启示录 22章6节 到 22章21节   背景资料  上一笔
Tī chit段经文中,作者用「看!我teh要来à」chit句话,说明上帝审判ê时刻teh beh来临,救主耶稣真紧to̍h会来到。

    第6节,「chiah-ê话是真实可靠ê」,是teh指天使传达上帝ê信息是「真实可靠」ê话(参考启示录廿一:5)。上帝ê话ê范围包括kui本圣经,作者特别指出上帝「赏赐圣神hō͘众先知」,而先知就是tī传达上帝ê话语,旧约圣经中大部分lóng是先知ê信息。Koh讲是「主上帝差遣伊ê使者」,chiah-ê使者mā包括摩西,伊是旧约圣经中siōng重要ê使者。因为án-ne,chit节所讲ê「chiah-ê话」,就是teh指摩西律法册kah先知文献,这就等于是kui本圣经ê意思。

    「短期内beh发生ê事」,thang对照启示录第一章1节、19节、第四章1节。指ê就是耶稣koh再临ê事件,表示时间真紧to̍h会来临,bē等真久。有真chē ê「奴仆」会为tio̍h án-ne事件做见证。

    第7节,Tī chit章中共计出现三pái,kah第12节、第20节是仝款ê话。
    「看!我teh要来à」,这第一pái是天使讲ê,第二pái kah第三pái lóng是耶稣家己讲ê。这是天使引用耶稣所讲ê话,表示耶稣koh再临ê时刻就beh来到,chit对hiah-ê tú-teh受难中ê基督徒来讲,是非常大ê安慰kah鼓舞,mā是陷tī被迫害中ê苦难性命,siōng好ê信息。

    「hit-ê遵守chit-ê册顶面预言ê人」,chit句话thang参考启示录第一章3节。这真清楚说明一件事:上帝启示ê话语所写做ê圣经,一定tio̍h遵守,若是只有研究而无去遵守,án-ne就无甚么意义thang讲,因为圣经上帝ê话,无法度只有研究,而是beh去遵行、实践。相对ê,无研究清楚,就根本m̄知上帝ài咱遵行ê是甚么事。

    「实在有福气」,这是第六pái ê「实在有福气」,启示录总共提了「七」次(参考一:3、十四:13、十六:15、十九:9、二十:6、廿二:7、14)。

    第8到9节,chit两节thang参考启示录第十九章10节。这是第二pái提起bē-tàng拜天使,因为天使kah先知等,「仝款lóng是上帝ê奴仆」,m̄-thang去拜人,唯一beh敬拜ê对象只有上帝。Mā tùi chit两节thang想像会tio̍h,为何早期教会发生崇拜天使ê错误行为。

    「听见mā chhōe -tio̍h」,chit句话讲出作者是kā家己亲目看见、亲耳听见ê事见证出来(参考使徒行传四:20),chit种见证siōng真实。

    第10节,「m̄-thang kā chit本册顶面ê预言封闭起来」,koh一pái强调耶稣koh再临ê时刻就beh快到à。因为án-ne ài kā chiah-ê来自天顶ê信息公开来,hō͘ koh khah chē ê人听见、明白,并且ē-tàng tùi án-ne信靠上帝羊羔而得tio̍h拯救ê恩典(参考启示录一:3)。

    第11节,chit位天使真清楚指出:tī末后ê日子,是kā性命kah死亡摊开,这ná亲像摩西tī往生chìn前对以色列人所讲ê(参考申命记三十:1、15)。Chia启示录作者记落来天使传出来上帝ê信息是:tī chit最后ê机会,若iáu不醒悟过来,就无机会à。每一个人beh为家己ê选择负责。

    第12节,「我beh带来报赏」,这是天使传出耶稣ê信息。Kah第7节所讲ê「有福」有仝款ê含意,chia讲遵守教导ê信徒必定会有奖赏ê。「报赏」chit字,原希腊文「misthos」,是teh指应得ê待遇(参考启示录二:23)。

    第13节,参考启示录第一章8节、第廿一章6节。

    Chit节讲「开始kah终结」,这表明性命之主有「权威」,他thang启动一切,mā thang kā它停止。Tī chia用「事(tāi)先kah末后」,表明「永恒」ê意思。
    第14到15节,这是相对存在ê现象。

