诗篇 84章1节 到 84章12节   背景资料  上一笔  下一笔
这是一首o-ló圣殿siōng好ê诗歌。通常用tī节期到圣殿敬拜ê时,朝圣客siōng喜爱,mā是必唱ê一首诗歌。

第1到4节,Tī chit段诗歌中,诗人表示伊是用全部性命ê气力向上帝歌颂,表示ē-tàng tòa tī上帝ê殿宇中,是性命siōng大ê福气。Chit-ê意思是teh指ē-tàng tī圣殿敬拜、歌颂上帝,是性命中siōng大ê享受。第3节提起「雀鸟á」kah「燕子」,tī圣殿中筑窝,诗人mā想像in仝款。

第5到7节,m̄-nā是ē-tàng进入圣殿敬拜上帝ê人有福气,就连回乡来朝圣ê客旅mā仝款会蒙上帝赐福in所khiā起ê土地,甚至in为tio̍h beh朝圣,行过ê路径lóng会得tio̍h上帝ê赐福。这mā有表示一个重要理念:只要是敬畏上帝,热心敬拜上帝ê人,连伊所khiā起ê土地mā会得tio̍h上帝ê赐福。

第8到9节,chit两节是代祷ê诗歌,特别为君王祈祷。因为好ê君王,会带领人民以诚实ê心敬拜上帝。Án-ne,全国ê人民mā会蒙上帝ê赐福。

第10到11节,chit两节是对照句型,用圣殿比较khah一般住宅。「看门」者是teh指奴仆,kah khiā起tī厝内ê人是主人二者完全无仝ê身分,诗人讲宁可做上帝ê奴仆,mā无愿意当邪恶者厝里ê贵宾。伊深信上帝就是富有ê主,只要óa靠他,甚么lóng有,而且是丰富有chhun,永远bē缺乏。

第12节kah第4节是对应句;前者是信靠上帝ê人「jōa-ni̍h-á有福ah」。后者讲tòa tī上帝殿宇中ê人「jōa-ni̍h-á有福ah」。作者想表达ê是:一个信靠上帝ê人,必定会欢喜到圣殿去敬拜上帝。换句话讲:一个人如果以真实ê心内回应上帝ê慈爱kah拣选,就是如同在圣殿中敬拜上帝仝款,chit种人就是信靠上帝ê人,一定会得tio̍h上帝ê赐福。使徒保罗讲咱ê身躯就是上帝ê殿(参考哥林多前书三:16—17),而耶稣讲,敬拜上帝beh用真诚ê心灵(参考约翰福音四:23—24)。

重新查询 专卷研经 诗篇系列
错误回报,请联系comm[@]fhl.net