诗篇 37章1节 到 37章40节   背景资料  上一笔  下一笔
Chit首诗歌mā是一首以字母顺序排列写做ê诗歌。它kah头前ê第25、34 首ê每一节起头用字母开始无仝,chit首是tī每一段落用字母作起头,然后照字母顺序写落来。Án-ne 40节就分做22个段落。Mā因为án-ne,chit首诗ê一个特色,就是每一个段落lóng是一个独立ê诗句,有点á像箴言ê型态。中心主题就是善有善报,恶有恶报。M̄是不报,是时chūn未到。咱tùi第1到2节就thang看出chit首诗ê主要中心题旨。Chit首诗篇mā被列为「智慧文学」ê诗歌,tī诗篇中有kúi-nā篇lóng属tī chit种智慧文学ê作品,除了chit篇外,iáu包括有第一篇、第七十三篇、第九十一篇、第九十二篇、第一一一篇、第一二七篇、第一二八篇,以及第一三三篇等九篇。

第1到2节,chit两节kah箴言第廿四章19到20节ê内容仝款,lóng是teh说明作恶ê兴旺并无值得羡慕。因为in ê兴旺是暂时ê,真紧to̍h会消失。

第3到4节,chit段诗歌有一个真重要ê主题,说明óa靠上帝,chiah是根本之道。Óa靠他ê人,ē-tàng安稳生活,因为上帝就是siōng好ê保护者。Tī第4节讲tio̍h上帝是喜乐ê泉源,因为án-ne,甚么人走chhōe上帝,甚么人就会得tio̍h性命ê喜乐。

第5到7节,chia ê第5节thang参考箴言第十六章3节,当人kā性命交托tī上帝手中,chit种人所期待ê事,lóng会得tio̍h上帝ê帮助。只要有上帝ê帮助,就会看见希望teh thèng候。M̄-koh óa靠上帝,并m̄是马上会看见应允,mā可能teh-thèng候上帝ê回应前,会先看见邪恶ê人ê兴盛,就懊恼起来,而这是无需要ê。

第8到9节,chit两节是相对句型。人往往看见作恶ê人发达,就心内气愤难平,m̄-koh chit种气愤对家己并无益处。因为上帝teh看,mā有家己ê时间表,上帝一定会处理。坚持信靠上帝ê人,就会知影上帝惩罚ê时刻一定会来临,hiah-ê作恶ê人结局会hō͘驱离。

第10到11节mā是相对句型,讲tio̍h邪恶ê人真紧to̍h会消灭,而且是消灭到无踪无影。Á chhōe上帝ê人(就是teh指「谦卑ê人」),一定ē-tàng享受上帝赐福ê喜乐。

第12到17节,chit段诗歌kā义人kah作恶ê人分别出来。邪恶ê人siōng欢喜欺负义人,因为义人tī in目睭前出现,kan-taⁿ会hō͘ in感觉不安、急躁。In mā知影上帝kah义人同在。因为án-ne,in想beh杀害义人、迫害义人,作为对抗上帝ê另外一种方式。

第16节thang对照箴言第十五章16节,说明义人拥有ê财富lóng是正当得tio̍h ê,相对tī邪恶者拥有真chē财富,却lóng是来自非法ê欺骗、偷the̍h、掠夺而来。M̄-koh chit种财富上帝会kā它the̍h走。Ná亲像第17节所提起ê,上帝会kā作恶ê人ê膀臂hō͘ phah断仝款,就算是拥有,mā bē真久。

第18到20节,「敬畏上帝」,这是圣经中真重要ê一则教导。因为上帝是神圣ê,mā是独一ê,是至koân ê。用敬畏ê心敬拜上帝,必定会得tio̍h上帝ê赐福。有上帝赐福ê人,即使tī siōng艰困ê环境中,mā会充满tio̍h性命ê气力。

第20节是chit首诗歌第一个段落ê结语,作恶ê人最后就是hō͘消灭,像烟雾仝款消散,chhōe bē-tio̍h痕迹。

第21到31节,chit段落是chit首诗歌ê第二部分。Chit段描述义人得tio̍h上帝ê看顾chē到不胜枚举。Thang kā第21 kah第26节合并同齐看,就会清楚义人tī生活上,lóng会慷慨好施,帮助困苦ê人。这mā反应出作恶ê人tú好颠倒,m̄-nā bē伸手救助需要帮助ê人,而会想出所有ê办法敛财。

第23到25节提供了真重要ê信仰认知:义人并m̄是bē tú-tio̍h困境,会,m̄-koh这并无表示上帝离开伊。无,上帝就khiā Tī义人ê身边,teh陪伴伊行过这siōng艰困ê性命旅程。

第27到29节,诗人一再提起,义人一定会享受安定ê生活,因为有上帝teh保守、看顾。

第30到31节,chit两节thang用来对照箴言第十章31到32节。义人因为心中有上帝,因为án-ne,伊teh讲话ê时chūn,就会表现出伊所认bat ê上帝。换句话讲,义人会随时随地提起上帝tī伊身上奇妙ê作为。

第32到40节,这是chit首诗歌ê第三段落。Chit段诗歌讲述义人一定会有好ê结果,除了ē-tàng安定生活之外,mā会得tio̍h上帝赏赐ê性命,kiáⁿ孙繁多。

第32到33节,ná亲像头前所提起ê,作恶ê人lóng是想出所有ê办法beh除掉义人,因为义人ê出现,ē-sái作恶ê人容易被发见,甚至是凸显出作恶ê人ê恶行。当做恶ê人想beh除掉义人ê时,上帝真清楚chit种计谋,一定会保护义人免受伤害。

第34到36节,作恶ê人tī兴旺ê时,气势之状,ná亲像黎巴嫩ê香柏树仝款高大,显目,行踏明明是就是「专横霸道」。M̄-koh chiah-ê真紧to̍h会消失。就算兴旺ná亲像黎巴嫩ê香柏树hit种高大壮硕,结果是甚么都无存留落来。因为无上帝ê赐福。

第37到38节,chit两节是相对句型,义人ê kiáⁿ孙会繁延真chē,m̄-koh相对ê是作恶ê人,连kiáⁿ孙mā会hō͘铲除。

第39到40节,chit两节是chit首诗歌ê结语。上帝一定会看顾、守护义人。

重新查询 专卷研经 诗篇系列
错误回报,请联系comm[@]fhl.net