Tùi第15节开始，这是第七个天使吹响了号筒。因为天使吹响chit-ê号筒，mā同时结束启示录第一部分ê段落。

    Chit-ê段落kah头前第七个印phah开ê时ê景象无相仝。Tī第七个印phah开ê时，天顶是寂静无声长到半小时之久。chit-má吹响第七支号筒ê时，天顶就传出真大ê声音。仝款ê是，tī第七个印开启了后，就koh随时有新ê异象出现，就是七个天使the̍h七支号筒。Tī-chia，第七支号筒吹响了后，也kah头前第七个印仝款，除了听tio̍h大声响歌颂上帝ê伟大外，续落来又koh是连续不断出现新异象。

    M̄-koh第七支号筒所phah开ê景象，并无亲像第14节b句所提起ê「第三种灾难就到à」，kah头前几枝号筒出现过ê景象非常无仝款；头前ê异象是灾难接踵不断而来，m̄-koh tī第七支号筒吹响了后，所呈现ê景象是公开宣告基督成做王，原本坐tī上帝面前ê廿四位长老，chit-má lóng坦覆 (thán-phak）tī上帝面前，同声歌颂上帝ê伟大。

    第15到19节ê chit段经文，是第七个天使吹响号筒后ê情形，内容包含一首o-ló上帝ê诗歌。

    第15节，chit节说明第七支号筒吹响后所出现ê情景，chia讲第七个印phah开了后，随时就看tio̍h新ê异象，就是天顶传出真大ê声音。Chit声音正式宣告「统治宇宙ê大权已经属tī咱ê主kah伊所立ê基督了」，这说明基督掌权ê范围，是包括kui个受造ê宇宙，而且chit pái掌权kā是「世世无穷」，mā就是无有时间限制ê，永无止尽ê。

    第16节，chit-ê「廿四个长老lóng坦覆 (thán-phak）tī土脚」，每pái描写chit廿四位长老tī歌颂o-ló上帝ê时，lóng是坦覆 (thán-phak）tī土脚ê（参考四：10、五：8、14、十九：4）。

    第17到18节，这是一首短诗，teh颂赞上帝ê伟大。

    第17节，「昔tī-teh、今tī-teh ê上帝」，chit句话表示ê意义就是「一直活teh、存在tio̍h ê上帝」。Chia用「昔tī-teh、今tī-teh ê上帝」，kah第一章4节、8节、第四章8节ê「昔tī-teh、今tī-teh、将来mā永远tī-teh」用法无仝；chia并无「将来mā永远tī-teh」，真可能tī启示录作者ê观念中，世界末日已经就beh来到，上帝ê审判teh beh展开，一切lóng会重新开始。所有ê旧秩序lóng会结束，未来是一个全新ê时代，mā是一个新创造ê世代（参考廿一：1—5）。

    「全能ê上帝」，chit句话mā teh说明基督教信仰所见证ê上帝ê特徵之一，上帝乃是全能者（参考创世记十八：14，约伯记四十二：2，马可福音十：27）。启示录作者kúi-nā pái使用「全能ê上帝」chit-ê词（参考一：8、四：8、十五：3、十六：7、十九：6、廿一：22）。作者约翰讲「全能ê上帝」ê时，是用他hit-ê「大权能」ê权柄，统治宇宙万物kah人类世界，而chit-ê「大权能」ê权柄是tī人无法度预知ê情况下出现ê。

    第18节，chit节讲tio̍h上帝ê审判来到ê情景有下列几个现象：
    上帝ê「义怒」，表示是上帝公义ê审判。Mā是审判ê时刻到à，所有ê人，即使是「死」去ê人mā tio̍h「受审判」。

    「你ê奴仆」，是teh指上帝ê奴仆，包括有「先知」（指传达上帝信息者），以及忠实ê「子民」，kah所有「敬畏」上帝ê人，lóng会得tio̍h「奖赏」。Chiah-ê人是不分贫贱富贵ê。

    「毁灭大地ê人会被毁灭」，chiah-ê就是造成人类世界混乱，á是hō͘人khiā起ê环境受tio̍h破坏ê人。

    第19节，「天顶ê圣殿」，这是teh指属tī上帝子民敬拜ê所在（启示录作者一再使用chit-ê名词，参考三：12、七：15、十五：5）。Mā teh表示人ê心灵kah上帝交流ê所在。另外提起「约柜」是khǹg tī圣殿中，这mā teh表明，敬拜上帝，就是teh实践kah上帝所立ê约。M̄-koh敬拜一定tio̍h是用真诚ê心灵。

    Chit节表示审判ê时刻来到，上帝就降临而且坐tī审判ê宝座上，同时有震撼人心、hō͘人惊惶ê「sìh-nà、雷轰、响声、地动，kah大冰雹」等出现，chiah-ê lóng teh表示上帝已经来到审判ê宝座前，beh开始进行他公义ê审判，hō͘所有ê人心生敬畏。