Chit章1到5节是继续第廿一章9到27节所描述新耶路撒冷ê景况。续落来第6节开始一再地强调讲：koh活ê耶稣teh beh来临。Á伊ê来临会是真清楚ê审判，而且按照每一个人ê行为hō͘ in应得ê报应。

Chit-má第廿二章1到5节是继续讲tio̍h新ê耶路撒冷城之内部。虽然是只有短短ê五节经文，ē-sái讲是却hō͘读者真容易想tio̍h创世记第二章伊甸园内部ê景象，有河流、性命树，以及歌颂o-ló上帝，因为tī chit新ê城里，无koh有乌夜、死亡，这是上帝完全ê统治之地。这真清楚表明新ê耶路撒冷城，m̄是用人ê手建造起来ê，却是上帝亲手建造ê城。

    第1节，thang参考以西结书第四十七章1到12节；该处描写先知以西结tī异象中看tio̍h圣殿ê门口，有泉水tùi门ê入口所在下底涌出，流向东方，就是圣殿头前ê方向。Tī撒迦利亚书第十四章8节，soah讲tī耶路撒冷kā有「活水」流出来，分做两半，一半流到死海，另外一半流到地中海。

    「天使」，这是teh指第廿一章9节提起ê hit位天使。

    「性命ê河流」，tī第七章17节、第廿一章6节lóng bat提过chit-ê性命ê泉水。Hit-ê诗人mā án-ne讲：「有一道河流kā喜乐带到上帝ê城，到至高者khiā起ê圣所。(全民版)」（诗篇四十六：4）先知约珥ê预言中mā án-ne提起，有án-ne ê一工，上帝beh临到耶路撒冷，hit时chūn「有一条泉水beh tùi上主ê圣殿流出来」（参考约珥书三：18）。

    「tùi上帝kah羊羔ê宝座流出来」，chit句话已经真清楚说明，ē-tàng赏赐性命泉水ê，是上帝kah羊羔耶稣，却m̄是任何人为ê气力。

    启示录作者用chit种方式真清楚teh说明一个基本认bat：用真诚kah心灵敬拜上帝ê人，chit种人ê性命kā有上帝同在，而伊会ná亲像得tio̍h永远bē止息ê泉源一般，有永恒ê性命（参考箴言十五：27），因为上帝就是「性命ê泉源」（参考诗篇三十六：9）。

    第2节，thang参考启示录第二章7节，以西结书第四十七章12节。

    Tī伊甸园中有一棵是分别善恶ê果子树，另外一棵是性命树。M̄-koh人违背上帝旨意偷食了分别善恶ê果子，结果上帝派出天使kā性命树包围起来，hō͘人无法度接近，直到启示录讲出未来ê景象ê时，人才有机会koh一pái得tio̍h chit-ê性命树ê果子。

    「性命树」，就是用性命ê泉水灌溉ê，结出来ê果子就蕴含永恒ê性命。chit-ê树ê果子mā ē-sái病人得tio̍h医，因为树ê叶áthang当药材。换句话讲，新ê耶路撒冷并m̄是只提供福气hō͘ khiā起tī内面ê人，甚至mā thang帮助hiah-ê iáu未进入ê人，性命得tio̍h医。

    「河ê两pêng有性命树」，chit句话是teh表示随时伸手lóng thang摘得tio̍h性命树ê果子，而且永bē缺乏，因为是「每年结果子十二次」，这「十二」，thang表示齐全、完美ê意思，mā表示果子够额提供给上帝所有ê子民。

    第3节，参考创世记第三章14到19节，chit段经文记载当人犯罪了后，上帝对人进行严厉ê惩罚。Taⁿ是tī新ê耶路撒冷城里，kā「无koh有上帝所诅咒ê事」，bē koh再发生因诱惑而弃sak上帝ê事，mā bē有上帝ê忿怒kah惩罚ê tāi-chì发生，mā teh表示上帝kah人之间ê关系已经和好，已经修复。

    Tī chit城里有「上帝kah羊羔ê宝座」，表示上帝kah chit-ê城同在，敬拜上帝ê子民lóng会聚集做伙tī-chia，mā表示此城是一个荣耀ê城。

    第4节，「in beh朝见上帝」，过去hiah-ê人认为若是看见上帝ê面必定会死亡（参考创世记十六：13、三十二：30，出埃及记三十三：20、23），chit-má是tī新ê耶路撒冷城里，所有敬拜上帝ê人，lóng thang真自然tek朝见上帝ê面，看见上帝ê荣耀。因为上帝已经kā伊ê名写tī chiah-ê人ê「额头」，表示chiah-ê人lóng是属tī上帝特别拣选出来ê子民，hō͘ in有chit种特别ê福份。

    第5节，chit节回应启示录第廿一章23节所讲述ê，tī chit新ê耶路撒冷城里，无需要日光á是月光，因为上帝kah羊羔就是亮光。

    「无koh有乌夜」，表明无koh有死亡ê意思。相对tī「乌夜」，就是「光」，表明ê是性命。「上帝是in ê光」，意思是teh指上帝是in性命ê来源（参考约翰福音一：4—5）。