Tùi chit章开始直到第十八章止，又koh是一个新ê段落，而且是koh一pái出现「七」ê连串异象，ná亲像tī第一pái ê「七」封hō͘「七」间教会ê信（参考一：9—三：22）、「七」个印封tio̍h ê册卷（五：1—八：1），以及「七」个天使吹tio̍h七支号筒（参考八：2—十一：19），chit pái是第三个「七」位天使倾倒「七种灾难」到世界上，chit-ê「七」种灾难teh代表上帝ê极大忿怒。Chit pái ê「七」之循环，mā是最后一pái ê循环。

    第十五章到第十六章，koh一pái出现「七个天使」ê异象。Tī chit两章中，会看tio̍h头前已经有提过ê资料，亲像「天顶ê圣殿」、「水变成血」、「日头」、「乌暗」、「怪兽」等等等chiah-ê奇异现象ê描述。Mā因为án-ne，chiah-ê重述ê资料hō͘读者阅读此经册ê时，bē有siuⁿ chē ê生份感，这mā是作者编撰此经册ê另外一个特点。chit-má chia ê「七个天使」捧tio̍h「七个碗」所启示出来ê，teh表示上帝极大ê愤怒，mā因为án-ne，所带来ê就是极大ê灾难，这mā是chit所在「七个天使」kah头前所形容ê「七个天使」无仝ê所在。

    第1节，chit节是作者所看见「另外一个神秘ê景象」ê序言。Chia讲景象非常无仝款，是「koh大koh奇」。Chit-ê「景象」是teh描述天使teh做ê tāi-chì。「七个天使掌管最后ê七种灾难」，表示每一个天使lóng有各自负责ê职责工作，而且「chiah-ê灾难必定会贯彻」上帝ê忿怒。

    第2节，「玻璃ê海」，tī第四章6节有提起chit种「玻璃海」看起来ná亲像「水晶仝款光洁」ê景象。M̄-koh tī chia则无相仝，chit所在「玻璃ê海」则夹杂tio̍h「火」tī其中。作者约翰讲伊看见得胜者参与歌颂上帝ê行列，强调in手上lóng是「the̍h上帝hō͘ in ê竖琴」，chiah-ê人就是得胜者，in就是得tio̍h平安kah喜乐ê人，因为in已经通过「火」ê考验，赢过ná「兽、兽像」等。

    第3节，「唱上帝奴仆摩西ê歌」，所谓「摩西ê歌」，thang参考出埃及记第十五章1到18节。因为án-ne，有kóa学者认为第2节所提起ê「玻璃ê海，掺杂tio̍h火」，是teh指tio̍h「红海」ê意思，teh表示chiah-ê为tio̍h信仰遇tio̍h迫害ê殉道者，in ná亲像早年以色列民族出埃及ê时chūn，行过「红海」ê时ê景况，ná亲像经过死亡ê威胁，终其尾得tio̍h上帝ê拯救。续落来摩西唱了歌颂上帝ê诗歌。Á「羊羔ê歌」，乃是早期教会以耶稣基督赢过死亡、koh活升天为主要内容（参考使徒行传二：22—36；另外参考使徒信经、尼西亚信经），每pái聚会ê时lóng会用之来歌颂上帝伟大ê救恩。M̄-koh无论是「摩西ê歌」á是「羊羔ê歌」，lóng有一个共同ê主题，就是teh歌颂上帝拯救ê恩典。

    「全能ê上帝」，这是上帝ê特性中siōng重要ê一点（另外两点：上帝乃是无所不在、无所不知ê上帝）。是teh指tī上帝看起来，无做bē到ê事（参考创世记十八：14，约伯记四十二：2，马可福音十：27）。续落来讲上帝ê「作为jōa-ni̍h-á宏伟奇妙」，表示上帝ê作为m̄是用人ê智慧ē-tàng明白透彻。

    「公正真实」ê上帝，这是kui本圣经ê主题之一。上帝ê公正，mā teh表示上帝ê慈爱、怜悯。他怜悯软弱者，m̄-koh对压迫者施行审判kah惩罚。

    第4节，「甚么人敢m̄敬畏」上帝？chit句话thang参考诗篇第八十六篇8到10节，以赛亚书第四十五章22到23节，玛拉基书第一章11节。

    「只有你是神圣ê」上帝，thang参考出埃及记第十五章11节，撒母耳记上第二章2节，诗篇第九十九篇3节，以赛亚书第八章13节。

    第5节，「天顶ê圣殿开了」，thang参考第十一章19节。这是引用摩西带领以色列民族出埃及tī旷野时代ê背景，hit时in建造「圣幕」，tī圣幕ê内面有「约柜」，表示上帝临在其中kah以色列人民对话，kah in同行（参考出埃及记四十：34）。

    第6到7节，chit两节描述「掌管七种灾难ê天使」身上ê特徵，包括有：(a)穿插「光洁ê麻纱衫裤」，(b)胸前系tio̍h「金带」，chit种穿戴ná亲像tī会幕时代大祭司ê穿插仝款（参考出埃及记廿八：4—13）。Chiah-ê天使teh象徵大祭司beh执行上帝ê惩罚命令。

    「四活物ê另外一个」，thang参考第四章6到7节。

    「忿怒ê七个金碗」，chia ê「碗」所用ê希腊文是「phialas」，kah第五章8节所用ê「金炉」mā是用「phialas」chit-ê词。因为án-ne，chia所讲「上帝忿怒ê七个金碗」，就是第五章8节中所提起ê「金炉」仝款，内面贮满tio̍h众信徒ê祈祷，特别是为hiah-ê因福音而受难ê人ê祈祷（另外参考六：10）。

    第8节，天顶ê圣殿充满tio̍h「烟」，chit-ê「烟」表明上帝出现ê一种荣耀方式。Chiah-ê看起来是「烟」，其实也kah云彩仝款（参考出埃及记四十：34，列王记上八：10—11）。Tī旧约圣经中，用chit种方式表明上帝ê荣耀极大，大到人无法度接近。