诗篇 143章1节 到 143章12节   背景资料  上一笔  下一笔
这是诗篇中七首忏悔诗中ê最后一首忏悔诗(其它六篇是:第六篇、第三十二篇、第三十八篇、第五十一篇、第一○二篇、第一三○篇等)。虽然讲是忏悔诗,m̄-koh,除了第2节「因为tī你面前无无辜ê人」是忏悔诗句外,其余lóng是属tī哀歌ê内容。

第1到2节,诗人一开始用诗篇中不时出现ê祈求句,祈求上帝「垂听」伊ê「呼求」。Ná亲像真chē诗人所歌颂ê,chit位救助性命ê上帝,是一个「信实」、「公义」ê上帝。M̄-koh续落来第2节,是诗篇中比较khah少出现ê句话,就是诗人祈求上帝m̄-thang「审判」伊,因为伊知影无任何一个人tī上帝面前是「无辜」ê人。换句话讲,无一个人ē-tàng自认是「义人」(参考诗篇十四:3a,罗马书三:20,加拉太书二:16),如果上帝chiâⁿ实追究,必定无人ē-tàng khiā立得tòa。

第3到4节,chit两节诗歌thang看出诗人tú-tio̍h ê性命境遇是真凄惨,包括伊被「囚禁」tī乌牢中,性命无koh存任何ǹg望,ē-sái讲是「悲愁」到极点。

第5到6节,诗人Tī顶面所讲chit种环境中,一再回顾过去行过ê日子,知影上帝是伊唯一ê ǹg望,ná亲像干旱teh渴望甘霖ê降临仝款。「举手祈祷」,这是chē种祈祷ê方式之一(参考诗篇廿八:2、七十七:2)。

第7到12节,诗人Tī chit段诗歌中koh khah明确表明,伊需要上帝ê拯救,chiah ē-tàng脱离仇敌beh置伊tī死地ê危险。

Tī第10节,诗人chit句「你是我ê上帝」,kah最后一节最后一句ê「因为我是你ê奴仆」,tú好表明出作者心内ê顺服。这mā是以色列人民表明in kah上帝之间ê关系,就ná亲像chia诗人所讲ê,是主人kah奴仆ê关系。Á奴仆只有听从主人ê命令。Chit位诗人表示伊beh「遵行」上帝ê旨意,án-ne,必定ē-tàng行上「平坦」ê道路。


重新查询 专卷研经 诗篇系列
错误回报,请联系comm[@]fhl.net