这是一首有含chiok厚教导ê诗篇。Mā ē-sái讲是一篇诗人teh做信仰告白ê诗歌。Chit首诗篇有一个特色，就是用「启应」ê方式，因为án-ne，mā是一首tī公众聚会中吟唱ê诗歌，chit点tùi诗歌ê结构thang看出来。亲像：第1到2节，是用「我」，然后第3到8节用「你」；第9节ê a句，原文是用「上主是我ê避难所」，b句是「你以至koân-.ê为居所」，tùi第九节ê b句到第13节，lóng是用「你」。第14到16节lóng是用第三人称来表达。

第1到2节，领唱ê诗人开始吟唱，讲上帝是「我」ê「避难所」、「堡垒」，坚定ê信心讲上帝是「我」ê óa靠。

第3到8节，这是民众回应领唱者所发出ê颂赞诗歌。Tī chit段诗歌中，提起上帝ê慈爱会庇护óa靠他ê人，无论ná亲像「致命ê瘟疫」来袭，á是任何灾害，无论是tī暗夜á是日时，lóng m̄免惊惶。就算有「千人倒毙」á是「万人横尸」tī四周，lóng m̄免惊。因为上帝一定会惩罚作恶ê人。

第9节a句，ná亲像头前所提起ê，是用第一人称ê我，诗人讲「我以上主为避难所」。

第9节b句到13节，只要知影óa靠上帝ê庇护，上帝一定会保护到无微不至。甚至mā会差派天使用手托tòa óa靠上帝者ê脚，诗人甚至讲任何óa靠上帝ê人，lóng会得tio̍h上帝赏赐ê气力，ē-tàng制伏「狮」kah「蛇」，这是两种对人性命威胁非常大ê动物。

第12节bat被魔鬼引用来试探耶稣（参考马太福音四：6），m̄-koh被耶稣责备。

第14到16节，chit段是上帝回应óa靠他ê人。就算tī患难中，上帝mā会kah这óa靠上帝者同在，hō͘ in ê患难变成「荣耀」。