启示录 14章6节 到 14章13节   背景资料  上一笔  下一笔
Chit段经文出现三个天使ê异象,这带hō͘ tú-teh受难中ê信徒真大ê安慰,并且清楚指出迫害者ê国度会真紧to̍h倒塌,而弃sak上帝ê人mā会受tio̍h严厉ê审判kah惩罚。相对ê,所有受tio̍h迫害ê信徒会得tio̍h上帝赏赐ê恩典,有份tī天顶喜乐ê行列。

    第6节,「一个天使tī空中teh飞」,chit位会飞ê天使beh向全世界传出「永恒ê福音」,这是teh指tio̍h上帝ê信息。因为「永恒」是属tī上帝,人类lóng是目nih-á有限ê(参考以赛亚书四十:6—8)。作者用chit种方式teh说明:罗马帝国统治者虽然看起来真强猛、有力量,m̄-koh基督徒m̄免惊,hiah-ê lóng是目nih-á ê,真紧to̍h会成做过去,因为伊ê掌权bē是永恒ê。

Á「永恒ê福音」,表示上帝对人类拯救ê疼永远无改变,一直存在tio̍h。而且非常重要ê,chit-ê「福音」是对所有ê人传出ê好消息。作者用「各国家、各部落、各民族,kah讲各种语言ê人」来形容全世界(参考五:9、七:9),mā就是所有ê「四方」ê意思(参考诗篇六十六:8)。

    第7节,这会飞ê天使传出ê信息,讲上帝就是「创造天、地、海,kah一切泉源ê主」,chit句话表明ê意义就是:罗马皇帝并m̄是创造者,伊kah一般人lóng仝款,不过是受造者而已。

    第8节,「第二个天使」mā tòe传出信息,伊连续传出两pái「倒塌了」ê信息。Chia作者用「大巴比伦」隐喻tio̍h罗马帝国必定会「倒塌」。它倒塌ê主要原因,是lim了「淫荡ê烈酒」。「淫荡」一词,Tī圣经通常是用来表明对上帝ê无忠实,四界铸造、雕刻神明崇拜ê行为。Á「烈酒」是teh代表上帝严厉ê惩罚(参考诗篇七十五:8,以赛亚书五十一:17,耶利米书廿五:15—16)。

    第9到11节,这是「第三个天使」传出ê声音。Chia提起上帝kā怎样惩罚chiah-ê lim了「烈酒」ê人。Chit-ê第三位天使传出ê信息指出:任何拜chit-ê怪兽ê人会ná亲像lim了烈酒仝款,受tio̍h上帝严厉ê惩罚。而且上帝ê惩罚m̄-nā bē减轻á是消失,ná亲像无经过「冲淡」ê烈酒仝款。上帝ê惩罚有「焰火kah硫磺ê酷刑」,ná亲像创世记第十九章上帝毁灭所多玛城kah蛾摩拉城ê情景仝款,而且koh khah严重,因为hit-ê惩罚是亲像「永远无停ê烟」一直冒,án-ne chiah是siōng恐怖ê事(参考启示录十九:3、二十:10)。

    第12节,相对tī第9节hiah-ê拜怪兽ê人,就是hiah-ê确实「服从上帝命令、忠于耶稣ê上帝子民」,作者koh一pái呼吁in一定会有「耐心」。意思就是m̄-thang受tio̍h hiah-ê邪恶者ê诱惑,á是因为受tio̍h迫害就想beh逃避而妥协,一定会坚持到最后。

    第13节,「为主来死ê人实在有福气!」chit句话thang参考马太福音第五章11到12节,以及帖撒罗尼迦前书第四章13到14节。Lóng teh表明为福音而受难者,lóng会因上帝ê救恩ē-tàng「结束劳苦而享安息」。Chia ê「劳苦」,指ê是身躯因为工作到无法度歇困,甚至工作到死去。另外一方面,就是teh指tī心灵上tú-tio̍h侮辱而受苦。作者tī chia讲chiah-ê lóng会跟tòe性命ê结束而释放。M̄-koh却因为in ê信仰坚持bē改变,而hō͘ in结出信仰ê果子。Chit-ê果子会「跟tòe in」tī上帝ê救恩里,享受永远ê「安息」。

重新查询 专卷研经 启示录系列
错误回报,请联系comm[@]fhl.net