诗篇 95章1节 到 95章11节   背景资料  上一笔  下一笔
Lóng有一个共同ê主题,就是用耶和华上帝为性命ê主、为王、是一切万物ê统治者。Chiah-ê诗篇mā因为chit种主题,lóng用tī圣殿ê敬拜礼仪中大声欢唱。

这是一首呼吁大家同齐用o-ló ê声音歌颂上主ê诗歌。Chit首诗歌通常会用tī季节、庆典ê时吟唱比较khah chē,特别是tī收割结束ê时ê Tòa棚节,全体民众感谢上帝而唱ê诗歌。因为第1到7节ê内容kah第8到11节ê内容差别真大,有人认为这是由两首无仝ê诗歌组合而成ê。

第1到7节,这是部落á是宗族ê长老,带领所有ê族人beh敬拜上帝ê时ê宣召诗歌,呼吁所有ê人lóng tio̍h来歌颂o-ló拯救in ê上帝。Tio̍h用感恩ê心来敬拜他。因为chit位上帝是大有能力ê上帝,他mā是创造一切ê上帝,无论是海洋á是大地,lóng是上帝创造ê。

第4节thang参考诗篇第一三九篇8节,无论是深渊á是上天,lóng会看见上帝,因为他掌管一切。

第6到7节c句是chit首诗ê中心,呼吁民众tio̍h会记得上帝,beh听上帝ê话。第7节koh一pái用上帝是顾羊人,他ê子民就是他ê羊群,表明这二者之间亲密ê关系。圣经一再表示上帝kah以色列人民之间,就是顾羊人kah羊群之间ê特殊关系(参考诗篇廿三:1、七十八:52,以赛亚书十四:30,耶利米书三十一:10,以西结书三十四:15,弥迦书四:8、五:4)。

第7节d句到11节,chit段诗歌比较khah sêng是先知á是祭司á是族长ê劝勉诗句。踏话头就用「Lín chit-má听伊所讲ê话pah」,续落来就是用上帝传出ê信息之模式,叙述以色列民族经历过ê历史做教材。

第8节ê「米利巴」、「玛撒」,有关chit两个地名ê记事记载tī出埃及记第十七章1到7节,以色列人民因为chhōe bē-tio̍h水lim,而埋怨上帝。上帝ài摩西用手中ê拐á phah石磐,结果有泉水tùi石磐中流出来。「玛撒」ê意思是「试探」,用tī chia是teh指怀疑上帝ê意思。「米利巴」ê意思是「斗争」,指以色列人民kah摩西斗争,mā kah上帝teh斗争。

Tī旷野漂流ê「四十年」,以色列人民是一再经历上帝奇妙ê作为,m̄-koh iáu是一再埋怨上帝,甚至iáu有过背叛上帝,铸造金牛崇拜。

第11节thang参考民数记第十四章26到38节。背景是摩西派十二位以色列各支族代表去探视迦南地,结果去ê探á 回报告,其中有十个人一再讲无法度入去,入去一定会死,若无,就是变成奴隶。只有犹大支族ê迦勒,kah以法莲支族ê何希阿(后来改名成做约书亚)表示全力支持进入迦南地。Chit件事hō͘上帝大大伤心。结果决定hō͘年纪满二十岁以上ê人,lóng死tī旷野,无法度进入应允之地迦南。

重新查询 专卷研经 诗篇系列
错误回报,请联系comm[@]fhl.net