    「洗净家己衫裤ê人」,参考启示录第七章14节,指出ē-tàng洗净家己ê衫裤,并m̄是用人ê气力做会到,而是beh用羊羔ê血(参考哥林多前书六:11),因为chiah-ê污秽乃是指性命中ê罪状、斑点。想用人ê气力除去是枉然ê(参考罗马书七:14—25)。

    Chia第七pái提起「有福」。
    「有权食性命树á顶ê果子」,chit种人就是「有福」,因为从来无人食过chit种果子(参考创世记三:22—24)。Á食chit-ê果子ê人ē-tàng拥有永恒ê性命。

    相对tī另外一种人,就是所谓「留tī城外」ê人,in ê结果会ná亲像启示录第廿一章8节所提起ê人仝款,会面临「第二pái ê死」,永远tī「火湖」中(另外参考诗篇一○一:7)。

    第16节,thang参考启示录第一章1节。作者一开始就讲chit本册乃是得自耶稣ê启示而写落来ê。M̄-koh tī册内mā有真chē pái提起天使对作者讲ê话(参考启示录十九:9、廿一:9、廿二:6)。天使mā是受命传达上帝á是耶稣ê信息,却m̄是跟tòe己意而讲话。

    「大卫ê kiáⁿ孙」,参考启示录第五章5节,以赛亚书第十一章1节、10节。Tùi人ê族谱来看,耶稣就是大卫ê kiáⁿ孙(参考马太福音一:1)。伊是「明亮ê星辰」,表示伊是性命ê拯救者,带hō͘信tùi伊ê人看会tio̍h性命ê亮光(参考约翰福音八:12、九:5)。

    第17节,chit节连续用三pái「来」回应第7节、第12节、第20节ê「我teh要来à」。Chia第一pái用「圣神kah新娘」,第二pái用「所有听见ê人」,第三pái是「口渴kah愿意ê人」。

    「新娘」chit-ê词tī chia就是teh指基督ê教会,它对所有ê人呼召讲「来」,而呼召ê对象不限,只要是愿意听从「圣神」所启示ê声音,而且愿意回应讲「来」ê人。因为án-ne,tī chia ê「来」,是一个听tio̍h就随时力行ê态度。只要是「所有听见ê人」愿意用谦卑ê心来领受,就ē-tàng得tio̍h。

    「口渴ê人lóng来」,Tī以赛亚书第五十五章1到3节记载所有心灵饥渴ê人lóng thang来领受,而且无需要付出任何代价,只要是「愿意ê人lóng thang白白来接受」。

「白白接来接受」,chit句话mā是使徒保罗所讲ê上帝恩典,就是「白白」赏赐hō͘人,只要愿意,就ē-tàng领受得tio̍h(参考罗马书三:24)。

    「性命ê水」,chit句话thang参考约翰福音第四章14节。另外,耶稣mā bat对hiah-ê四界去chhōe伊ê民众讲,伊就是性命ê粮食,tùi伊ê身上领受chit-ê粮食ê人永远bē饥渴(参考约翰福音六:35)。

    第18到19节,chit两节强调chìn前所写落来ê,lóng是tùi上帝来ê预言,因为án-ne,无论加添á是删减,lóng是对上帝极大ê亵渎,是hō͘严厉禁止ê行为。箴言ê作者mā提起仝款ê警告(参考箴言三十:5—6)。Chit种「郑重警告」,mā表示是一种非常忠诚ê心意,而且用严肃ê态度讲话。

    「享受性命树kah圣城ê福泽」,指ê就是永恒性命ê福气。

    第20节,kui本启示录ê中心题旨,就是beh kā读者讲:耶稣就「teh要来」。早期教会有一个观点:当耶稣koh再临ê时chūn,mā就是上帝审判ê时刻来临,而chit点mā是早期教会共同ê期待(参考哥林多前书十六:22)。因为in lóng面临严厉ê迫害,生活tī极大ê痛苦里。

    第21节,「愿主耶稣赐恩典hō͘ lín大家」,chit句祝福ê话,tùi作者写作ê时代到chit-má,一直是教会聚会中不时使用ê祝福。

重新查询 专卷研经 启示录系列
错误回报,请联系comm[@]fhl.net