启示录 21章9节 到 21章27节   背景资料  上一笔  下一笔
Chit段经文是teh描述新ê耶路撒冷城,用此来譬喻新ê天地出现kah过去ê景况完全无仝款。chit-má是一座非常荣耀ê圣城,因为上帝kah羊羔就是hit-ê城ê管理者kah掌权者。作者约翰用hit-ê城无需要点灯mā会明亮,甚至光芒四射ê描述,来突显出圣城kah人所建造ê城境界是完全颠倒ê。

    第9节,thang参考第十七章1节,m̄-koh并bē-tàng确定是m̄是仝一个位天使。chit-má所看tio̍h ê是纯洁「新娘」,mā「就是羊羔ê bó͘」。

    「羊羔」,chit位词tī本册第廿一到廿二章共计出现七pái(参考启示录廿一:9、14、22、23、27、廿二:1、3)。Teh表明上帝ê拯救,ná亲像一只献祭tī祭坛上ê羊羔,带有救赎性命ê重要含意。另外,「羊羔」mā teh表示特别拣选ê「对象」。古早时ê以色列人,beh献祭ê羊羔lóng一定tio̍h经过特别ê拣选,确定是无缺陷chiah thang献tī祭坛上(参考利未记一:3、10)。

    第10节,「圣神支配tio̍h我」,chit句话thang参考启示录第一章10节。表示chit-má作者m̄是tī自主ê状态下,却是由圣神支配伊ê性命。

    「天使kā我带到高山ê顶峰上去」,表示作者约翰chit-má是神魂离开身躯,chiah ē-tàng hō͘伊看见「异象」,mā只有chit种状况下,伊chiah ē-tàng tī极高ê山顶上「由上帝hia、tùi天顶降落来ê圣城耶路撒冷」,意思是teh表示一个敬拜上帝ê所在,是神圣ê,mā是用上帝做中心ê国度。因为chit-ê城市有上帝khiā起、同在(参考本章第3节)。

    Tī「高山ê顶峰上」,这mā teh表示人心灵升华到某一个层次ê时,就会经历一般人无法度进入ê境界。

    第11到14节,新ê耶路撒冷城因为是tùi天顶降落来ê,因为án-ne「充满tio̍h上帝ê荣光」。

    「十二」,表示chit-ê新ê耶路撒冷圣城,它带有拣选kah「约」ê意义tī内面。因为雅各teh代表「以色列十二支族」,而雅各kah上帝立有永远ê「约」。因为án-ne tī「十二个门」顶面lóng有写十二支族ê「名」。Chit-ê名表明ê是立约ê记号。「每边各有三个门」,án-ne有四边,tú好是十二个门。

    「十二使徒ê名」,作者用chit种方式主要teh表达一个重要ê信念:旧约并m̄是单独存在ê,却是为tio̍h新约ê来临所准备ê;而新约mā m̄是单独存在,是延续旧约而来ê。因为án-ne,tī第12节说明是以色列十二支族ê名,tī第14节则说明是十二个使徒ê名。Koh讲,作者讲chit「十二使徒」teh代表「十二块基石」,chit-ê基石就是代表上帝ê kiáⁿ耶稣(参考马可福音十二:1—12),mā teh代表基督教会。

    第15到17节,用尺量城墙kah城门,这thang参考以西结书第四十到四十一章。另外mā thang tùi chia看出,chit段经文其实就是启示录第十一章1到2节ê扩大范围。

    「金ê量尺」,圣经作者用「尺」teh丈量一个对象á是事物ê时,mā teh代表「审判」ê意思(参考阿摩司书七:7—9)。

    「城是四方ê」,而且长kah宽共计达「二千四百公里」,这thang想像得出这m̄是一个小城,却是一个极大ê城。Á二千四百公里,tú好就是十二ê倍数。是一种象徵性ê含意,表明无限大,thang容纳所有ê上帝子民tòa入去内面。

    城墙ê「高有六十公尺」,这是十二ê「五」倍。表示非常完整、内外lóng分得非常清楚,bē受tio̍h外力ê攻击。因为有上帝khiā起tī其中。

    第18到21节,chia作者描述新ê耶路撒冷城墙是用「透明像玻璃ê纯金造ê」,表示tùi天顶降落来ê耶路撒冷非常珍贵、纯洁,连一点点á瑕疵mā无。Chit种圣殿chiah会有上帝降临、同在。Koh khah重要ê,tī chit城ê每一个地方,lóng是纯洁无比,却m̄是只有城门而已,连城内ê街路lóng是非常纯洁,lóng是「像玻璃仝款ê透明」,清澈可见。

    第22节,tī新ê耶路撒冷城内「无看见有圣殿」,这就kah旧ê耶路撒冷「有」圣殿成做鲜明ê对比。

    「全能ê上帝kah羊羔就是圣殿」,chit种「圣殿」已经无koh以献祭为主要ê敬拜方式。一个新ê圣殿出现,mā带来新ê敬拜方式,就是用纯洁ê心敬拜(参考约翰福音四:23—24)。

    第23到24节,thang参考以赛亚书第六十章2到3节、19到20节,诗篇第三十六篇9节。

    因为上帝本身就是亮光,羊羔就是城内ê灯。光kah灯,lóng teh表示明亮,同时mā是teh表明性命ê气力。

    第25到26节,圣经作者ài用「光」来teh代表性命、希望。用「乌暗」来表示「死亡」。因为án-ne,chit两节tú好kah前两节相对应。

    城内无「乌夜」,表示chit-ê上帝ê城内,无hō͘人吓(heⁿh)惊、惊惶、担忧,mā无危害性命ê气力存在。Mā因为án-ne,根本就无需要城门来当做「隔离」ê需要。这mā表示tī上帝ê城内,是无彼此之分(参考以弗所书二:14),因为大家lóng仝款尊贵、荣耀,无人会因为性命受tio̍h威胁而惊惶(参考以赛亚书二:2—5)。

    第27节,相对tī hiah-ê名被登录tī「性命册」上ê人,就是hiah-ê tī性命册上无记落来名ê人,in是hō͘排拒tī城外、hông弃sak ê人,chiah-ê人会亲像耶稣所讲ê,只有ē-tàng tī外面咬牙切齿、啼哭(参考马太福音八:12、十三:42、50、廿二:13、廿四:51、廿五:30,路加福音十三:28)。

重新查询 专卷研经 启示录系列
错误回报,请联系comm[@]fhl.net