰冷ê温泉水，lóng是对身躯有疗效kah提神作用。只有不冷不烧热ê温泉chiah会hō͘人无甚么感觉，对身躯ê健康mā无甚么帮助。

Chia讲beh tùi嘴中kā老底嘉教会「吐出」来，是因为温泉ê水硫磺气味chiok厚、水质混浊，无法度lim下口，因为án-ne，当地ê人ài用之来做催吐剂ê路用。因为án-ne tī第16节作者特别强调讲ài kā chit间「无冷无烧」ê老底嘉教会「吐」出去，意思就是放弃，无koh珍惜，mā thang表示讨厌ê意思。

第17节，「富足宽裕、lóng无缺乏」，tú好kah「sàn-chhiah、失明、koh赤身露体」呈现明显对比。Kā chit节对照示每拿教会ê「患难kah sàn-chhiah」tú好是颠倒；tī示每拿教会，信徒因为tú-tio̍h迫害而成做「患难kah sàn-chhiah」ê状态，m̄-koh tī审判者上帝ê眼中却是「富足ê」（参考二：9）。M̄-koh tī老底嘉教会，表面上看起来是「富足宽裕、lóng无缺乏」，其实，这只是好看而已，并无实质ê内涵thang讲。因为án-ne作者讲tī审判者上帝ê眼中，hit-ê教会是「sàn-chhiah、失明，koh赤身露体」。这mā讲出老底嘉教会ê信徒确实真有钱，m̄-koh却无真实ê信仰。

「失明」，原来老底嘉城是一个医药真发达ê城市，它ê特色就是目药水真出名。原本目药水是beh帮助人目睭明亮ê，m̄-koh chit-má却是失明ê，这表示hit-ê教会ê信徒已经被世间ê物欲hō͘迷惑了心灵，离开信仰ê道路，á是对信仰ê热心、坚持已经消失à。

而「赤身露体」，chit-ê词原本ê意思是teh指「见笑」（参考创世记二：25）。Tī chia表示hit-ê教会已经到à hō͘人看tio̍h就会感觉见笑、作呕ê凄惨样式。

第18节，老底嘉城siōng出名ê三件物件：一是钱财（拥有银行业，表示经济活动力甚强）。二是纺织业兴盛，因为hit-ê城出产羊毛，koh tī染织业上真兴盛。三是医药出名，特别是目药膏，以及胃药。

Chia「买」字，意思是teh指「得tio̍h」。「买精链ê金子」，是teh指经过ná亲像火一再地提炼了后ê金子，真纯、幼路、súi、亮晶晶ê款。信仰应该就是beh有chit种内涵，而án-ne chiah是老底嘉教会信徒该追求获取ê。

「买白袍穿」，thang参考第三章5节hō͘撒狄ê信中提起ê「白袍」。Tī老底嘉城siōng出名ê羊毛产品，就是乌色羊毛织品。Á tī chia却讲是「白袍」，tú好kah老底嘉城出产ê「乌色羊毛」成强烈ê对比。意思是teh指thang放弃老底嘉城siōng出名ê产物，改用真实、圣洁羊毛所织成ê「白袍」披在身上，以显示性命ê尊贵、纯洁、无瑕疵。Án-ne就thang遮盖in tī信仰ná亲像「赤身露体」。因为只有心中纯洁ê人chiah ē-tàng面对上帝（参考马太福音五：8，约翰福音四：23—24）。

「买目药擦你ê目睭」，头前已经提过老底嘉城是当时小亚细亚地带出名ê医药城市，特别是hit-ê城以出产ê目药膏siōng-kài出名。M̄-koh一个人性命中siōng thang悲ê是「心盲」致使人看bē-tio̍h真理，mā看bē-tio̍h上帝ê救恩（参考约翰福音九：39，另外参考以赛亚书六：9—10）。Chia teh kā老底嘉教会讲需要真理ê信息，thang hō͘ in ê心灵得tio̍h饱足kah醒起来（参考以赛亚书五十五：1—3）。

第19节，chit节引用自箴言第三章12节，上帝管教他所疼ê子民。Chia讲上帝ê责备、管教有两点：其一是勉励老底嘉教会「tio̍h热心」。这是对老底嘉教会信徒ê「不冷不烧热」之信仰所提出ê呼吁。其二是in「tio̍h悔改」。这mā是teh写hō͘七间教会中第五次提起，是针对五间被责备ê教会所讲ê（参考二：5、16、21、三：3）。悔改，这mā是kui本圣经siōng中心ê信息（参考路加福音五：31—32），mā只有真实ê悔改，chiah ē-tàng改变上帝原本beh惩罚人类ê计画。

第20节，这是对老底嘉教会温柔ê呼吁，表示审判ê主尚且对hit-ê教会存希望，若是hit-ê教会信徒ē-tàng悔改，全能ê主非常期待ē-tàng kah hit-ê教会信徒同齐分享拯救ê疼。

启示录ê作者tī chia强调一个重要ê认bat：就是「听见」上帝ê声音而知影悔改ê人，就有机会得tio̍h上帝所hō͘ in ê特权，享受同桌共席ê喜乐，并且iáu thang享有天顶ê宝座，这是上帝极大恩典。M̄-koh相对ê是心硬、不悔改ê人，永远听bē-tio̍h救主ê声音。即使救主已经「khiā tī门外敲门」，内面iáu是听无看tio̍h，得救ê机会mā会因为án-ne而失去。

第21节，坐tī「宝座」上，这是teh指极大ê荣誉（参考廿二：3），因为这是属tī上帝国度宝座，同坐tī chit-ê宝座者，mā就拥有「审判」ê权柄，chit-ê权柄乃是一种「特权」。启示录作者一再提出chit种观念（参考一：9、五：10、二十：6、廿二：5）。Chia ê「得胜」一词，是teh指赢过chit-ê世界ê意思，mā是teh指赢过chit-ê世界ê死亡、苦难ê意思（参考约翰福音十六：33，另外参考约翰一书五：4）。

第22节，每封phoe ê最后结语lóng仝款，lóng仝款用「圣神向各教会所讲ê话」chit句话。所谓「向各教会」，就是teh指chiah-ê信虽然lóng是写hō͘特定教会收看，m̄-koh mā同时是beh hō͘所有属tī基督教会ê信徒看。