这是一首诗人向上帝祈求，帮助伊脱离邪恶者侵犯ê诗歌，是属tī哀歌ê诗篇。Thang用诗人teh呼求上帝ê时，求叫上帝ê名来分段落。

第1到3节，这是第一pái呼求上帝ê名，祈求上帝ê救助。诗人提起诗人ná亲像有含剧毒ê蛇仝款，其毒无比，ná亲像饭匙chhèng嘴中ê牙，其毒之厉足以hō͘人随时毙命。

第4到5节，这是第二pái求叫上帝ê名，祈求上帝救助诗人「脱离邪恶者ê权势」。诗人讲chiah-ê邪恶者ná亲像「狂傲」ê人仝款，in心中根本to̍h无上帝，因为án-ne，设计陷害人ê「kho͘-á套」，认为无人知影，m̄-koh上帝一定清楚知影toh一kóa地方有「陷阱」，祈求上帝带领帮助。

第6到7节，这是第三pái呼求上帝ê名，诗人表明伊对上帝绝对有坚定ê信心，相信上帝一定会拯救伊，ná亲像tī战场上仝款「保护」tio̍h伊免受敌人ê攻击。

第8到11节，这是第四pái呼求上帝ê名。Chit段诗歌是一种祈愿诗，诗人期待上帝ē-tàng随时出手打击chiah-ê邪恶ê人，hō͘ in恶质ê计谋无法度成功，甚至hō͘ in设下ê陷阱害到家己。

第12到13节，这是诗人第五次呼求上帝ê名，伊koh一pái表明对上帝ê认知，表示知影上帝会「维护弱小者ê权益」，mā会为「sàn-chhiah ê人伸张公义」，因为án-ne，只要「正直ê人」lóng会歌颂上帝ê名。