诗篇 27章1节 到 27章14节   背景资料  上一笔  下一笔
有bē少诗篇学者认为这是由两首无仝ê诗歌编撰做伙ê,因为第1到6 节kah第7到14节ê题材kah内容完全无仝。原因是tī第一部分表明诗人ê信心,而第二部分则一首哀歌。M̄-koh mā有诗篇ê学者持无仝看法,认为这原本就是一首诗篇,因为诗人所用ê词字并无差别。

第1到3节,诗歌ê开始,就讲上帝是「亮光」、「拯救」、「保障」,纵然有「大军围困」、「打击」tio̍h,mā m̄免惊惶,因为相信上帝就在身边看顾、保守。

第4到6节,有bē少学者认为tùi第4节就thang看出chit首诗歌是出tī大卫王ê手笔。理由是大卫一心一意想beh盖圣殿,因为上帝无仝意,改由伊kiáⁿ所罗门王建造完成。Chit位诗人讲上帝kā伊安置tī「稳固ê石磐顶」,表示有上帝同在,就是siōng安稳。Án-ne,即使仇敌想出所有ê办法beh攻击伊,伊iáu是m̄惊,因为有上帝同在。伊beh tī圣殿歌颂上帝ê救恩。

第7到14节,头前有提过,这部分真可能是另外一种诗歌ê形式kah内容。诗人teh走chhōe上帝ê帮助kah拯救。诗人teh呼求上帝垂听伊ê祈祷。

第8节,chit节真清楚讲tio̍h上帝对仰望他救恩ê人,lóng会垂听并看顾。因为他是慈悲ê性命之主。

第9到10节,chit节thang kah诗篇第廿二篇1节对照来看,就ē-tàng发见圣经作者一贯ê思想:人若离开上帝,á是hō͘ 上帝所弃sak,性命就变成孤独无助,陷入危险中。因为án-ne,伊祈求上帝纵然伊ê父母弃sak伊,上帝mā tio̍h看顾伊。

第11到14节,chit节是chit段诗歌ê中心思想:只有遵行上帝ê道路,chiah有性命ê ǹg望。人无法度óa靠家己ê能力赢过chit-ê世界,只有óa靠上帝ê带领chiah ē-tàng赢过世间ê各种试探kah诱惑。因为án-ne,诗人发出声音,祈求上帝指示伊人生ê道路。伊认为无论仇敌怎样攻击、恐吓,伊lóng深信只要有上帝同在,一定会看见上帝tī伊性命中siōng美好ê旨意。伊beh坚信上帝,永bē改变。

重新查询 专卷研经 诗篇系列
错误回报,请联系comm[@]fhl.net