启示录 17章1节 到 17章18节   背景资料  上一笔  下一笔
第十七到十八章lóng是teh描述有关巴比伦帝国沦陷ê情景。其实chia讲是巴比伦帝国,真正意思是teh指罗马帝国。Thang án-ne了解:kui本启示录siōng主要ê目的,就是beh安抚hiah-ê tú-teh受难中ê基督徒,á是已经因为福音ê缘故而遇tio̍h残酷迫害ê基督徒家庭,beh hō͘ in知影上帝必定会审判hiah-ê迫害者,而且审判ê时间随时就会来临。作者ê主要用意在tī鼓励chiah-ê受难者、安慰in,hō͘ in知影上帝一定会伸手救助in,替in伸冤。

    Tī启示录中共有七pái提起巴比伦帝国ê灭亡:第十四章8节、第十六章17到21节、第十七章5节、第十八章2节、10节、21节、24节等等。虽讲巴比伦帝国是象徵tio̍h罗马帝国ê意思,m̄-koh mā有另外一个意义,就是撒旦、淫乱ê记号。作者同时mā用天顶ê耶路撒冷来譬喻上帝子民ê团契,因为耶路撒冷ná亲像属tī上帝国度度ê城市仝款。

    第1节,「大淫妇」,圣经作者ài用chit种形容词来描述一个犯罪深重ê城市、国家(参考以赛亚书廿三:15b—16)。Chit-ê「大淫妇」指ê是一个城市,而且又koh是「建造tī河流边ê大城」,这是teh指巴比伦帝国,因为巴比伦城就是建造tī幼发拉底河边。用淫乱来譬喻犯罪,意思是teh指对上帝无忠实(参考耶利米书三:9—10,以西结书十六:30—34),特别是teh指自认为是神明á是teh代表神明ê chit种心态(参考以赛亚书十四:12—15),siōng受圣经作者所讨厌。因为án-ne,tī chia指出七位天使中ê「有一个」kā作者约翰讲上帝beh惩罚chit位「大淫妇」,mā就是beh惩罚chit-ê罪恶甚重ê城市—巴比伦,意思就是beh惩罚罗马帝国。M̄-koh真正惩罚到第十八章chiah出现。

    第2节,真正ê问题是tī chit带头者之背后á是身边会有一大阵拥护者,大家共同参与了淫乱ê事。Chit种共同犯罪ê行为,作者tī chia用「地上诸王」kah「世间ê人」chit-ê词来表示真chē共犯。Á所谓「行过淫」、「淫乱ê酒」,意思是teh指chiah-ê依附tī罗马帝国领导下ê附庸国家,kā罗马帝国看做是「神明」一般teh敬拜,chiah-ê国家ê人民mā tòe统治者ê号令起舞。

    第3节,「受圣神支配」,thang参考第一章10节。

    Chia作者约翰讲伊被圣神带到「荒野」ê所在。「荒野」,mā teh表明是人kah上帝siōng亲近ê所在(参考何西阿书二:14)。「朱红色ê兽」,chit-ê兽kah第十一章3节所描述ê红色大戾龙ê长相仝款,lóng是有「七个头kah十个角」。Chit只兽身上是「遍体写满亵渎ê名号」,表示对上帝极尽ê侮辱。「七」kah「十」lóng有含「chē」ê意思,thang表示「chē」到无法度thang数hiah-nih-chē。作者用「遍体写满亵渎ê名号」chit种语句,teh表示罗马帝国时代,崇拜偶像神明ê风气非常兴盛。

    第4节,chit节真详细地描述着chit-ê「大淫妇」ê穿插,除了有「朱红kah紫色ê衫裤」,iáu配戴tio̍h「金饰、宝石,kah珍珠」,这lóng teh显明这是一个富有ê cha-bó͘人,mā同时表示伊藉tio̍h淫乱累积了真chē财富。Chit-ê隐喻tú好说明tī罗马帝国富裕景况下ê社会非常淫乱。Chit-ê cha-bó͘人手中the̍h「金杯」,而杯中却是「贮满伊淫乱thang憎ê秽物」,这说明「金杯」看起来真耀眼,m̄-koh却是装满hō͘人弃sak上帝教示ê「秽物」。

