诗篇 45章1节 到 45章17节   背景资料  上一笔  下一笔
这是一首庆祝王室亲族结婚ê诗歌。有人认为chit首诗歌大概就是为所罗门王写ê,因为伊娶真chē外族人做妻妾。不过亚哈王mā是娶外族人耶洗碧,约兰王则娶亚伊利雅。后来chit首诗被看做是新郎就是弥赛亚,新娘就是以色列人民,而这是因为以色列人民ài用「夫妻」关系来形容in kah上帝之间ê关系,上帝就是以色列民族ê丈夫,in是上帝ê bó͘。

第1节,chit节是chit首诗歌ê踏话头。

第2到9节是对新郎唱ê,而第10到15节是对新娘唱。其中第2到5节kah第10到12节,是对新婚ê新郎、新娘ê劝勉;第6到9节kah第13到15节是对in ê歌颂。因为án-ne,chit首诗mā是一首对称体ê诗歌。

第2到9节,chia讲述tio̍h歌颂chit位君王ê原因,是因为伊有「威严」、「维护真理正义」、「以公道治国」、「喜爱正义,憎恨邪恶」等,chiah-ê lóng是hō͘一个国家、社会稳定siōng重要ê气力。Ná亲像以赛亚书第九章7节、第十一章4到5节等等所提起ê君王仝款。

第8到9节,chit两节讲述国王加冕ê时会出现ê现象。Á第9节则讲tio̍h有来自各国ê嫔妃聚集tī国王身边,这mā teh暗示着有真chē国家ê国王kā in国家ê佳丽送来当礼物,庆贺chit位国王加冕,á是做王后ê hō͘女。

第10到15节,chit段诗歌是由新娘回应,有可能就是由王后唱出来。Tī chit段诗歌中,有几点是teh劝勉chit位王后ê:

一是王后既然嫁hō͘国王,就一定tio̍h成做这国ê「老母」仝款。bē-tàng kan-taⁿ回想家己ê故乡、亲人,chit-ê国家ê人民chiah是伊ê亲人。

二是王后一定会顺服国王,因为国王是伊ê主人。

三是因为是王后,大家为tio̍h beh讨国王ê欢喜,就会先讨好王后。这会hō͘国王满心欢喜。

四是王后ê súi、贤慧,hō͘ kui个王宫充满欢喜。

第16到17节,chit两节是所有来祝贺ê嘉宾之贺词,表示siōng大ê祝福,就是君王会有真chē kiáⁿ孙,王位ê继承thang永久延续落去,而且王权会继续扩张到koh khah真阔ê区域,永远hō͘人民怀念。

重新查询 专卷研经 诗篇系列
错误回报,请联系comm[@]fhl.net