头前已经有提过，启示录作者teh写作á是编撰上有一个特色，就是出现连续性ê异象，而且chiah-ê连续性ê异象koh分做两个大段落，tùi第一个到第四个异象，续落来是第五到七个异象。Ē-sái讲是每pái第七个异象出现ê时，会koh一pái出现新ê连续性异象，而chit-ê新ê连续性异象mā是kah本来异象景况仝款。续落来，会koh看tio̍h单独ê异象中，mā是分做两组，类似chiah-ê异象lóng tī说明彼此之间有其关连性，mā有其相对性。M̄-koh无论chiah-ê异象中ê怪兽是jōa-ni̍h-á奇形怪状，lóng tī说明一个事实：he是一个真畸形ê世代，人心kah行为，以及显露出来ê心思意念ná亲像chiah-ê怪兽仝款，特别是tī hiah-ê有权势ê统治者身上，tùi in所做种种残害人民ê行为thang印证。

    第十四章记载「羊羔」、三个「天使」ê歌颂声，以及kah-ná人子ê出现。Chiah-ê lóng表示上帝ê拯救teh迫害了后随时来临。作者chit种笔法ê技巧特色，就是kā「善」kah「恶」交叉做伙，mā讲出人类思想中ê chit两股力量，一直存在tī人ê心内。

    Chit段经文读起来就kah前一章差别真大，tī chia看tio̍h ê是充满宁静、圣洁kah喜乐ê景况。Chit-ê喜乐是来自拯救ê羊羔所带来胜利ê结果。

    第1节，「我koh看」，tī第14节koh一pái出现。Chit-ê词也kah第四章1节ê「我得tio̍h另外一个异象，看见」、第六章2节、5节ê「我一看」、第七章9节ê「我一看」等，tī原希腊文lóng仝款ê意思。

    「羊羔」，作者tī chia用「羊羔」teh代表一个胜利ê军事领袖、有权势ê领导者。chit-ê羊羔是「khiā tī锡安山顶」，chia用「锡安山」á是「锡安」表示是属tī上帝ê所在，mā是传达上帝赏赐「安息」ê信息ê所在。Kah羊羔做伙ê有「十四万四千人」，而且chiah-ê人ê额头lóng有写tio̍h「伊kah in老父ê名」，表示有盖印ê记号，mā表示chiah-ê人lóng是分别为圣ê子民。

    第2节，「有声音tùi天顶来」，这是作者约翰siōng ài用ê词句（参考九：13、十：4、十一：15、十二：10、十四：2、13、十八：4、十九：1、5）。作者描述chit-ê来自天顶ê声音，「kah-ná大瀑布ê吼声」，mā像「竖琴师弹奏ê琴声」，chit种形容ê方式tī第一章15节mā bat使用过，而且表明发出chit种声音ê，乃是「人子」发出ê声音真大声却非常悦耳听感动。

    第3节，chit-ê「十四万四千人」lóng khiā tī万物主宰ê上帝面前唱「新歌」。这kah第四章所描述ê天顶景况仝款，lóng是teh歌颂全能ê上帝。「新歌」，表示ê意义ná亲像献「初熟ê果子」hō͘上帝仝款，是siōng新鲜ê，mā是siōng好ê，siōng圣洁ê诗歌。作者进一步强调chit首「新歌」只有chit-ê十四万四千人「会唱」。因为in是hō͘拣选ê子民，kah一般人无仝。

    第4节，「chiah-ê人lóng是无亲近过cha-bó͘人ê童男」，in lóng「是tùi人类中被赎出来」，chit句话Tī圣经中表明ê就是上帝拯救ê对象，属tī「上帝kah羊羔」ê族群。用chit句「无亲近过cha-bó͘人ê童男」，是因为圣经时代，特别tī迦南地ê民间宗教敬拜中，lóng会用「妓女」来参与祭祀ê行为（参考耶利米书五：7—8）。Chit种情景m̄-nā tī旧约时代，tī新约时代ê小亚细亚地区mā特别兴盛。因为án-ne，chia ê「童男」是teh表示chiah-ê信徒tī信仰上lóng是真纯洁ê，对上帝绝对忠实。只要「羊羔行到tó位」，in「就kah到hia」，绝对bē偏离。

    第5节，表达siōng好、siōng圣洁ê方式，就是「从来m̄-bat讲白贼」。chit-ê「从来m̄-bat讲白贼」有另外一个意思就是teh指「心内无诡诈」，诗人讲chit种人是有福气ê人（参考诗篇三十二：2）。先知ê信息中，强调上帝beh拯救ê对象，是chit种「不讲白贼」ê以色列人民（参考西番雅书三：13）。Á「无玷污」，指ê是无瑕疵ê意思。就kah-ná beh献祭hō͘上帝，一定tio̍h用完美、无缺陷ê祭品chiah ē-tàng仝款（参考利未记三：6、四：3、23、28、32）。