    第5节,chit节讲出罗马帝国teh崇拜偶像神明上非常严重,koh加上因为经济富裕所带来ê淫乱、荒诞行为真chē。所谓「thang憎ê物ê母」,chit句话表示chit种淫乱ê行为m̄-nā会影响tio̍h koh khah chē人,而且iáu会继续流传到下一代。

    第6节,「血」,Tī圣经中teh代表性命ê意思(参考利未记十七:11)。Tùi chit节thang koh khah清楚罗马帝国对迫害基督徒采取ê手段有jōa-ni̍h-á严厉,因为基督徒被刣ê chē,其所流ê血chē到差不多thang当做「酒」一般hō͘人lim到「醉」,这表示因迫害而遇tio̍h刣死ê人数极chē。Chia作者约翰用「大大惊奇」,描述伊tī异象中看tio̍h hit-ê种凄惨ê景象,kah伊本来所期待看tio̍h情景差别非常大。

    第7节,天使beh掀开chit-ê「大淫妇」cha-bó͘人kah伊所骑ê chit只怪兽ê秘密。Chia讲chit-ê cha-bó͘人是骑tī怪兽顶面,而chit-ê怪兽就是teh指tio̍h罗马帝国讲ê。因为án-ne,讲tio̍h cha-bó͘人骑tī怪兽身上,这lóng是kah罗马帝国有关,有可能是teh指tio̍h罗马帝国ê皇帝。

    第8节,chit只兽家己有修复伤痕ê能力,表示chit只怪兽ê能力真强,mā因为有chit种奇特ê能力,就自认为是神,m̄-nā显现出真骄傲ê心,koh khah hō͘大家看了lóng惊奇地认为它就是神而崇拜它。M̄-koh它「bat活过、chit-má无koh活teh」,这表示m̄是永恒,kah第一章4节、8节、第四章8节、第十一章17节等等所描述ê「昔tī-teh、今tī-teh、将来mā永远tī-teh」ê上帝成强烈ê对比。

    Chia讲只有名「无被登记tī性命册上ê」人,chiah会惊奇chit只怪兽ê koh一pái出现。M̄-koh tī性命册上有名ê人,in并无会惊奇,因为in lóng清楚知影为福音受苦难乃是「正常」ê事,不足惊奇。

    第9到11节,因为启示文学siōng典型ê表现方式,就是用「隐喻」ê方式来描述作者时代ê社会现象,á是想beh传达ê信息,因为án-ne,需要有「智慧」ê人chiah ē-tàng明白chiah-ê数字所代表ê到底是怎样一回事。

    Chia提起「七个头」,指ê是chit-ê cha-bó͘人所坐ê「七座山」,是teh代表七个皇帝。「五个已经倒了」,这是teh指罗马帝国已经往生ê五位皇帝,分别是(1)奥古斯都、(2)提庇留、(3)加里古拉、(4)革老丢、(5)尼禄等五位,而hit位尚且iáu teh ê真可能就是teh指tī尼禄了后,kā混乱ê局势稳定落来ê(6)威斯巴先(Vespasian,68~79)。Á续落来威斯巴先了后ê,乃是(7)提多(Titus,79~81),伊在位期间真短,只有短短两年gōa而已。Á第(8)个就是多米田皇帝,伊是启示录作者时代ê罗马统治者,因为án-ne,第11节讲伊「当teh行向灭亡」,chit点chiah是作者约翰所khah强调ê,伊beh hō͘受苦中ê基督徒得tio̍h安慰,知影所有ê苦难lóng会tī真短ê时间内过去,只要忍耐到底,必定得tio̍h拯救kah天顶ê冠冕,án-ne chiah是作者真正希望传达ê信息。

    第8节ê「ná bat活过、chit-má无koh活teh」chit句话,就是beh kah「昔tī-teh、今tī-teh、将来mā永远tī-teh」相对照;人无论怎样强盛,lóng无法度kah永恒ê上帝相比,koh khah无法度取代上帝。因为人是有限ê,无法度永远存在tio̍h。

    第12到14节,「十个角是teh指十个iáu未开始统治ê王」chit句话thang参考但以理书第七章24节。圣经作者常用「角」表示权力、权柄ê意思。作者约翰讲chit-ê「十个角」所象徵ê统治权并无会真久,只有短短ê「一点钟」。作者beh表明一点:只要是对敌基督者(参考第14节),lóng会真紧会灭亡,in生存ê时间lóng真短促。

    Chit-ê「十个角」并m̄是真有权力,却是小角色而已,因为án-ne,in「ài kā家己ê能力权柄交hō͘ ná兽」,表示in只有ē-tàng听从大怪兽ê指挥。

    「羊羔」teh代表基督,因为án-ne,真正ê问题就是chiah-ê拥有世间权力ê人,lóng想beh kah基督对敌。M̄-koh羊羔(基督)kah所有跟tòe ê人lóng kā赢过chiah-ê拥有世间权柄m̄-koh却想对敌基督ê统治者。

    「万主之主,万王之王」,thang参考tī第一章5节所讲ê:耶稣基督就是「作地上诸王统治者」。Chit句「万主之主,万王之王」mā是用来形容创造宇宙万物ê主上帝(参考申命记十:17,诗篇一三六:2—3,但以理书二:47)。

    第15节,chia ê「各民族、各种族、各国家kah讲各种语言ê人」,lóng是tī chit位大淫妇ê统治之下,顺服tio̍h伊。表示伊ê势力真强大,统治ê范围差不多就是「万国万民」chiah-ni̍h chē,mā因为án-ne,chit-ê帝国chiah会kā家己当做是神明仝款,并且逼kah众人lóng tio̍h敬拜伊。

    第16节,chit节mā thang参考以西结书第廿三章28到30节。

    Chia讲出上帝惩罚ê结果,是hō͘ chiah-ê原本都是顺服大淫妇统治ê,会背叛伊。In beh联合起来对抗大淫妇,而且hō͘ in自相残杀。结果是hō͘ chit位大淫妇付出代价,包括「夺行伊所有ê一切」,原因是chiah-ê过去附庸tī伊ê国家lóng背叛,hō͘ chiah-ê原本所有ê,lóng tī忽然之间消失à。Chit句「hō͘伊赤身露体」,表示强暴伊、侮辱伊ê意思。Á「食伊ê肉」,这表达一种极大ê痛恨(参考弥迦书三:2—3)。续落来是「用火烧」,这是古代siōng严厉ê酷刑之一(参考利未记二十:14、廿一:9),尼禄皇帝当时迫害基督徒siōng不时使用ê刑罚之一种,就是用火kā基督徒活活烧死。chit-má变成罗马统治者会受tio̍h仝款ê惩罚,表示迫害人ê,mā会有「报应」临身。整节经文表达一个意思:上帝beh用严厉ê手段惩罚罗马帝国,而且beh hō͘它完全灭亡。

    第17节,tī第13节已经提起过chit「十个王」会「kā家己ê能力权柄交hō͘ hit-ê兽」。Á tī chit节soah讲出全能ê上帝有奇妙ê作为,他用奇妙ê方法,会án-ne kā统治权交hō͘大淫妇,乃是因为上帝ê奇妙旨意,hō͘ chiah-ê小角色ê王会知影联合起来,有「仝款ê目标」交出统治权。M̄-koh chit种动作,mā是为后来联合起来抵抗大淫妇作准备ê,thang hō͘「上帝ê话实现」。这mā teh说明无论chiah-ê暴君jōa-ni̍h-á伟大,上帝只要伸出手,就ē-tàng hō͘ in自认ê伟大变成火灰。

    第18节,「统治地上诸王ê hit-ê大城」,chia ê「大城」是teh指罗马城。如果以今á日来看,则是teh指因权力大而骄傲,并且对敌上帝救恩ê人、团体á是国家。

重新查询 专卷研经 启示录系列
错误回报,请联系comm[@]fhl.net